"Le vin de la colère divine" di Kenneth Cook

Ci sò i libri chì si cunnoscenu, i classichi famosi ch'omu finisce sempre per scuntrà è leghje. Ci sò quelli chì l'altri amentanu è chì accatizzanu u focu di l'interessu eppo, ci sò quelli affaccati per incetta. Una impressione, un sguardu incuriusitu è ecculu nant'à u tavulinu di notte. 'Ssa volta, fù u titulu à move mi : "Le vin de la colère divine", o chì titulu ! L'avaria compru solu per avè lu in a mio bibbliuttecca. È, ancu megliu, dopu ch'è no ci fussimu vardati una stonda, l'aghju lettu. Un viaghju, una iniziazione à fiancu à un giovanu americanu ingagiatu vuluntariu in l'infernu di u Viêt-Nam per "salvà u mondu di u cumunismu". A forza maiò di 'ssa storia fundata nant'à tistimunianze di suldati è scritta in piena guerra (in u 1968), hè d'ùn lasciassi mai allaccià da u maniccheismu. Longu u racontu, longu i scontri di u narratore, Kenneth Cook ci prupone una fiura maistrale d'unu di i più grandi lochi cumuni chì sia : "A guerra hè boffa". A face senza cumpiace nè aduprà falze emuzione, cù parolle ghjuste, di quelle à ribumbà assai in capu à u llittore. Trafalata à l'infernu, cerca di redenzione o simplice strada umana ? À voi di sceglie, s'ella vi casca a furtuna di scuntrà 'ssu libru è imbriacavvi à u vinu di l'ira divina...


Kenneth Cook (1927-1987) hè un giurnalistu, realizatore, scenaristu è scrivanu australianu. Natu in Lakemba (Nova Galla meziurnale). Studiò à Fort Street High School. Hà fundatu un partitu puliticu è a prima ferma di farfalle in Australia. Morse d'un attaccu di core.

Opare :

• Wake in Fright, 1961. Trad. Cinq matins de trop, éd. Autrement, 2006.
• The Judas Fish, 1983.
• Vantage to the Gale, 1963 (sous le pseudonyme de Alan Hale).
• Chain of Darkness, 1962.
• Stormalong, 1963.
• Wanted Dead, 1963.
• Bloodhouse, 1963. Trad. À coups redoublés, éd. Autrement, 2008.
• Take this Hammer, 1963.
• Tuna, 1967. Trad. Par-dessus bord, éd. Autrement, 2007.
• The Wine of God's Anger, 1968. Trad. Le vin de la colère divine, éd. Autrement, 2011.
• Eliza Fraser, 1976.
• Play Little Victims, 1978.
• Pig, 1980.
• Killer Koala, 1986. Trad. Le koala tueur et autres histoires du bush, éd. Autrement, 2009.
• Wombat Revenge, 1987. Tard. La vengeance du wombat et autres histoires du bush, éd. Autrement, 2010.
• Frill-necked Frenzy, 1987.

U m'aghju da cumandà quissu u libru.

Iè, hè vera chì u titulu è a prisintazione ch'ellu ne face Tittolu danu a brama di leghjelu...
tè! pè u colpu m'aghju da sciaccà un Clos D'alzetu 2005...
à a salute...

(ci vole à buscacci un smiley :tchin tchin: )

Face un libru di più à aghjustà à a longa lista di i libri ch'eo devu cumprà, mi sò messu tardi à a lettura, aghju u ritardu à richjappà.