Lingua è cultura corsa
 
AccueilAccueil  FAQFAQ  RechercherRechercher  MembresMembres  GroupesGroupes  S'enregistrerS'enregistrer  ConnexionConnexion  

Partagez | 
 

 Centru Pasiphae

Voir le sujet précédent Voir le sujet suivant Aller en bas 
AuteurMessage
Ruclinonu Solechjari

avatar

Messages : 518
Date d'inscription : 27/02/2012
Localisation : Casinca

MessageSujet: Centru Pasiphae   Lun 27 Fév - 17:47

I




Citation :
Settembre 2009. Università di Nastoron. USA.

L’anfiteatru, pocu à pocu si ne era viutatu, è ne eranu escitu i studienti di a prima annata, carchi di sperenze varie è di prughjetti più o meni precisi per u so avvene. L’ambienza era allegra, quasi troppu festiva per un locu cusì austeru. Ma s’e i studienti avianu tutti u spiritu felice, ùn era manc’una seconda perchè averianu pussutu cunsiderà st’anni chì principiavanu per elli cume anni di dilettu. À u cuntrariu, si rallegravanu di u principiu d’una vita attiva duv’elli riescerianu, o almenu pruverianu di fà e so mostre, per duvintà veramente grande personne, indipendente.
Di l’anfiteatru, ne escianu dinù prufessori, sempre allegri di sparghje u so sapè, in u filu dirittu di l’eterna trasmissione fra e generazione umane chì si seguitavanu nant’à u caminu di a miglurazione cuntinua.
Fra elli, in particulare, i dui ultimi à esce di l’onorabile bastimentu eranu occupati à cuntrastà nant’à un sughjettu impurtante. U più vechju era u prufessore Flatz, un omu di quasi sessant’anni, d’andatura mezana, incù una faccia à bastanza dolce è capelli neri neri solu un pocu grisgetti. A so fisiunumia sparghjia un impressione di serenità, puru appinuccia falsa, chì l’omu era, in stu mumentu precisu, tesu è inchietu. Accant’à ellu, u più ghjovannu, u duttore Gressner, longu longu è magru, i spechjetti quadrati sopr’à u so nasu, paria piuttostu aspru.
I dui omi s’assumigliavanu tutti i dui à cio ch’elli sò veramente, à prufessori intellettuali distinti. Puru nimu, o quasi, in l’università, ùn cuniscia veramente a so opera, assai strasurdinaria

Allora chì quasi tutti i studienti si ne eranu partuti, Flatz dumandò à Gressner :
« O Edward, vai à ricuparà i foglii d’evaluazione. »
Quasi trent’anni nanzu, Gressner era statu l’allevu di Flatz, è dapoi, i dui omi eranu duvintati amichi, è sopra tuttu, associi in un prughjettu tamantu, u Prughjettu Avvene. Ma sempre era firmata tra d’elli una rilazione di maestru à elevu.
Pigliendu per sè parechje centinaie di foglii lasciate da i studienti chì venianu di passà l’evaluazione, Gressner dì, mugugnendu :
« Si spera chì sta volta averemu infine à qualchissia chì riesce st’evaluazione sicretta. »
Dopu à essessi assicuratu chì nimu ùn era firmatu, Flatz rispose, malinconiu :
« Si spera, o Edward. Ma in vinti cinque anni, nimu ùn l’hà mai riescitu. Almenu a sperenza face campà. »
Ogni annu, à ogni rientrata universitaria, i dui omi prununciavanu quasi sempre e stesse parole, ma senza mai scuntrà nisun sucessu in a so sperenza, fin’à tandu.
Pò, dopu pigliati tutti i foglii, i dui omi si ne rientrinu in u so uffiziu persunale, per trattà u travagliu di i studienti luntani di l’arechje indiscrete.


Trè ghjorni dopu, trè ghjorni dedicati, per i dui omi, à fighjà attentamente l’inseme di e copie di l’elevi, in i so uffizii, Gressner venì à truvà Flatz, tuttu azzizzatu :
- O Maè, o Maè !
- Cosa o Edward ?
- O Maè, unu l’hà francatu !
Tandu Flatz, calmamente, cacciò i so spechjetti, si pisò di a so careca, è dumandò, incredibile :
- Site sicuru, o Edward ? Ùn site micca fatigatu ?
- Innò o Maè. Dapoi tutti st’anni, avemu infine trovu un studiente chì riesce st’evaluazione.
- Ch’ellu l’ebbi riesciutu, a possu capì, ma quantu punti ?
- Più di 9990 nant’à 10000 ! A prima volta dapoi u principiu !
- Incredibile o Edward ! Ma mi piaceria, per esse veramente sicuri, ch’e no riverifichessimu.
- U pudemu fà, ma eiu, ùn aghju più nisun dubbitu !
- Ùn v’aghju mai vistu cusì allegru, o Edward.
- Hè l’emuzione. Dapoi tant’è tant’anni ch’e no circhemu, è oghje l’avemu trovu ! Qualchissia chì tene e capacità intellettuale eccezziunale bastevule per fà cio ch’ellu ci hè à fà in u Prughjettu Avvene. E capacità intellettuale chì noi stessi ùn avemu mancu !
- Iè. Forse u mumentu hè storicu, o Edward, ma ùn vale a pena di mettessi in un statu tale. Pinsate à u vostre core. Sapete chì a vostra tensione hè troppu forte.
- Mi n’infuttu di u mio core. Ancu s’o morgu avà, mi n’infuttu, chì almenu, seraghju mortu dopu à avè assicuratu a mio missione, dopu à avè trovu à qualchissia per u munumentale Prughjettu Avvene.
- Podasse o Edward, ma pensu ch’ellu seria megliu per tuttu u mondu ch’e vo firmessite in vita. Ditemmi piuttostu cumu si chjama stu prudigiosu studiente.
- In fatti, hè una studienta, una femina, è si chjama Susan Channing.
- Bene. Feremu a so cuniscenza da quì à pocu, pensu. A sò ch’ùn l’avemu mai avutu in corsi, ma a devimu scuntrà. À voi di fà, o Edward. Fatella cunvucà, fate cumu vulete, ma avà, li devimu parlà.
- Serà fattu o Maè.

Tandu u prufessore Flatz si girò versu a finestra, è calmamente dì :
« A sai o Edward, pensu chì si riparlerà di Susan Channing torna qualchi millenarii. »
Revenir en haut Aller en bas
Voir le profil de l'utilisateur http://appuntamentu-corsu.forums-actifs.net
Ruclinonu Solechjari

avatar

Messages : 518
Date d'inscription : 27/02/2012
Localisation : Casinca

MessageSujet: Re: Centru Pasiphae   Lun 27 Fév - 17:47

II




Citation :
U sole si ne era chjinatu nant’à u monte, è Ghjuvanu, firmatu à zappà in una piana vicina di l’anticu paese, s’approntava à rientràssi infine in casa soia. A ghjurnata di travagliu infine s’era compia è Ghjuvanu, quante u so amicu Furcottu, ne era stancu mortu. Stancu mortu d’avè zappatu tutta a ghjurnata sott’à un sole chì paria in focu.
Di fattu, a ghjurnata era stata calda calda, ancu per un ghjornu di ghjungnu, è u labore ne era statu ancu più penevule.

Almenu compiianu tramindui e so ore incù a suddisfazzione di sapè ch’e u grossu travagliu era statu fattu, chì tuttu era statu zappanu, lavuratu. A suddisfazzione di pinsà chì a ghjurnata di u lindumane, ancu s’ella devia esse sempre più calda, seria menu penosa, postu chì ùn avianu previstu ch’e di suminà è d’innacquà.
Per fine, elli devianu dinù andà à vede à Sciroccu, per i so boii, ma almenu l’inchjostru di Sciroccu si trovava in a furesta, sott’à l’arburi, duve u sole era menu gattivu. Cusì a ghjurnata di u lindumane seria menu penosa.

Mentre chì Ghjuvanu è Furcottu eranu occupati à accuncià e zappe è l’altri istrumenti di travaglii da i quali avianu fattu usu tuttu stu ghjornu, si ne vultonu, per a strada, Firnetta, Ghjurlina è Rosasfea chì eranu trè surelle.
Incù una decina d’altri paesani, rivenianu, à pedi, di u mercatu di a Grande Cità duve avianu passatu i dui ghjorni precedente à scambià i so pastizii contr’à altri vitti. Un travagliu più impurtante ch’ellu sembrava chì, per avè a voglia d’andà viaghjà ore nant’à sti camini cusì pocu sicuri, per sti calori infernali, u scopu ùn pudia esse ch’e impurtante.
Ma per u paese, dopu un annu scorsu di gattive raccolte di parechji frutti, l’urgenza era di fà scambii è baratti per sperà diversificà appena l’alimentazione di i paesani.

Subitu vedendu e trè surelle, Furcottu, dopu dettu à Ghjuvanu di chjode a porta di u baraccone, si ne corrì à scontràlle. Salutò brevamente à Firnetta è à Rosasfea, è pò basgiò fogamente à Ghjurlina, a so moglia. Pudicamente, Ghjuvanu calò u capu, fendu nice di fighjà in altrò.
Dopu dettu qualche parole dolce, Furcottu, lascendu a so moglia è e so surelle vultà tranquilamente in paese, ormai vicinu, è si ne rivoltì per finisce d’accuncià u materiale.

Mentre ch’elli finiscianu u so travagliu per a ghjurnata, Ghjuvanu dumandò à u so amicu :
- Anu riescitu à vende assai ?
- Iè. Tuttu. Tutta a manghjusca ch’elle avianu, tutti i pastizzi. Ma ùn anu micca veramente vendutu ch’elle l’anu barattatu contr’à frutti siccati à buzeffa.
- Bona nutizia allora. Preferiscu què, chì di tutte manere, i soldi ùn si manghjanu.
- Ùn si manghjanu, ma facenu campà.
- Forse ai a raghjone o Furcò.

Prununciendu ste qualche parole, Ghjuvanu venia di finisce di chjode u baraccò. A ghjurnata di travagliu era compia da veru – à l’attrachjata cume sempre – è i dui amichi si ne ritornavanu à u paese, chjachjarendu :
- Devenu esse stanchi quante noi, a to sposa, e so surelle, è tutti l’altri.
- Ùn hè micca u stessu gennaru di sforzu ch’e quellu nostru, ma arrese, elli sò da veru.
- Almenu cusì, puderemu manghjà qualchi frutti per stu mese, è forse quellu à vene
- Iè, di sicuru, ma ùn ci ne sò micca tanti chì a staghjone ùn hè ancu compia.
- Per noi quist’annu, i nostri tinti arburi, ùn mi parenu micca di vulè fà tant’affare, per disgrazia.
- Cosa voli fà ? Sò quasi tutti malati, i corcii.
- È ùn avemu nunda per risanàlli…

Caminendu, ghjunghjinu infine in u circondu di l’anticu campanile di u vechju paese, duve era a casa in a quale campa Furcottu, a so moglia, è una grande parte di i so parenti. Tandu Furcottu ripigliò a parola, dicendu :
- O amì. Ti dicu à dumane. Ci ritruveremu versu sett’ore, accant’à a casa di ziu Rulè, cume oghje.
- Sett’ore ? Ùn serà micca troppu tardu ?
- Ùn pensu. Dumane, ne averemu menu à fà ch’e oghje.
- Serà cume un picculu ghjornu di riposu…
- Cume tu dici… chì ghjorni di riposu ùn ne avemu micca tantu.
- Chì vitaccia ! Ai a raghjone.
- Si dice ch’e i nostri antennati campavanu megliu ch’e noi, ma certe volte mi dumandu s’ella ùn hè micca un mitu.
- Ùn sò. Si dicenu tant’affare, chì sò vere o ch’ùn sò vere, chì ùn si sà più nunda di sicuru in stu mondu.
- Chì vitaccia. L’ai detta ! Bon, avà, à dumane da veru o Ghjuvà.
- À dumane o Furcò.

È mentre chì Furcottu si ne rientrava in casa soia, Ghjuvà suspirò :
« Hè vera ch’ella hè una vitaccia, ma tù almenu, si maritatu, è eiu mi ne stò solu. »
Ma prestu rigrettò d’avè pinsatu una cosa simile. Forse chì a miseria era menu difficiule à pate in coppiu, ma esistia per tuttu u mondu, è Furcottu ùn ne era manc’appena pruttettu.
Tutti eranu povari. U paese sanu l’era, è ancu aldilà, chì Ghjuvanu ùn cuniscia nimu chì fussi veramente riccu, o simpliciamente benistante.
« Iè. Tuttu u mondu và male, è u mondu ellu stessu dinù. Ma forse hè u prezzu à pagà per a nostra esistenza. » Pinsò, avvicinendussi di a so casuccia ch’ellu sparte incù fratelli è surelle.

Mentre ch’ellu gira a manechja di a porta di a so casa, ellu pinsò :
« Tuttu và male, di male in peghju, è ùn si sà mancu cosa fà per megliurà a nostra sorte à tutti. »
È, entrendu infine ind’è ellu, si girò, fighjendu a Luna, tondula, è cume in segnu di sfida, li mughjò :
« Ma forse chì tù, cunosci a risposta. »
Revenir en haut Aller en bas
Voir le profil de l'utilisateur http://appuntamentu-corsu.forums-actifs.net
Ruclinonu Solechjari

avatar

Messages : 518
Date d'inscription : 27/02/2012
Localisation : Casinca

MessageSujet: Re: Centru Pasiphae   Lun 27 Fév - 17:48

III




Citation :
Settembre 2009. Università di Nastoron. USA.

L’uffiziu di u prufessore Flatz in l’università, ùn era micca tantu grande. D’altronde, trè altri lochi più spaziosi li dighjà eranu stati pruposti da a Presidenza di l’università, ch’ellu avia sempre riccusati. Micca ch’ellu fussi statu suddesfu di u spaziu cusì ristrintu chì era soiu, ma piuttostu ch’e u s’offiziu prisentava l’incumparabile avantaghju, per u prufessore Flatz, d’esse à bastanza ritiratu di a maghjorità di u gruppu di bastimenti universitariu, assicurendu cusì à u prufessore Flatz tutta a discrezzione ch’ellu bramava per u so travagliu ch’ellu ùn pudia palisà à l’inseme di a cummunità universitaria, ne mancu quella umana, d’una manera generale. Micca chì u prughjettu, u famosu Prughjettu Avvene ùn sia onorabile, ma u prufessore Flatz ùn cuniscia ch’e troppu l’essare umanu, è ùn sapia ch’e troppu ch’e u sicrettu era indispensevule per ch’e u prughjettu campessi senza fiascà.

Era in st’uffiziu ch’e, stu 17 di settembre di u 2009, aspettava a venuta di Susan Channing, u duttore Gressner à u so latu. I dui omi eranu appena narbosi, quante l’averianu pussutu esse s’elli avianu avutu à scuntrà un sapiente di fama mundiale, un novu Albert Einstein. A situazione chì tandu era soia era ancu più cumplicata, ch’elli devianu accoglie una ghjuvanotta nucente ch’ùn era manc’appena cuscente di a so grande valore, è à a quale devianu fà sveli strasurdinarii chì forse a spaventerianu, incù u risicu ch’ella sia persa o ch’ella riccusessi l’opportunità eccezziunale ch’elli vulianu pruponelli.
L’appuntamentu incù a ghjovana studiente li era statu cummunicatu grazie à una lettera chì li era statu mandata à a so camera universitaria, chì mintuvava l’invitu, u ghjornu, l’ora, è u locu, ma dicia pocu nant’à u mutivu di sta cunvocazione cusì strania. I dui sapienti, chì puru sapianu ch’elli ùn pudianu micca piglià u risicu di stampàlla nant’à un fogliu chì averia pussutu cade in una manu straniera, temianu ch’e a ghjuvanetta ùn venessi micca à a so scontra.
Per quessa, l’aspettanza fù o sembrò longa à i dui omi, pusati daretu à u so scagnu, ma, narbosi cume eranu, ùn pudinu mancu cuntrastà tra d’elli, è nisun parola ùn fù prununciata in stu tempu. Fin ch’e infine, quattru colpi ribumbessinu à a porta di a stanza ; quattru colpi secchi à i quali Gressner rispondì un pocu troppu prestu d’entre, svelendu cusì a so ansia, più ch’ellu l’avieria bramatu.

A porte s’aprì nant’à una femina, di quasi vint’anni, a faccia armoniosa in e so prupurzione, ma senza ch’ellu ci sia una bellezza eccezziunale in e so linee. I so ochji, culore nucellula, ben ch’e sprimendu maghjoritariamente l’intarrugazione è a curiosità, eranu pienu d’intelligenza, fidi spechji di l’anima. A so bocca era assai fina è i so capelli, longhi è liscii, castagnini. Di statura mediana, tenia una corpulenza ordinaria, è u so essare di carre, ellu stessu, era propiu ordinariu.
Mancu a so vestura ùn era rimarchevule, è si vedia bè ch’e a ghjovana studiente ùn avia tandu medii finanziarii, almenu ch’ella preferessi fà un usu menu materiale di i so soldi.

Per a studiente in prima annata chì venia d’entre, dopu à avè ricevutu una strania cunvocazione in a so scatula à lettera, eranu davanti à elli dui omi, parendu assai serii, forse pudenti in l’università, chì esaltavanu un impressione d’intelligenza è di pudenza. U primu, u più vechju, s’assumigliava di manera incuscente per ella, à una figura paterna benefattriccia è dolce, ma senza eccessu. U secondu, un pocu più duru di fisionumia, era tuttu l’archetipu di l’intellettuale, severu.
Fù ghjust’à puntu ellu chì pigliò a parola u primu, è chì dopu salutata, verificò a so identità – cosa chì accentuò l’apprensione di a ghjuvanetta – ghjustu nanzu di lascià a parola à u so cullega, chì principiò e prisentazione :
« Bonghjornu à voi, o madamicella, sò eiu u prufessore Edwin Flatz, è accant’à mè, eccu u duttore Edward Gressner, u mio cullaboratore. Mi cunfirmate dunque ch’e site bè Susan Channing. »
Un pocu inchieta, ella rispose :
« Iè o sgiò prufessore. A vi aghju detta. Perchè ? »
Tandu, u prufessore Flatz misse i so spechjetti, è perseguitò :
« Pocu fà, avete fattu, in u quatru di i vostri studii, un evaluazione, piazzata sott’à a nostra iniziativa, chì durò quattru ore, senza nisun pripara, è d’un alta difficultà. »
Susan Channing, sempre di più turbata, rispose esitente :
« Iè… di sicuru chì mi ne ramenta. Un eserciziu à bastanza straniu d’altronde. Ma tuttu u mondu hà sà ch’ellu hè una spezia d’evaluazione di l’intelligenza d’ogni studienti chì s’affaccanu quì. Ùn ci aghju vistu nisun prublemu à signalà, ancu s’e e questione eranu stranie, è chì u tempu chì ci era datu per rispondecci era troppu cortu per riflette à u megliu à una risposta, o sviluppà… »
Tagliendulli a parola, u duttore Gressner annunciò :
« A sapemu. Hè fattu à posta. Ùn hè micca un evaluazione di cuniscenze, ma d’intelligenza. È l’avete vintu. »
Surpresa, Susan sbarragò i so ochji :
« Vintu ? Cumu vintu ? Aghju vintu eiu un evaluazione d’intelligenza ? Cumu aghju vintu ? Cosa vole dì ? Ricevite ogni studienti chì a vincenu, a vostra prova ? »
Flatz iniziò un sunrisu, è rispose :
« Solu quelli chì ottenenu u risultatu massimale. »
« Tutti l’anni ? » Dumandò Susan.
È tandu, Flatz rispose è svelò, infine :
« Innò. U risultatu massimale assolutu. È hè propiu a prima volta, in vinti cinque anni, ch’ella accade ch’e qualchissia u vincessi. È site voi ; felicitazione. »

À l’intesa di sta nutizia, Susan fù cume petrificata, incapace di parlà, tutta stumacata, è ùn ci vulia crede. Gressner li porghjì una carreca ch’ella pigliò per automatisimu è nant’à a quale si pusò, u spiritu sempre tunatu. L’emuzione era forte per ella, è i dui sapienti devinu aspettà qualchi tempi nanzu di perseguità, nanzu chì Flatz ripigliessi a parola :
« Di sicuru, sta nutizia vi pò stumacà, è sò chì pudete avè qualche difficultà per credecci. Puru, vi possu assicurà, a vi possu ancu ghjurà, ch’ùn hè micca una macagna ch’e no vi femu, è chì incù a vista di i vostri risultati à st’evaluazione, site probabilmente a personna a più intelligente ch’ùn aghju mai vista nant’à sta Terra, è chì e vostre putenzialità sò fenumenale. »
« S’e vo a dite. » Rispose Susan Channing, pocu cunvinta.
- Non solu a dicu, ma ne sò sicuru sicuru. E vostre putenzialità sò propiu eccezziunale, à un livellu ch’ùn aghju mai scuntratu in a mio vita. Per quessa, spergu chì mi perdonerete s’o mi permettu di ponevvi qualche questione.
- Fate puru, o sgiò prufessore.
- Mi piacerebbe assai ch’e mi parlessite di voi, di u vostru passatu è di l’avvene ch’e vedite per voi, per piacè. A vostra famiglia, i vostri amichi, i vostri passatempi… tuttu stu gennaru di cose.
- Umbeh… à me mi pare ch’ùn ci sò tante cose à dì. I mio genitori sò morti quandu ùn avia ch’e quattordeci anni, è sò statu obligata d’amparà tuttu in a vita, à fà cio ch’ellu ci hè à fà, à sempre francà ogni difficultà, è à imponemmi scopi sempre più alti. Ùn aghju micca veramente famiglia vicina, è assai di bon ora, sò stata obligata di sbrugliàmmi sola in a vita.
- Hum… Mi dispiace per voi. Ma pensu ch’e avete riescitu à supranà stu scumpientu grazie à i vostri amichi.
- Innò o sgiò prufessore. Amichi ùn ne aghju. Aghju passatu u mio tempu à travaglià, à i mio studii, o per vince qualchi soldi. In st’anni, ùn aghju avutu ne u tempu di fàmmi amichi, ne di truvàmmi passatempi.
- Deve esse à bastanza penosu.
- Ùn hè nunda o sgiò prufessore. Ne aghju pigliatu l’abitutine, è oghje ùn cuncepiiria mancu di campà altrimente. A vita hè una lotta sempiterna per firmà arrittu, è cusì pensu.
- Una filosufia assai aspra, mi pare.
- Iè, ma ùn hè ch’e cusì ch’e si vince.
- Bene… è postu ch’ùn avete amichi, ùn ne avete parlatu à nimu, di a vostra cunvoca ?
- Hè una questione ? Ùn capiscu manc’appena a vostra andatura, ma innò, ùn ne aghju parlatu à nimu.
- Bene… Puru, malgratu ch’ùn vi permettessite nisun passatempu, avete quantunque pigliatu un pocu di u vostru tempu à vene à sta cunvoca senza ligame incù i vostri studii.
- L’aghju fattu perchè mi paria impurtante. Puru s’o vecu ch’ùn hè micca u casu, a vi dicu francu, mi n’anderaghju.
- Iè. Ma vi possu assicurà ch’ella hè impurtante. Impurtantissimu ancu. Pudete stà.
- Spergu solu d’ùn perde micca u mio tempu cun voi.
- Avemu torna qualche questione à ponevvi, o madamicella.
- Postu ch’e ci simu…

Tandu, sentendu ch’e l’atmosfera s’infracicava, u prufessore Flatz lasciò passà una stonda, mentre chì Gressner s’era assentatu in a stanza vicina, è dumandò :
- Cosa pinsate di l’umanità ? Di u so avvene ?
- Cio ch’o ne pensu ? Nunda di particulare. Di tutte manere, cio ch’o ne pensu ùn pò fà nunda per megliurà a so sorte, mi pare.
- Parlate voi di megliurà a so sorte ? Interessante.
- S’e vo a dite. Ben ch’o principiessi da veru à dumandàmmi cosa facciu quì.
- Firmate per piacè. Firmate, è sviluppate.
- Mi dumandate dunque cosa pensu di l’umanità. Hè una questione larga ch’e quessa ! In poche parole, pensu ch’e l’umanu meriteria di campà in pace nantu à a Terra, in armunia incù tuttu cio chì hè vivu, senza falsità, ma mi pare ch’ùn hè manc’appena pussibile.
- È perchè, per voi ?
- Perchè l’omu ùn hè micca à bastanza bonu. Sempre invidiosu, sempre à favurizà u so benestà individuale nanzu di quellu cullettivu, troppu eguistu, troppu avidu. À u cuntrariu, strugge tuttu cio ch’ellu tocca, è tuttu và sempre di più à caternu. A vi possu dì senza sbagliàmmi chì secondu à mè, a spezia umana ùn ne hà più ch’e per un seculu o dui à campà nanzu l’autodestruzzione.
- Interessante.
- A pinsate ?
- Iè. A pensu da veru, chì avemu, tramindui, a stessa visione di a realità. È hè què chì mi piace, malgratu u bughju di a situazione.
- Tantu megliu allora. Ancu s’ùn capiscu micca u perchè di tuttu què.
- Ùn vi ne fate. Tuttu vi serà prestu spiegatu, ma eiu aghju d’altre dumande.
- …
- Iè. D’altre dumande. Mi piaceria di sapè, o madamicella, s’e seriate pronta à agisce per u bè cummunu, per l’Umanità, per a Terra ; travaglià à megliurà tuttu què, incù perspettive vere di riesce ?
- S’ella era pussibile, seria u mio sognu. Ma ùn hè manc’appena pussibile.
- Vi sbagliate, o madamicella. Vi sbagliate.
- Forse mi scusarete di parlàvvi cusì, o sgiò prufessore Flatz, ma per un omu di a vostra sperienza, mi parite bell’ottimistu.
- Hè chì aghju ormai qualche raghjone per què. Tuttu si move, è ogni forza tene a so putenza. Ma s’e a permettite, aghju un ultima questione, è dopu, incù u ritornu di u duttore Gressner, vi spiegheraghju tuttu.
- Sarebbe ora.
- Site assai impacente, ma ùn face nunda. A mio ultima questione seria di sapè s’e vo sapete tene un sicrettu, s’e vo pinsate pudè travaglià à l’appiattu, senza aspettà ricuniscenza di nimu, per u bè cummunu, per appruntà un avvene migliore.
- Eventualmente, s’e l’opportunità si prisentava, di sicuru chì iè, ma, à dìlla francu, e vostre questione mi frastornanu. Cosa aspettate di mè tramindui ? Site una setta o chene ? Chì mi parite di fàmmi u vostru numaru abituale, prima mi cumplimentate, è dopu mi dumandate à cosa seria pronta. Cosa hè a seguita ? U mio numaru di carta bancaria ? Perchè s’o vi possu fà andà più prestu, ùn c’hè soldi nantu. Allora, malgratu a vostra fama di gran prufessore, a vi dicu cusì, chì avete intaressu à dàmmi una bona raghjone di stà, ossinò mi ne vò !
- Per piacè. A sò chì s’o era voi, l’averia forse pinsatu cusì, sopra tuttu chì u Prughjettu Avvene pò sembrà esse una fola, ma per pietà, firmate cun noi, chì avemu bisognu di qualchissia cume voi.
- U Prughjettu Avvene ? Ùn avete trovu ch’e què cume nome ? Avà, mi basta, è mi ne rientru ind’è mè. Ùn aghju persu ch’e troppu tempu. »

In zerga, Susan s’arrizzò di a so carreca, è senza mancu salutà u prufessore Flatz, ella si girò versu a porta…
… ghjustu quandu rivenì u duttore Gressner, portendu parechji cartarii sembrendu pisii. Esitendu, Susan, una volta di più, si pusò nant’à a so carreca, ben decisa di stà un pocu di più, ancu s’ella seria per nunda, per pruvà di capisce a situazione.
Revenir en haut Aller en bas
Voir le profil de l'utilisateur http://appuntamentu-corsu.forums-actifs.net
Ruclinonu Solechjari

avatar

Messages : 518
Date d'inscription : 27/02/2012
Localisation : Casinca

MessageSujet: Re: Centru Pasiphae   Lun 27 Fév - 17:48

IV




Citation :
U ghjornu si discitava nant’à u paese, ma Ghjuvannu è u so amicu Furcottu zappavanu dighjà in l’ortu. Parechji ghjorni eranu scorsi dapoi l’ultima volta ch’elli s’eranu visti, ma nunda ùn era veramente scambiatu.
Puru Ghjuvannu ùn avia mai piantatu di riflette è di pinsà. Di riflette à a logica di u mondu è di pinsà à cio ch’ellu averia pussutu esse in altre circustanze. Assai, dapoi chjucu, s’era sempre intarrugatu nant’à tante questione filosofiche di l’esistenza, sempre bramosu di sapè perchè u mondu era cio ch’ellu era, è ogni tantu, quandu e so interrugazione ùn suscitavanu micca u svagu, li era risposu ch’e e cose eranu cusì perchè era a storia chì l’avia vulsutu, o allora una divinità più suprana, o allora, più simpliciamente, l’omi.
Sempre avia intesu parlà, à mezu voce, d’un età d’oru, parechji seculi, o millenarii nanzu, duve l’omu campava megliu, ma tutti eranu quantunque d’accunsenti per dì ch’e ùn eranu ch’e fole per i zitelli, per scurdàssi di a so malavia. Ghjuvannu ùn ci credia micca tantu, ma era quantunque propiu cunvintu ch’ellu ci era statu qualcosa, per ch’e sta fole sia cusì spartuta in ogni locu ch’ellu cuniscia, è chì forse ci era un palmu di verità in st’affare.
Puru, aldilà di i miti è di e legende d’un altru tempu chì seria statu sfarente, ci era u presente. Un prisente assai miserevule, duve ci vulia battessi è strazià per firmà in vita. Micca ch’ella ci sia a guerra, chì fora di qualche bande di briganti chì qualche volte assaltavanu e case, era a pace, ma piuttostu chì a vita era strettamente ligata à e raccolte è à e cugliere, è chì bastava una timpesta, o una sicchia per arruvinà un paese sanu, pruvuchendu a morte di i più debbuli. Senza mancu parlà di tutte e malatie chì tumbavanu l’omi in pocu tempu. Ùn si pudia negà ch’e a falcina era travagliatriccia.
D’abitutine, Ghjuvannu pruvava di tene per ellu e so riflessione. Ma quessu ghjornu, u so spiritu infrebbatu ùn pudì fà altrimente ch’e di spartelle incù u so amicu Furcottu :
- Poca vita ch’e a nostra o Furcò !
- Chì voli fà ? U travagliu hè duru, ma ci vole à fàllu. Ossinò ùn manghjemu micca.
- Certe volte, mi dumandu s’ella ne vale veramente a pena. A pena di strazià tantu per cusì pocu.
- È cosa ai a fà ? T’ai à lampà ? Rifletti troppu o Ghjuvà.
- Innò ch’ùn riflettu micca troppu. Ùn si riflette mai à bastanza. Solu mi dumandu u perchè di stu mondu. U perchè d’un esistenza di straziera, duve nunda ùn pare movessi.
- Ma cosa dici ? Cosa vai à circà, torna ?
- Quandu u mio missiavu mi cuntava a so ghjuventù, a vita ch’ellu mi cuntava era esattamente a stessa ch’e a nostra. È mi dicia dinù ch’e u so missiavu à ellu – ch’ùn aghju mai cunisciutu – avia avutu dinù a stessa vita.
- È allora ?
- Solu per dìtti chì in cent’anni, e cose ùn sì sò manc’appena mosse. Tuttu hè firmatu stessu dapoi un eternità. Nisun evoluzione.
- È chì ti pò fà ? Hè u nostru destinu, simpliciamente. Cosa voli invità torna ? Cosa vai à circà ? Per u colpu, o amì, ùn ti seguitu micca in i carrughji di a to pinsata.
- Hè solu ch’o mi dicu ch’ùn hè nurmale ch’e, in più di cent’anni, ùn ci sia statu nisun evoluzione, per noi paesani, ne megliurazione impurtante di a nostra sorte. È ùn u trovu micca nurmale.
- Cosa voli ch’o ti dica ? Ùn possu esse ch’e d’accunsentu cun tè, ma mi pare propiu ch’ella hè dapertuttu a stessa situazione. Dapertuttu, i paesi sò povari, è e cità dinù. A sò ch’e certi, certe volte, si dicenu ch’e a vita seria migliore in cità, ma a sola sfarenza tra una cità è un paese, hè solu a dimensione.
- Credi ch’ella seria dapertuttu listessu o Furcò ?
- Di sicuru pensu. Anderaghju ancu più luntanu, chì pensu, à contu megliu ch’e forse hè ancu peghju in altrò. A sò ch’e tu ti dici sempre ch’e in a Grande Cità, si campa megliu, ma eiu, pensu chì nò, à u cuntrariu. Ancu quallà, anu e so difficultà, è mi pare propiu ch’e in tutti i paesi di u mondu, ci sò i prublemi. U Vechju di u Purtò m’avia ancu dettu, qualchi mesi fà, ch’elli c’eranu ancu parechji paesi duve si sterpanu a ghjente, per un pezzu di pane, o un stagnone d’acqua. A miseria hè universale, sai, d’appress’à cio chì si dice.
- Forse o Furcò, forse, ma allora, fin’à duve và, l’universu, per tè ?
- Ai certe questione, tù ?
- S’e tù rifletti bè, viderai ch’e ùn si pò micca campà quì nant’à sta terra senza mai ponessi questione nant’à cio ch’e no simu, è nant’à tuttu cio chì ci ingira. Ùn pudemu micca campà senza sapè nunda. Ùn pudemu micca campà sempre incù e nostre questione.
- Certe volte, o Ghjuvà, sò forse e risposte chì ci impediscenu di campà. »

Ghjuvannu, surpresu da st’ultima replica, s’appruntava dighjà à dumandà qualche spiegazione, quandu s’affacò Sciroccu in u campu duve zappavanu tramindui. L’omu, un buiatteru di quarant’anni, era venutu à posta per imprestàlli – una volta di più – i so boii per aiutàlli in u so travagliu di a terra. Dopu salutatu è parlatu di u travagliu chì li fermavanu à fà tramindui questu ghjornu, Furcottu inoltrò u cuntrastu nant’à Ghjuvannu :
- A sai, o Scirò, chì Ghjuvannu si pone assai questione ?
- Pò… ne averà quante tuttu u mondu. Ùn hè u casu ?
- Innò, chì e sò questione mi parenu assai più stranie.
- Stranie ?
- Iè. Si frasturna di l’origine di u mondu, di perchè simu cusì è micca altramente, è vole campà megliu.
- Ah, campà megliu… cume tuttu u mondu, mi pare.
- Mi stumacate tramindui ! Questione, ùn vi ne punete mai nant’à u perchè è u cumu ?
- Sai, o Ghjuvà. Per ponessi questione, ci vole à avènne u tempu, è tempu, ùn ne avemu ch’e poc’è micca.
- Ùn sò micca d’accunsentu, o Furcò. Manc’appena. Eiu pensu chì tutt’ognunu pò è deve ponessi questione. Ùn hè ch’e cusì chì s’ampara è s’avanza.
- Ah iè ? È à cosa ti ghjoveria, o Ghjuvà, di ponetti questione à e quale ùn ai nisun risposte ?
- Ùn capisci nunda, tù ! Sò sicuru ch’e s’e circhemu bè, risposte, ne truveremu.
- Pensi ? È cumu voli fà, per circà risposte ?
- Ùn sò. Ma sò sicuru ch’e, per ritruvà u nostru passatu, a nostra storia, ci vole à zappà in e memorie.
- Si un bellu scemu, Ghjuvannu. Dighjà chì zappi a terra, voli, in più di què, zappà e memorie ?
- Iè, Furcottu ! Sò sicuru chì e risposte sò quì, è ci serianu ghjuvevule.
- Ma e risposte nant’à cosa, esattamente ?
- E risposte nant’à u nostru passatu persu. Avemu bisognu di cunosce u nostru passatu s’e vulemu appruntà l’avvene.
- Què, sò belle parole, ma ùn ci vecu nisun sensu cuncrettu, custì.
- Allora ti sbaglii o Furcò. »

Tandu a cunversazione si piantò, è solu u silenziu ribumbò, mentre chì i trè omi appiccavanu i boii, iniziendu cusì un travagliu novu per a ghjurnata, è u restu di l’ore chì seguitonu si passonu senza troppu parole altre ch’e usuale.
Ùn fù ch’e incù a partenza di Sciroccu, ricuparendu i so boii, ch’e u sughjettu rivultò quand’ellu stessu pruponì :
« Ma sai, o Ghjuvannu, s’e a storia è u passatu t’intaressanu tantu, pensu chì, à l’occasione, a prossima volta ch’e anderai à fàtti un affaccata in a Grande Cità, aghju intesu ch’ellu ci hè quallà un vechju sapientu chì sà assai assai cose di u nostru passatu di nanzu u scordu. S’ella t’intaressa, ti ne riparleraghju à l’occasione. »
È mentre chì Sciroccu ripartia, accumpagnatu da Furcottu, Ghjuvannu, solu, firmò qualche stonde pensosu, u sguardu persu, è da per ellu, sussurò, tristu :
« Iè. À l’occasione. »
Revenir en haut Aller en bas
Voir le profil de l'utilisateur http://appuntamentu-corsu.forums-actifs.net
Ruclinonu Solechjari

avatar

Messages : 518
Date d'inscription : 27/02/2012
Localisation : Casinca

MessageSujet: Re: Centru Pasiphae   Lun 27 Fév - 17:49

V




Citation :
Settembre 2009. Università di Nastoron. USA.

U duttore Gressner rientrò di novu in l’uffiziu, è Susan decidò d’aspettà torna una cria per andàssi di stu locu duve pensava perde u so tempu. Micca ch’ella sia stata di più cunvinta da a ghjuvitù di a discussione, ma solu ch’ella era curiosa di capì cio chì forse era à capì. Si firmò muta è pusata, mentre chì Gressner, seguitatu da Flatz, spiegava :
- Cume a sapete, a vita umana scambia assai. Durante millenarii, e populazione umane, escendu d’Africa, si sò sparte in u mondu sannu, sempre più luntanu, in ogni rughjone di a pianetta, essendu sempre più numarosi è duvintendu sempre di più pudenti nant’à l’ambiu naturale.
- Sempre di più, a so spansione si feci à u discapitu di a nature è di l’altri essari vivi. Si dice ancu oghje ch’e u mammuttu hè smaritu per colpa di l’omu preistoricu. È puru l’omu ùn era ch’e à u principiu di a so influenza nant’à a so terra.
- Attempu, ellu purtava dipoi sempre in ellu e sumente di a guerra. È cio ch’ùn era prima ch’e a spressione di u stintu di sopravvivenza in un mondu ostile hè duvintatu, à misura ch’e i seculi passavanu è chì l’omu ammaestrava a natura, stu stintu si mutava sempre di più in un stintu di morte à u scontru di l’altr’omi. I seculi passavanu, è l’omu diventava sempre di più pudente, sempre di più oppressore di a terra, senza mai sembrà scambià, megliuràssi.
- Incù i dui ultimi seculi, a populazione umana di u mondu hè crescita cume mai, fendu cusì cresce e minaccie ch’ellu riprisenta nant’à u so mondu. L’antrupisazione di a Terra hè ghjunta à un puntu stremu, è a presenza umana nant’à Terra ùn hà mai avutu un pesu tale, minacciendu più ch’e mai ogni vita nant’à sta pianetta.
- Di l’altri latu, e tensione tra i paesi, e nazione, ùn sò mai state più forte, è a cosa hè ancu più periculosa avà ch’e l’omu dispone d’arme cusì tarribile.
- In poche parole, l’omu ùn hè mai statu più vicinu di a so autodestruzzione, è di quella di tuttu cio chì campa nant’à sta pianetta.

U prufessore Flatz si piantò un mumentu, dopu à st’accertata cusì tarribile, lascendu à Susan un parè affanosu, pò aprì un cartariu ch’e li porghjì Gressner, è ripigliò :
- Tuttu què, a sapemu dighjà dipoi anni, chì fù ufficialmente attatu in a Cunfarenza di Rio in u 1992.
- Ma cio chì si dice menu, chì ùn hè cunisciutu, hè chì più di dece anni nanzu, tutti i Capi di Stati di u mondu i più cuscenti di u tragicu di sta situazione, avianu decisu di mette in ballu un protocollu sicrettu, u Prughjettu Avvene per riflette à una suluzione attempu sucetale è tecnica per assicurà l’avvene di l’umanità è di a pianetta. In sicrettu, fubbinu chjamati i più gran sapienti di u mondu, per travaglià nant’à stu puntu maghjore per u bè cummunu, luntanu di a curiosità di a ghjente, o di a pulitichella internaziunale, per infine pudè sperà ghjunghje à un risultatu efficace.
- Parechji centri di ricerche sò stati creati in u mondu sannu, in rughjoni diserti, per tene sempre u sicrettu, è travaglià megliu à u bè di l’umanità, è malgratu e difficultà di u principiu, chì duronu fin’à u 1985, u travagliu realizatu, sempre in sicrettu, da u Prughjettu Avvene, fù veramente meravigliosu, attempu à u livellu tecnicu, ma dinù sucetale è in altri settori.
- À tal puntu chì simu ghjunti, à un puntu maestru di u Prughjettu Avvene duve devimu tutti, noi altri, scentifichi travagliendu à u so serviziu, sceglie un andatura nova per a so appiicazione.
- Dapoi prima, a situazione mundiale hè sempre di più duvintata più periculosa, è ci pare avvicinàssi sempre di più di l’annientamente finale. Ùn ci hè più ch’e noi, incù u fruttu di u nostru travagliu, à pudè fà qualcosa.

Torna una volta, u prufessore Flatz si piantò, ripigliò u so fiatu, per annuncià :
- U duttore Gressner è eiu stessu, avemu l’onore di travaglià à u nostru livellu, per u Prughjettu Avvene. Troppu cuscenti ch’e devimu fà qualcosa per assicurà a perennità di l’omu è di a Terra, è bramosi di fà per richjappà u male fattu da a nostra nazione americana in u mondu sannu, ella cusì pudente, sopra tuttu per mette a puzza in u mondu.
- Unu di i nostri travaglii, ghjust’à puntu, era di fà passà un evaluazione assai speziale à ogni studiente novu in st’università, per evaluànne l’intelligenza teurica è pràtica, senza parlà di e cuniscenze. St’evaluazione hè passata attempu in trente università in u mondu sanu.
- È, a vi dicemu cusì, per a prima volta in più di vint’anni, dapoi ch’e avemu creatu st’esamine un pocu speziale, avemu una personna chì ottene a nota massimale. È site voi.
- Cosa chì vole dì chì tenite un intelligenza teurica è pratica strasurdinaria, chì suprana a nostra.
- È in poche parole, hè propiu di voi ch’e bisognemu per cunduce u capu di u Prughjettu Avvene. Site voi a persona ch’e circhemu tutti dapoi più di vint’anni.

Per a terza volta, u prufessore Flatz si tacì, lascendu Susan muta, ma quessa volta, senza ripiglià a so spiegazione. I dui omi di scenza aspettavanu una riazzione, per perseguità, ma Susan si ne firmava cume abbaluticata. Sempre cunvinta ch’e u discorsu di i dui omi era falsu, è ch’e u Prughjettu Avvene ùn esistia, qualcosa era cambiata ch’ella ùn pudia precisà.
Per aiutàlla, u prufessore Flatz abbandunò u so tonu di prufessore, è ne pigliò unu, più partenu, ellu chì averia pussutu esse u babbu di a ghjovanna studiente, essende assai vechju per quessa :
« Cio ch’e vi dumandemu, hè a vostra participazione à stu cusì bellu prughjettu, à u più altu livellu. Capimu i vostri dubbiti, ma vi possu accertà ch’ùn simu ne mitomani, ne una setta. Solu ghjenti vulendu assicurà un avvene migliore per tutti è micca solu per qualc’uni. A vostra intelligenza hè tale ch’e site propiu voi ch’e no bramemu per cunducellu. Ùn vi sottumettimu à nisun obligazione d’accunsentu di a nostra pruposta, è vi lachemu u tempu ch’e vulete per piglià a vostra decisione. »
« In più di què, per accertà tuttu cio ch’e v’avemu cuntatu, vi rigalemu di tutti sti cartarii ufficiali. Leghjendulli, spergu chì sarete cunvinta di a veracità di e nostre corcie parole. » Sughjunghjì Gressner.
Susan esitò. Ella porghjì a manu, cume per piglià i cartarii, ma scambiendu d’avisu, dichjarò :
« À u vistu di cio ch’e mi date, sò centinaie di pagine, è ancu puru millaie ch’o averia à leghje quì. È incù i mio studii, ùn aghju micca u tempu. Allora ùn possu micca piglià u risicu di mancà i mio corsi per leghje tuttu què. »
Sentendu st’argumentu, Gressner si scuragì, ma Flatz ebbi un mezu sunrisu. Ellu s’aspettava assai à una risposte simile da una ghjuvanetta spavintata à bastanza, chì per piattà u so disandiu, ponia una questione nant’à un puntu secondariu. Avendu previstu u casu, escì u so portafogliu di u so mantellu, è ne pigliò parechji biglietti di banca, annunciendu :
« Tenite o ghjuvanotta. Eccu quì 10.000 $. I vi rigalu per ch’e leghjessite sti cartarii s’e vulete. Cusì, ancu s’e riccusate a nostra pruposta, ùn perderete micca u vostru tempu à leghje tutti sti ducumenti. Per 10.000 $, pudete propiu mancà qualchi corsi, nò ? Cusì, spergu chì vi cunvincherà di u seriu di tuttu què, è sopra tuttu, vi ferà aderì à u Prughjettu Avvene duve a vostra presenza seria cusì bramata. »
Susan esitò. Una volta di più. 10.000 $ riprisentavanu per ella quasi un annu di travagliu. A manera di fà di u prufessore Flatz li sembrava strania è forse ancu scuretta, ma ùn pudia micca riccusà una pruposta tale. À u peghju, cum’ellu l’avia detta, ella ùn averia nisun prublemu à richjappà qualche ore di corsu. È l’opportunità, s’e tuttu era veru, era strasurdinaria per ella.

Susan accitò, è aiutata da u duttore Gressner, pigliò parechji chilò di cartarii, è partì, u core pienu di sintimi cuntradittorii mentre ch’e i dui sapienti a fighjulavanu da luntanu, sperendu ch’ella fessi a bona scelta.

Susan passò i ghjorni chì seguitonu à leghje più d’un millaie di pagine chì cuncernavanu u famosu Prughjettu Avvene, essendu à ogni filare, sempre di più cunvinta di a realità di l’affare. Infine, una settimana dopu, una settimana mentre a quale ùn seguitò nisun corsu, ella vultò à l’uffiziu di u prufessore Flatz, annunciendu ufficialmente ch’ella accitava a pruposta chì li era fatta di travaglià cun elli per u Prughjettu Avvene.
Revenir en haut Aller en bas
Voir le profil de l'utilisateur http://appuntamentu-corsu.forums-actifs.net
Ruclinonu Solechjari

avatar

Messages : 518
Date d'inscription : 27/02/2012
Localisation : Casinca

MessageSujet: Re: Centru Pasiphae   Lun 27 Fév - 17:49

VI




Citation :
Anni è anni, Ghjuvannu si devia ricurdà di stu ghjornu cusì particulare chì fù veritabilmente u principiu di tuttu u scambiamentu chì devia accade dopu. Di stu ghjornu particulare, duve ellu pigliò a decisione di fà un viaghju fin’à a Grande Cità.
Sta scelta li era venuta in mente per parechje raghjone. Prima di tuttu, u scopu era di cumprà robba, chì dopu à parechje settimane di gattive raccolte, u paese principiava di teme a fame. Certe, fin’à tandu, u paese campava sempre di e so riserve è di e so magre raccolte, ma ùn puderia durà troppu. Più ch’e tuttu temia, in sta fine di settembre, a ghjunta à vene di l’inguernu, troppu spessu feroce in sti rughjoni salvatichi. Stu viaghju fin’à a Grande Cità era ancu più ghjuvevule ch’e e famiglie di u paese tenianu sempre un pocu d’oru firmendu di un tempu forse più anticu duve u paese era più riccu. Quist’oru chì infine salveria i so paesani.
Ghjuvannu era statu sceltu da a so cummunità paesana per andà fin’à a Grande Cità per compie sta missione. Una missione di cunfianza per a quale s’era pruclamatu vulintariu.
Incù quattru mule imprestate da Ghjacu, un mulateru di u paese, ellu sperava raccoltà assai robba secca per ch’e u paese tenessi l’inguernu. Di sicuru, ùn seria ch’e poca robba, cun a quale camperianu sicuramente di fulena è di privazione per qualchi tempi, ma almenu, ùn morerianu micca di fame. À u peghju, rivulteria in a Grande Cità per chere altra robba o aiutu. Tuttu inseme, è incù e corcie raccolte di l’annu, magre, ma micca assente, averianu a pussibilità d’aspettà i ghjorni migliori senza troppu suffrenza. A situazione era pessima, certe, ma micca addisperata.

Puru, u bisognu ùn era l’unica mutivazione di Ghjuvannu. Aldilà di a necessità, ellu pensava sempre di più, andendu in a Grande Cità, à vede qualchi amichi soii stallati quallà, ma dinù per pruvà di cunsultà stu famosu vechju savviu mintuvatu da Sciroccu, chì li puderia parlà di a vita di nanzu u scordu. Di sicuru, Ghjuvannu ùn era troppu cuscente ch’ellu seria forse dilusu da a puvertà di a testimunienza, ma u so core li dicia ch’ellu ùn pudia micca stà senza sapè u cume, u perchè. Ùn avia micca in ellu a forza di campà senza fà nunda per cunosce e so radiche.

Incaricatu di e so mule, tenendu contu di u statu di a strada, l’abbisognerianu dui ghjorni per caminà fin’à a Grande Cità, è dui per u ritornu. Cunsiderendu ch’ellu avia sempre qualche settimane di sicurezza per ellu, ancu in casu di fastidiu, Ghjuvannu avia previstu di firmà trè o quattru ghjorni sopra locu in u casu duve ellu puderia amparà di più nant’à stu vechju saviu chì teneria sempre ind’è ellu libri antichi ch’ellu seria primurosu di leghje.

Accumpagnatu da e brame di tutti i so paesani, ch’ùn dubbitavanu mancu una seconda ch’e u viaghju ùn ebbi altri scopi ch’e d’andà à chere robba, è dinù di dui cultelloni è d’una piola per paràllu d’un assaltu eventuale di i briganti di u caminu, ellu partì, a matina à bon’ora, u core frasturnatu.

Dopu francatu a prima girata di a strada incù e so mule, ellu si ritruvò infine solu incù a so cuscenza in u silenziu di a furesta.


A strada, da u paese à a Grande Cità ùn era più pulita dapoi longu è u caminu si facia per maghjor’parte passendu per cio chì era duvintatu un chjassu di furesta, è per quessa, u viaghju era longu. Si dicia ancu ch’e in i tempi, quandu a strada era sempre bella, u viaghju, ancu à pedi, si pudia fà in qualche ore solu. Ghjuvannu ùn sapia s’ella era vera o micca, ma l’avia intesu dì da l’anziani di u paese. Anziani chì elli stessi l’avianu intesu cuntà.
Per què, per tuttu què, è per assai altre raghjone simile o più cumplesse, Ghjuvannu era bramosu di cunosce megliu a storia, di i seculi passati, è ancu aldilà. Ùn si pudia suddisfà di campà senza sapè nunda di i tempi più andati. Ellu ùn pudia micca.

Caminò à mezu à l’arburi, sempre straziendu per truvà un caminu per e so mule, sempre l’arechja arritta à cuttighjà i boschi, à stà à sente u più minimu stridu d’animale di u circondu, per anticipà à u megliu un assaltu di briganti è di banditi. Chì, ùn a sapia ch’e troppu, eranu omi in a furesta chì avianu abbandunatu i paesi per campà ritirati di u fruttu di e so runfere. Eranu chjamati salvatichi, ben ch’elli sianu sicuramente parenti accarnalati di l’omi di i paesi. Azzuffavanu i viaghjatori per arrubbàlli è troppu spessu tumbàlli.
Si dicia ancu chì quandu eranu custituiti in bande appena numarose, li accadia certe volte d’assaltà e case sole, o ancu i picculi paesi per scuzzàlli. Ma ancu s’e sta perspettiva u facia tremà, ùn avia nisun ricordu ch’ellu sia mai accadutu in u circondu, ancu stende à sente a memoria di l’anziani.
A sola cosa ch’ellu sapia di manera sicura, hè chì un cucinu di a moglia di u so ziu era statu tombu da i briganti, più di trent’anni nanzu, mentre ch’ellu rivenia in u paese dopu passatu qualchi ghjorni in un paese vicinu.
Per quessa, ùn rigrettia mancu una secondu u pesu di i so cultelloni è di a so piola.

Malgratu stu pinseru custante, malgratu a difficultà di u chjassu chì spessu si paria perde tra l’arburi, è malgratu a difficultà di fà caminà e mule, Ghjuvannu era serenu. Passavanu l’ore, è i lochi chì l’ingiravanu firmavanu sempre cusì belli. A furesta paria vulè splode in maestà, è u tempu era firmatu chjaru senza u più minimu nulu di piossa chì averia pussutu incrusciàllu. Chetu è allegru, Ghjuvannu caminava, versu a Grande Cità.

Quallà, ci era dighjà andatu parechji anni nanzu, incù amichi, è tandu ùn era mancu a prima volta. Per quessa, malgratu l’assenza d’una strada chjara, è malgratu ch’ella sia a prima volta ch’ellu ci andessi solu, ùn si facia ninsu pinseri per circà u caminu ghjustu versu u so scopu. Cuniscia tutti i chjassi di u circondu, è ogni fiume ch’ellu averia bisognu di francà per ghjunghjecci.

Passavanu l’ore, in u straziu, è u caldu sott’à l’arburi era assai pattibile per Ghjuvannu. Malgratu ch’ellu spendessi tutta a so energia à assicurà e so mule è à firmà guardincu contr’à u più minimu segnu di presenza di briganti in u so circondu vicinu, e so pinsate eranu tutte girate versu a perspettiva di cunsultà quellu vechju savviu.

Ghjuvannu era sempre statu affascinatu da u sapè dapoi chjucu. In u so paese, malgratu a puvertà è a necessità di lottà per vive, a memoria cummuna è cullettiva era à bastanza ricca. A maghjorità di stu sapè cuncernava a vita cutidiana, ma ci eranu dinù qualche fole o favule. Nunda di veramente instruttivu nant’à u passatu, è a sete di Ghjuvannu firmava instanciata.

Quandu venì a notte, mentre ch’ellu avia viaghjatu più di a meità di u traghjettu, preferì, postu ch’ùn era micca troppu stancu, perseguità u so viaghju, per ghjunghje à u più tostu in a Grande Cità. D’altronde, s’e i risichi eranu grandi di fàssi spuglià da i brigandi, i risichi eranu ancu più grandi s’ellu si piantava per dorme. Postu ch’e e so mule ùn prutestonu micca, fù cusì ch’ellu sceglì di fà.

U lindumane, in mezu di matinata, i so passi l’avianu infine purtatu à u termine di u so viaghju. Duve u chjassu divenia una strada per cunduce, qualche minute dopu, à ella.

A Grande Cità. Infine ci era !
Revenir en haut Aller en bas
Voir le profil de l'utilisateur http://appuntamentu-corsu.forums-actifs.net
Ruclinonu Solechjari

avatar

Messages : 518
Date d'inscription : 27/02/2012
Localisation : Casinca

MessageSujet: Re: Centru Pasiphae   Lun 27 Fév - 17:49

VII




Citation :
Dopu accittatu a pruposta di travagliu chì li era stata fatta, Susan Channing era firmata un pocu abbaluticata da u pesu d’un svelu tamantu. A lettura di e millaie di pagine di documentazione era stata per ella à l’origine di a più grande emuzione di a so vita, è l’avia assicuratu ch’e esistianu centinaie d’omi è di femine in u mondu, travagliendu à stu bellu prughjettu altruista per u bè cummunu, è di l’umanità, è di a pianetta.
Un travaglione tamantu chì avia u drittu, più ch’un altru, d’esiste è di riesce ! Un travaglione chì facia passà prima l’umanità, è micca u prufittu. Un scopu di i più nobile.
Più u tempu passava, è più, in a mente di Susan, crescia una brama di e più alte, di fà, d’agisce. U scopu era l’umanità sana, è a salvezza di u mondu. A so participazione à sta cusì bella missione seria per ella a cuncecrazione insperata di a so vita puru sempre ghjovanna. Mai ùn puderia truvà megliu, è li era dumandatu di piglià u capu operaziunale di stu prughjettu, di dedicàllu a so vita.
Un sonniu per ella !

A so presa di cuscenza crescia sempre di più. Capiscia ch’ella venia d’accità simpliciamente di scambià tutta a so vita. Avia cumplettamente abbandunatu l’Università, senza più nisun impurtanza per ella. Solu l’impremia a so missione per u Prughjettu Avvene.

Qualchi ghjornu dopu à u so accunsentu, Susan fù invitata, da u prufessore Flatz in un Centru di Ricerche in u disertu di l’Arizona. U locu, sicrettu, si cuncipia tale una piccula cità quasi autonoma, è carca di circatori è di sapienti di u mondu sannu, travagliendu cusì à l’appiattu, per u bè di l’umanità, è a salvezza di a pianetta. A scuperta di sta cità ascosa li cacciò i so dubbiti ultimi ch’ella tenia sempre in a so mente nant’à u seriu di l’operazione, è più ch’e mai, li vulia dedicà a so vita.

Subitu subitu, dopu à avè fattu a cuniscenza di a ghjente, fù introdutta da Flatz, in u Centru Operaziunale di u Centru di Ricerche. Culà, à u capu di tuttu, ella ebbi a pussibilità di cunosce ogni duminiu d’attività di u Prughjettu Avvene in u mondu. Firmò in i so primi tempi maravigliata da l’avanzate iniziate da u Prughjettu, per a megliurazione di a sorte di l’umanu, per a prutezzione di u circondu naturale, in ogni direzzione pussibile. Tuttu era pinsatu, è tuttu era pruvatu.

À ella incombia l’alta direzzione d’ogni prughjettu, missione chì cunsistia, micca à cunosce ogni ditaglii d’ogni operazione, ogni prughjettu, ma d’assicurà a cuurdinazione generale per u megliustà, è un ottimisazione di l’avanzate. U rollu di sceffu d’orchestra. Ùn li era mancu dumandatu di participà à un prughjettu particulare, è forse ùn averii micca avutu e cuniscenze tecniche bastevule, ma simpliciamente di capitanà, di fà chì tuttu ghjuvessi à qualcosa, è nunda ùn sia fattu in vanu.

Dopu à i primi ghjorni, dopu à a so stallazione difinitiva sopra locu, a so timidità si svania per lascià a piazza à una vulintà di farru di fà viaghjà l’organisazione scentifica a più sicretta, è attempu a più avanzata di u mondu. Più andava è più u prufessore Flatz, da vicinu o da luntanu, si rallegrava di a ghjustezza di a so scelta.
I mesi passavanu, è Susan – sopra locu, o in un altru di i centri di ricerche di u mondu – senza mai piantà, senza mai arripusàssi, cumandava incù a so intelligenza altissima l’andatura di u Prughjettu Avvene à tal puntu chì era duvintatu a so vita propia.


Qualchi mesi dopu, Susan ricevì a visita di u prufessore Flatz in u Centru Operaziunale, per un occasione speziale. U prufessore, à bastanza affabile, questu ghjornu, iniziò u cuntrastu :
- Madamicella Channing, cume sempre, a mio gioia hè tamanta davanti à tanti belli risultati ch’e avete figliulatu.
- Ùn c’hè bisognu di ringraziàmmi o sgiò prufessore. U facciu per u bè di l’umanità. Ùn facciu ch’e u mio duvere.
- Cun permessu, insistu. I vostri meriti sò tamanti, è grazie à voi, u travagliu hà avanzatu più ch’o l’avia bramatu prima.
- Ùn sò ch’e poche cose puru.
- Da quì à una settimana, sera un annu ch’e avete pigliatu u capu di u Prughjettu Avvene. U mio scopu iniziale era di fà un bilancciu di a vostra azzione, cio chì và o cio ch’ùn và. Puru, à dìlla franca, ùn vecu nunda ch’ùn andessi. Ùn c’hè ch’e pusitivu, madamicella Channing. Tuttu pusitivu.
- Tantu megliu allora. Ma ùn facciu ch’e u mio duvere. Solu u mio duvere.
- A vostra mudestia mi stumaca, à u vistu di u travagliu strasurdinariu cumpiitu in cusì pocu tempu. Tandu mi pare venuta l’ora, postu ch’e riccusate e mio lode, di chere u vostru parè nant’à tuttu cio ch’hè avete scupertu à u principiu di u vostru travagliu fra noi.
- Hum… Aldilà di a mio surpresa di vede ch’e tuttu era veru, sò veramente stata chjuzzica davanti à a scuperta di a vostra bibbiutecca mundiale, infurmatica, chì cuntene ogni opera in u mondu, non solu scentifica, ma dinù litteraria, in ogni dumaniu… è di sapè ch’e tutta l’umanità tenia in i vostri dischi infurmatichi…
- Hè puru un vechju prughjettu ch’e quessu.
- Certe, ma in più di què, cosa chì m’hà assicuratu un emuzione ancu più forte, hè a vostra maestria tamanta in scenza genetica, a vostra bibbiutecca di genomi di a biusfera sanna, è u fattu ch’e siamu capace, incù a nostra tecnica, di pudè creà cio ch’e no vulemu, animalu o vegetalu ! Cusì, si pò salvà ogni razza nant’à sta terra, senza più nisun prublemu ! È sì ne pò ancu creà nove spezie, o rifà campà animali smariti !
- U caminu fù longu per ghjunghjecci, ma ci simu oghje ghjunti.
- È dicu què, senza parlà di tutte e tecniche d’energia pulita è pudente, è di tuttu cio chì cuncerna a dippuluzione. Un travagliu meravigliosu !
- Fubbinu anni è anni di travagliu, ma oghje, grazie à a vostra azzione cuurdinatriccia, simu vicini più ch’e mai di u nostru scopu.
- A salvezza di l’umanità è di a pianetta ?
- Iè… o piuttostu innò. Ma in fatti, micca dighjà. Un scopu pruvisoriu, deveriu dì.
- Ùn capiscu, o sgiò prufessore. Di cosa vulete parlà ?
- Vogliu parlà di a nostra stallazione nova chì prestu s’hà da fà. Aghju vulsutu avè a primura d’amparàvvilla.
- Una stallazione nova ?
- Iè. Cume a sapete, u nostru scopu hè, l’avete dettu megliu ch’e mè, a salvezza di l’umanità è di a pianetta. Puru, u prublemu hè chì l’omu hè naturalmente giratu versu a corruzzione, è e so brame di putere persunale. Per quessa, nanzu di mette tuttu què in applicazione, ci vurria scambià prima l’omu, è quessa cosa hè sempre impussibile per oghje. Per quessa, s’hè riflettutu assai, è pensemu ch’e devimu viaghjà nant’à una via sfarente per sperà un scambiamentu sucetale prufondu, di natura à sperà ghjunghje à u nostru scopu ultimu. Devimu dunque cuncipì un altru mudellu umanu. U nostru.
- Ùn sò micca sicura di capisce bè, o sgiò prufessore.
- Cio ch’o vi vogliu dì, hè chì prestu, in un unità nova di u Prughjettu Avvene, unità chjamata à duvintà l’unità centrale di stu prughjettu, a nostra opera si perseguiterà quante quì, nant’à una terra vergine, per stabilisce attempu una nova manera di campà in armunia, per u rispettu di tuttu cio chì campa, di u patrimoniu umanu, animalu, vegetale, materiale è immateriale. Un unità nova nova da a quale a custruzzione hè dighjà principiata.
- M’interessate assai, o sgiò prufessore. È cum’ella s’hà da passà ?
- St’unità nova si trova nant’à a Luna. Iè ! M’avete intesu curettamente. Nant’à a Luna. A Luna nant’à a quale avemu dighjà principiatu di stallàssi, in gran sicrettu, grazie à tutte e scuperte tecniche fatte da u Prughjettu Avvene. Una terra vergine per pudè sperà una partenza nova per l’umanità, per sperà salvà a Terra è caccià u stintu gattivu di l’omu, incù un novu mudellu di sucetà. Cosa ne pinsate ?
- U più chì mi surprende hè ch’ùn sò mancu più surpresa da st’annunciu. Mi n’averiate parlatu qualchi mesi fà ch’o seria stata incredula davanti à sta nutizia. Oghje cuscenta di a nostra putenza strasurdinaria, a perspettiva d’una stallazione seria nant’à a Luna mi pare quasi nurmale. È mi dite ch’e diventeria l’unità centrale di u Prughjettu Avvene ?
- Di sicuru. È da quallà, s’e vulete, puderete cuntinuà à direge, cun medii sempre più elaburati, stu bellu prughjettu chì tenite cusì caru. Ùn vi face micca paura st’eventualità ?
- Mancu una stonda o sgiò prufessore. Seria ancu un piacè per mè ch’e d’andà fin’à a Luna per cuntinuà sempre più luntanu in a nostra via, in st’unità nova. D’altronde, cumu si chjama ?
- L’avemu chjamatu Centru Pasiphae.
Revenir en haut Aller en bas
Voir le profil de l'utilisateur http://appuntamentu-corsu.forums-actifs.net
Ruclinonu Solechjari

avatar

Messages : 518
Date d'inscription : 27/02/2012
Localisation : Casinca

MessageSujet: Re: Centru Pasiphae   Lun 27 Fév - 17:50

VIII




Citation :
A Grande Cità, custruita à fiancu di muntagna era per Ghjuvannu cume u centru di u mondi civilisatu. Aldilà, si dicia chì ci eranu altre cità, altri lochi, certi ancu più grandi o più civilisati, ma a Grande Cità, cum’elli a chjamavanu tutti, era a sola ch’ellu cuniscia.

A Grande Cità, quante i paesi è paesoli di u circondu, era stata custruita in i tempi di nanzu u scordu. À u so capu, ci regnava un Principe elettu per a vita da tutti i citatini di a Grande Cità, ma chì avia dinù un putere simbolicu nant’à tutti i paesi di u rughjone, chjamatu u Reame di l’Acqua. Ancu senza cunosce cun precisione e limite di stu rughjone, Ghjuvannu era sicuru chì u so paese era nentru.

Si dicia assai ch’e aldilà, eranu altri lochi, più belli o più goffi, in a diversità di u mondu, ma ùn si ne sapia nunda, quante ùn si sapia nunda di u so passatu, di l’origine di i paesi, di e cità, di i reami, è di cio ch’e tutti chjamavanu l’epica di u scordu. È s’e a maghjor’parte di a ghjente si ne primurava pocu, pruvendu à campà prima di tuttu, fora di Ghjuvannu.
Più ch’e a fame o u fretu, l’ignurantaghjine u feriscia.

A Grande Cità s’assumigliava assai à u so paese, ma in assai più grande. E case eranu listesse, ancu s’e certe parianu più alte, è i carrughji, più numarosi, li sembravanu un pocu più puliti ch’e in paese soiu. Eranu i valetti di u Principe chì eranu incaricati di a pulizia di e strette, è ci passavanu e so ghjurnate. In cumpensazione, eranu pagati, è cusì campavanu senza travaglià a terra. Di a stessa manera eranu altri mistieri in a cità, sott’à l’ordine di u Principe.
A Grande Cità era ricca. Assai più ricca ch’e u so paese. Assai più sicura dinù, per via di a guardia, sempre pronta à diffendella contr’à un assaltu di briganti di a furesta, chì cusì longu ch’e a memoria umana è tradiziunale andava, ùn era mai accadutu.
Puru s’e sta cità era cusì ricca, a ghjente chì ci campava, malgratu a so sicurezza, ùn era più ricca ch’e in altrò. Certe, ci eranu quelli chì avianu di più ch’e l’altri, ma di manera generale, ùn era ne megliu ne peghju ch’e in u so paese, o in l’altri paesi, simili à u soiu, ch’ellu cuniscia dinù. Solu più grande è un pocu megliu organisatu.

Tuttu què, Ghjuvannu a sapia dighjà dapoi longu, è pocu l’impremia ormai. Pocu l’impremia dinù a so « missione », a raghjone iniziale di u so viaghju, chì era quantunque di cumprà robba per u so paese è per i soii. A cosa ùn era micca un prublemu per ellu, chì u Gran Marcatu era sempre apertu in a cità, è ch’ellu ùn averia nisun difficultà per chere manghjusca. E so pinsate, mentre ch’ellu girandulava in i carrughji pupulati di a cità, eranu tutte girate versu cio ch’ellu ùn sapia ancu, versu a storia, u passatu persu, di nanzu cio ch’e a ghjente chjamava u scordu, senza mai o quasi mai circà à capisce u perchè, à zappà più prufondu in e so origine, ùn fussi ch’e per custruisce un avvene migliore.

Caminendu per furtuna, u so core si rallegrò quand’ellu sculunò, à qualchi passi d’ellu, un amicacciu soiu, guardiu in a cità. Subitu u vuciò, è a cunversazione principiò :
- Mi o Ghjuvannu !
- O Nandriu ! Và bè ?
- Iè. Cume sempre. Si mantene, è ci vole. È tù allora ? Cosa si venutu à fà quì per sti lochi ?
- Disgraziamente sò quì per necessità, si puderia dì.
- Iè ? È perchè ?
- Sò venutu à cumprà qualcosa à manghjà per u paese, in previsione di l’inguernu.
- Piombu ! È si venutu solu per tuttu què ? Straniu per un cusì longu caminu.
- Innò. Aghju dinù e mio mule. L’aghju lasciatu quallà, à l’entrata, appiccate à l’anelli.
- Ma si solu quantunque ? Sì u solu omu ?
- Iè. Si puderia dì cusì.
I dui amichi fecinu qualchi passi chjachjarendu, culendu e scale di u muraglione. Nandriu dumandò :
- Ma dimmi appena… ùn avete dighjà più nunda à manghjà in paese ? A saperaghju eiu chì e raccolte ùn sò tantu statu bone quist’annu, ma m’istonerebbe ch’ellu fussi dighjà u bisestu.
- Ùn ci simu ancu, è tenimu sempre di ch’e manghjà per avà, ma ùn ne avemu micca à bastanza per francà l’inguernu cun sicurezza. Hè per quessa ch’o sò quì.
- Umbeh ! È pensi da veru ch’e un solu viaghju, ancu incù tutte e to mule carche, ti basterà per tuttu un paese, per tuttu l’inguernu ?
- À dìlla franca, ùn ne sò micca cunvintu, ma quandu rivolteraghju in paese, si feranu i conti, è forse si ferà un altru viaghju. Videremu.
- Avete una manera strania d’organizà i v’affari, mi pare.
- Cosa voli ch’o ti dica ? Ùn sì pò micca sempre anticipà tuttu. Di tutte manere, ùn si pudia micca fà altrimentu, chì ùn si pudia mandà ch’e un solu omu attempu, per ch’e u paese cuntinuessi di campà.
- A to spiegazione ùn mi cunvinche manc’appena.
- È puru hè cusì.
Mentre ch’elli caminavanu, s’avvicinavanu pocu à pocu di a piazza duve si tenia abitualmente u Gran Mercatu. Fù à stu mumentu ch’e Nandriu annunciò :
- Di tutte manere, per oghje, ùn ai da fà tant’affare, chì u Gran Mercatu, oghje, ùn hè apertu.
- Micca apertu ? Ah peccatu. È quandu apre, allora ?
- Deverai aspettà dumane. Tandu sì chì puderai cumprà tuttu cio ch’e voli, è ch’e poi, sopra tuttu.
- Tantu megliu allora.
- Ùn t’impenserisce micca troppu, di duvè aspettà fin’à dumane, spergu ?
- Innò. Per quessa, mi sbroglieraghju. Dormeraghju à un albergu, è fra tempu, averaghju u tempu di spassighjàmmi in a cità. Serà cume piccule vacanze, per una volta.
- Ùn temi micca d’annoiàtti ?
- Mancu una seconda o amì. Ci sò, cose à fà in sta cità.
- Hè vera, per tù ch’ùn ci sì mai, tuttu hè sfarente.
- Forse ch’e tù dinù, u ghjornu ch’e t’affachi in paese meiu, u vederai dinù incù un altru ochju ch’e u meiu.
- Pensi troppu o Ghjuvannu. Rifletti troppu è pensi troppu.
- Forse ch’e t’ai a raghjone.

I dui amichi marchjonu torna qualchi passi, in silenziu, fin ch’e Ghjuvannu, inspiratu, dumandessi :
- Forse mi poi rinsegnà. Aghju intesu dì ch’ellu ci era quì, in cità, un vechju sapientu chì sapia assai cose anziane. Vedi quale pò esse ?
- Umboh ? Què p’allora a mi dumandi, ma ùn l’aspettava micca. Un vechju sapientu cerchi ?
- Iè. Un vechju sapientu o un vechju eruditu. D’altronde, ùn sò mancu sicuru ch’ellu sia vechju da veru. Tuttu cio ch’o sò, hè ch’ellu sà assai cose. Cose di l’epica di nanzu u scordu.
- Di l’epica di nanzu u scordu ? Ai certe preoccupazione tù !

Da veru, Nandriu paria cume cumossu da a dumanda di Ghjuvannu. Ellu si n’avisò, è rispose :
- Per mè, hè impurtante di cunosce u nostru passatu, a nostra storia piatta. Ùn possu micca stà senza sapè, senza almenu pruvà di cunosce cio chì s’era passatu tandu. Ùn t’intaressa micca à tè ?
- Eiu pensu sopra tuttu ch’e s’e l’anziani si ne sò scurdati, si ne sò TUTTI scurdati, hè perchè devianu avè certe raghjone. Ùn credi micca.
- Dunque, s’o capiscu bè, pensi ch’e no deveriamu firmà quante elli, senza sapè nunda di u nostru passatu.
- U prisente hè dighjà assai cumplicatu cusì o Ghjuvannu. Ùn c’hè bisognu à rendelli ancu peghju zappendu in e tombe.
- Ma ùn mi voli rinsegnà ? Ùn vedi micca quale pò esse, stu vechju savviu ?
- Sai o Ghjuvannu ch’e sì u m’amicu. Ùn vogliu micca ch’ella t’accadessi qualcosa. Forse certe ricerche sò periculosu per l’omu, è forse chì ci sò certi sicretti ch’ùn devenu esse svelati. Ma ancu s’ùn sò micca sicuru sicuru, u solu omu, campendu in a Cità, chì puderia esse quellu da u quale parli, hè un vechju di u carrughju ghjustu nanzu à a citadella.
- Ah iè. Dimmine di più per piacè.
- Hè un omu vechju vechju, forse u più vechju di a cità. Tutti l’avemu sempre cunisciutu, ancu s’ellu sorte pocu di u so alloghju. Certi dicenu ch’ellu hè un magu, o un essare sopranaturale, chì si dice ancu ch’ellu tene più di dui centi anni. Forse ùn hè micca vera, ma si dice. Hè un anzianu erburistu è apoticariu, ma certi cuntinueghjanu sempre d’andà à vedellu quand’elli sò malati.
- Pensi ch’o possu andà à visitàllu ?
- Senza nisun prublemu. Hè bravu bravu, ancu s’e spessu appena straniu. Dopu ti mustreraghju u caminu per ghjunghjecci, s’e tù voli. Ind’e ellu, sì pò truvà certe cose ch’ùn truverai mai in altrò ; avà ch’e tù ne parli, mi rivene in mente. U chjamemu Ziu Vipalgunu. Ma attenti ! Chì s’e ellu hè bravu, pensu quantunque ch’elle ci sò certe cose chì devenu firmà ascose. Chì certi sicretti devenu firmà sicretti. Voli veramente quantunque andà à vedellu ?
- Iè. Hè a mio vulintà.
Revenir en haut Aller en bas
Voir le profil de l'utilisateur http://appuntamentu-corsu.forums-actifs.net
Ruclinonu Solechjari

avatar

Messages : 518
Date d'inscription : 27/02/2012
Localisation : Casinca

MessageSujet: Re: Centru Pasiphae   Mer 29 Fév - 10:12

IX




Citation :
Solu sei mesi dopu à l’annunciu chì li era statu fattu da u prufessore Flatz, Susan imbarcava in nave spaziale chì abbandunava a Terra, per andà fin’à u Centru Pasiphae, nant’à a Luna. Solu accumpagnata d’una decina di spezialisti varii chjamati à travaglià in u Centru Pasiphae.
A partenza di u veiculu interpianetariu s’adempiì nant’à a basa di lampera speziale di u locu in u quale Susan travagliava ghjà dapoi più d’un annu, è sì passò senza nisun difficultà. Inoltre, postu ch’e u traghjettu da a Terra à a Luna era previstu per esse u più cortu pussibile, senza stanciata, Susan ùn abbisugnò priparazione speziale. Fù solu à u livellu mentale ch’e tuttu sì passò per ella.
Di fattu, u Centru Pasiphae era a prima vera stallazione lunare di l’umanità. Era dinù un altru prugressu strasurdinariu figliulatu da u Prughjettu Avvene, à u quale averia a primura di participà, per u bè cummunu di l’umanità. È per Susan più ch’e mai, era què solu chì impurtava. U bè cummunu di l’umanità, è micca a so vita persunale.

A partenza, quante u viaghju sanu si passonu senza prublemu, è, per Susan, senza altre emuzione ch’e a perspettiva d’agisce per u bè di l’umanità.

Puru, ella scoprì u Centru Pasiphae incù un emuzione tamanta, micca nata di a so presenza nant’à a Luna, ma piuttostu di a perspettiva d’un modu d’azzione novu, è di tuttu cio ch’ellu ci firmava à fà in quellu locu. È u travagliu ùn mancava.
Custruitu per a so maghjor’parte dentru a rocca, scavata in un picculu poghju, u Centru Pasiphae ùn tenia quasi nisun apertura, fora d’una unica porta, solu ligame tra l’esteriore è l’interiore. A stallazione ella stessa era custituita d’una trentina di sale, fra e quale, a maghjorità era viota.

Fin’à tandu, u scopu primordiale di a ghjente stallata in u Centru era di rendellu campatoghju è autonomu, cosa firmata incompia.
Una larga parte di e stallazione assicurava, incù u mutore biochimicu cataliticu, u rinnuvamentu di l’ossigena, mentre chì l’alimentazione energetica di a basa era assicurata grazie à una centrale à antimateria cunvertibile. Duie stallazione chì eranu – cume Susan l’amparì prestu – state e prime à esse stallate nentru e stanze viote di u Centru Pasiphae, ghjustu dopu scavatu.
Puru firmava sempre à truvà una suluzione per assicurà a cuntinuità cuncernendu l’acqua, è l’appruvisiunamentu nutrizionale, sempre dipendenti di a Terra.

Certe, u cuncettu di sintetisore alimentariu polimorfu, sviluppatu da i sapienti di u Prughjettu Avvene funziunava d’incantu, ma ellu abbisognava d’ammanugliu assicuratu. D’altronde, ancu per fà usu di a ghjaccia lunaria, prisente naturalmente sopra locu, si devia quantunque cuncipì un sistema di spluttazione accertatu per permette u rinnovu abbeternu di a risorza, un arte in u quale s’abbisogneria assai travagliu cummunu.

Per Susan, ùn ci eranu ch’e sfide. Sfide maghjore per u funziunamentu essenziale di a struttura, per u bè di l’umanità. In st’ambiente novu novu, tuttu tecnicu, tuttu materiale, solu solu direttu versu u travagliu, u so spiritu duvintava sempre più staccatu di a so persona, di i so bisogni naturali. Solu l’impremava a so missione.


D’una manu sicura, è senza mancu necessità u più minimu tempu d’adattazione, si misse subitu à travaglià à regulà a questione, orchestrendu una coordinazione trà i pochi sapienti presenti in u Centru Pasiphae, è quelli, assai più numarosi, firmati in Terra. À misura ch’e u tempu passava, ch’e e squadre di travagliu si seguitavanu sopra locu, arrechendu ogni volta robba nova, u funziunamentu di u situ si perfezziunava, è caminava sempre di più luntanu nant’à a via di l’autonomia è di l’indipendenza. Per tutti, era un trionfu, ma per Susan, e cose ùn eranu mai à bastanza bène, è si pudia sempre fà megliu.

Puru, s’e Susan ùn era ch’e troppu cuscenziosa in l’adempiimentu di u so travagliu – a so missione – ella ùn tenia più nisun contu di a so persona propia, ch’ella cunsiderava ormai solu cume un ardignu per u so travagliu.
Sempre di più dedicata à u so solu travagliu, ùn era mancu più cuscente ch’e a ghjente ch’ella capitanava, s’elli tenianu rispettu per a so intelligenza eccezziunale è i so doni, eranu quasi spavintati assai da a ghjovanotta ch’ùn avia più nisun altra vita ch’e u so travagliu, nisun svagu ne distrazzione, dormendu à u menu, manghjendu à u menu, sempre giratu versu u so unicu diu, u travagliu, cume s’ella ùn era più umana.


Fù in stu cuntestu ch’ellu s’affaccò per qualchi ghjorni, u prufessore Flatz, à u Centru Pasiphae. Malgratu u so putere in u sennu di u Prughjettu Avvene, era per ellu a prima volta ch’ellu venia visità u locu, è ancu puru a prima volta ch’ellu facia un viaghju in u spaziu. A so emuzione era tamanta è ricca di scuperte, solu ottu mesi dopu à a so discepola, l’anziana studiente di l’Università di Nastoron.

Unu di e so prime azzione fù d’avè una discussione cun Susan :
- Madamicella Channing, ci vole ch’o vi felicitessi, una volta di più. Mi pare certe volte ch’o passu e mio ore à felicitàvvi. Tuttu cio ch’e fate diventa incantu.
- Vi ringraziu, o prufessore Flatz, ma ùn hè ch’e u mio duvere.
- Site troppu mudesta. Assai troppu. Ùn ne avete micca dirittu, dopu à u vostru travaglione.
- È perchè micca ? U più impurtante, hè chì u travagliu sia fattu, micca di sapè quale l’hà fattu.
- Hè… hè una filosufia.
- Ma spergu ch’ùn hè per parlàmmi di filosufia ch’e mi vulete intratene.
- Innò… in fatti… in fatti, hè per cunosce l’avanzata di i vostri travaglii quì. Sapè duve ne simu.
- D’una manera tecnica, Pasiphae serà prestu indipendente di a Terra à ogni livellu.
- Iè ? Travagliate prestu, quì !
- Hè u nostru duvere, a nostra missione. Per l’umanità.
- Per l’umanità, ma per l’umanu dinù.
- Ùn vi capiscu, o sgiò prufessore.
- Mi pare, quandu vi vecu, ch’e travagliendu per u bè di l’umanità, cum’e dite, vi site solu scurdatu di voi, di a vostra persona.
- A mio persona ùn hè nunda à u vistu di u travagliu ch’o possu fà. Fin ch’o ne averaghju a forza, travaglieraghju in stu scopu u più nobile.
- S’e vo a dite…

U prufessore Flatz, malgratu a so accertata, ùn era ch’e pocu rassicuratu. Per a prima volta, li paria di cunfirmàssi u sò parè fin’à tandu incertu, nant’à l’annegazione troppu forte di Susan Channing. Era annegata di travagliu, è a so vita ùn avia nisun altra direzzione. In stu locu luntanu di tuttu, senza pussibilità di svariata, a so anima pigliava un andatura quasi inumana, forse ghjuvevule per u bè cummunu, ma chì risichia d’invelenà u so essare persunale, à tal puntu ch’e u prufessore Flatz pinsò un mumentu à smette subitu subitu u so travagliu in Pasiphae, per ripatriàlla nant’à a Terra, è permettelli di ritruvà una vita nurmale. Ma rinunciò à st’idea, cunvintu ch’e e cose si calmerianu da elle stesse, è rivultò solu, nant’à a Terra.

Sei mesi dopu, sei mesi d’un travagliu accanitu, u Centru Pasiphae era infine uperaziunale, autosufficente, è indipendente di a Terra à ogni livellu. A seconda parte di a so missione era principiata.
Revenir en haut Aller en bas
Voir le profil de l'utilisateur http://appuntamentu-corsu.forums-actifs.net
Ruclinonu Solechjari

avatar

Messages : 518
Date d'inscription : 27/02/2012
Localisation : Casinca

MessageSujet: Re: Centru Pasiphae   Jeu 1 Mar - 22:24

X




Citation :
Qualche ore dopu, più decisu ch’e mai, Ghjuvannu caminava solu in i carrughji di a Grande Cità. Seguitendu l’indicazione date da u s’amicu Nandriu, era à a cerca di a casa di Ziu Vipalgunu, u famosu vechju saviu di a cità. Pienu di sentimi è di sperenza, ripensava cun primura à tutte e parole chì li eranu state dette da ognunu. Pinsava a e parole di Furcottu, di Sciroccu, è di tant’altre persone campendu senza sapè ne perchè ne cumu, pocu primurose di u so passatu. Li paria ch’e in u mondu, era quessa a normalità, è ch’ellu era ellu, Ghjuvannu, un eccezzione, o forse un mostru, à vulè zappà i vechji sicretti.
Tutti sembravanu cume spavintati da stu passatu scunisciutu, è d’una manera più generale, da tuttu cio ch’elli ùn cuniscianu. Micca ellu. À contu soiu, l’esistenza di cose scunisciute ghjustificava e raghjone di zappà per circà, è per truvà. A paura ùn tenia nisun ghjustificazione, è solu l’ignurantaghjine pudia fà nasce u spaventu.

Tale era u so sentimu, chjaru è lindu, avvicinendussi di a piccula porta scura è ascosa, in stu carrughju strettu è disertu di a Grande Cità. Un locu chì paria cuncipitu per impaurisce a ghjente influenzabile chì averia pussutu avè a curiosità di girandulà per sti chjassi.

Puru, fù cun un pocu d’apprensione ch’ellu pichjò à a vechja porta. Micca ch’ellu fussi sensibile à tutti sti puttachji intesi quì è culandi, ma piuttostu ch’ellu temessi assai di frasturnà un vechju omu chì fin’à tandu ùn cuniscia. Ma più ch’e tuttu, era ellu chì era frasturnatu, tra a sperenza d’avè infine e risposte à e so questione, è angoscia di vede sfundàssi tuttu u mondu ch’ellu cuniscia fin’à tandu.

E seconde sembronu minute per Ghjuvannu, nanzu ch’e una vechja voce, sempre chjara, lampessi :
« Iè ? Quale hè ? »
Ghjuvannu, cuscente d’avè francatu un puntu decisivu, è d’ùn avè più a possibilità di rinculà, rispose :
« Vi salutu o Maè. Mi chjamu Ghjuvannu è sò venutu per chere u vostru aiutu. »
A risposta ùn fù subitania, è Ghjuvannu, aspettò torna qualche seconde – senza fine – di più, nanzu ch’e a porta ùn s’apressi, svelendu un vechjettu d’andatura mezana incù un sguardu vivu. Vedendullu per a prima volta, Ghjuvannu capì subitu perchè tutti quelli chì li avianu parlatu d’ellu u talizavanu di vechju saviu. A parola paria propiu invintata per ellu !
Ben ch’ellu sembressi più vechju ch’e i monti, l’omu tenia in ellu un essenza quasi ghjuvanile, è un energia strasurdinaria per un omu di st’età. Ghjuvannu si n’avisò subitu vedendullu, è subitu capì u perchè di u mitu ch’ellu riprisentava.
« Avete bisognu di u m’aiutu ? Cherite medicine, per voi o per un parente ? » Dumandò u vechjettu.
« Innò. In fatti, sò venutu à voi chì m’anu parlatu di tuttu cio ch’e sapete di a storia di nanzu u scordu. » Spiegò Ghjuvannu, un pocu impressiunatu.
Tandu l’ochji di u Maestru si missenu à spampillulà ancu più forte, d’un intaressu ch’ùn era fintu, è allegru, invitò Ghjuvannu à entre in a so stanza.


A visione d’un locu tale straseculò assai à Ghjuvannu. S’aspettava assai à scopre un locu bughju, puzzicosu, ingombru di caraffoni, boccali, è altre chimere. In fatti, è ben ch’e a stanza fussi stretta, è bughja per causa d’una finestra troppu chjuca, u locale era bellu pulitu, riccu di legnami muschendu l’ambra, cun belli mobuli lustrati, senza nisun bulacu, è più ch’e tuttu, in fondu di a stanza, si vedia un mobulu strasurdinariu ch’ellu scopria per a prima volta di a so vita : una bibbiuteca !

Fin’à tandu, Ghjuvannu, quante tutti i so paesani, ùn sapia leghje. Ùn cuniscia mancu l’esistenza di i libri, di stu mediu strasurdinariu di cunservà u sapere è tante altre cose ch’e a sola memoria umana era troppu debbule per assicurà sola. Quante tutti l’abitanti di u so rughjone, ùn ne avia mai intesu parlà. Mentre l’ore chì seguitonu, u Maestru li devia spiegà u « funziunamente » di sta cosa nova per ellu, ma per u mumentu, Ghjuvanu era solu meravigliatu.

Ma capunanzu, ghjustu dopu scupertu a stanza di u vechjettu, ellu li dichjarò, affabile :
- Entri, entri puru, o ghjuvanottu. Per una volta ch’o scontru qualchissia chì pare passiunatu, quant’e mè, di e cose di u nostru passatu, ch’o vecu qualchissia ch’ùn si suddesfa micca di u presente senza circà à capì… Voli beie qualcosa.
- Niente, grazie o Maè.
- Peccatu… Ma ùn face nunda. Per una volta ch’o trovu à qualchissia chì hè interessatu da tuttu cio ch’o aghju quì, tutti sti libri.
- Sti libri ? Cosa hè, un libru, o Maè ?
- Un libru… un libru hè una cosa magica. U mediu u più sicuru di sapè cose ch’ùn cunosci. Ti spiegheraghju, è viderai.
- So primurosu di capì.
- Mi pari intelligente tù. Mi face piacè. Per una volta ch’o scontru à qualchissia à u quale possu trasmette tuttu u sapè anticu, ramintatu in stu locu. Mi face piacè. Mi face veramente piacè.
- Tantu megliu o Maè.

U Maestru, veramente felice d’avè infine una bella occasione per sparghje u so sapè, si pusò è dumandò :
- Cosa voli sapè, esattamente ? Cosa t’intaressa di sapè ?
- À mè mi piaceria assai d’amparà assai nant’à a nostra storia. Quella di nanzu u scordu. Ne sapete qualcosa ?
- L’epica di nanzu u scordu ? Hè què chì t’intaressa ? Sò e nostre radiche e più prufonde o ghjù. L’origina di tuttu. Di tuttu cio chì face ch’e simu cio ch’e no simu. Hè un intaressu più ch’e leghjitimu.
- Pensu ch’e hè cuniscendu u nostru passatu ch’ellu si pò approntà l’avvene à u megliu.
- Bravu ! Si un omu rispunsevulu tù. Pensu ch’e meriti d’avè risposte à e to questione. Ma prima di tuttu, questione, ti n’aghju da pone una. D’induve sì, esattamente ?
- Sò di un paese dopu à u fiume. U paese di i Trè Castagnoni. U cuniscite o Maè ?
- Di sicuru ch’o u cunoscu. Ti possu ancu svelà ch’e l’anticu nome di stu paese era Carpinetu.
- Carpinetu ?!
- Era u so nome in i tempi. È voli dinù cunosce, u veru nome, di a Grande Cità ?
- Per piacè.
- Nanzu l’epica di u scordu, a Grande Cità si chjamava, in fatti A Porta.
- Carpinetu. A Porta. Carpinettu. A Porta.

Ghjuvannu, cume stantaratu, ripetia senza piantà sti dui nomi ch’ellu venia d’amparà, cume s’elli eranu parole magiche. Fù u Maestru chì interrompì u so sonniu :
« Pianta o ghjuvanottu. Ùn sò ch’e nomi. Ùn sò ch’e dui corcii nomi. U veru tesoru ùn hè què. U veru tesoru ùn hè solu què. »
Ghjuvannu, rivenutu in a realità di u cuntrastu, dumandò allora :
« Quantu sò à sapè cio ch’e m’avete dettu, è cio ch’e m’avete da dì avà, d’apress’à voi ? »
U vechjettu perdì u so sunrisu, è rispose, tristu :
« Disgraziamente, pensu ch’e simu belli pochi. À dìlla franca, in a mio longa vita, ùn aghju mai scuntratu à qualchissia chì fussi solu interessatu da tuttu què. À i mio anni, principiava di teme ch’e tuttu stu sapere smariscessi incù mè. Si veramente u primu. U primu ch’o scontru à interessàssi à a nostra storia, di quella di nanzu u scordu. O benedettu ghjornu ch’e oghje ! »

Ghjuvannu, ben ch’e resu dubbitativu da l’allegrezza eccessiva di u vechjettu, rispose, più bramosu ch’e mai d’amparà :
« Parlate o Maè. Vi stò à sente. »
Revenir en haut Aller en bas
Voir le profil de l'utilisateur http://appuntamentu-corsu.forums-actifs.net
Ruclinonu Solechjari

avatar

Messages : 518
Date d'inscription : 27/02/2012
Localisation : Casinca

MessageSujet: Re: Centru Pasiphae   Sam 24 Mar - 10:56

XI




Citation :
Dopu à un travaglione strasurdinariu, infine u Centru Pasiphae era duvintatu operaziunale è u veru travagliu pudia infine principià. Sempre d’una manu di farru, Susan capitanava senza mai piantà l’opera monumentale di salvezza di a Terra è di l’umanità. E stallazione, duvintate autonome di a Terra, funziunavanu d’incantu per assicurà a spansione di u situ. Sempre di più era fundata a rocca per ingrandà e sale. Sempre di più materiale novu era stallatu.

Grazie à a presenza di a centrale energetica à antimateria cunvertibile, u Centru Pasiphae ùn tenia nisun difficultà d’appruvisiunamentu per tutti i so prughjetti i più scemi, mentre chì u rinnuvamentu di l’ossigena si facia senza nisun difficultà, è quellu di u cibu da u sintetisore alimentariu polimorfu. A fabbricazione di cumpunenti tecnichi novi era ormai assicurata da a funderia universale, capace di cuncipì n’importa chì oghjettu fin ch’ellu ci era a materia in quantità bastevule è una dimarchja à seguità per ghjunghjecci.
U sistema matriciale « Pasiphae » era una bella riescita. I mesi passavanu è sempre di più u Prughjettu Avvene si cuncretizava nant’à a Luna. Sapienti è tecniziani facianu u passu è vene da a Terra à a Luna, è ùn ci era ch’e Susan per stà sempre sopra lochi à travaglià, travaglià, travaglià sempre.
A disciplina ch’ella dumandava à tutti quelli chì travagliavanu sott’à i so ordine pudia spessu esse à bastanza dura, ma quella ch’ella s’imponia à ella stessa era mille volte peghju. Tuttu per ella, era fattu di manera à favurizà à u megliu u so travagliu, a so missione per l’umanità, è una certa logica ch’ella chjamava funziunalisimu, una filosufia ch’ella applicava cun primura nant’à a so propia persona, cunsiderendu ch’e solu u scopu finale, a missione, era impurtante. Peghju : cunsiderava ch’e ancu s’ella ne moria di stanchezza, almenu seria morta fendu u so duvere per l’umanità.

I mesi passavanu, è l’anni dinù. A populazione totale mezana di u Centru Pasiphae era crescita à più d’una centina di persone, mentre chì l’inseme, scavatu in a rocca, s’assumigliava tandu à una cità scentifica, à a cità scentifica a più parfurmante mai cuncipita.
Puru, malgratu un appiegazione accanita di u funziunalisimu à a so propia persona, Susan firmava sempre primurosa di u benestà di tutti i sapienti è tecniziani travagliendu sott’à i so ordine. Per quessa, eranu custituiti parechji lochi d’allenata, è ghjardini veri in l’ormai mensa struttura ch’era duvintata u Centru Pasiphae.

Ma per Susan, tuttu què ùn era ch’e u cumpunente d’un pianu d’inseme per assicurà a bona marchja di a so missione. Divintata schennighjatu, manghjendu ghjustu à bastanza per ùn more di fame, è arripusendussi ghjustu à bastanza per ùn more di stanchezza. A so apparenza fisica era duvintata veramente spavintosa, è à certi paria più morta ch’e viva. Stu parè era ancu rinfurzatu da u fattu ch’ella si lavava ormai pocu è ch’ella ùn cambiava quasi mai a so vestitura, più fiunziunale ch’e bella. I so capelli, pocu lavati è firmati senza primura ùn s’assumigliavanu più à nunda, è puzzavanu à bastanza. Stu « prublemu » fù puru regulatu da Susan quand’ella decidì, sempre in a so logica funziunalista, di rasàssi u capu à zeru, à a grande surpresa di tutti, ancu di quelli chì a cuniscianu bè.

Puru, tuttu què, ùn eranu per Susan ch’e ditaglii senza nisun impurtanza. U Centru Pasiphae funziunava di manera indipendente, è crescia. Energie pulite è senza limite eranu impiegate cun maestria, mentre chì u prublemu di e rumenzule era propiu smaritu. Ecosistemi terrestru eranu statu ricustituiti à un picculu livellu, ma e so tecniche eranu tale ch’ella li era ormai pussibile di ricustituisce n’importa chì ecosistema di a Terra, è di salvà ogni spezie animale è vegetale di u mondu. In poche parole, u Centru Pasiphae era duvintatu da veru, in solu cinqu’anni, a cellula a più impurtante di u Prughjettu Avvene, à tal puntu chì e so più minime realisazione eranu capitanate direttamente da u Centru Pasiphae.

U ghjornu di u cinquesimu anniversariu di u Centru Pasiphae, ghjust’à puntu, u prufessore Flatz feci, per l’occasione, un affaccata nant’à a Luna, per intrattenessi una cria incù quella chì era, d’una certa manera, a so figliola spirituale, è da a quale si sentia rispunsevule
- Bonghjornu o madamicella Channing. Cumu site oghje ?
- A missione si porta bè è avemu fattu assai travagliu. Ma sempre si pò fà megliu, ne sò cunvinta.
- S’e parlate cusì sì pò sempre fà megliu. Ma devite quantunque ricunosce ch’e avemu adempiitu tutti i nostri scopi. Ch’e a nostra sapienza hè ormai putenzialmente capace di salvà a Terra è l’umanità.
- Vi sbagliate o sgiò prufessore. Fin ch’e l’omu ùn scambia, nunda ùn serà salvatu. E què, hè a seconda parte di a missione. L’omu deve piantà di pensà à ellu, ma à u cuntrariu, deve solu pensà à l’intaressu cummunu.
- Una bella filosufia ch’e quessa, ma ùn hè… ma ùn hè manc’appena di què ch’o vi parlu, ch’o sò venutu à vedevvi. Eiu vi dumandu cumu site voi oghje ? Cumu vi sentite ? S’e ùn site micca troppu stanca dopu à tanti sforzi. Perchè mi sembrate abbisognà un pocu di riposu. Ùn hè ?
- Ùn capite mancu voi o sgiò prufessore. Malgratu a stima ch’aghju per voi, site sempre un omu attuale. Pinsate à mè quasi prima di pinsà à u cummunu, à u bè cummunu. A personna umana ùn vale nunda, solu importa a cummunità. A cummunità è pò a natura dinù. È eiu, ùn truveraghju mai riposu fin ch’e u mondu ùn serà salvatu.
- Aiò o madamicella Channing, piantate appena per piacè. Ùn pudete mica, sola, salvà u mondu. Ci vole dinù, malgratu l’impurtanza di a vostra opera, di u vostru travagliu, ch’e pensessite un pocu dinù à voi, à a vostra personna. Ossinò, ùn tenerete micca longu u colpu di sta manera.
- Chì vi pò fà ? Solu importa u travagliu o sgiò prufessore !
- Ma infine, riflettite appena ! Ùn vi rendite micca contu ch’e ùn campate più ch’e per u vostru travagliu !? Ch’e avete persu u cuntrolu di u vostru corpu ? Ùn vi ne rendite micca contu ?
- Mi rendu sopra tuttu contu ch’e u travaglia avanza, ma ch’ella puderia esse megliu ; ch’o puderia travaglià ancu megliu. U restu, mi n’impippu.
- Mi dispiace di sentevvi parlà cusì.
- S’ella vi dispiace, u peghju hè per voi. Eiu ùn facciu ch’e u mio duvere, è u mio duvere, ghjust’à puntu, hè di perseguità u mio travagliu, è avà ch’e u travagliu di u Prughjettu Avvene ne hè ghjuntu à un livellu operaziunale, ch’e tenimu in noi tutte e tecniche per assicurà à u megliu a salvezza di a Terra, ùn ferma più ch’e à scambià l’omu. Per quessa aghju una soluzione.
- Mi dumandu cosa puderia esse, postu ch’ùn riescite mancu à salvàvvi voi stessa.
- A mio soluzione, hè di custruisce un omu novu. Per quessa sò state stallate, u mesu scorsu, sott’à i mio ordina millaie d’incubatrice artificiale da e quale nasceranu bambini umani. Seranu allevati quì, secondu un prugramma funziunalistu assolutu, è sempre in a linea di u bè cummunu è micca di u piacè persunale. Cusì, nove generazione d’omi nasceranu sbarazzate, a spergu, di a grana di u male.
- Ma u vostru prughjettu, hè propiu mostruosu !! Ùn vi ne rendite mancu contu ?
- S’e ùn avete ch’e què à dìmmi, hè megliu ch’e partessite.


U corciu prufessore Flatz, mociu, ùn insistì, è ùn firmò in u Centru Pasiphae ch’e qualchi ghjorni nanzu di vultà nant’à a Terra. Più ch’e mai, è malgratu u successu di e rialisazione scentifiche, u prufessore Flatz era impauritu assai. Più ch’e tuttu, si sentia culpevulu di vede l’andatura pigliata da quella ch’ellu cunsiderava più ch’e mai cume a so figliola adottiva. Li paria propiu chì era ellu chì avia pigliatu sta ghjovana studiente nucente, è l’avia quasi sparsunata per fànne un ammostru ch’ùn avia più nisun primura d’ella stessa. Angusciatu, ellu pinsò à una strategia per custringhje Susan à abbandunà tuttu è ridivintà una persona viva, ma sta dimarchja ùn fù ne seguitata ne accittata da i so amichi di u Prughjettu Avvene. Per u prufessore Flatz, u travagliu di Susan Channing cun elli s’assumigliava di più à una scunfitta ch’e à una vittoria.
Revenir en haut Aller en bas
Voir le profil de l'utilisateur http://appuntamentu-corsu.forums-actifs.net
Contenu sponsorisé




MessageSujet: Re: Centru Pasiphae   

Revenir en haut Aller en bas
 
Centru Pasiphae
Voir le sujet précédent Voir le sujet suivant Revenir en haut 
Page 1 sur 1
 Sujets similaires
-
» Centru Pasiphae
» Pasiphaé et l'amour

Permission de ce forum:Vous ne pouvez pas répondre aux sujets dans ce forum
ISULA :: Quandu l'inchjostru sumena :: Prosa-
Sauter vers: