Lingua è cultura corsa
 
AccueilAccueil  FAQFAQ  RechercherRechercher  MembresMembres  GroupesGroupes  S'enregistrerS'enregistrer  ConnexionConnexion  

Partagez | 
 

 Acquaviva Jean Yves

Voir le sujet précédent Voir le sujet suivant Aller en bas 
AuteurMessage
Amministratore
Amministratore


Messages : 43
Date d'inscription : 27/02/2012

MessageSujet: Acquaviva Jean Yves   Sam 13 Oct - 15:40

Puesia dedicata à 'ssa razza cusì sparta per i nostri paesi è cità... I mittò.


MONTASEGA


Batt’à nant’à u mio pettu
Una catena in oru
Trè chilò di pesu nettu
Cuntendu a testa di moru
Iè sò bellu cum’un camiò
Iè, fieru cum’un papachjò
Sò omu di grande classa
Forse un diu fattu umanu
È tutta quella chì passa
Mi pizzica in la manu
Iè, piattate e vostre moglie
Iè, ch’ogni fiore hè da coglie

Sò un veru dizziunariu
Un pistellu, una putenza
Un tippu strasordinariu
Tratechju à intelligenza
Iè, sò tuttu ciò chì si sà
Iè, ma ùn possu palisà
À mè s’è vò mi circate
Pinsate à i vostri denti
Chì dopu e mastucate
Vi cacciaranu I pienti
Iè, eiu I facciu falà
Iè, I colpi senza cuntà

A paghjella ô zitè
L’aghju invitata eiu
L’altri si mettenu in trè
Eiu solu facciu megliu
Iè, à cant’à mé Pavarotti
Iè, ùn vale trè pomi cotti
Camisge ne aghju centu
Ma ùn ne portu chè una
Ci vecu anc’à lume spentu
Sò ghjuntu à nant’à a luna
Iè, à cavallu à e bugie
Iè, mi tracciu tutte e vie…



Dernière édition par Amministratore le Sam 13 Oct - 16:02, édité 1 fois
Revenir en haut Aller en bas
Voir le profil de l'utilisateur
Amministratore
Amministratore


Messages : 43
Date d'inscription : 27/02/2012

MessageSujet: Re: Acquaviva Jean Yves   Sam 13 Oct - 15:40

IN SOGNU

Qualchì volta in sognu mi ne vogu asgiatu
À visità ‘ssi lochi persi nu e mimorie
È vecu torna luce a stella di u passatu
È move tal’un fiume l’onde di e so storie

È vecu l’omi inseme affaccindati in l’aghja
Spulendu ‘sse granelle chì turnaranu pane
È mi vene a fiura d’una banda ch’impiaghja
Quandu arreghje infine, l’estate, e so calmane

Vecu sopra à e rate u celu infumicà si
L’alivi carchi mensi di e frante à vene
E fere insumate attippendu à i chjassi
È a ghjente accolta da sparte gioie è pene

Mi si parenu vive l’uparate, e chjame
Quandi unu facia a forza di tant’altri
Ci era ancu poca robba, i vezzi eranu brame
Ma l’amore curria frà tutti à passi sgualtri

Ùn aghju nustalgia chì ùn l’aghju campata
‘Ssa vita forse cruda ma di quelle serene
È sò chì l’alma meia ci s’hè arradicata
Chì canta e so stonde viaghjendu à l’avvene…


Revenir en haut Aller en bas
Voir le profil de l'utilisateur
Amministratore
Amministratore


Messages : 43
Date d'inscription : 27/02/2012

MessageSujet: Re: Acquaviva Jean Yves   Sam 13 Oct - 15:43

Un'antra addattazione, HOTEL CALIFORNIA di u gruppu Eagles


A bella sulana

Una strada diserta, u ventu chì và
Viaghjava à l’incerta frà i fiori à sbuccià
Vide in u luntanu,una luce trimà
L’ombra di Ciprianu mi ci fece cansà
Ella, stava custì, cum’è fissa à l’eternu
Eiu ùn sapia dì : paradisu o infernu ?
Mi pigliò per a manu è m’insignò a via
Cum’in un sognu stranu una voce dicia

Veni à scopre a bella sulana
O chì bellu mondu
Chì visu giocondu
Veni è stà ti à a bella sulana
Ùn sai perchè
Ma a to piazza ci hè

Era à pinsate torte, bella cum’un albore
È avia una corte d’omi scemi d’amore
Ne ballavanu tutti, certi per sminticà
D’altri in brama di frutti d’un estate à invintà
Cherse à u capitanu un entica di vinu
Ma l’aspittò in vanu u liquore divinu
È sempre quelle voce à chjamà mi quallà
Sempre per purtà in croce l’ore di u sunnià

Veni à scopre a bella sulana
O chì bellu mondu
Chì visu giocondu
Tanti sò à a bella sulana
À gode a vita
Serena è gradita

Sò i muri allattati à culori di rè
È simu imprigiunati da u nostru piacè
menanu e cultelle arrutate è tagliive
Ma ‘sse bestie crudelle fermanu sempre vive
È mi vene à mente c’o circava à scappà
C’à mezu à a mio ghjente vulia riturnà
Disse u varghjianu simu quì per accoglie
Poi andà luntanu ma a leia ùn si sciogle

Veni à scopre a bella sulana
Ci hè una funtana
D’acqua fresca è sana
Veni è stà ti à a bella sulana
Beie à ‘ssa funtana
Ma per a vita sana…




U mio amore


Hè di stonde rivolta, di mumenti fingardi
Per fighjà l’orisonti s’azzinga à i to sguardi
Quelli sguardi prufondi chè tù sai lampà
In ‘ssi pozzi turchini mi ci vogliu annicà


Toglie da u to core una luce nuvella
À tempu li hè u sole, a luna è una stella
Parturisce e nuttate di i sogni carezza
È cù u to surisu ammazza a tristezza

Hè cum’è a muntagna chì ogni neve alliscia
Cantendu li l’inguernu è a so bianca striscia
Cum’è ‘sse case vechje ch’ùn anu più età,
Petra à petra arrizzate da esse eternità


Per francà si i freti di i peghji timpacci
U mio amore s’asconde à mezu à i to bracci
Viaghja à passu toiu appesu à e to lapre
Da varcà si e bocche di l’avvene chì s’apre

Da cantà u mio amore mille versi ci vole
Centu mila filari scelti in e to parolle
Vinti stagione à l’annu è campà le cù tè
Seculi fatti stonde d’un immensu piacè…




A GIUVANOTTA È U RÈ

Era una bella zitella
Un fiore di giuventù
Lucia quant’una stella
È forse ancu di più
A so vita era un fiume
D’asgiu di risa è di ghjocu
Ma sottu à tantu dulciume
U so core era di focu

A si brusgiavanu l’ore
Bastendu li i piacè
Si sintia pronta à more
Per l’amore di un rè
Ellu ùn avia primura
Di l’ochji d’una zitella
Di ‘ssa luce cusì pura
Chì risplindia in ella

Era colma à tenerezza
Quant’ellu pò esse un fiore
Ella era tutta carezza
Ellu ùn era chè furore
Eiu à son’di ghitara
Aghju dettu à ‘ssa zitella
Quantu a tinia cara
Quantu a vidia bella

È poi un bellu un bellu ghjornu
L’aghju chjappa appalamanu
È senza spirà ritornu
L’aghju purtata luntanu
È ‘ssu fiore di vaghjime
Tralasciatu da u rè
Eiu incù e mio rime
U m’aghju coltu per mè…


Revenir en haut Aller en bas
Voir le profil de l'utilisateur
Amministratore
Amministratore


Messages : 43
Date d'inscription : 27/02/2012

MessageSujet: Re: Acquaviva Jean Yves   Sam 13 Oct - 15:45

Sorte bandita

Era mele a mio vita
Un fiume d’onde ligere
Si ne scurria gradita

Giuvanottu spinsiratu
À l’asgiu d’ogni pinsere
A mi gudia sepiatu

Pastore per e muntagne
Passighjava in libertà
È l’ore eranu cuccagne

Puetu era à e volte
È sapia sunnià
Dumane à rime sciolte

Mi piacia à stuzzicà
U core di e zitelle
Di u mio dolce cantà

È m’era ancu inamuratu
D’una stella frà e stelle
Pronta à luce à u mio latu

Mi ci vidia digià
Ella, eiu è un figliolu
Ortu bellu à innacquà

Una casa assulanata
Per e valle di Niolu
Da tant’amore scaldata

Ma ne fù un’antra sorte
Chì a vita per mè scrisse
Cù a so penna di morte

Fù un ghjornu à l’albore
Chì pianu, babbu mi disse
Ci vole ! Hè per l’onore…



Monte Cintu

Accunsente à u sguardu quellu orisonte spachju
‘Ssu celu spalluzzatu da vede à l’infinita
Accunsente à sapè chì da l’alba à l’attrachju
A vecu, smisurata, a meia l’invistita

Sò eiu u più altu, eiu u più supranu
È regnu da tant’anni nant’à l’isula bella
Di quelli lochi amati ne sò u varghjianu
Mi chjamu Monte Cintu, sò muntagna ribella

Mi chjamu Monte Cintu aghju duie surelle
Artica è Minuta, punte insannicciate
Di a mio vita sò l’eterne sintinelle
Affiancate da sempre è per sempre affiancate

Sò u monte tarcanu, cintu da tanti amichi
I so nomi Pardatu , Capu Larghja o Ciuntrone
Sò u rè rispittatu frà tutti l’alti spichi
I mio principi sò Ritondu è San’Petrone

Mi chjamu Monte Cintu, stò vicinu à e stelle
Quassù, à l’aria fresca, quassù pè l’alte sponde
È cù i mio cumpagni e ci passemu belle
Dolce, calme è sirene e stonde è pò e stonde…




L’altru versu


Vogliu tuccà cù l’ochji ciò chì a manu ùn sente
È vede l’altru versu di cose tralucente
Sapè e fiure nate da ciò ch’ hè senza esse
Intriccià mi à l’ore chì a tela ci tesse

In ‘ssu mondu di sognu mi ci vogliu affundà
Da esse qualchì sia c’ùn hà realità
Esse nulla è à tempu, tuttu pudè pruvà
Donna, omu, zitellu ancu acellu chì sà ?

Iè ! esse l’altore, vulà sopra à u mondu
Duv’ellu ùn ci n’hè più, nè bè, nè puru male
Vulà, vulà dinù spiritu vagabondu
Apre, chjode è pò apre di ogni virtù l’ale

Quand’in quandu falà è tuccà torna tarra
Lascià mi una cria ‘sse falze libertà
Per esse torna eiu, a mio vita campà
Quant’unque, hè cusì bella, ancu per esse amara…




U mio sognu

U mio sognu cum’è tanti hè natu in i prati immensi
Di quellu tempu graditu quandu a vita era zitella
Tal’un mondu invintatu da allusingà i sensi
Di profumi incunnisciuti è culori à sta più bella

Hè crisciutu mezu à selve zeppe, nere è prufonde
Duve l’alburi tamanti, intricciati di vitalba
Parianu alliscià i nuli cù e so fronde
È adumbravanu l’ore chì l’estate troppu scalda

U mio sognu cum’è tanti hà abbracciatu ogni lotta
Hà suttu à ogni rivolta è bedu à tante surgente
Cù a forza spinsirata di a vita giuvanotta
Quandu u core cummanda è chì a ragiò ùn sente

U mio sognu oghje sì tù è pò lu nostru figliolu
Una fiura assirinata, a luce d’un lindumane
A sperenza di campà senza esse mai solu
È lascià corre a vita à centu mila funtane

Revenir en haut Aller en bas
Voir le profil de l'utilisateur
Amministratore
Amministratore


Messages : 43
Date d'inscription : 27/02/2012

MessageSujet: Re: Acquaviva Jean Yves   Sam 13 Oct - 15:49

Ind'è mè

A campa chì l’eternu ùn si compie dumane
Chì eiu vogliu vede e custere landane
Quelle chì tantu notte mi fecenu vighjà
Oghje cù i moi ochji e vogliu accarizzà

Vogliu vede u sole quand’ ellu avvia in’sù
È scopre ‘ssi paesi ch’ellu scalda di più
À rombu di calmane ‘ssi lochi ch’ellu frusta
Fendu a ghjente mora è a tarra di rusta

Vogliu vede e stese di l’eterna cutrura
Ciuttà mi in u silenziu, a pace cusì pura
Di ‘ssa notte chì campa un paghju di stagione
È dorme sunniendu un antru viaghjone

Èppò di l’oriente sapè ogni profume
Di e meriche luntane vede splende u lume
Varcà mi ogni mare, i calmi è i furiosi
Scopre d’ogni muntagna l’andati petricosi

È mezu à ‘ssi viaghji chjode l’ochji una stonda
Arreghje di li ghjorni a corsa vagabonda
È vultà ind’è mè è beie à ‘sse surgente
Chì da sempre stancionu e sete di a mio ghjente

Chì tanti sogni scemi, chì tanti viaghjoni
I sicreti da scopre l’aghju quì à miglioni
Di ventu, di muntagna, di machja è di stradò
Ognunu più lucente c’à quelli di l’altrò…




L'isula sola

O quantu vuleria scrive chì a mio storia hè di pace
Chì l’albori ch’aghju vistu si sò pisati sereni
Ma à empie a mio mente sò centu mila e strage
È di fiure sanguinose i mio ricordi sò pieni

Aghju vistu tantu volte u mio mondu piccià focu
Per una croce, un spechju o per un palmu di terra
Per una fede, un’idea, per u pusessu d’un locu
L’omi move e battaglie, l’omi dà si à a Guerra

Eiu sò l’isula sola
Locu di tanti sicreti
Un’isulella di fola
Musa di tanti pueti
Sò un’isula sulella
Mi chjamanu a più bella

Aghju vistu à l’orisonte ghjungne tanti battilloni
È i sullati à millaie calpighjà e mio marine
Aghju in core e vinice di ‘ssi tempi bughjiconi
È piengu à fiumi pieni e mio pene senza fine

Da sempre sò stata eiu ogettu di ogni imbliglia
Quella chì omu vulia cumprà, vende o cunquistà
Quella stella ch’in lu celu di più c’à l’altre spampiglia
È c’ ognunu vuleria di e so mani tuccà

Eiu sò l’isula sola
Locu di tanti sicreti
Un’isulella di fola
Musa di tanti pueti
Sò un’isula sulella
Mi chjamanu a più bella

Ma vogliu sperà e crede in un dumane sfarente
Sunnià di l’ore à vene cum’è di tant’allegrie
Vede e so albe chjare è di pace splendurente
Pisà si à l’infinita cum’è in le puesie

È vogliu dì à i mei, à i mio figlioli cari
In un cantu di sperenza, in un’ardente prighera
Di francà mi à l’ora mai di tanti ricordi amari
È di tene caru à mè di più c’à a mio bandera

Eiu sò l’isula sola
Locu di tanti sicreti
Un’isulella di fola
Musa di tanti pueti
Sò un’isula sulella
Mi chjamanu a più bella…




In ogni core

Bella sì cum’è u ghjornu
Quand’ellu hè prontu à sbuccià
È infiarà u cuntornu
Dolce sì cum’è u mele
Chì ne sà inzuccarà
E to lapre è a to pelle

Sì cum’è l’alba
Chì mi scalda
È m’imbriaca
Chì mi cunsola è pò guarisce ogni piaca
In u mio core

Feconde sò e to tarre
Stese immense à suminà
Da coglie e stonde care
Sicrete sò e to sponde
I to catagni à svilà
Tanti sogni sanu asconde

Sì cum’è l’oru
D’un tesoru
Chì spampiglia
È chì acceca à chì u vede, à chì u piglia
In u so core

È per tè ne vogliu scrive
Quant’elle sò dolce à vive
E mio stonde à u to fiancu
Scrive quantu sò fatate
E to ire, e to risate
È pò u to sguardu francu
À u mio core

Sì cum’un fiume
Mossu di sciume
È d’acque pure
Chì si ne fala è inveranisce l’ore sciagure
In ogni core




Un ghjornu di vaghjime

Era un celu tristu cum’è i sà ottobre
Da ‘ssi nuli sculava u pientu di u mondu
Ma à spirà le belle, tante l’albe da scopre
Eranu, omi fieri, di pettu à u sprufondu

Era un ghjornu di vaghjime
Unu di quelli à spulà rime
Era un ghjornu di vaghjime

Eranu di ‘ssi lochi o figlioli d’altronde
Arritti fiancu à fiancu, sottu à stessa bandera
Pronti à more inseme da difende ‘sse sponde
Ancu s’à dii varii facianu prighera

Era un ghjornu di vaghjime
Unu di quelli à spulà rime
Era un ghjornu di vaghjime

U sangue di e so vene hà bagnatu ‘ssa tarra
Sottu à ‘ssu celu tristu dormenu e so salme
Ma u fiume spiranza hè corsu per ‘ssa sarra
È s’hà paratu nanzu quella bestia infame

Era un ghjornu di vaghjime
Unu di quelli à spulà rime
Era un ghjornu in Teghjime…




Treblinka

Di notte è pò di nebbia ne era u viaghju
Mezu à tarre silenziu, immaculate stese
Cù u morsu cutratu d’ un eternu farraghju
Per pate ne di l’omi e pessime offese


Maiò, donne è zitelli imbulighjati è stretti
Mandati da ‘ssi treni à u murtale esigliu
À una sorte indegna, à ghjorni maladetti
Per di l’idee tonte paspà ne u berbigliu


A sperenza ne campa ancu in lu bughju cecu
A voglia di fighjà torna u sole nasce
È mezu à notte è nebbia una luce ci vecu
A vita cerca sempre un pratu novu à pasce


Maiò, donne è zitelli decisi tutti inseme
N’un soffiu di rivolta, brama di libertà
Una volta è pò centu anu accesu di speme
E notte di ‘ss’infernu chjamatu Treblinka


Finite e rivolte, ne ferma u sbilanciu
Parechji si sò morti, pocu ne sò scappati
Ma à tutti l’hè parsu un distinu più danciu
D’andà si ne arritti c’à campà indinuchjati


A sperenza ne campa ancu in lu bughju cecu
A voglia di fighjà torna u sole nasce
È mezu à notte è nebbia una luce ci vecu
A vita cerca sempre un pratu novu à pasce



È po campà

Nasce, cum’è nasce un fiore
In un pratu, à l’albore
Discitatu da l’acquatu

Nasce, cum’è nasce un sole
È scaldà l’anime sole
À un dumane incantatu

È ingrandà

Cresce è cresce dinù
Zitellina è giuventù
Annacquà le à puesia

Esse è po torna esse
Intriccià, filà è tesse
Ogni ora d’ allegria

È po campà, un’ora, una vita
Cum’una ultima sfida
À i celi d’affanni

Lascià si andà, à l’asgiu calamita
Di dulcezza infinita
È lascià corre l’anni

Torna campà

Da fà u mondu più bellu
Circà l’oru d’un anellu
Imbriacà si d’amore

Gode d’ ogni maraviglia
Forse fà si una famiglia
In un pratu, qualchì fiore

È po campà, un’ora, una vita
Cum’una ultima sfida
À i celi d’affanni

Lascià si andà, à l’asgiu calamita
Di dulcezza infinita
È lascià corre l’anni

È po passà…


Revenir en haut Aller en bas
Voir le profil de l'utilisateur
Amministratore
Amministratore


Messages : 43
Date d'inscription : 27/02/2012

MessageSujet: Re: Acquaviva Jean Yves   Sam 13 Oct - 15:52

À l'alba di u sparte


S’è a voce hè sincera s’ellu hè lindu u versu
Cù a musica andaremu à scopre l’universu
Nant’un mare di note da fà ci navicà
È buscà e custere di un novu sunà

Mischiendu e magie di l’acqua è di u focu
Faremu batte quì u core di ‘ssu locu
S’è l’anime sò pure è e mente aparte
Cù a musica andaremu à l’alba di u sparte

Andaremu appesi à e muse diverse
À circà u dumane di e meludie perse
Fendu nasce dinù armunie nuvelle
È po fà le cantà cum’è voce surelle

Andaremu affullati à l’estri di l’ingegni
È faremu canzone di tutti i so impegni
È ‘sse stonde à vene, ‘ssi canti à sunnià
I scrivaremu inseme cù e rime d’avà



In sognu

Qualchì volta in sognu mi ne vogu asgiatu
À visità ‘ssi lochi persi nu e mimorie
È vecu torna luce a stella di u passatu
È move tal’un fiume l’onde di e so storie

È vecu l’omi inseme affaccindati in l’aghja
Spulendu ‘sse granelle chì turnaranu pane
È mi vene a fiura d’una banda ch’impiaghja
Quandu arreghje infine, l’estate, e so calmane

Vecu sopra à e rate u celu infumicà si
L’alivi carchi mensi di e frante à vene
E fere insumate attippendu à i chjassi
È a ghjente accolta da sparte gioie è pene

Mi si parenu vive l’uparate, e chjame
Quandi unu facia a forza di tant’altri
Ci era ancu poca robba, i vezzi eranu brame
Ma l’amore curria frà tutti à passi sgualtri

Ùn aghju nustalgia chì ùn l’aghju campata
‘Ssa vita forse cruda ma di quelle serene
È sò chì l’alma meia ci s’hè arradicata
Chì canta e so stonde viaghjendu à l’avvene…




Zia Lolla

Ci aghju ancu eiu dui passi
Chì vanu à a Pinzutella
Li mi ramentu ligeri
In le stonde cocepella
Cù a mio mamone cara
Zia Lolla è a mio surella

Invece chì quelli d’oghje
Pesanu quante u piombu
Sottu à u sole di lugliu
A nutizia face frombu
È pare c’à l’ora mai
Si senterà u ribombu

Zia Lolla si n’hè andata
À viaghju funerale
N’una strana muntagnera
Senza francà Caprunale
À truvà u so riposu
Quassù à l’altu pughjale

Ne sapia di l’amore
A voce a più sincera
Quella chì perf à si sente
Ùn abbisogna amparera
È chì sbuccia per ognunu
Di cusì bella manera

Oghje u ventu a porti
À ritruvà l’armunia
Cù e so surelle care
Valintina è Maria
U so babbu, a so mama
È tutta a parintia

È ancu s’ella mi pesa
A tristezza di ‘ssu dolu
Mi dicu chì à l’eternu
In u celu di Niolu
Zia Lolla s’hè fatta stella
À cant’à Babbò Tittolu



Corre linda

Corre linda a Gravona
Lesta cum’una canzona
È ribomba in a mio mente

Ribomba di libertà
D’armunia è di cantà
È di voci mai spente

Mi dice l’altu silenziu è le so loche incantate
‘Sse sarre date à u ventu, è duie muvre attippate
Mi soffia e so rivolte, quelle d’eri o d’avà
Dice d’esse sempre aritti, tutti inseme è po marchjà

Corre linda a Gravona
Lesta cum’una canzona
È ribomba in a mio mente

Ribomba di libertà
D’armunia è di cantà
È di voci mai spente

Mi sà dì à rime dolce u culore d’ogni locu
U lagnu di a so machja quandu ci hè corsu u focu
Da fà nasce mille fiure, maraviglia o spaventu
È alliscià i ricordi à u soffiu d’ogni ventu




Qualchì annu fà, simu andati à cantà per sti lochi cari à Circione è Zifranu. Pocu dopu à u ritornu aghju scrittu què.
M'interrugheghju nant'à a sumiglia ettimologica trà "Vallorcine" è "l'orcinu"...



E Vall'Orcine

Arricurdà mi à pena di ‘ssi boschi immensi
Di ‘sse case impetrate da sfidà e stagione
Di ‘ssi prati infiniti, incantu di i sensi
Chì u sguardu assumiglia à un verde marone

Addurmintà mi ancu à mezu à tanti fiori
Visità sunniendu ‘sse cullette, ‘ssi poghji
Rinvivisce in fine i so mille culori
Da fà li sfilà sciolti di punta à i mio ochji

È purtà i mio passi per ‘ssi lochi beati
Duve ogni muntagna pare tuccà u celu
È andà per ‘ssi chjassi è ‘ssi mondi cutrati
Chì a neve hà fasciatu d’un eternu mantellu

Invene mi dinù di a ghjente di quì
Di i so bracci aparti à e nostre canzone
À estru paisanu ùn ci hè bisognu à dì
Basta à esse sinceru per sparte a passione

Campà torna una cria ‘ssa stonda prediletta
Vede un’antra volta paisaghji è cunfine
Gode d’ogni billezza chì a mente aletta
Arricurdà mi à pena di quelle Vall’orcine

È purtà i mio passi per ‘ssi lochi beati
Duve ogni muntagna pare tuccà u celu
È andà per ‘ssi chjassi è ‘ssi mondi cutrati
Chì a neve hà fasciatu d’un eternu mantellu…



Sant'R'Ghjina


Sì di petra zuccata da l’omi è da li venti
I to culori sò quelli chè tù t’inventi
Lascendu fà l’ingegnu di e quattru stagione
Ch’intreccia ombra è lume in una strana unione

Sì di sicreti persi cù l’anime smarite
Di quelli ch’in le fole s’amentanu e vite
Quelli ch’anu spartutu tempi fà e to stonde
Banditi o pastori l’hai sappiutu asconde

Quantu hai vistu ghjente, mancu tù ùn la sai
Ma adopri pacenza è senza stancà mai
Porti u peregrinu à scorbe u Niolu
Cullendu à passi dolci à fiancu à Fiume Golu

Sì di caldu chì brusgia à sin’à a ferita
Quandu à e sciappittane a statina t’invita
Di i to ghjargalelli quandu viranu sbuccia
Si movenu e spisce da U Ponte à cuccia

Sì di cotru lucente à l’ore inguernarecce
Nant’à i to sciappali si spechjanu e trecce
Di ‘sse stelle fughjite induve nimu ùn sà
Elle sò l’infinitu, tù sì l’eternità

Quantu hai vistu ghjente, mancu tù ùn la sai
Ma adopri pacenza è senza stancà mai
Porti u peregrinu à scorbe u Niolu
Cullendu à passi dolci à fiancu à Fiume Golu…



Di rime sciolte

Scrive ghjorni, notte è stagione
Luce o bughjicone
Dì l’umbrie o puru e sulane
Friscure o caldane

Fà canzone d’ogni stundarella
Tinta d’oru o ancu mischinella
Scrive l’ore passate o à vene
À rime serene

Piaghje, monti è fureste prufonde
Stelle è luna bionde
Celu, mare è immensi rinaghji
Sole di mille raghji

Fà canzone d’ogni paisaghju
Culuritu à dicembre o à maghju
Scrive l’ore bianche o verdicante
Di rime tamante

Scrive, cantà, dì
In puesia cusì...

Rise, surisi è carezze sincere
Alma è mente ligere
Zerga, brioni è core à timpurale
Missoghju fatale

Fà canzone d’ogni gestu umanu
Un cuntrastu, una strinta di manu
Scrive l’ore di pace o rivolta
D’una rima sciolta

Scrive, cantà, dì
In puesia cusì...




Eccu una puesia scritta in u 1988, un annu dopu à a morte di Ghjuvan'battista Acquaviva.


A TO VITA

Ùn ci hè più bellu ghjornu c’à quellu chì si pesa
Quandu u marosulellu si chjina nantu a rena
Chì u sguardu si perde in a turchina stesa
Tandu, per una stonda, si strughje ogni pena

Ma tù ùn ci si più à vede ‘sse billezze
Batti d’altre cuntrate, d’altre machje serene
Forse u tempu sparghje e pessime tristezze
Ma u ricordu ferma è corre à l’avvene

Cum’hè chè tù ci lasci
Oghje chì tanti canti fermanu à cantà
Cum’hè chì a to vita ne ghjugne à l’annuttà

Ùn ci hè più bellu cantu c’à quellu c’ùn si sente
‘Sse note silenziose, quelle rime taciute
Sò forse sunniate ma sò cusì prisente
Quandu sbuccisce l’ora di e carezze mute

Ma tù ùn ci si più à risente ‘sse cose
Hai d’altre parolle per scrive e to ore
D’altre strade à sulana, di quelle c’ùn sò chjose
Da e sperenze rotte, cundannate à more

Cum’hè chè tù ci lasci
Oghje chì tanti canti fermanu à cantà
Cum’hè chì a to vita ne ghjugne à l’annuttà

Ùn ci hè più bella stonda c’à l’ombra d’una leccia
Vicinu à un ghjargalellu chì corre chjachjarendu
Senza nisun’pinseru ch’in a mente s’intreccia
Cù u calmu sulennu d’un riposu tremendu

Ma tù ùn ci si più à gode di quell’asgiu
U to riposu immensu u sparti cù l’acellu
E lapre di falcina t’anu datu un basgiu
Fatale era u toscu, t’hà apartu u celu

Cum’hè chè tù ci lasci
Oghje chì tanti canti fermanu à cantà
Cum’hè chì a to vita ne ghjugne à l’annuttà




Scritta qualchì mese dopu à a strage di Furiani.


ERA VIRANU SBUCCITU

Oghje hè viranu sbuccitu
Cù e so stonde serene
È u so bellu vistitu
Tintu di sogni d’avvene
È u soffiu maghjulinu
Fattu trattulellu finu
Culurisce di turchinu
E centu mila albe à vene

È sempre u sole caldu
Lampa raghji senza stizia
Cuprendu d’oru u valdu
D’oru è di lume à divizia
È s’induvina belle
E millaie di ‘sse stelle
Chì lucicheranu anc’elle
Cù a celesta milizia

In un fiume siculare
Ogni ora si licenzia
Appicchendu à e sarre
Una rima di silenziu
È un’entica d’amore
Di parfume, di culore
Per u prossimu albore
Ch’ellu naschi di sperenza

Era viranu sbuccitu
Cù e so stonde serene
È u so bellu vistitu
Tintu di sogni d’avvene
Ma un ventu di sciagure
S’hè spartu pè ‘sse pianure
È parenu cusì scure
E centu mila albe à vene…



Dernière édition par Amministratore le Sam 13 Oct - 16:06, édité 1 fois
Revenir en haut Aller en bas
Voir le profil de l'utilisateur
Amministratore
Amministratore


Messages : 43
Date d'inscription : 27/02/2012

MessageSujet: Re: Acquaviva Jean Yves   Sam 13 Oct - 15:55

Una stella di più

In u celu serenu dopu à u spalluzzime
Un ventu puesia ci hà scrittu duie rime
È accesu per noi una stella di più

Una luce tamanta à un focu d’amore
Chì à la notte nasce è cresce cù l’albore
Sin’à esse ricordu di u ghjornu chì fù

Un paghju d’ochji puri chì l’avvene invita
À coglie l’ore appese à l’alburu di vita
È tigne di billezza ogni sguardu lampatu

Una prisenza nova in u chjerchju di l’esse
Duie mani di più per aiutà à tesse
D’un filu di dulcezza un mondu assirinatu

Un fruttu à maturà francatu da e strage
Una mente chì s’apre à ricordi di pace
Fatti di zerga ghjusta è d’amore dinù

U ventu di u distinu d’un soffiu veranile
Hà vistutu l’inguernu à culori d’aprile
È accesu per noi una stella di più…



Per cambià à pena di rigistru, eccu una canzona di i Peres Verts Peppers (storia campata una sera di fiera, in una altra vita).


BILLÌ ZUCCHINU

Assai sogu eiu di ciò ch’ellu vulia
Ùn ci capia nulla à ciò ch’ellu dicia
‘ssu tippu affaccatu una sera di fiera
À mezu à a fiumara di pastizzu è di biera

Paria natu avà, cascatu da a luna
U ciarbellu in bisbò, in capu a so funa
È hà dettu cusì, sò vinutu per dì
U mio nome hè Billì è v’aghju da fà capì

Laca la puru corre, ùn t’imballà Billì
Laca la puru andà, ùn t’anarbà cusì
Laca la puru andà è sciala ti la Billì

Ci vulia spiecà u sensu di u mondu
E cose ch’ùn si sanu, u so perchè prufondu
Ma puzzava in veru a so filusuffia
Ùn era chè futichje, ch’un trecciu di pazzia

Aiò, aiò, mì, mì feghja ‘ssu gabarì
Basta cusì Billì avà sbirba di quì
Sì troppu à zezu sì, vai à ballà Billì
Vai à spassu Billì, iè scrizza mi di quì

Laca la puru corre, ùn t’imballà Billì
Laca la puru andà, ùn t’anarbà cusì
Laca la puru andà è sciala ti la Billì

Manc’oghje ùn la sò s’ùn aghju sunniatu
S’o l’aghju vistu in veru o s’era addurmintatu
Paria veramente cascatu da a luna
È forse ci hè vultatu, appesu à a so funa

Aiò, aiò, mì, mì feghja ‘ssu gabarì
Basta cusì Billì avà sbirba di quì
Sì troppu à zezu sì, vai à ballà Billì
Vai à spassu Billì, iè scrizza mi di quì

Laca la puru corre, ùn t’imballà Billì
Laca la puru andà, ùn t’anarbà cusì
Laca la puru andà è sciala ti la Billì…




DUI SOLI IN U MIO CELU

À core solu è spinsiratu
M’incaminava à passi d’asgiu
Senza pinsà c’à u mio latu
A vita c’era à dà mi un basgiu

Longu l’acque d’un fiumicellu
Ci viaghjava una zitella
Un sole natu in u mio celu
Si cunsumava à dì mi « hè ella »

È d’un surisu, una carezza
‘Ssu fiore fattu giuvanotta
Per fà mi ne dolce cavezza
U so core in u meiu ciotta

A core doppiu, innamurati
C’incaminemu à u piacè
Sunniendu abbracciacati
C’ a vita venghi à fà ci trè

È longu à u fiumicellu
Ci spunterà una viola
Un antru fiore cusì bellu
À esse a nostra figliola

Vuleria centu ghitare
Da cantà a nostr’odissea
Dì vi quantu vi tengu care
Quant’hè bella a vita meia

À l’ora di fà mi ricordu
Mi n’andaraghju cù l’acellu
À fà sunà l’ultimu accordu
Cù dui soli in u mio celu




ELEMENTI

Acqua di a surgente
Candilluccia di sognu
zirlata in a mio mente
Annacqui u bisognu
Di stà eternamente
In l’ombra d’un carognu
Di lascià corre l’onda
Cum’è corre u ventu
Alliscià ogni stonda
Ogni caru mumentu
Chì a vita asconde
In un mondu d’argentu

Focu di u fucone
Calusgina d’accolta
Picciatu in e canzone
À puesia sciolta
Sì per e mio passione
Fiaccula di rivolta
Da scaldà ci adduniti
À i rochji infiarati
Ma sì ancu di striti
Per ‘ss’alburi chjinati
Chì stanu ammutuliti
Mezu à l’immensi asciati

Tarra di e tribbiere
Fulena di mimoria
Ti sò piaghe ligere
I solchi di a storia
U granu hè da chere
Ma ùn spunta chè corria
Per e to stese offerte
À i soli d’altrò
Per e piane diserte
Troppu i guai sò
È troppu e valle incerte
Di fiurisce dinò

Aria di a muntagna
Buffulata d’eternu
A to corsa accumpagna
U mondu vechju zernu
Soffii ventu di spagna
Da mandà à caternu
Ogni ansciu d’addisperu
Ogni stonda mischina
È in un cantu fieru
Spazzi ogni matina
Di l’albe di u pinseru
I nuli di a ruina…

Revenir en haut Aller en bas
Voir le profil de l'utilisateur
Amministratore
Amministratore


Messages : 43
Date d'inscription : 27/02/2012

MessageSujet: Re: Acquaviva Jean Yves   Sam 13 Oct - 15:57

UN ANTRA ISULA


A mio isula hè paradisu à cantà
Rinaghji culor’d’oru è ghjuvelli turchini
Ci trova u puetu rime da incantà
È veste ogni canzona d’albori purpurini

Isula n’aghju un antra, di tamantu turmentu
Mucata di catene, stampata d’inghjustizia
Dicenu ch’ hè incapace à stancià u so pientu
È chì senza misura, si frasa ogni divizia

A mio isula sà e stonde e più chiete
Cum’un vascellu datu à l’estru di u ventu
U si gode sepiata ciò chì natura dete
È sogni d’un dumane ne face nasce centu

Isula n’aghju un antra, u mio culor’di pelle
U dicenu piccatu, guai o ancu scugnura
Eiu ci vecu ‘ss’ombra ch’ingutuppa e stelle
È e face risplende, di luce cusì pura . .





AFRICA

Di fiumi senza fine à l’onde tralucente
Di diserti infiarati à dì e mio arsure
D’una storia chì corse à ore chjare o scure
Da chì l’ira terrania mi fece cuntinente

D’altissime muntagne vistute di bianchezza
Sia di neve eterna o di lava caghjata
Di pianura infinita, campia assuliata
Di tanti paisaghji, surgente di billezza

Sò i venti intinti à l’acqua di u celu
Chì mi dedenu un nome da esse à u mondu
È omi vargugnosi chì vensenu d’altronde
À fà di a mio sorte, schjavitù è macellu

Eiu, tarra chì vide nasce l’umanità
Di i populi matre, i bianchi o i mori
U mio core trabocca di tanti li tisori
Ma ciò c’o bramu eiu ùn lu ponu cumprà…




STELLA MARIA


Vogliu intigne a mio penna à l’inchjostru di u sperà
È ingutuppà di lume ognuna di e mio rime
Da purtà ti in i mio canti l’aria fresca di e cime
È u profume scurdatu di l’antica libertà

Ch’elli ti sianu dolci i ghjorni di u t’avvene
È cantessi di sperenza ogni stonda in a to mente
U to sonnu sia calmu cum’è l’albe d’oriente
Colmu si sogniviaghji per e cuntrate serene

È corghinu i to sguardi à fior’d’un raghju di sole
Da cunnosce e cunfine di ‘ssi paesi landani
‘Ssi tisori chì mai omu ùn hà toccu di e so mani
sianu toi per sempre i misteri di ‘sse fole

Stella Maria o cara ancu l’alba ti ringrazia
Quand’in la to risa calda ci si trova ‘ssa lumera
Da imbriacà di sole e stese di a to terra
Da e valle di Niolu à e machje di Rosazia…



DUMENICACCIA


Ghjinnaghju era per finisce
È si n’andava à passi lenti
Versu d’altre ore più lisce
È d’altri ghjorni lucichenti

Cum’è s’è l’estate era natu
À risplende in cor’d’inguernu
Cum’è s’ellu avessi appingatu
In celu, un luciore eternu

Un omu una voce
Era u so cantà
Cum’è u fiume in foce
Chì vole inzuccarà
U mare portacroce
Di i nostri sperà
U mare portacroce
Di i nostri sperà

Ghjente addunita è serena
Ghjente à trecce in carrughju
Da rode marchjone è catena
Era di pace u so mughju

Cum’è s’è un raghju era natu
Mez’ à tamantu timpurale
Cum’è s’ellu avessi picciatu
In celu, un eternu fanale


Un omu una voce
Era u so cantà
Cum’è u fiume in foce
Chì vole inzuccarà
U mare portacroce
Di i nostri sperà
U mare portacroce
Di i nostri sperà

Ma soca ùn ne pò esiste
Chjarore à mezu à ‘ssa fumaccia
Chì si sò scorse nere è triste
L’ore di ‘ssa dumenicaccia

Cum’è s’è u bughju era natu
Foscu è prufondu in cor’di ghjornu
Cum’è s’ellu avessi appingatu
In celu, un eternu frastornu

Un omu una voce
Era u so cantà
Cum’è u fiume in foce
Chì vole inzuccarà
U mare portacroce
Di i nostri sperà
U mare portacroce
Di i nostri sperà




SICRETI

Palisà l’addisperu di e lacrime piatte
Quand’omu ùn tene più di ùn sfucà si micca
Di pettu à u viotu di l’ombra chì s’hè fatta
È ferma pinciulendu di sogni pocu riccu

Palisà ciò chì mughja in fondu à a cuscenza
Ricordi di battelli privati di vintata
Cundannati per sempre à l’alta penitenza
Di un eternu esiliu ch’ùn avarà estate

Palisà a tristezza di tanti usci chjosi
Spalancati un ghjornu per rompe u silenziu
È u pesu angusciosu di e mane nibbiacose
Quand’omu à i soi per sempre si licenzia

Palisà ‘ssu viaghju in u mentre di l’alba
Tracarcu di suspiri è d’accunsenti muti
Quandu in a to mente cantanu rime calde
Mazzuli di parolle da u t’ingegnu esciuti

Per tè ô tarra sacra di a nostra mimoria
Palisà l’emuzione, a gioia scrianzata
D’esse pienu di tè, natu di a to storia
È pò d’andà sicuru nant’à a to scarpata…



Revenir en haut Aller en bas
Voir le profil de l'utilisateur
Amministratore
Amministratore


Messages : 43
Date d'inscription : 27/02/2012

MessageSujet: Re: Acquaviva Jean Yves   Sam 13 Oct - 15:58

VINTERA

Prima ci hè u silenziu, à fascià ogni cosa
D’ogni alburu, u frascume, d’un siscu hè azzicatu
È u celu si veste di lana cindarosa
Cum’è per dì à tutti c’un periculu hè natu

Dopu l’aria si face cum’è ligera è fresca
U celu torna foscu, u ventu vene mossu
Cuscogliule scimite si pesanu in tresca
È digià in un frombu, u tonu ci hè addossu

È tuttu vene bughju, in cor’di miziornu
Toni, saette, acqua, in tamantu scunfondu
S’abbraccianu per forza, a notte cù u ghjornu
À robba è ghjente pare, natu u finimondu

È pò tuttu si tace è volta u turchinu
Cum’è s’è nulla ùn fussi canta torna l’acellu
È dopu à ‘ssa vintera, soca soffiu divinu
U sole è i so raghji invadenu u celu…




QUATTRU NOTE


Quattru note dulcezza à mezu à u fracassu
Dui cori appesi à u listessu passu
Un mumentu sulezza à mezu à tanta ghjente
Quattru note à sunà per noi eternamente

Una stonda sepiata quandu in l’ombra pagna
A to manu di a meia si face a cumpagna
Una cria di vita abbandunata à l’asgiu
Eppò e nostre lapre per u listessu basgiu

Eppò andà inseme
Quasi à tuccà u celu
Lascià e nostre speme
Purtà ci cù l’acellu

Quattru note dulcezza è torna u fracassu
È a vita d’ognunu ripliglia u so passu
Si staccanu e mani u basgiu torna ventu
È a nostra abbracciata diventa un ramentu




DUVE SÒ

Duve sò pigliate l’ore
Di e rise zitelline
Quandu per coglie e more
Ùn timiamu e spine
Duve sò, duve sò ’ssi mumenti
Duve sò, duve sò à i venti o spenti

Forse si nè sò andate
Cù u fiume di l’età
Cù ‘sse piene infuriate
À l’eterna libertà
Duve sò, duve sò ‘ssi mumenti
Duve sò, duve sò à i venti o spenti

Duve sò a niscentria
È u so cumpagnu l’asgiu
Oghje ferma a nustalgia
È d’un ricordu u basgiu
Duve sò, duve sò ‘ssi mumenti
Duve sò, duve sò à i venti o spenti

È quelle ardente battaglia
Da difende u castellu
Fattu di tarra è di paglia
Di u mondu u più bellu
Duve sò, duve sò ‘ssi mumenti
Duve sò, duve sò à i venti o spenti

È ‘ssi chjarasgi pumposi
Quantu volte vindimiati
I rivecu, diviziosi
Carchi à frutti inzuccarati
Duve sò, duve sò ‘ssi mumenti
Duve sò, duve sò à i venti o spenti

Ma in fondu à u mio core
L’aghju tinuti prisenti
U profume di ‘sse more
È tutti quelli mumenti
Sò in mè, sò in mè ‘ssi mumenti
Sò in mè, sò in mè à venti
Sò in mè, sò in mè ‘ssi mumenti, mai spenti…



VIT’ALBA

In u celu l’ultima stella more
A luna s’abbandona à u tramontu
Di a notte si ne compienu l’ore
È u ghjornu ne face tornacontu

U bughju si ne và senza rimore
In un sussuru u mondu si move
Ogni cosa s’inonda di luciore
È s’assesta da campà l’ore nove

U primu raghju vene è accarezza
E sarichje di neve incasgiulate
Ammanta d’una dolce tennerezza
E stonde di l’ultime sunniate

Ogni candella d’acquatu spampiglia
È d’argentu ne parda u circondu
A vita abbraccia l’aria à piglia, piglia
Quandu l’alba entre in u vucatondu

Sbuccisce di ‘ssu stranu spusaliziu
Un reame d’armunia è culori
Hè una maraviglia, un deliziu
Un mazzulu di musiche è d’adori

U primu raghju vene è accarezza
Paesi è cità addurmintati
Ingutuppa di solfice dulcezza
Sogni è realità aghjummellati




E STRADE TURCHINE

Parianu scappati
D’un sognu lucichente
À culori d’oriente
‘Ssi vascelli andati
Per e strade turchine
Per i chjassi di sciume
È l’andati di lume
À l’ultime cunfine
À l’orisonti chjari
Duve more u sole
È nascenu e fole
Figliole di i mari

Suvitendu e stelle
Sulchighjavanu l’onde
À circà d’altre sponde
D’altre loche più belle
Un’isula serena
Tarra senza mimoria
Da scrive una storia
Ch’ùn cunnosce catena
Una muntagna d’oru
Da chì a so bandera
Svintulessi più fiera
Chì u più fieru albore

È mezu à u silenziu
Fà si una piazzarella
Esse cum’una stella
Mezu à u celu immensu
Ma e strade turchine
Ùn ti portanu indocu
S’è t’ùn adopri focu
Per apre e cunfine
Ci volenu e strage
Da fà nasce a pace
S’è un mondu si face
L’altru si deve tace

È cusì và u fiume
Da l’altu di e sarre
Sin’à lampà si in mare
In e valle di sciume
È i vascelli vanu
Frà ‘sse piane di luce
Circhendu un mondu à struge
Per e strade turchine
A l’ultime cunfine…




Mi ne vocu

Cù e sciume chì vanu à imbiancà l’orisonti
Purtate da u mare peregrinu eternu
Cù e neve chì stanu appese à i monti
Carezze di silenziu rigalu di l’inguernu

Cù l’omu spiranzosu fighjendu a spirata
Chì vene à risplende mesu à u timpurale
Cù l’ansciu silenziosu di a chieta attrachjata
Quandi a luna accende u più altu sciappale

Mi ne vocu à cantà e fureste di sole
I chjassi di u sperà è po l'eternità
È po l’eternità

Cù l’acellu quassù in lu celu turchinu
Duve và solu, solu un nulu andarice
Cù u tempu dinù missageru divinu
Chì tramanda l’idea d’un mondu più felice

Cù u ventu istrosu chì gira centu mondi
Basgendu ogni sarra di e so dolce lapre
Cù u fiume furiosu chì và mezu à e sponde
È l’immensa dulcezza di u fiore chì s’apre

Mi ne vocu à cantà e fureste di sole
I chjassi di u sperà è po l’eternità
È po l’eternità

Cù l’ochji illuminati da i ghjorni d’aprile
Impastati d’amore è carchi d’asgiatezza
Cù i cori infuriati da u sintimu suttile
D’appartene à a tarra è à e so billezze

Cù l’omu incatenatu privu di stellaria
À l’ora chì a notte stende u so reame
Cù u sognu strappatu in cerca d’armunia
Chì scianchighjendu và versu l’alba chì chjama

Mi ne vocu à cantà e fureste di sole
I chjassi di u sperà è po l’eternità
È po l’eternità…



L’omu scioltu

Sentu l’aria marzulina
Stuzzicà mi u tupezzu
È sfrisge mi in u spinu
Cum’un fiume chì carezza
Da e sarre à a marina
E muntagne cù dulcezza

Sentu a calurosa tarra
Scatinà e so passione
In favulose fiumare
È l’estru di e stagione
Scumudà l’unducce pare
Di u prufondu marone

Sentu u celu ghjastimà
Lampendu l’acqua sacrata
È ‘ssi toni à discità
Ogni fola sminticata
Piatta per l’eternità
In l’ochji di l’attrachjata

Sentu l’eternu alburone
Scaglià si sott’à l’accampu
Di u ventu girandulone
È ‘sse parolle c’o lampu
In fondu à u vangone
È chì mai omu ùn stampa

Cusì dice l’omu scioltu
Chì campa ogni mumentu
Fighjendu l’immensa accolta
Di l’alba è di l’elementi
Dà vita à a rivolta
È po discità a mente…




Per tè

Tale à u silenziu natu
Dopu à tamantu abbracciu
Tale à a fiamma data
Chì accende a to faccia
Tù, sazii e mio brame
Colmi e mio mancanze
Rispondi à e mio chjame
Assulii e mio stanze

Eiu ti scrivaraghju
E mio più belle rime
È pò ti purtaraghju
Nant’à e più alte cime
Accatizzaraghju u focu
In fondu à a ziglia
Per riscaldà u locu
Di a nostra armunia

Dà mi a to sperenza
Per crede in lu dumane
È pò a to prisenza
Per cungnurà u stranu
Tù, empii di dulcezza
I mio sogni, e mio teme
È cambii a mio sulezza
In voglia d’esse inseme

Eiu t’insignaraghju
E strade e più piatte
È per tè scupreraghju
E catagne e più ciatte
Cacciaraghju l’amarezza
È a malincunia
Per prutece a billezza
Di a nostra armunia…




À lu ghjornu spuntatu

Acquatu di a mane rinfreschi i mio sogni
Quandu in lu primu raghju si scopre u cuntornu
À l’angunia a notte fughje incù lu so fornu
Eppo lu ghjornu cambia e mio brame in bisogni

L’acellu à tempu natu, si move sgalapatu
U trattu scrianzatu stuzzica i talavelli
In l’aghja testimone di l’anticu macellu
Rinasce a rivolta à lu ghjornu spuntatu

À lu ghjornu spuntatu in un dolce rimore
Si stringnenu e mani in un chjerchju immensu
U nome libertà ripiglia u so sensu
È alloghja a vita in fondu à ogni core

À lu ghjornu spuntatu s’arrizza a bandera
Di l’eterne spiranze piatte in le nostre mente
È risplende a luce d’una fiaccula ardente
Chì piccia focu in core è tomba l’addisperu

Ingannu di a notte, di a morte funtana
Di u sperà di l’omu ùn sia strappatura
È sappia chì a lotta campa ancu in la bughjura
È ch’in l’ochji d’un populu a rivolta s’intana…



Terzettu sunniatu

Un soffiu puesia, vene è mi piglia
È mi tramutu in un mondu di rime
Duve à ogni sguardu, vecu una maraviglia

M’accecanu ‘sse fiure, a so billezza
Eppo mi ciottu in un fiume d’argentu
Le so onde mi sò, una carezza

Avà mi vultuleghju, mezu à u celu
È supraneghju le più alte le cime
Sò lu ventu chì corre, sò un acellu

È viaghju in ‘ssu locu, mondu sicretu
Duve e cose, facce ne anu centu
È in pede à u mio lettu, mi discetu…



À chì vale

À chì vale dumane s'è tù sai digià
Ciò ch'ellu piatta in sè, ciò ch'ellu ne sarà
S'è tù credi ch'un celu, culore ùn pò cambià
È ch'à certi orisonti sole ùn ne pò spuntà

À chì vale un sognu s'ellu pasce à umbria
S'ellu ùn si sà fascià d'un pocu di pazzia
S'è t'ùn voli sperà chì mezu à l'asciatu
Qualchì volta ci nasce un pascu smisuratu

À chì vale à scappà, à allungà u passu
Basta à ùn sbaglià si scigliendu u so chjassu
Ci sarà sempre un ponte, una verga à francà si
È un ghjornu, chì sà, a vita à affiancà si

E brame l'aghju sceme è i sogni tamanti
U mio core hè immensu, prontu à mille stanti
I muri i calcecu è ne facciu pianure
Da suminà ci ore da esse e più pure




Dernière édition par Amministratore le Sam 13 Oct - 16:09, édité 1 fois
Revenir en haut Aller en bas
Voir le profil de l'utilisateur
Amministratore
Amministratore


Messages : 43
Date d'inscription : 27/02/2012

MessageSujet: Re: Acquaviva Jean Yves   Sam 13 Oct - 16:00

Eccu una addattazione di "Les feuilles mortes"


CUSCOGLIULELLE
(Les feuilles mortes)

O quantu bramu chè tù t’arricordi
Di ‘ss’albe nate da l’amicizia
À quelli tempi l’ore andavanu belle
Ore di mele è di sole à divizia
Centu mila sò e cuscogliulelle
Sai, ùn mi ne sò scurdatu
Centu mila sò e cuscogliulelle
È vanu appese à li ricordi
Purtati da a zilifrina
Duv’ella more a statina
Perchè chì mi ne scurdaria
Di ‘sse rime chè tù dicia


Hè u cantu di a sumiglia
Eiu è tù d’amore spartu
Eramu dui à piglia, piglia
Eiu è tù d’amore spartu
Ma l’amore torna fulena
À passi ciatti, senza fracassu
E l’onda arruba à a rena
A vistica di u to passu


Centu mila sò e cuscogliulelle
È vanu appese à i ricordi
Ma u mi’ amore ùn vole dà si à elle
È ride sempre di i nostri accordi
Eri per mè dolce è pò cusì bella
E t’aghju in core tal’un’eterna stella
À quelli tempi a vita era gradita
In celu u sole sapia e calmane
È tu ne era a mio dea
Ma chì primura ‘ss’ore vane
Chì ribomba in l’alma meia
A to canzona à l’infinita

Hè u cantu di a sumiglia
Eiu è tù d’amore spartu
Eramu dui à piglia, piglia
Eiu è tù d’amore spartu
Ma l’amore torna fulena
À passi ciatti, senza fracassu
E l’onda arruba à a rena
A vistica di u to passu


Revenir en haut Aller en bas
Voir le profil de l'utilisateur
Contenu sponsorisé




MessageSujet: Re: Acquaviva Jean Yves   Aujourd'hui à 11:11

Revenir en haut Aller en bas
 
Acquaviva Jean Yves
Voir le sujet précédent Voir le sujet suivant Revenir en haut 
Page 1 sur 1
 Sujets similaires
-
» Diavule - Jean Yves Acquaviva
» LE PHANTOM ( Jean Yves Mitton)
» Le Retour à la terre - Tome 1: La vraie vie [Ferri, Jean-Yves & Larcenet, Manu]
» Jean yves Ménager
» sapin de Noël par Jean-Yves Page

Permission de ce forum:Vous ne pouvez pas répondre aux sujets dans ce forum
ISULA :: Quandu l'inchjostru sumena :: Antulugia-
Sauter vers: