Ghjocu incù u focu

Principiaraghju à pruvà
Ùn riesciaraghju pocu

So chi ghjocu cu qualcosa
È sta cosa hè u focu

Mi prisentu so giovanu
Circione sà quale socu

montemaiò a écrit:

Principiaraghju à pruvà
Ùn riesciaraghju pocu

So chi ghjocu cu qualcosa
È sta cosa hè u focu

Mi prisentu so giovanu
Circione sà quale socu

Caru amicu balaninu
Aghju intesu e to canzone
Ma avà in puisia
Ti facciu sta cunfissione
Montemaiò u cugnome
Era di u me babbone

Vogliu salutà a prova
Di l'amicu liceanu
À sta rima nova nova
Li vogliu porghje una manu
Sappiate chì avia un ziu
Cugnumatu Montepianu

a risposta m'intaressa
ancu di piu u cugnome

hè bellu cum'u paese
ancu s'ellu ùn hè paesone

ti dicu ghjustu sta cosa
avii un grande babbone

Calcosa t'aghju da dì
Annant'à u me babbone
Chì di taglia t'assicurgu
Ùn era un umatone
Ma a casa ind'ellu hè natu
Hè accant'à un pentone

salutu à Montemaiò
cù le so rime parfette
à fà puesie è rime
vecu ch'ellu ci si mette
hà capitu lu sistemu
prestu in quatt'è trè sette

qual'è tù sì o puetu
à dilla franca ùn la sò
ma sappia solu un affare
ben'ch'e venissi d'altrò
u mio cugnome anch'eu
u tengu d'u mio babbò

per ciò chì tocc'à lu focu
t'aghju da palisà sti fatti
è tandu t'arvidarei
chì li mio versi ùn sò matti
caru ùn lu stuzzicà tantu
ch'è t'ùn appia da brusgiatti

Mi n'arvecu o Caparrittu
Chì a to musa ùn hè matta
U versu hè bellu dirittu
Ogni strufata hè ben fatta
Ma s'ellu piccia u focu
Circione ghjugne è l'ammatta

Voli sapè nantu à mè
Vocu sempre à a scola

Sò di sessu masculinu
Ùn sò micc'una figliola

È u mo arcibabbone
Hà cantatu "Minicola"

scusatemi s'e sò longu
ma facia una sarrenda
è u tempu ch'e mi lavi
è ch'e cambii di mutenda
hè passata una stonda
o zitè senza ch'e venga.

o caru Montemaiò
vecu d'induv'è tù sbocchi
cù le to improse distinte
tù ùn esci da li solchi
seguitendu u tracciatu
di li t'antenati Rocchi.

u to purbabbone o caru
cù la so voce tarcana
hà fattu trimà li cori
di una Corsica sana
quandu chì li so figlioli
eranu in terra luntana.

minicola, u mio mulinu
ritornu è u mulatteru
ribumbonu in i paesi
corsi o puru à lu strangeru
tinendu u stintu d'un populu
spapersu ma sempre interu.

allora o montemaiò
sta lascita cusì greva
mantenila à tutte l'ore
chì ghjè toia è micca mea
è fà di modu o amicu
d'assicurà à rilleva.

incù tè caru Circione
ùn mi facciu più pinseru
soca ai ottenutu
un diplomu di pumpieru
s'ellu scappa u focu allora
sò ch'è tù sì di mistieru.

ma sappia chì ci hè un focu
chì mi scalda è chì m'ammusa
ùn ci hè bisognu di legne
chì l'intrattene a mio musa
è notte è ghjornu à tutt'ora
in la mio anima brusgia.

a so fiara cusì chjara
mi face lume una cria
accopiia parolle è rime
poi m'insegna la via
d'una manera currente
di la vera puesia.

ùn sò s'è sta fiamma ardente
spegnela un ghjornu si pò
ch'hè agradicata in mè
'gni locu da cim'à inghjò
è sò sicuru o Circione
ch'ella luce in tè dinò.

Vecu ch'è tù cunniscii
Famiglia è mo babbone

Sai che socu di Rusiu
Locu di l'arcibabbone

Pigliaraghju a rilleva
Ma ùn aghju cà u so nome

Caparrittu a écrit:

incù tè caru Circione
ùn mi facciu più pinseru
soca ai ottenutu
un diplomu di pumpieru
s'ellu scappa u focu allora
sò ch'è tù sì di mistieru.

Tuttu avà capiscu megliu
Quandu sentu a to cantata
Chì l'altru ghjornu à Circione
Aghju trovu à bor di strada
Incù l'acciarinu in manu
Si facia una pisciata

Eiu era andatu à marchjà
À fammi dui ritratti
Vi ne faria prufittà
Avà postu chì sò fatti
Ma vistu a qualità
Hè megliu à teneli piatti

Mancu per fà e sarrende
Ùn sò tantu ammanugliatu
Osinnò possu pratende
Ch'e t'avaria aiutatu
Infine lascemu corre
Postu chì ùn m'ai chjamatu...

Ma vultemu à u sugettu
Di e calusgine accese
Vulinteri quì t'aspettu
Incù e mo bracce stese
È d'accatizzà stu focu
Saranu e nostre imprese.

À ditti a virità
Eiu ùn sò tantu fieru
Chì ùn l'aghju ancu à passà
U diplomu di pumpieru
Ma ùn contu d'ammattà
Un focu cusì sinceru.

erbaghju a écrit:

Tuttu avà capiscu megliu
Quandu sentu a to cantata
Chì l'altru ghjornu à Circione
Aghju trovu à bor di strada
Incù l'acciarinu in manu
Si facia una pisciata

Avà vecu chì l'Erbaghju
M'invita à u mio ghjocu
Acciarini n'aghju un paghju
È trè petre battifocu
Circione hè ben'allivatu
È ùn piscia in ogni locu

À stu ghjocu o camaratu
Ùn ti lasciaraghju solu
Ch'arimane m'hà cuntatu
Un pumpieru in Niolu
Chì i toiu u "caucciù" <=
Paria un innacquaghjolu

U caucciù ch'è tu dici
Mi dispiace ma hè prumessu
I pumpieri di Parigi
D'aostu u m'anu chersu
È sarianu felici
D'avenne unu listessu

U pruverbiu hè santu è ghjustu
Sempre a virità ci sciacca:
"Caucciù quand'ellu hè mollu
Ùn tene arrittu è si stracqua"
Diciaranu sti pumpieri
Chì Circione hà tortu l'acqua

Aghju tricatu à risponde
Perchè l'affare hè suspettu
U ghjargalu trà le sponde
Pò sorte da u so lettu
Invece di torce l'acqua
Vogliu torce u sugettu...

Vecu chi i spenghji focu
Cumencian'à spenghje tuttu

Qual'hè chi li hà chjamati
Ci hè tutt'u mondu mutu

Forse stà fume è fiamme
Per chi piu nimu stà zittu

Per rinvivisce u focu
Basta à lampà a legna
Tuttu u mondu stà mutu
Tuttu u mondu si segna
Eiu ci portu a fiamma
Per ùn pientà a to chjama

Quì lampà voli una legna
À mezu à i versi posti
Soca tù in puesia
Voli cambiacci in arrosti
Mentre chì u focu hè spentu
In fatti di "scritti imposti"

Ùn ti sè micca scurdatu chì l'ultimu sugettu l'ai prupostu tù?? :twisted:

In fatti di scritti imposti
S'hè prestu spentu u focu
Ma ùn t'inchietà amicu
Piccierà in ogni locu
È attenti ch'in cucina
In trè tempi eiu m'affogu

Ma s'o rinviviscu u focu
Cun suffiettu è calisgina
Ùn tenerà tantu tempu
Ùn simu ancu d'estatina
O Circiò dimmi ch'aspetti?
Lascia cascà a calcina

Ùn la facciu micca apposta
Credi puru sò afflittu
Pè a puesia imposta
Mi sò statu bassu è zittu
Aspittendu una pruposta
Di l'amicu Caparrittu

Di l'amicu Caparittu
Tù aspetti a pruposta
Ma ùn ai ancu scrittu
Nant'à quella ch'aghju posta
Però sè quessa ùn t'inspira
Cambiemu puru di mira