Federici Michele

U pueta di Rusiu Michele Federici (1910-2002) hà scrittu per "Baretta Misgia", "A Muvra", "Monte Cintu", "Paese Corsu".

Ind'u prefaziu di a racolta Penta Rossa Santa Leziu (dedicata à u so figliulinu mortu ind'un accidente, è à u so figliolu, mortu di malatia) Roccu Multedo dice ch'ellu era l'avucatu di a lingua corsa, è ch'ellu s'hè misuratu à i più grandi impruvisatori "per a gloria è a cuntinuità di a nostra cultura".

Era un omu passiunatu, passiunatu di lingua corsa, di puesia è di cantu. Ebbu a furtuna di cunnoscelu, è era sempre un piacè di truvallu in Rusiu, da ch'ellu mittia à parlà di i pueti di nanzu (cun mè parlava sempre di quelli di Niolu) s'accindianu i so ochji.

Ete fattu bè o Speranza di fallu entre in la nostra antulugia .

A GHJUVANNI L'ASCHESE

Signor caru Cincinone
Celebre pueta aschese,
Ti credi un sapientone
In corsu cum'è in francese
Godi l'aria di a marina
'nu la cità Paolina !

Oghje stessu, la to musa
Ella mi trova malatu:
Eo ti dumandu scusa:
Nun sò micca un ingratu
Chì sò sempre generosu,
Galante è rispettosu.

Mi parli d'infidele:
Quandu mai l'hai pensata ?
Forse chì, sopr'à Michele,
L'averia sunniata
Ed ùn sai ciò chè tù dici,
Caru, voltu li to amici

Le to muse ùn sò strangere:
Forse m'hai capitu male.
Ti parlu in belle manere
Da pueta dialettale.
Un sò micca un andaccianu
Persu per lu mondu sanu.

U Muntese, Nu 138, Ottobre-Dicembre 1971.

A quale s'indirizza quì Federici ?