A rivolta paesana di u 1729

Tuttu principiò in u 1729, in u Boziu, sempiternu ribellu (ricurdatevi di Sambucucciu), in u paese di Bustanicu, duve un vechju cugnumatu Cardone avia ricusatu di pagà l’impositi, dettu di i Dui Seini, sempre di più inghjusti à un percettore genuvese.
Ùn bastava ch’e què per ch’e i so paesani venessinu à a so riscossa, lampendu fora i percettori. A mossa si sparghjì, à tal puntu chì, in pocu tempu, a maghjor parte di a Castagniccia diventessi ribella.
U guvernatore Felice Pinelli, una rubaccia nera chì odiava i Corsi assai di più ch’è i so predecessori, mandò allora u tenante Carbuccia, per assaltà i paesani rivultati, in Poghju di Tavagna, epicentru di a rivolta.
Quallà, Carbuccia fù scunfittu cun stuzia grazia à un certu Generale Pompiliani, chì avia fattu invinà i suldati genuvesi per scunghjurà a strage prevista. Pompiliani pigliò tandu u capu di l’insurezzione è pochi tempi dopu, s’impatruniscì di l’arsanale d’Aleria.

A mossa divintò sempre più pudente, è paesani, venuti di u Boziu, di sicuru, ma dinù di u Rustinu, di a Marana è di a Casinca, daretu à Pompiliani, ghjunsenu in Furiani duv’elli si stabillinu, per marchjà nant’à Bastia, sediu di u guvernatore genuvese Pinelli, è dinù di a maiorità di i burghesi, corsi o genuvesi. In Furiani, u 18 di ferraghju di u 1730, si ritruvonu cusì cinquemila omi armati per assaltà a cità di Bastia.

Mgr Saluzzo, u vescu di Mariana, fù tandu mandatu à scuntralli per pruvà di calmà u so ardore è a so rabbia accumulata da tanti seculi di suffrenza chì venia di schjattà d’un colpu, ancu s’ella ùn era ancu duvintata veramente rivuluziunaria è sicuramente micca indipendentista.
Mgr Saluzzo parlò à l’abboccu, chjamendu à a pace, ma in vanu. A risposta paesana fù ch’elli vulianu decemila arme, fin’à tandu pruibite da u guvernu genuvese, è ch’elli eranu pronti à marchjà nant’à Bastia per ottenenne.
U cleru tandu, ùn riescì ch’e à reduce u numaru d’arme riclamate da i ribelli, da dece milla à trè centu, ch’ellu era prontu à dàlli contr’à un ghjuramentu di fedeltà à Genuva.
U furbu Pinelli, ricevendu stu missaghju, priparava dighjà a so vindetta, è incaricò u vescu d’annuncià à i ribelli paesani ch’ùn riceverianu ne fucili ne danari – missaghju chì u vescu, impauritu da a riazzione di i paesani, ùn mandò micca, preferendu fughje a Corsica.

Tandu principionu i cumbatti. Pinelli fece tirà à u cannonu contr’à u poghju di Monserratu, duve s’eranu adduniti un gran numaru di ribelli, fendu assai morti è feriti, mentre ch’ellu arrulò di forza Corsi di Bastia, minaccenduli di castichi s’elli ùn andavanu à battesi contr’à i so fratelli di i paesi. A manuvra parse funziunà qualchì mumentu, chì i paesani ùn fecinu più nunda, finchè un paesanu di Castineta chjamessi à l’assaltu.

Tandu principiò l’assaltu di Bastia .

I paesani, pocu armati, ma assai numarosi, entronu in cità cù a forza di l’addisperu è a sperenza d’un avvene migliore per elli è i so zitelli. Malgradu a forza di i cannoni è di i fucili genuvesi, chì ne tumbedenu è ne feriscinu assai, elli perseguinu a so marchja in i carrughji bastiacci, pruvendu dinù, à cunvince i Corsi di Bastia di raghjunghjeli.
In lu frà tempu, a risposta si messe in piazza, è e barruffe diventonu più viulente. I ribelli paesani, resi accaniti, s’impatruninu di l’arme ch’elli avianu tantu bramatu, ma dinù di riserve di cibu, è di soldi. Parechji Bastiacci pruvonu à fughje in battellu. Bastia si ritruvò in vera situazione di guerra civila.

Puru ùn durò. À a fine di a ghjurnata di u 19 di ferraghju, ghjunse, inaspettatu, u vescu d’Aleria, Mgr Mari. Ellu riescì à fà accittà à u guvernore Pinelli un amnistia generale. D’un altru latu, riescì dinù à calmà i ribelli, adduniti versu u Cunventu Sant’Anghjulu, chì in magiurità, rivultonu in i so paesi u 20 di ferraghju, mentre chì unipochi, minuritarii, perseguinu l’assaltu.

I ribelli si ne riturnonu in paesi, ma u sintimu insurezziunale corsu era natu, è ùn si pudia più piantà. Malgradu a morte di Pompiliani in a battaglia, è malgradu chì tuttu ùn si fussi micca passatu cum’elli l’avianu vulsutu i paesani, a prova era stata fatta chì a forza di Genuva ùn era invincevule. U stintu corsu ùn si pudia più tace, è parechji Corsi, da i più umili à i più ricchi, avianu capitu chì qualcosa era natu ch’ùn si pudia più annegà, è ch’elli vulianu esseci. À pocu à pocu, a cuscenza d’una nazione s’era sviluppata, dapoi tanti seculi, è d’un colpu, paria quasi di vulè infine fàssi realità. A marchja nant’à Bastia, ch’ùn era prima chè una marchja di prutestu contr’à a rapacità di i percettori, avia permessu di fà schjattà tuttu. U scrittore anonimu, di a famosa canzona « A Palatina », l’avia capita. Cosa pinsà nant’à sta bella canzona anziana, scritta nant’à st’avenimenti, chè i scrive cusì bè, di manera cusì puetica, senza dimenticà a cuscenza naziunale corsa ? Ùn sò, ma u dibattu hè apertu.

A lotta ùn facia ch’e principià per cunduce à l’organisazione d’una nazione corsa ch’ùn era ancu nata, mancu in a mente di tutti. A ribellione diventò resistenza, a resistenza diventò guerra, è a guerra devia finalmente duvintà indipendenza