Lingua è cultura corsa
 
AccueilAccueil  FAQFAQ  RechercherRechercher  MembresMembres  GroupesGroupes  S'enregistrerS'enregistrer  ConnexionConnexion  

Partagez | 
 

 Currispundanze

Voir le sujet précédent Voir le sujet suivant Aller en bas 
Aller à la page : Précédent  1, 2
AuteurMessage
Ruclinonu Solechjari

avatar

Messages : 518
Date d'inscription : 27/02/2012
Localisation : Casinca

MessageSujet: Re: Currispundanze   Jeu 18 Oct - 8:38

Per a bella racolta.
Revenir en haut Aller en bas
Voir le profil de l'utilisateur http://appuntamentu-corsu.forums-actifs.net
Erbaghju

avatar

Messages : 465
Date d'inscription : 29/02/2012

MessageSujet: Re: Currispundanze   Lun 22 Oct - 15:00

Rusignolu Rusignolu
U to versu hè rinumatu
Ogni volta ch'e ti sentu
U me core hè incantatu
Ch'ella sia in Niolu
O ancu puru à u Pratu

Rispondendu colpu à colpu
À e chjame di l'Acquale
Un acellucciu di Zilia
Purtatu da u Grigale
Hè vinutu in muntagna
Per cantà a so Balagna

Vistutu di puisia
È di l'impruvisazione
Rispittate in ogni locu
Amicu e to canzone
Ai purtatu à l'eternu
Nostra bella tradizione

Quandu d'istate a sera
Si sente e rusignulate
Un silenziu rispittosu
Rispond'à l'impruvisate
Nostre muse à l'unione
Piglianu e to lizzione

Stemu à sente u ralegru
U to cantu salutivu
Chì sarà u to sicretu
Per esse sempre à l'abbrivu ?
Rusignolu dimmi ghjà
Sarà l'oliu di l'alivu ?

Quessa a sapemu tutti
Chì l'acqua di a Balagna
A dice ancu u pruverbiu
Ch'ella caccia ogni macagna
Ma sarà forse u Libecciu
Chì t'hà fattu cantarecciu

Di un cugnome acellime
Impannatu di talentu
A to musa hè una fiara
Attizzata da u ventu
Ch'ellu tirga sempre forte
È u focu ùn sarà spentu

Sì di a Cultura Corsa
Cantà vogliu lu figliolu
Avà ti lasciu andà
Chì tù pigli u to volu
À truvacci per ste fiere
Amicacciu Rusignolu

(Sò è Erbaghju)





T'arricordi o amicu
U tempu di e mirendelle
Si sentianu i canti
Eppo dinò e paghjelle
Belle fiuriture corse
Sbucciate di e cannelle

Ma sti tempi sò finiti
È ùn turnaranu più
S'ellu ùn si face u sforzu
Di fà vene a giuvintù
Ne mandu questa prighera
À Maria è à Ghjesù

Chjamu à a risistenza
Per mantene u patrimoniu
L'anziani cù i zitelli
Femu nostru matrimoniu
È cantaremu inseme
Ciò ch'ùn sarà più un sognu

Mandà vogliu un appellu
À l'artistu Rusignolu
Chì di tutti i tarcani
Ne hè l'ultimu fighjolu
È salutà i so canti
Sussurati da i Santi

Tù chì ai cunnisciutu
Quelli pueta di razza
Cum'è u cunsidereghji
Oghje quellu spazza spazza ?
Sì n'ùn femu a trasmissione
S'hà da more a tradizione

È cusì ch'avà dumandu
À u pueta di Zilia
Di fà corre a so rima
È un versu à sciolta briglia
Chì spartemu à l'unione
Amicu stessa passione

S'ellu ùn ti scumoda micca
Di facci una furmazione
Pigliaremu in Balagna
Di l'acellu e lizzione
Una bella spuntinata
È divizia di canzone

È tandu si pò sperà
Cù u cantu indiatu
Chì dumane ellu sarà
D'un albore spiriatu
È di stu bellu ritrovu
Nascerà un ghjornu novu









Revenir en haut Aller en bas
Voir le profil de l'utilisateur http://erbaghju.unblog.fr/
Circione

avatar

Messages : 2187
Date d'inscription : 27/02/2012

MessageSujet: E stelle di a ripa vintosa, Simone Agostini, Ghjuvan Petru Ristori.   Dim 28 Oct - 12:02




_________________
Spunsurizatu  da l'UNESCO
Revenir en haut Aller en bas
Voir le profil de l'utilisateur
Circione

avatar

Messages : 2187
Date d'inscription : 27/02/2012

MessageSujet: Per capu d'annu. Ghjacintu Orsucci, Ghjuvan Petru Ristori.   Dim 28 Oct - 12:04




_________________
Spunsurizatu  da l'UNESCO
Revenir en haut Aller en bas
Voir le profil de l'utilisateur
di sfughjita

avatar

Messages : 124
Date d'inscription : 06/03/2012
Localisation : Bastia

MessageSujet: Re: Currispundanze   Lun 29 Oct - 10:45

Mi campu, mi campu ! ditone salutu2
Revenir en haut Aller en bas
Voir le profil de l'utilisateur
Circione

avatar

Messages : 2187
Date d'inscription : 27/02/2012

MessageSujet: L'Infernu ,Culiseu è Natalellu.   Mar 6 Nov - 17:01

U chjama è rispondi ch'e vinimu di fà incù u Ciocciu m'hà fattu pinsà à quelle canzone di l'Infernu ch'elli fecenu Culiseu è Natalellu.


Pè a prima vi mettu l'uriginale di A Tramuntana di nuvembre 1903 andate puru à circà i spichjetti osinnò appughjate annant'à ctrl è fate girà a rutulella di u topu Idea








Pè a siconda, vi mettu un strattu di u bellissimu Libru di Roccu Multedo cunsacratu à Natalellu Sarocchi di Rusiu, cusì pudaremu prufittà dinù di e so note.
















_________________
Spunsurizatu  da l'UNESCO
Revenir en haut Aller en bas
Voir le profil de l'utilisateur
Circione

avatar

Messages : 2187
Date d'inscription : 27/02/2012

MessageSujet: A pippa, Pincu, L'Orsu d'Orezza, Natalellu di Rusiu.   Mar 6 Nov - 17:53

Un classicu avà, sempre strattu da u libru di Roccu Multedu: "Natalellu di Rusiu" publicatu da a "Stamperia Samarcelli" p.241:


(s'è tù e ci poi truvà isse dui puesie di u to paisanu o Ghjallochju... Almenu ch'ellu e ci trovi Sidussincu Rolling Eyes ? Eiu ùn l'aghju No .)













_________________
Spunsurizatu  da l'UNESCO
Revenir en haut Aller en bas
Voir le profil de l'utilisateur
Erbaghju

avatar

Messages : 465
Date d'inscription : 29/02/2012

MessageSujet: Re: Currispundanze   Dim 28 Avr - 21:09





Puisia scritta in u 2011 da GP Ristori par a nascita di Leandru


Dernière édition par Erbaghju le Lun 29 Avr - 10:22, édité 1 fois
Revenir en haut Aller en bas
Voir le profil de l'utilisateur http://erbaghju.unblog.fr/
Erbaghju

avatar

Messages : 465
Date d'inscription : 29/02/2012

MessageSujet: Re: Currispundanze   Dim 28 Avr - 21:12

Par avelli uffertu "Da a ripa ventosa" quandu l'aghju vistu arisera, aghju prumessu à Ghjuvan Petru una risposta di Leandru  


Di l'amandulu u fiore
Ùn sò cà duie e stagione
Ma mi piace à st'albore
D'avè in manu u librone
Rigalatu cù u core
Da Ristori u puitone

Di risponde à questu amicu
Sempre a vulia fà
Ma u parlatu di Vicu
Par pudè scrive è cantà
Era calcosa a ti dicu
Prima à ammaistrà

Ch'ellu sia salutatu
Quellu di A Riventosa
Chì u tempu aghju pigliatu
Par risponde à a so improsa
Ma avà sò ingrandatu
È possu impinnà calcosa

Face un paghju d'anni fà
Chì mi cunsigliasti in rima
È di stu fattu o cumpà
Ti portu una grande stima
Chì in Corsu allettu avà
Cane, sumere è bima

Di u mio caru paese
Batte in pettu a ciccona
È ùn si passa un mese
Senza chì a mio parsona
Cù e duie arechje tese
Ùn ascolti a so canzona

Sia di babbu o di mamma
Aghju intesu e canzone
A paghjella è a nanna
Sò state e prima lizzione
Par cunnosce calchì rama
Di a nostra tradizione

Vedi bè chì i to cunsigli
I m'aghju pigliati tutti
È u chjassu chì tù pigli
Duve i versi ùn sò sdrutti
Trà i fiori è i stigli
Hà datu i più belli frutti

Incun una fede eterna
È a to penna sè mossu
Dendu a voce fraterna
Di u pueta in rinforzu
À a me vita muderna
Ma chì t'hà u stintu corsu

Par e future canzone
À a to musa diletta
Sapendu chì u me nome
Poche rime ellu accetta
Li facciu a suggistione
Di fallu rimà cù Filetta

Leandru
Revenir en haut Aller en bas
Voir le profil de l'utilisateur http://erbaghju.unblog.fr/
Erbaghju

avatar

Messages : 465
Date d'inscription : 29/02/2012

MessageSujet: Re: Currispundanze   Hier à 10:37

Eccu ciò ch'aghju mandatu à una manata di pueta à l'entre di u 2017.

Ùn sò micca un induvinu
L’affare ùn era privistu
À un cignale mastinu
Arruvillatu da Pristu (<= nome di u me ghjacaru  risa  )
Ci aghju persu u me funinu
Nimu di voi ùn l’hà vistu ?

Ci sò turnatu à andà
Una volta, duie è trè
Cù primura di truvà
Quellu chì cù gran piacè
Parmittia di chjamà
È dumandà “ vai bè ?”

Incù arte è virtù
Mi sò messu à ruspà
Aghju cercu tantu è più
Duva ellu pudia stà
Ma cerca inghjò è insù
Si n’hè firmatu quallà

S’hè strappatu u me core
Aghju pientu è stridatu
Eru prontu ancu à more
D’avellu abbandunatu
Ma ghjuntu in l’uparatore
L’aghju prestu rimpiazzatu

Stu matiriale cambiatu
Sempre a voce si tace
Chì u numaru sguassatu
Di truvallu ùn sò capace
Hè cusì ch’aghju impinnatu
Par divvi “salute è pace”

A più bella a vi contu
Ch’era à u mese di sittembre
In a machja cum’è un tontu
À flagillammi e membre
Branculai lestru è prontu
Ma u cignale..... corre sempre !!!!  

Pace è salute !!!
Revenir en haut Aller en bas
Voir le profil de l'utilisateur http://erbaghju.unblog.fr/
Erbaghju

avatar

Messages : 465
Date d'inscription : 29/02/2012

MessageSujet: Re: Currispundanze   Hier à 10:39

Tittò m'hà rispostu u prima :

Risposta à Stefanu Conca

Chì piacè quessa matina
Di riceve i t’auguri
Scritti cun rima calina
Per gradisce i futturi
Chè t’appii in sta lettarina
I mo voti i più sicuri.

Pregu à tè è à i toi
Un’annata senza uguale
Tanta saluta eppoi
Dui soldi, ch’ùn hè male
Eppo pregu centu annoi
A u pessimu cignale.

Stu cignale sempre corre
Mez’à quella Marignana
Manderaghju un cacciatore
À disturbe a so cuccagna
Per salvà u to onore
Di pettu à quessa macagna.

S’ellu ci vole a ti dicu
Viotu tuttu u canile
Eppo partu o car’ amicu
Appress’u cignale vile.
Li prumetu gran’castigu
Chì ghjè bonu u mo fucile.

In quantu à u teleffonu
A so perdita hè trista
Hè smaritu u so sonu
Attemp’a famosa lista* *(a lista di i numeri)
Quandu u capu* ùn hè bonu *(à ch’ùn hà capu…)
Ci vole l’anche è a vista.

Quandu a sorte si rivolta
Ùn ci vale a furtuna
Sè a to ragione ascolta
Per chì frachja stessi una
Per a to prussima volta
Pensa à metteci una funa.

Torna un pezzu u ti facciu
Dopu ti lagu riflette
Per tè u mio amicacciu
E mo speme ne sò scelte :
Ch’ùn t’accadi st’affaracciu
Per dui’ mille dicessette.

Abbracciu maiò à tè, Sonia è Leandru.
Revenir en haut Aller en bas
Voir le profil de l'utilisateur http://erbaghju.unblog.fr/
Erbaghju

avatar

Messages : 465
Date d'inscription : 29/02/2012

MessageSujet: Re: Currispundanze   Hier à 10:40

Eppo dopu Ghjuvan Petru Ristori :

CACCIA D'ORU

Mi prisentu da cinghjale :
Sò cruciatu ma mastinu,
Pè mezu porcu nustrale
Pè mezu salvaticinu
Ma l'unicu animale
Chì hà un telefuninu.

L'aghju trovu di ribattu,
In fondu di a spilonca,
È, ben' chellu fussi piattu
Sott' à una ghjemba tronca
Ci scuprii u ritrattu,
D'un certu Stefanu Conca.

Cunnoscu d'ùn bellu pezzu
U furdanu ritrattatu
In stu picculu attrezzu
Cù u quale m'hà ghjustratu.
Da trè anni s'hè avvezzu,
Furtuna ! Hè sgalabatu.

Ormai, grazia à Dìu,
Li facciu perde la faccia,
Da ch'ellu piglia l'abbrìu
Pè a so' solita caccia
Cù tuttu u so' cunvìu
U seguitu à la traccia.

Ùn pò più fà cum'è prima,
Quandu cù a so' antenna,
Pigliava posta, in cima
D'una culminante zenna.
Pensu ancu chì a rima
Ammutulita, chinchenna.

Pè diventà muntagnolu
Ùn basta mutà di pannu.
Perch'un telefunu solu
Possi fà tamantu dannu,
Vogliu porghjeli cunsolu
È dilli bon Capudannu.

Ancu si moltu mi costa
Di fà simili richjeste,
Una tregua l'hè pruposta,
S'ell' ùn ci mette prudeste,
Ch'ellu spachji ogni posta
Pè u tempu di e feste.

E tregue sò benvinute
Ancu si l'odiu tenace
E ci rende mal vivute.
Ma si questa li cunface
Li auguru Salute
S'ellu mi lascia a Pace.

È pè esce di st' intrescu
Secondu i voti mei,
Vogliu dì à 'ssu burlescu,
Cùn ottimi caladei :
U numeru cinghjalescu
Cumencia sempre per sei !!!
Revenir en haut Aller en bas
Voir le profil de l'utilisateur http://erbaghju.unblog.fr/
Erbaghju

avatar

Messages : 465
Date d'inscription : 29/02/2012

MessageSujet: Re: Currispundanze   Hier à 10:47

@Erbaghju a écrit:
Tittò m'hà rispostu u prima :

Risposta à Stefanu Conca

Chì piacè quessa matina
Di riceve i t’auguri
Scritti cun rima calina
Per gradisce i futturi
Chè t’appii in sta lettarina
I mo voti i più sicuri.

Pregu à tè è à i toi
Un’annata senza uguale
Tanta saluta eppoi
Dui soldi, ch’ùn hè male
Eppo pregu centu annoi
A u pessimu cignale.

Stu cignale sempre corre
Mez’à quella Marignana
Manderaghju un cacciatore
À disturbe a so cuccagna
Per salvà u to onore
Di pettu à quessa macagna.

S’ellu ci vole a ti dicu
Viotu tuttu u canile
Eppo partu o car’ amicu
Appress’u cignale vile.
Li prumetu gran’castigu
Chì ghjè bonu u mo fucile.

In quantu à u teleffonu
A so perdita hè trista
Hè smaritu u so sonu
Attemp’a famosa lista*             *(a lista di i numeri)
Quandu u capu* ùn hè bonu    *(à ch’ùn hà capu…)
Ci vole l’anche è a vista.

Quandu a sorte si rivolta
Ùn ci vale a furtuna
Sè a to ragione ascolta
Per chì frachja stessi una  
Per a to prussima volta
Pensa à metteci una funa.

Torna un pezzu u ti facciu
Dopu ti lagu riflette
Per tè u mio amicacciu
E mo speme ne sò scelte :
Ch’ùn t’accadi st’affaracciu
Per dui’ mille dicessette.

Abbracciu maiò à tè, Sonia è Leandru.

Dopu aghju rispostu à Tittò è li parlu di tutti quelli ch'avianu ricivutu a me prima puesia :

À l’amicu di Tavagna
Di mistieru prufissore
Cunfermu chì sta macagna
Fatta à u cacciadore
Di sittembre in Marignana
L’aghju campa cù orrore

Ma tù mi dai u curagiu
È mi sentu andà megliu
D’amparà chì u viaghju
Sin’à lu paese meiu
Sè prontu à fà di ghjinnaghju
Dunque ti rispongu anch’eiu

U cignale l’ai detta
Incù l’aiutu di Diana
Dorme sempre in a filetta
S’ellu ùn hà leccu a tartana
Inde calchì posta stretta
Di Balogna, Ota o Piana

À quellu cignale corsu
Li prumettu tanti affanni
Chì prestu à u rinforzu
Pristu avarà i to cani
È cù tè à u succorsu
Ghjà sò pronti i paisani

Passendu piglià à Francè
Chì ellu sà caccighjà
È ùn ti scurdà d’Ancey
Hè forte par scucinà
Ristori à u me parè
S’ellu vene hè par manghjà

Pocu cunfidenza aghju
In quellu chì conta male
Piglialu sempre un viaghju
Fendu u to giru stradale
Cunfonde trè è un paghju
Ellu ùn pò tumbà cignale

Sì luntanu hè Bunifaziu
Lascia corre eiu mi cansu
A possu fà senza straziu
Par amparallu innanzu
Ch’ellu ùn mi tirga di laziu
Annant’à un porcu mansu

Tù chì ai par distinu
Cum’è casa a machja corsa
Avà mi rendi u funinu
O ti femu quella mossa
È cum’è un assassinu
Ti lamparemu in a fossa

Erbaghju
Revenir en haut Aller en bas
Voir le profil de l'utilisateur http://erbaghju.unblog.fr/
Contenu sponsorisé




MessageSujet: Re: Currispundanze   

Revenir en haut Aller en bas
 
Currispundanze
Voir le sujet précédent Voir le sujet suivant Revenir en haut 
Page 2 sur 2Aller à la page : Précédent  1, 2
 Sujets similaires
-
» Currispundanze

Permission de ce forum:Vous ne pouvez pas répondre aux sujets dans ce forum
ISULA :: Quandu l'inchjostru sumena :: Chjama è rispondi-
Sauter vers: