Lingua è cultura corsa
 
AccueilAccueil  FAQFAQ  RechercherRechercher  MembresMembres  GroupesGroupes  S'enregistrerS'enregistrer  ConnexionConnexion  

Partagez | 
 

 DEPARTURE FOR PARADISE

Aller en bas 
AuteurMessage
Addisperata

avatar

Messages : 205
Date d'inscription : 10/03/2012

MessageSujet: DEPARTURE FOR PARADISE   Jeu 17 Jan - 23:28



U mo cuccunellu, ùn ai fame? Eiu aghju una fame negra. Spergu ch'ellu serà Mohammed sta mane, ellu mi arreca di più robba, face un pocu attenzione.

U corciu, cusì giovanu (averà 21 annu?). Si vede ch'ùn era fattu per piglià sta via di u terrurisimu. A sanu fà per intrenà a ghjente à pocu à pocu è teneli.

Ch'è tù sia masciu o femina, s'è no surtimu di sta cabbia, prumettami d'ùn dà capu à quellu, quale voglia sia, chì pratenderà d'avè a Verità! Sbattali a porta in faccia!

Ho, ma chì t'averanu sta mane? Certi mughji! Sò in e furie?

- o Mohammed, what's up?

U giuvanottu abbassa l'ochji, mi porghje u mo piattu di semula di granu è sorte senza dì una parolla.

A semula ùn la possu più sente, mi vene u schifu, ma avà manghju per tè.

Capiscu male a so lingua ma una parolla a chjappu : "tumbà".

PERCHÈ? PERCHÈ? Avemu fattu a videò l'altru ghjornu, u guvernu francese s'accupa di mè, ne sò sicura, neguzieghja ! Ùn hè micca pussibule, averaghju capitu male. Oh lu mo ciucciu, vulerebbe tantu vedeti nasce, stringhjeti, datti u pettu, tuttu ciò ch'aghju sunniatu tante volte!
Nò, ùn hè micca pussibule, ùn si pò compie cusì, eiu chì era venuta per aiutalli, curà i feriti è i malati! S'elli mi tombanu, ùn ci vincenu nunda.

Ci surteremu tramindui, viderai, ti purteraghju à spassu nantu à u fronte di mare, à quattru anni ti ampareraghju à fà u schì, feraghju tuttu ciò chì nimu hà mai fattu per mè...

Ecculu chì volta à piglià u piattu.
- Mohammed, tell me, tell me, please!!
- Today they kill you,...

Hà rispostu cù una voce strangulata, sfughjendu senza guardammi.

THEY KILL YOU

THEY KILL YOU

THEY KILL YOU

Ùn pare micca a rialità. E trè parolle giranu è voltanu in un viotu, u viotu ind' u mo capu, u viotu di u Spaziu bughju è ghjalatu.

Sò nantu à una pianetta scunnisciuta, sola...

Sola? Innò, ci sì tù. Tù chì ai da more prima di vive...U to picculu core di trè mesi averà avutu u tempu di sente u mo amore, u mo calore, almenu? Fora, e donne facenu l'ecugrafia, ponu vede u so ciucciu in u ventru, sente batte u core, chì furtuna!

Avà ùn ci hè più piazza pè e mo peure : "Cumu puderia esse una bona mamma, eiu, chì ùn aghju avutu mudellu? "Ùn m'anu sempre cunsideratu cum'è una giovana instabile, incapace, sgalabbata?

Quandu sò partuta, u mo fratellu m'hà trattatu di scema. "Ti piglerai per Mère Teresa? hahaha!" Ellu, u duttore di i ricchi, ùn pudia capisce.

A tè a ti possu dì quantunque, era nanzu à tè, pensu chì d'una certa manera ùna avia u tortu u mo fratellu, in a so gattivezza : a mo tuntia hè chì circava sta sorte, in fondu di mè, ùn vulia micca vive da veru...Sin'à a to venuta!

Ùn t'averianu mai accettatu, a mo matrinia, u mo fratellu, u mo babbu (quellu grande assente). Sì u fruttu d'un accuppiamentu cù u diavule, ùn sò mancu qualessu hè u to babbu! Mohammed, quella sera, ùn m'hà miccca vulsutu furzà, hè u solu; anu insistutu, ridendu cù e so rise grasse, hè diventatu tuttu rossu è l'anu lacatu tranquillu, per via di a so giuventù è perchè hà minacciatu di dì tuttu à u Capu.

Ma sì u mo ciucciu, à mè mi bastava; averiamu fattu a nostra vita tramindui senza primuracci di nimu. Seriamu partuti in Corsica, in a casa di Minnanna, à u sole, di punta à u mare. Ci sò stata felice qualchì annu, ti vulia fà cunnosce sta luce, sta bellezza.

Nimu m'hà da pienghje da veru, forse u solu chì m'averia tenutu cara seria statu tù, fora di a tinta Minnanna...

Eppuru, vedi, mi dicu guasi : hè megliu cusì. Anu a ragiò, ùn sò soda, ùn sò forte, ùn aghju vulsutu parte chè per pruvà à dà un sensu à a mo vita, per fughje u viotu in giru à mè è in mè, chì vita t'avia da offre? Aspettava podasse chè tù m'arrichessi tuttu tù: l'amore, a forza, a gioia? È eiu, in ritornu, ùn sò s'è t'averia datu tuttu ciò ch'un zitellu deve riceve. Ùn la sò, ci seria vulsutu un miraculu, cambià assai : cumu ti pudia dumandà di fà stu miraculu, tù solu?

- Do you want to write letters?
Mohammed hè davanti à mè, cù i so ochji tristi, li si pare di pudè infine fà un gestu per mè.

Lettare? À quale? Innò, da veru, ùn vecu micca.

Sò digià morta per elli tutti, dipoi trè mesi. A so vita cuntinueghja senza mè. Chjuccheranu u murtoriu, feranu una bella messa cantata cù i cironi, eppo ognunu vulterà à e so accupazione. S'elli rendenu a mo salma, u mo fratellacciu si senterà ubligatu, di pettu à u paese, di francà u mare tutti l'anni per fiurisce a mo tomba. Serà cuntentu di pudessila francà.

Strana, cum'è tutte e mo peure inutile mi parenu ridicule, sò smarrite di colpu cù a peura maiò:

Benedettu "They kill you", sesame pè a liberazione di a suffrenza, u "black out"...

Entrenu, preparati o tisò. Ùn ti ne fà, ùn senteremu nunda. Cum'ella dicia Minnanna, serai un anghjulu frà l'anghjuli, ùn cunnoscerai mai i guai di sta terra.

Mì, ci hè quellu di u camescopu chì hà filmatu a mo dichjarazione patetica ùn hè tantu.

I guardu tutti, guardu a mo morte in faccia è ùn pensava micca ch'ella fussi cusì faciule à fà. Ma elli nò, ùn mi fighjulanu, mi fascianu l'ochji, sò elli chì ùn volenu vede u so propiu orrore.

U Capu cumencia a so litania chì mi pare di durà un'eternità. Deve esse in traccia di fà una dichjarazione davanti à u camescopu.

Silenziu cortu. Sentu chì u cameraman s'avvicina : volenu fà un pianu vicinu di mè à u mumentu di ...?

Tutta s'agitazione ùn pare più di cuncernammi, ùn ci sò più. Sò sola cun tè nantu à quella pianetta luntana.

Sentu u fretu di u ceppu nantu à a mo gola.

Ci simu o tisurucciu, Inch'Allah! Imbarchemu subitu. DEPARTURE FOR PARADISE.
Revenir en haut Aller en bas
Voir le profil de l'utilisateur
 
DEPARTURE FOR PARADISE
Revenir en haut 
Page 1 sur 1
 Sujets similaires
-
» The Paradise, "Au bonheur des dames" adapté par la BBC
» [MEP] Paradise
» paradise chapter fanfic
» [Poupée] Manuheali'i Paradise Girl -Septembre 2010
» Manuheali'i Paradise Girl // RBL

Permission de ce forum:Vous ne pouvez pas répondre aux sujets dans ce forum
ISULA :: Quandu l'inchjostru sumena :: Bloghi è fori literarii :: Gazetta di Mirvella ( - 18 )-
Sauter vers: