Lingua è cultura corsa
 
AccueilAccueil  FAQFAQ  RechercherRechercher  MembresMembres  GroupesGroupes  S'enregistrerS'enregistrer  ConnexionConnexion  

Partagez
 

 Vangonu persu - Maestru Littlewhite

Aller en bas 
AuteurMessage
Amministratore
Amministratore
Amministratore

Messages : 43
Date d'inscription : 27/02/2012

Vangonu persu - Maestru Littlewhite Empty
MessageSujet: Vangonu persu - Maestru Littlewhite   Vangonu persu - Maestru Littlewhite EmptyMer 5 Sep - 15:00

Vangonu persu


C’era nanzi un sonniu chì purtaia l’omu versu i stiddi. Fighjulaia in celi è ci si traspurtaia, sicuru d’avè un distinu. Firmarà inveci à strascinassi in tarra. Viaghjarà à rampaconu pà l’eternità. Turrarà un varmu senza cuscenza.

Aghju viaghjatu in i bassuri, battutu i paesi è i cità. Sò tutti morti. O duvariani. In un anzianu magazenu d’armi, aghju buscu un fucili ch’ùn era statu furatu. Un automaticu à cinqui colpa chì u patronu s’era piattatu. Da chì l’avia piattatu ? Ùn la so. Ma i latri ùn l’ani micca trovu, ‘ssu fucili, inveci chì eu sì. I cartucci, l’aghju trovi quà è ddà, visitendu i casi abbandunati. Certi volti sapiu indu circà. In un’ antra vita aviu avutu l’amici cacciadori. Faciu com’è s’e andaiu à rèndali una visita. Ma l’amicu ch’e’ circaiu ùn c’era più, o truvaiu un catavaru cattusciatu in càmara, è inveci di sparta u caffè o l’acquavita, mittiu a casa suttisubra. È à spissu truvaiu ciò ch’e’ disidaraiu. Cartucci aghju dittu, ma ancu i buttiglioni d’ogliu pà intratena u fucili, i taccona pà asciuvà u cannonu, a limaglia di farru pà caccià a rùghjina. Ùn so ma sciutu senza avè ringraziatu. Senza avè fattu u signu ‘lla cruci.

Dopu turraiu à u salvaticumu. Mittiu à capu in sù, versu u me rifughju. Dui ghjorna di marchja da u cantu ‘llu mari, strascinendu a robba è piattèndumi à ugni trostu. Avariu pussutu scedda n’importa chì casa di paesu, è fanni u me casteddu. Ma parichji volti l’aghju visti arriundà, bàrbari, parichji volti aghju avutu à schisgialli. À salvà u me coghju. Aghju capitu chì l’umanità, a vera umanità, era sparita. Ciò chì firmaia agia da predatori, o viaghjaia senza cuscenza, aspittendu a morti.

Erani i primi essari ch’e vidiu dipoi ùn so quantu tempu. Aviu viaghjatu suvitendu a strada, forsa dipoi quindici ghjorna. Erani sfatti, sfacciati da i mutazioni genetichi, duvintati altr’affari. Una donna è un ziteddu, à l’orìgini. A donna pisò u so sguardu vitrosu in a me dirizzioni. Pensu ch’ùn mi vidia micca. U ziteddu ùn duvia avè trè anni. Era appiccatu à u pettu di a donna, com’è par sùghjala. Ma u pettu ùn era più chè una firita da indu pindiani i ghjeppi sanguinosi. I pùppuli, i s’avia manghjati u bardonu famitu. L’aghju lacati tremindui, l’aghju lacati agunizà annant’à u catramu buddenti. È aghju missu à capu in sù.

U vangonu, l’aghju circu i sittimani, i misati intrevi. Socu surtitu di strada, pà avvinghja in i loca i più scabrosi. Avanzaiu in a tiria achiendu com’è a vulpi. Mi so alluntanatu da i paesa, da ciò chì firmaia di ‘ssu mondu in ruvina. Mortu di siti, mi so lampatu in una vaddi abbuscata. In fundu di a vaddi ci aghju trovu a machja a più zippa ch’e pudiu imaginà, è po una vadina chì curria. Nisciun violu pà lungà a vadina. Da unu scoddu à l’altru, socu ricuddatu. U più ch’e pudiu. Di i volti, una grossa vitta impidia di passà, m’impuzzaiu suttu è passaiu in i ciottuli, circhendu di tena u me saccu for d’acqua, cù una mani. Eru in fundu di l’abissi, intuntitu da veru, à scappà faccia à i pistìcciuli d’un mondu abbassatu. Ma aghju cuntinivatu à avanzà, forsa parchì più nienti mi minacciaia. Più nienti di carri è d’ossa. È mi socu infrugnatu in quissa furesta scura, paria d’annuttà in pienu ghjornu, i frondi mi tappaiani u celi. Sin’à passà sta sèguita di scialbali, sti pisci chì faciani un curridori in a muntagna, una infilarata di vòiti naturali zuccati in a scadduliccia chì pariani unu scalandronu pà i tonti. Un dirrucatoghju chì solu u fughjitivu u più addispiratu di u mondu avaria pruvatu à varcà. Ma più tontu chè mè à quiddu mumentu pricisu, più addispiratu in l’universu sanu ùn esistia micca. È quandu socu ghjuntu infini da subra à i pisci, dopu à l’ori di caminera in infernu, tuttu u paisaghju era cambiatu.

A machja tenebrosa è i licci storti scuntraiani a pineta. I pianizzoli s’apriani davanti à mè, annant’à parichji piana. Ancu a vadina paria più pulita, è l’acqua curria da una vasca à l’altra senza impittà in i matrali di tronchi sciappati è di murzu vilanosu. U tarrenu duvintaia pratichevuli, è oramai u vangonu si palisaia à a me vista, prutettu da i cristi alti d’un cìrculu virtighjinosu. Da una ribba à l’altra, aghju viaghjatu in ‘ssu valdu schjariatu, ‘ssu locu binidittu chì mi paria com’è un pezzu sminticatu di l’antica Laurasia, è socu ghjuntu infini à a scarpiccia, infranchevuli, veni à dì u puntu u più altu induva si pudia avanzà in u vangonu.

À u pe’ di a scarpiccia, i cantoni erani disposti com’è par cinghja una tarrazza piana indu criscìa una arba di razina. Calchì buttissu cumparia quà è ddà, ma a vista purtaia sin’à u principiu di a furesta ch’e viniu di varcà. Sciddiu dui fila d’acqua chì nasciani da un partusu, è chì curriani à fà ingrussà a vadina chì m’era stata un traghjettu. Daretu à mè, i presi alti, i reschi abbissali mi prutighjiani. Nimu vinaria da ‘ssa parti quì. È nimu mi pudaria susprenda affacchendu da u fiuminali s’e stallaiu quì u me azzonu.

Riflittindu un pocu, nimu mi susprindaria mai, infatti, parchì nimu vinaria mai quì, indu l’omu ùn avia lacatu vistighja à u tempu di u so splindori. U locu era ìnditu, com’è vèrghjini in tuttu. Ed era diffìciuli d’imaginà chì i brìsgiuli d’umanità chì si strascinaiani malamenti in i ruvini di i cità, circhendu i varmi à manghjà sutt’à i sciappi rughjinosi, lippulendu l’acqua di i cundotta com’è lubbi à l’agunia, pudissi mai pinsà à vena quì à sbuscammi. Aviu marchjatu guasgi dui ghjorna dipoi ch’aviu lacatu u cantu ‘llu mari, è da dund’e’ eru, u mari ùn lu vidiu più, è mi paria cussì lògica chì nimu vidissi u me focu da i bassuri. Allora sì, m’eru inchjuvatu in u locu u più persu ch’e aviu circu, m’eru imprighjunatu in ‘ssu cìrculu scantatu da l’universu, ma viniu di truvà – pò dassi – u solu aggrunditoghju di paci pussìbuli chì esistissi sempri. Incagnatu quì, trà i cantoni di u pe’ di a scarpiccia, mi pudiu cuffà infini com’è in un nidu, è arripusammi, è appruntammi à cuntà infini ciò ch’e sapiu di u mondu. Cuntalla à u ventu chì buffulighja, è à i bèdduli è i riccia di a chjarina. Si mai a vodda li vinissi di parturiscia i generazioni novi di bèdduli o di riccia. Tandu, è tandu solu, mi dicisi à campà in u vangonu.

A prima sera in u vangonu, aghju sbiutatu u me saccu è cuntatu ciò chì c’era à drintu. U più impurtanti l’aviu vintu ghjuchendu a me vita, scumbattindu in i ruvini di i supermarcati cù certi èssari chì spiritaiani i loca com’è veri fandonii. S’iddu m’era statu ùtuli u me automàticu ? Forsa sì. Mi c’era vulsutu à puliscia i curridora è i rangati parichji volti. À longa cussì, par ùn essa toccu da u sangu chì schizzaia, ùn irrisicà micca a cuntaminazioni. S’e mi sintiu un assassinu ? Ùn avia mai tumbu à nimu. Nimu chì avissi miritatu di purtà sempri u tìtulu d’èssaru umanu. Lampaiu animali, criaturi avviliti da a malatia, i malfurmazioni, lacciarati è abruttiti da a frebba. U più suventi, vidiu una mora di mostri chì si battiani trè iddi, litichèndusi è ammazzèndusi pà calchì scàtula avvariata. Mi bastaia à tirà à l’imbusca, è i dui o trè supraviventi scappaiani à a lestra pà spariscia in calchì tafonu trà i ruvini di béton è di farragli. Ma lacaiani poca robba. È u restu erani i paciaghji chì u si piddaiani.

Quissi battiani in banda, in generali. Armati sin’à quì. Cunnoscia da veru u so tarritoriu era guasgi impussìbuli, chì a più parti muviani da un locu à l’altru, da un paesu à l’altru. Certi gruppi aviani furatu l’essenza è d’erani mossi cù i barchi, pà l’altri ìsuli o u Cuntinenti, qual’ a pudia sapè ? Vultati ùn erani vultati, o allora par fassi intazzà à a sbarcata, è spariscia cù a so stodia. Vardammi da i mutanti era un sunniacciu, ma accant’à i paciaghji ùn era nudda. I paciaghji erani l’infernu.

Da luntanu, i suvitaiu cù i canuchjali. Si pudiani aggruppà à trè o quattru, o più. A più grossa banda l’aviu scontra in i ruvini di a cità. Setti òmini è quattru donni. Ziteddi micca. Ma i ziteddi si vidiani raramenti. Troppu dèbbuli. Sia erani tutti morti cù a cuntaminazioni, ch’ùn pariani di suppurtà, sia l’aviani tumbi i scampati. Pochi ziteddi mutanti, dunca. Fora d’unu ch’e aghju ghjà mintuvatu, ma vistu pocu nanzi à a so agunia, cù a mamma. L’altri ? Ùn vuliu mancu sapè ciò ch’iddi erani duvintati, annant’à chì brasgera aviani finitu. A banda di l’ùndici l’aviu schisgiata parichji volti. I sapiu crudeli par avè scupartu i salmi di i so predi. U capu tassiddatu di baddi, o sbundatu à mazzati. Parchì aviani sceltu ‘ssa strada ? Credu ch’ùn c’era risposta. In ‘ssu mondu vastatu, a civilizazioni era un vechju ricordu, è a natura primiera di l’omu avia certamenti ripresu a subrana. Una natura suzza, chì u lùccicu di millai d’annati di cultura avia mascaratu. U mondu ‘sendu duvintatu ciò ch’iddu era duvintatu, ùn c’era forsa più bisognu di fà necci. I pulsioni di l’animali suvitaiani a fini di a bucia, a fini di a sucità, a fini di a rilighjoni. Malfiddassi di l’altru, scuncassallu in casu mai, scantallu da u so tarritoriu, a leggi era cussì, oramai.

C’era dinò un altru gruppu di trè òmini. L’aviu vattati un tempu, spirendu d’intigrà a so squatra, di truvà un rinforzu, una cumpagnia. Ci n’era unu più forti chè l’altri, i battia, i duminaia. Una sera, m’eru impustatu annant’à una tozza pà surviglià u so campamentu. Mentri chì unu facia a vardia, aghju vistu chì u capimachja si sirvia di u più dèbbuli. U piddaia à ghjacarinu. Mi so alluntanatu par sempri. In u tempu ch’e l’aghju suvitati, aghju vistu ch’iddi schisgiaiani anch’iddi a banda di l’ùndici. Erani intruti in un anzianu magazenu di vistiti, circhendu di buscassi calcosa pà rimpiazzà i so mutendi frusti. Una cavalcata s’era intesa in u carrughju, è i trè erani scappati com’è topa, à piattassi daretu à un muru. Pocu dopu, trè òmini à cavaddu erani passati, trè di a banda di l’ùndici, armati cù fucili di guerra, lachendu pindicà à i briddi di i so munturi i capidderi sanguinosi di i so vìttimi. Erani passati senza veda i trè topa ch’erani piattati. Ùn m’aviani vistu mancu à mè, aggrundatu ch’e eru à l’ùltimu pianu d’un casamentu arruvinatu. I cavaddi erani narbosi, ma l’òmini ùn fecini casu. Erani i soli à ùn malfidassi più. I novi maestri, aghju pinsatu à modu spuntàneu.

Avali mi tocca à parlà di l’animali, postu ch’e aghju evucatu u fattu chì l’ùndici t’aviani i cavaddi. N’era pà l’animali, infatti, quant’è pà l’òmini. A cuntagioni i tuccaia ancu ad iddi, è l’avia guasgi tutti stirminati. È i pochi ch’erani firmati si faciani tumbà. Sia par via di a fami, sia pà spazzà i cuntorna di ‘ssi bestii orrendi ch’erani duvintati. U più ch’e timiu eu, erani i ghjàcari, turrati guasgi tutti à u salvaticumu. Mutanti o nò, ma sempri famiti è priculosi. Subratuttu chì i soli ad èssasi mantinuti erani i razzi un pocu forti. Tutti i razzi di ghjàcari minori erani spariti, ma accadia à spissu di scuntrà un grossu ghjàcaru agrissivu. Chì vattaia, agguattatu in calchì catagnonu, è circaia di saltà in coddu à quissu ch’ùn la s’aspittaia micca. Aviu ghjà trovu i catàvari mezi manghjati, imaginatu di chì manera ‘ssi disgraziati s’erani abbandunati à i sanni di i fali. À mè dinò, m’era guasgi successa du’ o trè volti, ma ugni volta eru statu più veloci chè u me agrissori, è aviu sparatu nanzi di fammi murzicà. Ci vulia à tirà, subratuttu, nanzi chì l’animalu avissi pussutu tuccà, chì a cuntaminazioni passaia dinò par iddi, a sapiu. Una volta tumbu, circaiu quantunca di veda sì a bestia era sana. Una bestia sana si pudia manghjà, piddendu un rìsicu, ma una bestia dubbitosa era meddu à lacalla mirzà. Suventi, d’altrondi, è postu ch’e parlu di carrimasciu, m’eru inchiitatu di sapè sì i muschi, i zìnzali, pudiani purtà a cuntaminazioni. Parchì s’e pudiu parà i ghjàcari salvàtichi, ùn pudiu parà i punghjituri di l’insetti. Ma ùn m’aviani datu par avali chè brusgioli, è n’aviu ritiratu a lizzioni chì ‘ssi rubbacci ùn ispartiani micca a stessa diminsioni di dannazioni chè a noscia. Faciani parti d’un altru chjirchju. È, irunia di l’evuluzioni, u sapiu avali supiriori.


Maestru Littlewhite
Revenir en haut Aller en bas
Voir le profil de l'utilisateur
 
Vangonu persu - Maestru Littlewhite
Revenir en haut 
Page 1 sur 1
 Sujets similaires
-
» Malidizzioni-Maestru Littlewhite

Permission de ce forum:Vous ne pouvez pas répondre aux sujets dans ce forum
ISULA :: Quandu l'inchjostru sumena :: Bloghi è fori literarii :: The Old Pievan Chronicle-
Sauter vers: