Ancey Olivier

Postu ch'ellu hè troppu umile per apre un sugettu cuncernendu lu a facciu eiu
Cumenciu cù una di e so puesie chì mi piace u più, colma di dulcezza.


L’oru



Vulia assulià
I to ghjorni ancu à vene,
Di sonnii arraccamà
E to notte serene,
Vulia suminà
Di centumila stelle
Sin’à l’alburià
L’oru di a to pelle.

Vulia induvinà
I to cenni d’amore
È ti vulia dà
U veranu in un fiore
È vulia intriccià
À cullane di speme
L’ore felicità
Ch’aviamu da passà inseme

U tempu pò spulà
L’ore cum’è candelle
Ùn possu sminticà
L’oru di a to pelle.

Vulia navicà
Cun tè à core scioltu,
Gode l’eternità
D’issu mumentu coltu,
U tempu si ne và
È si more ogni stonda,
Di u mio sunnià
U vascellu s’affonda.

Mi vurria invintà
Un antru lindumane
È per sempre sguassà
Isse ferite landane,
U vurria smattà
Issu focu mai spentu,
Mi vurria scurdà
Eppuru mi ramentu…

U tempu pò spulà
L’ore cum’è candelle
Ùn possu sminticà
L’oru di a to pelle.

Reame


M’arricordu l’armunia
Di quella alba purpurina
È a stella matutina
Ch’inde u celu sbiadia.
M’arricordu l’aria pura
È l’ansciu di a natura
Quandu u ghjornu nascia.

M’arricordu a carezza
Di l’ambata prufumata
È u velu tinnarezza
Di a sciuma immaculata.
Sempre a mio nave mi pare
Azzicata da u mare
Chì m’annanna incù dulcezza.

Eiu ch’aghju sulcatu
L’onde di tanti mari,
Per l’orizonti chjari
Ch’avia sunniatu…
Eiu ch’aghju sfrisgiatu
L’onde di l’oceani,
Per i vostri dumani
Ch’avia sunniatu…

M’arricordu u cristallu
Di issu reame turchinu
È ogni fondu marinu
Intricciatu di curallu.
È tante sirene bionde,
Principesse in le so onde
Chì m’invitonu à u ballu.

M’arricordu a magia
Di quella attrachjata bruna
Quandu u sole ridia
Ghjuchendusi cù a luna.
Era l’ora più serena,
Fascendu d’oru a rena
L’ultimu ragiu muria.

Eiu ch’aghju sulcatu
L’onde di tanti mari,
Per l’orizonti chjari
Ch’avia sunniatu…
Eiu ch’aghju sfrisgiatu
L’onde di l’oceani,
Per i vostri dumani
Ch’avia sunniatu…

In un ame


E mio radiche sò un eternu ligame,
È da mill’anni in quà, abbraccianu u mondu.
Da quant’e mi ricordu u passatu più fondu,
Vecu ballà viranu in punta à e mio rame.

È à tramule d’oru spuntanu tante brame
Di divizia, di pace è d’avvene giucondu.
È sottu à Monte Cintu, San Petrone o Ritondu,
À via di u celu sparghju ampiu reame.

È quandu l’auturnu arrussisce u frundame
Di l’alburi cumpagni chì mi stanu di tondu,
Lampu à unu à unu ogni gricciulu biondu,
È frutti inzuccarati da caccià ogni fame.

Eppo l’inguernu arvigne u mio tintu pillame,
Ingrisgia u mio frustu nudu è muribondu.
Ma sarà colpa soia s’e cambiu cera è sfrondu ?
O sarà chì u tempu hè fughjitu in un ame ?

E mio radiche sò un eternu ligame,
È da mill’anni in quà, abbraccianu u mondu.
Da quant’e mi ricordu u passatu più fondu,
Vecu ballà viranu in punta à e mio rame.

Un'antra maraviglia...



Universale


E mio cunfine
Sò sponde inturniate
D’onde turchine,
Fole è sunniate…
È u ghjornu sbuccime
Ci sparghje e so ale,
Sentu l’universale.

Una furtezza
Chjerchju di a mio ghjente,
Un’aghja tralucente,
Nidu dulcezza,
Ci nascenu e rime
À parolle nustrale,
Scrivu l’universale.

E mio cunfine
Sò di rena è di mare,
Voce latine,
Manduline è ghitare,
Eternu sussurime
Di versu naturale,
Cantu l’universale.

Una furtezza
Un reame di vita,
Muntagna intimurita,
Fonte purezza,
Muvra di l’alte cime
Ritta nant’à un sciappale,
Temu l’universale.

E mio cunfine
Sò bracce spalancate,
Albe marine
Date à e cavallate
È à mezu spulime,
Di lacrime è di sale,
Campu l’universale.

Una furtezza
In brama d’orizonti
Un’armata di monti,
Isula altezza,
Necu l’assugittime
À lege culuniale
Sfidu l’universale.

O tarra isula matre



O tarra isula matre,
M’arrembu à u to scogliu
Induve travu suchju
È l’amore ch’e cogliu
Hè mazzulu di speme,
Di filetta è di muchju,
Ch’e tengu forte in manu
O tarra isula matre.
È s’andessi luntanu
O s’e vinissi à more,
Partariamu inseme,
Perchè ti portu in core.

Vecu stantare arcane,
Sicrete citadelle
È torre inariulate,
Eterne bardiane
È mute sintinelle
Di e stonde impastate
È di guerre è di patti
O tarra isula matre.
O tarra isula matre,
M’arrembu à a to storia,
Da fà chì nimu smatti
A fiaccula mimoria.

O tarra isula matre,
L’orizonte spalanchi,
Quandu sfrisgendu l’onde,
U primu ragiu vene
À tuccà e to sponde
È m’arrembu à l’avvene
Chì nasce à i to fianchi
O tarra isula matre.
Digià l’alba pettina
U to celu chì s’apre ;
In un nominepatre
L’aria si culurisce…
Ma prima di smarisce,
Ti basgiarà e labre
U mio sonniu in pulvina.

Cantata da Petru Guelfucci



In core à mè



Pare chì di i ghjorni a corsa scema,
In core di l’amanti tuttu sguassa,
Cum’è u mare alliscendu a rena,
Si rode tuttu u tempu chì passa.

In core à mè luntanu hè l’aligrezza,
U sintimu più forte hè l’amarezza.

A luna ad ogni stella face invitu,
A notte pare tissuta d’argentu
È l’ochji persi in lu celu infinitu
Tutta a to magia mi ramentu.

In core à mè si cunsuma l’amore,
Brusgia l’anima meia senza calore.

Ardente passione prestu sbiadite,
Dolce viaghju ch’emu fattu inseme,
Ore linde è felice oghje svanite,
Dillami tù ch’elle anu da rivene.

In core à mè più nisunu risponde,
Vidaremule più e nostre stonde ?

Duie magnifiche puesie cantate da u gruppu Giramondu



Isula citadella

http://www.musicme.com/Giramondu/titres/Isula-Citadella-t2560266.html


Sè celu carcu di stelle
Chì l’altri paesi ùn anu
Ghjunte l’albe cusì belle
Smariscenu pianu pianu
È tornanu rundinelle
Quandu vene u viranu

Sè a tarra ch’e laboru
E mio lenze suminate
Sè u paese ch’e adoru
I mio lochi e mio cuntrate
Di tè torna m’innamoru
Quand’ella affacca l’estate

Sè fiume chì corri è salti
È fali da l’alte cime
Da i monti i più alti
In un buleghju di rime
È di prufumi ti carchi
Quandu vene u vaghjime

Sè a nostra tradizione
Sè u spechju di l’eternu
Chì l’altre generazione
Anu impastatu fraternu
A sera à u fucone
Quandu vinia l’inguernu

Sè muntagna chì s’accorda
Cun quelli tempi beati
Eppoi chì s’arricorda
Chì i mio antichi sò nati
À u pede di Baglia Orba
Monte Cintu è Cinque Frati

Sè l’isula citadella
Arradicata à u mare
A mio unica prichera
È e mio brame più care
Sè a mio più bella ghjesgia
U più splundurante altare

A mio Cursichella a mio Cursichella




Ferma

http://www.musicme.com/#/Giramondu/titres/Ferma-t2103024.html

Cantata da u gruppu Dopu Cena



Tempiu



Tempiu vivu di l’arte
Spartuta da ognunu,
Fonte di u cumunu
Chì ognunu vole sparte.

Tempiu di tradizione,
Filu eternu di l’esse
Chì a to ghjente tesse
Trà e generazione.

Tempiu di l’armunia,
Reame di l’umanu,
Abbracciu più supranu
Di trè voce magia…

Tempiu sonniu d’umanità,
Fiore sbuccitu in l’universu,
Quant’hè dolce l’eternità
Annannati da u to versu.

Tempiu di fratillanza
D’amicizia sincera,
Cori d’ogni spartera,
Case di l’accuglianza.

Tempiu sulennità
Impastatu di fede
Chì tramanda u crede
Di una cumunità.

Tempiu di l’ora pia,
Funtana cantareccia
Quand’à l’aria s’intreccia
Dolce l’avemaria...

Tempiu sonniu d’umanità,
Fiore sbuccitu in l’universu,
Quant’hè dolce l’eternità
Annannati da u to versu...

à Ringraziatti o Petra Alta

ancu assai ch'è tù ci sè.

mandami puru u to rib in mp.

Circione a écrit:

à Ringraziatti o Petra Alta

ancu assai ch'è tù ci sè.

mandami puru u to rib in mp.

O maestru cumu si dice in corsu "au noir" è "petites coupures"?

O Petr'Alta grazie tante pè stu travagliu di spartera, sò da veru perle di favella ste puesie scritte à pinnellu di Musa. Hà l'impennatura bella st'omu è tantu megliu per noi !

Avà s'ella ci ne d'altre....

Santacroce di l’esse

Esse a per cumincià,
Esse b per dì babbà
Esse c per esseci
Esse una chj per chjamà,
Esse d per esse è dì.
Esse un’e per esse, ùn hè ?
Esse un’effe incù duie effe,
Esse g per ùn esseci.
Esse una ghj per ghjucà,
Esse un’acca pè a sbacca,
Esse un’i per unì.
Esse elle per esse belle !
Esse emme per dì o mà !
Esse enne per essene,
Esse o ùn esse o.
Esse sta p per stupì,
Esse q per esse cù u,
Esse erre è rè esse
Esse esse è esse esse
Esse t per esseti.
Esse un’u per esse unu,
Esse v da esse vita,
Esse zeta per finì.

Cusì vularia tesse
U santacroce di l’esse,
Di lettare arraccamate,
Cambiarine è intricciate.

P.S. :
Ogni tantu si pruponga
D’aduprà ancu l’i longa,
Puru sè a v s’accoppia,
Ùn sarà mai v doppia,
D’esse scusati si preca
Da k, icchisi è i greca,
Benchì ricche di qualitai
Ùn s’adupraranu mai.

Tale un batellu persu


Tale un battellu persu
Luntanu di u so portu
U mio sonniu spapersu
Nu i venti s'hè scioltu

È u mio core trema
Azzicatu da l'onde
Tale una nave scema
Chì brame e so sponde

Tale un battellu arfagnu
Di lacrime bagnatu
Ind'un ultimu lagnu
s'hè spentu u mio fiatu

Sott'à e stelle chjare
È a luna d'argentu
In fondu di u mare
Ghjace u mio turmentu

È u mio core trema
Azzicatu da l'onde
Tale una nave scema
Chì brame e so sponde

Tale un battellu persu
Luntanu di u so portu
U nostru amore immersu
Nu i pienti s'hè mortu

È u mio core trema
Azzicatu da l'onde
Tale una nave scema
Chì brama e so sponde

di sfughjita a écrit:

O Petr'Alta grazie tante pè stu travagliu di spartera, sò da veru perle di favella ste puesie scritte à pinnellu di Musa. Hà l'impennatura bella st'omu è tantu megliu per noi !

Avà s'ella ci ne d'altre....

un ringraziu tamantu à ellu d'offre ci tante bellezze

Suldatu


Si chjina à u to latu
U ghjornu chì si more
Lascendu fughje l’ore
Di u tempu scurdatu,
Addiu à tè suldatu,
Tù chì desti di core
U to ultimu fiatu.

Suspira adduluritu
U marmaru turmentu,
Lacrimeghja u ventu
Da a notte insischitu,
Annant’à u granitu,
Trè parolle d’argentu :
U to nome sculpitu.

Sbucina l’orizonte
Una striscia di fume,
L’onda chieta di u fiume
Dorme sott’à u ponte,
Accarezza u monte
Tandu un dolce lume…
U sole alza a fronte.

Sparghje l’alba ligera
U so più dolce mantu,
L’aria in campusantu
Da l’ombra hè prigiunera,
Anima pura è fiera,
Ti sia u mio cantu
Una dolce prichera.



http://www.musicme.com/Voce-Ventu/titres/Suldatu-t2557410.html
(scritta è cantata da Olivier Ancey nant'à l'ultimu dischettu di Voce Ventu)

mi ne saria passatu di scrive què...


Fratelli

Vi paria d’esse l’anelli
Di una listessa catena
È vi cridiate fratelli,
Essendumi tutti figlioli.
L’avvene tolse i maglioli,
Tamanta pena…

L’aria splindia di giuvelli
Ma oghje lacrime sumena
È i mio sonnii sò fulena
Chì l’alba pietosa rimena
Cù i pienti di l’urfanelli.

Quantu morsenu da ribelli,
Quantu paconu di so schiena,
Quantu sò partuti zitelli,
Mucata sò da troppu doli,
Ghjorni funesti, caracoli,
Tamanta pena…

L’aria splindia di giuvelli
Ma oghje lacrime sumena
È i mio sonnii sò fulena
Chì l’alba pietosa rimena
Cù i pienti di l’urfanelli.

Tamanta pena,
O chì macelli.

Turchinues #1


A mane quandu mi discetu,
Insunnulitu è stumacatu
È chì fora face u fretu
È chì u celu hè nivulatu,
Hè vera ch’e facciu u musu
È nasce in mè u turchinusu.

Mi pigliu un caffè à biera
È po dopu accendu u postu,
Sentu parlà corsu à strappera,
À pate quessa ùn sò dispostu,
Spengu cù u core cunfusu
È mi cresce u turchinusu.

Dopu una ghjurnata di stantu,
U stantu di u funziunariu
– Hè vera chì ùn si suda tantu
Ma si vince pocu danaru –,
Mi ne ghjungu in casa dilusu
È mi piglia u turchinusu.

Accendu a televisione
Sò e nutizie di a sera :
L’arrubecci, l’inundazione,
A miseria, a fame è a guerra.
Diciarete forse ch’abusu
Ma què mi dà u turchinusu.




Turchinues #2

Sò tutti à l’usu mudernu
I giovani di stu paese
Vi mandanu prestu à caternu
S’è vo ùn li parlate francese
Di u corsu si perde l’usu
È mi vene u turchinusu.

Portanu pindini à u nasu
È s’inchjodanu u billicu
Più nisunu ci face casu,
Si ne ridenu s’e li dicu :
« O giuventù corsa mi scusu
Ma m’arrechi u turchinusu ».

O Cursichella à l’addisperu
Chì cerchi sempre a to strada,
Oghje sì ch’hè finitu in veru
U tempu chì Marta filava,
Ùn ci hè più nè rocca nè fusu
Ùn ferma cà u turchinusu.

S’è vo ùn capite andate via !
Surtitemi di trà li pedi !
O puru aspittate una cria…
Aghju da traduce i versi mei :
I’ve got the right to sing the blues
Because I have the turchinues.

Ùn ci ferma chè què...Disgraziamente!

Una puesia assai particulare per mè.


A rota

U sole in timiconi face affacca è trapoghja
È fascia l’orizonte d’una innurata striscia.
Cusgita à fili d’oru pare a catapoghja
È a valle s’infiora da a luce cilesta.
U ghjornu annant’à l’aria pianu pianu sculiscia
È basgendu ogni cresta,
Sguilla annant’à e zenne.
Da rende più sulenne
Stu mumentu di pace
Ogni rimore avà si tace.
Si pianta ancu u ballu di u ventu in le fronde
Solu balla u mare chì carezza e sponde
In un armuniosu è dolce colla è fala.
Hè un vede, ma ancu a sintaghjina a si sciala :
Nè parolle nè verbi
Ma l’accenti superbi,
Cusì lindi è prufondi
Di issi chjama è rispondi.
L’alba chì e so vele hà scioltu
Pare una navicella in portu
In partanza per sponde nove
È cun ella u sole si move.
L’aria l’onda è a tarra sò belle à una para.
Ognuna à l’altra si marita…
È s’infiara a vita
È u core di l’omu dinù ellu s’infiara.
Guardendu di u mare l’eterni passa è veni
Gode ghjorni sireni.
Eppo sgranendu l’ore chì u tempu cuncede
Pianu pianu a notte à u ghjornu succede
È fala u sirenu,
Appende a Diana cullane di giuvelli,
Nascenu mille sonnii in ogni umanu senu
E spiranze di l’omi cum’è tanti vascelli
Sfrisgiuleghjanu lebbie i celi di bambace.
S’affrena ancu u mare è languente, si tace.
Ma a notte digià perde i so diritti…
È si sentenu quelli chì si stavanu zitti
Ìn un dolce sussuru l’alba rinasce torna...
Aghjorna.
È s’infiaranu l’ore.
Da u ghjornu più chjaru à a notte più ceca
A rota di u tempu face u porta è l’arreca
Induve face nasce, induve face more,
Quandu un’anima hè data, quandu un’antra hè rapita
È cusì và a vita...
Cusì voca a rota in un accendi è spegni
Ma cumu hè o mà stamane ch’è tù piegni ?

o Circiò ci ai tagliatu a scicca cù a to puesia