Isula

Isula citadella


Sè celu carcu di stelle
Chì l’altri paesi ùn anu
Ghjunte l’albe cusì belle
Smariscenu pianu pianu
È tornanu rundinelle
Quandu vene u viranu

Sè a tarra ch’e laboru
E mio lenze suminate
Sè u paese ch’e adoru
I mio lochi e mio cuntrate
Di tè torna m’innamoru
Quand’ella affacca l’estate

Sè fiume chì corri è salti
È fali da l’alte cime
Da i monti i più alti
In un buleghju di rime
È di prufumi ti carchi
Quandu vene u vaghjime

Sè a nostra tradizione
Sè u spechju di l’eternu
Chì l’altre generazione
Anu impastatu fraternu
A sera à u fucone
Quandu vinia l’inguernu

Sè muntagna chì s’accorda
Cun quelli tempi beati
Eppoi chì s’arricorda
Chì i mio antichi sò nati
À u pede di Baglia Orba
Monte Cintu è Cinque Frati

Sè l’isula citadella
Arradicata à u mare
A mio unica prichera
È e mio brame più care
Sè a mio più bella ghjesgia
U più splundurante altare

A mio Cursichella a mio Cursichella

Olivier Ancey











O tarra isula matre


O tarra isula matre,
M’arrembu à u to scogliu
Induve travu suchju
È l’amore ch’e cogliu
Hè mazzulu di speme,
Di filetta è di muchju,
Ch’e tengu forte in manu
O tarra isula matre.
È s’andessi luntanu
O s’e vinissi à more,
Partariamu inseme,
Perchè ti portu in core.

Vecu stantare arcane,
Sicrete citadelle
È torre inariulate,
Eterne bardiane
È mute sintinelle
Di e stonde impastate
È di guerre è di patti
O tarra isula matre.
O tarra isula matre,
M’arrembu à a to storia,
Da fà chì nimu smatti
A fiaccula mimoria.

O tarra isula matre,
L’orizonte spalanchi,
Quandu sfrisgendu l’onde,
U primu ragiu vene
À tuccà e to sponde
È m’arrembu à l’avvene
Chì nasce à i to fianchi
O tarra isula matre.
Digià l’alba pettina
U to celu chì s’apre ;
In un nominepatre
L’aria si culurisce…
Ma prima di smarisce,
Ti basgiarà e labre
U mio sonniu in pulvina.

Olivier Ancey














L’ISULA SOLA

O quantu vuleria scrive chì a mio storia hè di pace
Chì l’albori ch’aghju vistu si sò pisati sereni
Ma à empie a mio mente sò centu mila e strage
È di fiure sanguinose i mio ricordi sò pieni

Aghju vistu tantu volte u mio mondu piccià focu
Per una croce, un spechju o per un palmu di terra
Per una fede, un’idea, per u pusessu d’un locu
L’omi move e battaglie, l’omi dà si à a Guerra

Eiu sò l’isula sola
Locu di tanti sicreti
Un’isulella di fola
Musa di tanti pueti
Sò un’isula sulella
Mi chjamanu a più bella

Aghju vistu à l’orisonte ghjungne tanti battilloni
È i sullati à millaie calpighjà e mio marine
Aghju in core e vinice di ‘ssi tempi bughjiconi
È piengu à fiumi pieni e mio pene senza fine

Da sempre sò stata eiu ogettu di ogni imbliglia
Quella chì omu vulia cumprà, vende o cunquistà
Quella stella ch’in lu celu di più c’à l’altre spampiglia
È ch’ognunu vuleria di e so mani tuccà

Eiu sò l’isula sola
Locu di tanti sicreti
Un’isulella di fola
Musa di tanti pueti
Sò un’isula sulella
Mi chjamanu a più bella

Ma vogliu sperà e crede in un dumane sfarente
Sunnià di l’ore à vene cum’è di tant’allegrie
Vede e so albe chjare è di pace splendurente
Pisà si à l’infinita cum’è in le puesie

È vogliu dì à i mei, à i mio figlioli cari
In un cantu di sperenza, in un’ardente prighera
Di francà mi à l’ora mai di tanti ricordi amari
È di tene caru à mè di più c’à a mio bandera

Eiu sò l’isula sola
Locu di tanti sicreti
Un’isulella di fola
Musa di tanti pueti
Sò un’isula sulella
Mi chjamanu a più bella…

Jean Yves Acquaviva