Eccu un'adattazione di "roule galette" scritta da i mo sculari (scola bislingua di Santu Petru di Tenda) qualchi anni fà...
Scappa,scappa a bastella
Ind’un paese di muntagna,un vechjettu stava in...d’una casuccia incù a so moglie.
Un ghjornu, vene a voglia à l’omu di manghjassi una bastella. Dumanda à a moglie di falline una.
-Ma ùn ci hè micca farina, dice a donna !
-Colla in granaghju, spazza u sulaghju , sò sicuru chì ci sò sempre granelli di granu… »
Detta,fatta..Incù i grani trovi, a donna face a farina è incù a farina, una bastella.
Cum’ella era troppu calda, a vechjetta a mette nant’à a finestra per rifridalla.
Ma a bastella s’annoia. Pianu pianu, si lascia cascà ind’u giardinu è si mette à cincinà, cincinà, sempre più luntanu…
Eccu chì trova un cunigliulu.
-Bastella, bastella, t’aghju da manghjà! mughja u cunigliulu.
-Innò dice a bastella, ascolta piuttostu a mo canzona.
È u cunigliulu addirizza e so longhe arrechje.
“Sò a bastella,a bastella,
M’anu messu à rifrità
Mi sò messa à cincinà
Chjappami puru avà !
È si ne scappa cusì in furia… smarisce ind’a furesta.
È cincina, cincina nant'à u chjassu.
Eccu chì trova un lupu grisgiu.
-Bastella, bastella, t’aghju da manghjà !mughja u lupu.
-Innò dice a bastella, ascolta piuttostu a mo canzona.
“Sò a bastella, a bastella,
M’anu mess’à rifrità
Mi sò mess’à cincinà
Chjappammi puru avà !
È si ne scappa cusì in furia, u lupu un pò micca chjappalla.
Corre,corre ind’a furesta, eccu chì scontra un ursachjone.
-Bastella,bastella,t’aghj da manghjà !mughja l’ursachjone.
-Innò dice a bastella, ascolta piuttostu a mo canzona.
“Sò a bastella,a bastella,
M’anu messu à rifrità
Mi sò messa à cincinà
Chjappami puru avà !
È si ne scappa cusì in furia, u lupu un pò micca ritenela. Cincina, cincina, sempre più luntanu….
Eccu chì trova una volpe.
-Bastella,bastella,t’aghju da manghjà! mughja a volpe.
-Innò dice a bastella, ascolta piuttostu a mo canzona:
“Sò a bastella,a bastella,
M’anu messu à rifrità
Mi sò messa à cincinà
Chjappami puru avà !
Ma a volpe maligna li dice : « Coosaaa ? Ùn sentu nunda !!!!Eiu sò vechja, sò sorda, avvicinati appena !!!! »
Allora a bastella s’avvicina ,s’avvicina è ricumencia :
« Sò a bastella,a bastella, m’anu messu à rifrità, mi sò messa à ….. »
Ma OOOOO, a volpe li salta addossu è si la manghja!!!!