'SSA LUCE
Frustu era u mio core di troppu sonnii inderni
Statina tralasciata à mezu à tanti inguerni
Eppo mosse 'ssu ventu ch'è tù suffiasti tù
Da tigne u mio celu di turchinu dinù
Sguardi n'aghju lampatu à 'sse cunfine ingannu
Marosuli spapersi mezu à u mare affannu
Eppo vense 'ssa fiura ch'è tù stampasti tù
Da assitammi torna d'uchjate à l'insù
Abbracci n'aghju datu à sciori fughjiticci
Cum'è i fiori scemi à sbuccià primaticci
Eppo corsenu l'onde ch'è tù muvisti tù
Da annacquammi core, mente è ancu di più
È tandu ogni bughjura si fece lindu ghjornu
Tandu à verità vestì ogni cuntornu
In fondu à u mio esse, a luce sempre fù
D'un amore di focu è 'ssa luce era tù
Accueil 
)