Chjama à Sidussinchi

Tutti l'impruvisadori
Induve saranu mossi?
Heccine più amatori
Di i nostri canti corsi?
Mancu in stu paisolu
Ch'elli chjamanu Sidossi?

di parlà in sta manera
cumetti un grande sbagliu
ghjè una simana intera
chì nott'è ghjornu travagliu
ma guarda chì per risponde
caru amicu mai ùn scagliu

A socu chì a risposta
Tù a teni sempre pronta
A musa hè sempre disposta
È spessu di bella impronta
Barda chì quì Sidussinchi
Avà dui si ne conta.

allora s'aghju capitu
a chjama ùn era per mè
scusami s'e sò impulitu
ma ùn la pudia sapè
ma quill'altru sidussincu
spiegami qual'ellu hè

Ùn la vogliu palisà
Chì eiu ùn spalettu à nimu
Quessa ùn la vogliu fà
U fattu saria mischinu
Ma guarda chì Sidussincu
Hè forse un to cuginu

avà mi ramentu bè
cun alegria è cun gioia
d'un certu parente à mè
chì stà per a Casanova
ma seranu mesi è mesi
ch'ell'ùn ghjunghje in casa soia

Avà ai induvinatu
Quale ellu hè u to parente
Hè vera chì s'hà lasciatu
I so lochi è a so ghjente
'Ci chì si piace di più
Annant'à u cuntinente

di manera cusì franca
avà sì chì l'ai detta
u so paese ùn li manca
a cosa hè sicura è certa
inquant'à mè s'hè scurdatu
anch'ellu di a filetta

Ùn ci surtaremu più
S'è tù mi dai a corda
Ma quessa a dici tù
Chì di a filetta si scorda
Eiu saria per pardunalli
Madonna,misericordia

ùn seraghju cusì duru
chì ghjè un parente meu
è di criticà la ghjente
ùn hè micca u mo allevu
s'è tù li pardoni tù
li pardunaraghju anch'eu

L'affare assai prumette
Trà Circione è Caparrittu
Hè un piccatu di stimette
Saria sguasi un dilittu
Ma hè ora di magnà
Allora bon'appidittu

cù a scusa di u ripastu
o amicu ne prufitti
per chjode u nostru cuntrastu
allora staremu zitti
chì mamma hà preparatu
a carne è li pomi fritti

Per vultà à u più prestu
Aghju magnatu à l'asseccu
Vulinteri mi ci prestu
À tene tasta à Francescu
Aspittendu ch'ellu ghjunghi
Intantu m'appinzu un steccu

di carne è di patate
m'aghju magnatu trè piatti
ma cù u to steccu o amicu
dimmi ciò ch'è tù cumbatti
spergu omancu chì per fà què
caru circione ti piatti :affraid:

Cù i stecchi ciò ch'e facciu
A possu fà à palesu
Ma vecu lu mio amicacciu
chì parli à partitu presu
Eppuru d'appinzà stecchi
Da l'avà ùn hè difesu.

s'e parlu à partitu presu
caru amicu mi ne scusu
ma l'affare di u steccu
ghjera appena cunfusu
è dilla in sucetà
ind'è mè ùn micca l'usu

Cù e rime più pumpose
Vulinteri ti rispondu:
Face parte di e cose
Chì per falle ùn mi nascondu
Sappia chì s'appinza stecchi
Dipoi chì u mondu hè mondu

à chì appinza li stecchi
à chì i pali di l'ortu
ma sappia chì sta faccenda
ghjè un bè cum'è un tortu
chì à rombu d'appinzallu
u steccu diventa cortu

Saparè o Caparì *
Chì ùn ai ancu guadantu
Ma ti lasciaraghju dì
Chì mi piace u to cantu
U steccu quand'ellu hè cortu
Eiu mi n'appinzu un antru



*

ch'è tù ti n'appinzi un antru
ùn sò cusì persuasu
stecchi ùn avemu tantu
o caru Circiò fà casu
chi l'altru ch'è tù t'appinzi
ch'ellu ùn sia lu to nasu

Vai chì ùn mancanu micca
I stecchi sempre i trovu
Hè una faccenda antica
U fattu ùn hè micca novu
Ma per appinzà i nasi
Tandu appinzu lu toiu

à appinzà lu mio nasu
ùn sò s'è tù ci ai da ghjunghje
chì aghju previstu tuttu
è m'aghju appinzatu l'unghje
fà pianu o circiunacciu
ch'eu ùn t'avessi da punghje

Oimè chì Caparrittu
Avà e so grinfie caccia
Mi vole appinzà u nasu
Eppo sgrinfiammi a faccia
Ne tremu da a paura
È u mio sangue si ghjaccia

:pale:

in più d'appinzà e grinfie
m'aghju arrutatu a lingua
ùn fà tantu u malignu
chì sappia s'ella ti zinga
l'ai da sente ancu passà
ch'hè peghju ch'una sciringa

:evil: