l'emu digià messu stu vechju scrittu?
U RITORNU DI U CAPITANU
U Capitanu Ghjuvan’Filici era à l’addisperu. Eranu oghje duie simane ch’ellu avia fattu a so pruposta di sugettu è, nimu ùn scrivia nulla. Da crede chì u so ritornu ùn avessi cumossu mancu una cria ‘ssi furisti ingrati è senza mimoria. Cumu sarà ? Ellu chì, cridendu ch’ella possi cambià qualcosa, si n’era andatu à sulcà d’altri oceani, à visità d’altri mondi. Lascendu li asgiu à vultulà si nu i prati fiuriti di e puesie dolce, trapiene à albe nove è à surgente fresche.
Ma, dopu à un esiliu cusì longu, li era vinuta in corpu quella curiosità chì omu ùn pò parà. « Chì sarà turnatu ‘ssu locu senza e mio spine, senza chì u mio estru scemu venghi à stuzzicà u latu neru di l’imaginazione d’ognunu di ‘ssi pritini chì si credenu tocchi da e muse divine ? ». Era vultatu dunque, à passighjà per a furesta di i culi strittiti da l’assenza d’una licenzia cusì nicissaria à u so spannamentu. E, ciò ch’ellu ci scurbia ùn li garbava manc’à pena. Una furesta pulita, pulita. Alburi tamanti, chì parianu circà à caccià ogni traccia di fulena nant’à un celu turchinu è spurgulatu. Un dicoru c’ùn pudia pate u minimu difettu. Ciò chì saria per l’omu niscentre chì crede à un mondu spugliatu di miseria è di buffezza un paradisu, à ellu li si paria l’infernu.
Avia giratu u locu in ogni sensu, pisatu ogni petra, s’era arrappagatu à ogni alburu da buscà qualcosa chì li puderia arrigà a voglia di rende. Si saria ancu cuntintatu d’una piccula paura, da fà li riminà una cria e trippe. Ma nulla. Ci vulia à arrende si, quì ùn c’era più c’à zuccaru è mele. « Iscia ! ». Era a prima parolla ch’ellu cappiava dopu à trè ghjorni di girandulime senza appiccià l’ochji una siconda. È dorme, mancu pinsà la. Era troppu impinseritu da u risicu di sunnià à cose lisce, fiori sbucciati o amori sparti da giuvanotti nucenti è puri.
Circava, cù a spiranza in core di cascà, daretu à qualchì scogliu nant’à u baschicciu di qualchì sia d’ imprudente chì si saria persu in ‘ssa furesta à usu Disney world.
Iè una salma fracica, ma micca troppu. Ne mancaria un pezzu, un bracciu o un anca, pocu importa. Ghjustu da fà nasce u dubitu nant’à a prisenza d’un animale à bastanza salvaticu per magnà si un pocu di carne umana. E mosche l’avarianu digià fattu qualchì rigalu è, i varmi à millaie li darianu l’impressione strana chì a vita era sempre à move ‘ssa parsona. Saria una bella zitella, bionda cum’è un campu di granu maturatu da u sole ardente, vistuta di biancu. U so sangue avaria impiciatu e so robbe è a so faccia ùn palisaria c’à u ricordu trapassatu d’una billezza senza paragone. Ma, quessa era un sognu.
S’era messu à pusà, l’ochji persi nu e so pinsate. O chì tamantu piacè saria, in fine pudè gode d’una cosa boffa è puzzulente. Una puzza di quelle chì nimu ùn puderia suppurtà. Ellu, si n’impieria u pettu cù ingurdizia. Una puzza chì viniria à addibbulisce à pena tutti ‘ssi muschi, unu più dolce c’à l’altru, chì li stuzzicavanu e narre. Da l’amacu chì vulichjava indu l’aria è chì scimia l’ape, à u profume d’ogni fiore sbucciatu, u so ciarbellu bullia. Parianu avè un adore ancu e petre. « Inquant’à mè ùn puzza mancu a merda quì ». Avia cappiatu ‘sse parolle senza mancu pinsà ci, à voce alta. « Perchè parli cusì ? ». U capitanu avia pisatu u capu, soca era a mancanza di sonnu, soca a so ragione l’avia abbandunatu. Di punta à ellu si tinia una giuvanotta bionda, bella cum’è l’albore principiante nant’à una marina chieta chì l’estate accarezza di i raghji dolci d’un sole culor’d’oru…(scusate). Dunque, una zitella chì li parlava. U Capitanu avia cappiata un sonu, una spezia di stritu in lingua cignalina da dì a so suspresa. A vardava è a stava à sente. Quella, li dicia chì ùn ci avia più a so piazza nu ‘ssu mondu rinnuvatu, tranquillu, libaratu di tutte e fiure boffe ch’ellu ci vulia tigne. Ci vulia ch’ellu vultessi nu a so pieve, à pate a sulezza di quelli chì anu vultatu u spinu à a cridenza in un mondu puru fattu d’acelli bianchi è di fureste muscante. È parlava, parlava è parlava torna. E so parolle minavanu U Capitanu cum’è palle d’argentu avarianu feritu u Conte Draccula in parsona. Fiore, acellu, pratu verdicante, furesta chieta, fiume simatu, sole appaciatu…. Era troppu, l’omu lasciava cullà in ellu a bestia ch’ellu avia riisciutu à tene à sin’à avà, bavacciulava è li si paria chì i so denti allungavanu. È, d’un trattu, si lampò nant’à a giuvanotta. Ùn era durata tantu, una sannata è a gola bianca è dolce era ciduta. U sangue zirlava, a vita si n’andava lascendu piazza à l’oddiu scatinatu di U Capitanu. Quellu minava, strappava, stracciava, tumbava.
Avà, vardava a so opara. A giuvanotta ghjacia, viota, morta, boffa cum’ellu ci vulia. U so bellu vistitu era più rossu cà biancu. Ùn puzzava ancu ma da quì à una pochi di ghjorni…
U Capitanu era saziu, à l’accordu di carne fresca, tratechju di sangue è di gattivera. Avà pudia dorme è sunnià. Era di ritornu è e cose avianu da cambià. Finita a billezza fina, a tranquillità sirena di un mondu lisciu, lisciu è senza spine.
« Trimate, trimate voi chì vi site lasciati andà à u lussu di a rima parfetta, di a fiura lucicante. Oghje U Capitanu ripiglia u timone è u nostru battillacciu hà da sulcà torna i mari timpistosi di a creazione senza cunfina ».
Accueil 
