Lingua è cultura corsa
 
AccueilAccueil  FAQFAQ  RechercherRechercher  MembresMembres  GroupesGroupes  S'enregistrerS'enregistrer  ConnexionConnexion  

Partagez | 
 

 Scritti imposti antulugia

Voir le sujet précédent Voir le sujet suivant Aller en bas 
AuteurMessage
Sumenta

avatar

Messages : 2050
Date d'inscription : 25/02/2012

MessageSujet: Scritti imposti antulugia   Mer 27 Fév - 14:56

Quì mettimu i scritti produtti senza cummenti, per u solu piacè di leghje li felice
Revenir en haut Aller en bas
Voir le profil de l'utilisateur
Sumenta

avatar

Messages : 2050
Date d'inscription : 25/02/2012

MessageSujet: Re: Scritti imposti antulugia   Mer 27 Fév - 14:59

A seduzzione


Furtezza

L’alitu sittimbrinu facia trimulà u frundame maistosu di u castagnu in faccia à u caffè. Ghjuvan Filice era attavulinatu custì, in tarrazza, è lighjia di una racolta di puesie. Quella ch’ellu era in traccia di leghje parlava ghjustappuntu di un vechju castagnu chì, pò esse megliu cà tutti l’arburi, simbulizava u ciculu immutevule di e stagione è ritimava in accordu incù u vechju campanile a vita di i nostri paisani.

Pisendu l’ochji, Ghjuvan Filice dede un sguardu à quellu vechju castagnu. A so attinzione fù subitu chjappa da i gricci sempre verdi è vide dinù, accatastate trà e petre di a muraglietta vechja almenu quant’è u castagnu, miraculi di tramule russicce, vistiche di una statina chì si n’era scorsa senza ch’ellu ùn si n’arvidissi nimu. Avia cuntinuvatu à guardà in faccia ad ellu, senza mancu fà casu à quella Mini Cooper chì vinia d’ingarassi. Si face chì senza mancu avella dicisa, fissava a purtiera chì, scrignendusi, lascede intravede un paghju d’anche fatte à u pinnellu. Videndula sorte cusì da a so vittura, tale un giuvellu cacciatu da u so stucciu, stede un bellu pocu sgumintatu, affascinatu da tanta billezza è tamanta sinsualità. Era una donna magnifica, capellibruna, pellimora, propiu di rara cimbrera. A so travirsata di u stradò fù una vera dimustrazione di grazia. Ghjuvan Filice stava cum’è ipnutizatu… A donna si fece entre in caffè passenduli davanti senza mancu vedelu.

S’era chjinata in sala, accant’à a porta vitrata chì dava annant’à a tarrazza. Fora, chjinati à un tavulinu accantu à quellu di Ghjuvan Filice, l’ultimi turisti pigliavanu u so caffè à latte gudendusi a carezza di i ragi sittimbrini… A so luce chì vinia à pichjà annant’à u vetru, accindia i tratti di u visu parfettu d’issa donna magnifica è altiera. Da ch’ella era intruta in caffè, era natu un ambiente guasi sulenne è i clienti, insischiti, parlavanu sottu voce. Sta chietudine inabituale à l’ora di l’appiritivu, paria vulsuta da tutti, quant’è chì nimu vulissi intarrompe u filu di a littura di a donna chì, appena chjinata, avia cacciatu un librone da u so saccu. À ogni pagina ch’ella girava, pisava l’ochji ghjittendu in quà è in là lampe di disprezzu, indirizzate tantu à u locu cà à a ghjente. À chì scuntrava quelli ochji negri si guardava subitu i scarpi.

A so billezza, tutta a so parsona è dinù u so carattare, a piazzavanu inde una categuria alta… Quella di e donne chì ùn si ponu micca tuccà. Cusì avarianu pinsatu l’omi « nurmali » ma di quessa Ghjuvan Filice ùn ne avia primura… A sapia po dinù ellu ch’omu pudia piglià ogni citadella. Ad ogni colpu era listessa : bastava a sfida di qualchì furtezza inalpillata per ch’ellu si lampessi à curtella in bocca cum’è quelli pirati in franasia… È tandu, avia qualcosa cum’è una spezia di forza, una « grazia » chì guidava e so parolle è i sò gesti. Sta maraviglia chì vinia d’entre in caffè ùn pudia esse cà per ellu…

Mancu si pudia dì ch’ellu avissi un mettudu pricisu, elaburatu capunanzu o un discorsu di seduttore amparatu à mente Ghjuvan Filice… U so modus operandi ùn avia nulla di pueticu o puru d’uriginale, era piuttostu « classicu ». Di regula, attaccava offrendu una zicaretta o qualcosa à beie… È benchì l’omu fussi sempre curtese, a tecnica ella ùn avia nulla d’eccezziunale… U tuttu era d’entre in cuntattu, a so « grazia » facia u restu. Ùn si sà micca perchè, ma à e donne, ancu belle ch’elle fussinu, Ghjuvan Filice li piacia. Mi scordu di divvi chì u so fisicu era appena cum’è u so discorsu : urdinariu…

Ellu, lighjia e so puesie, o piuttostu facia nice… Quella di u castagnu, era un pezzu ch’ellu ùn la guardava più… Funu fugaci i so primi sguardi chì anch’ellu cum’è tutti era intimuritu, ma u sonniu fattu donna ch’ellu avia davanti ad ellu l’avia strigatu è pianu pianu, senza ch’ellu si n’arvidissi, s’era impatrunitu di i so ochji. Girendu a pagina di u so librone, vide à Ghjuvan Filice chì a fidiava da fora à traversu a porta vitrata. A so risposta fù un sguardu simule à tutti quelli ch’ella avia mandatu à l’altri clienti sin’à avà… U so sdegnu, chì avaria subitu impitratu u core di l’omi «nurmali», à Ghjuvan Filice li fece l’effettu cuntrariu : a miccanica di a sfida di a furtezza inalpillata era in anda… U nostru piratu mossu da a forza strana chì u guidava in simuli assalti, era digià arrittu, in faccia ad ella :

— Scuseti o madamicedda, mi possu permetta d’offravi calcosa à bia ?

— Innò.


Circione
Revenir en haut Aller en bas
Voir le profil de l'utilisateur
Sumenta

avatar

Messages : 2050
Date d'inscription : 25/02/2012

MessageSujet: Re: Scritti imposti antulugia   Mer 27 Fév - 15:02


Ghjuvan Filici hè arrimbatu à u comptoir. Sta sera, hè a bona a sà.
Sin'à oghje, ùn s'hè mai pigliatu chè bocchi.
S'arricorda di quella volta, quand'ellu avia statu à sente i cunsiglii di Circione. " Falli vede i ritratti di e truite chè tù chjappi, viderai marchja à tutti i colpi."
E zitelle di u paese ne ridenu sempre avà. Ma cusì hà capitu chì Circione era un mittò, è chì tutte e chjavate ch'ellu li cuntava, ùn e facia chè in u so capu battendusi e seghe.

Ma sta sera, hè a bona, ella hè quì chì balla, Petra Alta a chjamanu.
Ghjuvan Filici si face u filmu in u so capu. Li parlerà di puesia, di puesia russia ancu per impresiunalla, poi impruviserà ancu qualcosa annantu à a so bellezza, s'ellu ùn ci ghjunghje cusì, po allora.

Si sciacca u so whisky d'un colpu. Hè prontu per parlalli di puesia.
S'avanza ver'di ella, li pichja nantu à a spalla, un surrisu più perversu chè dolce schjarinisce a so faccia.

Mi piacerebbi à sciaccatti un palu in culu.
....

U pattone li hà fattu vulà i spechjetti.


U Ghjudice
Revenir en haut Aller en bas
Voir le profil de l'utilisateur
Sumenta

avatar

Messages : 2050
Date d'inscription : 25/02/2012

MessageSujet: Re: Scritti imposti antulugia   Mer 27 Fév - 15:04


Nunda, ma nunda di nunda ci averia fattu pensà una siconda ch'e no ci truveriamu un ghjornu inseme ind'un lettu à gode i sette celi.

Ellu guardava e studiente sexy, cù i vistiti corti è stretti è parlava cù i so amichi di modu cinicu di e so avventure d'un ghjornu : i sentia chjachjarà quand'elli ùn si misfidavanu in u caffè di u vechju Brittonu cugnumatu "Barberousse", à cantu à a Facultà. U truvava bellu, era grande, bè fattu senza esse spurtivu, ochjineri. Ma mi tenia luntanu, i so discorsi mi dispiacianu, ch'elli sianu nantu à e donne o nantu à a pulitica : ùn paria di crede in nunda nè in nimu, for di ellu stessu.

Eiu, sempre in jean-sweatshirt-baskets, ùn guardava à nimu, sunniava di sorte di a mo banlieue grisgia è triste, sunniava à a Corsica ch'è vidia più bella chè u mondu interu. Sunniava di scrive è a mo sola cumpagnia era un picculu carnettu di coghju induve tenia tutti i testi chì mi venianu à casu, à n'importa chì ora, pè u più a notte. In pulitica, m'era lasciata seduce da u discorsu di "liberazione naziunale" di a Corsica chì à ellu u facia more di risa quandu mi scappava un dettu.

Ci accadia di cruciacci davanti à u Flipper di u Caffè è di fà partite accanite, eiu ùn lu lasciava piglià a suprana è mi battia cum'è una liona. Quandu vincia, mi pacava un caffè, ma ùn era per dragà, manc'appena. Era sempre "accuppatu" in altrò, à caccia...

Eppo a mo cugina Katia, a mo idula, quella chì piacia à tutti i masci è chì si sapia veste, m'hà lacatu un pacchettu di vistiti, chì ella ne cambiava ogni matina.

Quellu ghjornu sò ghjunta in l'anfì cù u un vestitu rosiu bè aghjustatu, cù liagliule chì lasciavanu una vista bella aperta nantu à u principiu di i petti, avia messu i tacchi alti (ma cristu, quantu m'era difficiule di viaghjà cù st'arnesi) è aghju surpresu u so sguardu : cambiatu in tuttu! Mi sò intesa trubulata da stu sguardu, l'elettricità m'hà attraversatu tutta a persona cum'è una saetta. Durante tuttu u corsu l'aghju intesu nantu à u mo tuppezzu, ùn avia bisognu di vultammi.

Aghju fattu nice di nunda, sò andata à u Caffè cum'è sempre dopu à u corsu, emu fattu duie partite di Flipper, ma pè u mo "premiu" m'hà prupostu d'andà in altrò...

Aghju ricusatu (perchè?? a peura, u trimuleghju m'avia presu, ùn avia ch'una voglia : fughje u predatore, u cacciatore è i so ochji lucicanti di lupu...)

U lindumane matina, m'aspittava davanti à a surtita di u Metrò. Sta volta avia messu un vestitu rossu ancu più sublime, cortu abbastanza, è avia studiatu tutti i ditagli di sopra è di sottu... U mo stintu a mi dicia : ci avia da passà, ma a peura andava cù a frebba di l'attesa.

M'aspettava seriu seriu, l'ochji più neri chè mai... M'hà tesu u mo carnettu ch'avia sminticatu a vigilia in u caffè, in a mo partenza precipitata.

"Sì tù ch'ai scrittu tuttu què?"

Madonna, ùn avia mai mustratu 'ssi puemi à nimu è era Ellu à avelli lettu!

Ma ùn si ridia micca, a so voce era calda, un pocu arghita.

Duveriamu parlà un pocu, veni ind'è Barberousse?

Vulia prutestà chì ci era un corsu di Dirittu publicu ma ùn avia nisuna forza di pettu à u so sguardu...

Ci simu messi in fondu, è pocu dopu, tuttu parlendu, mi tenia stretta stretta contru à ellu è eiu mi lasciava andà : mi paria d'esse pè a prima volta di a mo vita in u locu induve mi tuccava ad esse, ùn mi punia più nisuna questione è u so calore avia fattu svulà a peura. Barberousse ci guardava da luntanu cù un surrisu cumplice chì paria di dì : "hè un pezzu ch'e aspettava di vedevi inseme"...

Prima chì l'altri ghjunghjissinu, hà vulsutu parte è m'hà sussuratu in l'arechja "Aghju riservatu una camara in u 14 u, chì ne dici? S'è tù ùn sì pronta, aspetteremu". Mi paria d'esse pronta (cù l'angoscia, quantunque, chì mi turghjò u stomacu una stonda). Aghju dettu di sì è solu tandu m'hà basgiatu, un basgiu lebbiu lebbiu, eppo più insistante, u gustu di sigaretta è di caffè di a so lingua circataghja u senteraghju sempre...Era cum'è in levitazione...

Una prima dilusione mi fece atterrisce. Un albergu puzzicosu, un "hôtel de passe", eccu induv'ellu avia riservatu. Paria d'esse un abituatu, a donna grassa è grussiera di l'accogliu li dicia di tù. Pensu chì sò sbiancata di colpu, si n'hè avvistu è hà esitatu un mumentu. Mentre ch'ellu pagava, sò fughjita fora di corre, pienghjendu cum'è una funtana. Aghju mancatu di fammi sfragellà da una vittura. Oh li mughji di u cunduttore, e ghjastemme, ma chì mi pudia fà?

M'hà richjappu da l'altru latu di u carrughju è m'hà strintu forte : "mi scusu, mi scusu, ùn sò perchè t'aghju purtatu quì, scusami, aghju fattu un sbagliu, andemu in casa meia, ci hè a mo mamma ma viderai, ùn hè un prublemu...

M'inchietava quantunque di sbarcà cusì ind'è a mamma, ma a corcia era un pocu "semplice". M'hà surrisu, era cuntenta di vede u so figliolu cù una "fidanzata"...

Simu andati diretta in a so camara.

Hà puntatu a porta, m'hà appughjatu contru à ella, m'hà sullevatu è da 'ssu mumentu ùn ci simu più lentati d'un centimetru durante trè ghjorni...
I so ochji lucicanti eranu ciò chì mi purtava u più altu perchè dicianu u so desideriu è qualcosa di più ... E so mane decise è ferme m'anu spugliatu lentamente (a canzona di Greco mi vense in core), s'arrestava per ammirà u mo caraccò, i mo sottupanni, per sfà e liagliule ad una ad una (o Katia, Katia, ùn ti ringrazieraghju mai abbastanza)

Sì vistuta cum'è una principessa, o cara, ma sai, avà aghju scupertu a to anima in i to puemi è puderii esse in stracci, per mè seria listessa...

Hè un pezzu chì t'usservu, sai... (surpresa)

Punia e questione precise, vulia sapè ciò chì mi piacia, ciò ch'avia digià fattu, paria di capisce ch'ùn era tanta aggalabbata nè sperimentata...À mè ùn mi piacia di parlanne, li aghju dettu chì ciò chì li piacia à ellu, ciò ch'ellu bramava di fà , cun ellu era pronta à falla, è era vera.

Ti vogliu meia per tutte e parte, sì d'accordu?

è cusì fù fatta, nunda mi paria bruttu nè goffu cun ellu, tutte e parte di a so persona mi parianu bone, l'adori eranu cum'è un mele dolce o forte cum'elli dicianu i puemi chinesi, più nunda mi facia peura postu ch'ellu mi dumandava u mo accunsentu, ch'ellu mi pigliava per a manu per cunducemi.

Avia ancu ritratti di pusizione, ci simu fattu risate sceme à pruvà certi affari è vultavamu spessu à e cose e più semplice : eiu da sopra à ellu o ellu da sopra.

Era cum'è un mare chì colla, colla, era sullevata sempre più altu, peccatu chì ùn pudia stridà troppu forte (a mamma è a sera u babbu eranu in l'appartamentu)

A matina mi priparava u caffè cù e tartine di mele. Isciamu solu per manghjà à u risturante è una volta emu fattu cena in casa cù u babbu è a mamma. Tandu eiu mi sò intesa vergugnosa,ùn sapia induve mettemi, solu a so manu nantu à a meia mi rasserenava.

Eppo ci hè vulsutu à vultà in u mondu, in a vita, simu isciuti fiacchi, sfiatati, smagriti, ma vultavamu guasi ogni ghjornu in a so camara, è l'esami quella annata l'aghju fiascatu bè."


Addisperata
Revenir en haut Aller en bas
Voir le profil de l'utilisateur
Sumenta

avatar

Messages : 2050
Date d'inscription : 25/02/2012

MessageSujet: Re: Scritti imposti antulugia   Mer 27 Fév - 15:07

Un messagiu




Principiu di dopu miziornu, Piazza Santu Niculà.

Quella mane Filippu ùn avia micca betu. S'era toltu da u lettu versi miziornu, era a sola manera d'ùn lasciassi andà à i delizii di l'alcollu. Un caffé, una strufinata à i denti è si n'era falatu in carrughju. Viaghjava pianu, dendu ogni tantu un uchjata à u so teleffonu. Ghjuntu nant'à a piazza, scelse una terrazza, un tavulinu è ci si misse à pusà. Ponse u teleffonu davanti à ellu è cummandò una vodka. Un antra eppo un antra è e si sciaccò sempre vardendu à l'incrochju, aspittendune un cennu. Versi duie ore, l'apparechju trimulò. Filippu fece una voce à u servore, li cherse una vodka doppia a fece falà è chjappò u teleffonu in a so manu manca. U so ditu grossu carizzava u buttone d'apartura di i missaghji. Sturzulava, circava a forza di move 'ssa piccula pressione chì avia da decide di tuttu. Fidighjò ingiru à ellu, a ghjente ridia, i zitelli a si ghjucavanu, un battellu andava à d'altre sponde. Una bella ghjurnata, una di quelle à piglià e decisione chjare, à cambià i distini. A viciglia avia mandatu un sms à Laura a so innamurata, u so core, a so vita. A risposta ùn era vinuta subitu è dopu à essesi annigatu di vinu l'avia fatta di sonnu, ultimu rifugiu contru à a realità. È ava, era ghjunta, li bastava à appughjà nant'à 'ssu buttunellu è saparia. Era cum'è ghjucà à a rulletta russia è ghjucò. Cacciò una pistola, fece girà a rutulella di e palle è si misse u cannone contru à u core. E zitelle pusate à u tavulinu à cantu mughjonu di paura sintendu u colpu. Ebbinu solu u tempu di vede à Filippu parte à l'indaretu è cascà in pianu. Firmò nant'à u spinu, e bracce sparte, una tacca rossa in pettu.

Una stonda dopu, una pulizzera ricolse a pistola è u teleffonu. Nentru à l'arma, firmava cinque palle, nant'à u screnu, e cinque lettare d'una cundanna senza appellu : "Addiu".


Tittolu
Revenir en haut Aller en bas
Voir le profil de l'utilisateur
Sumenta

avatar

Messages : 2050
Date d'inscription : 25/02/2012

MessageSujet: Re: Scritti imposti antulugia   Mer 27 Fév - 15:08


Anton'Ghjacumu apre a lettara senza fassi illusione. Sà capunanzu ch'ella anderà à accatastassi cun tutte quelle ricevute dapoi ch'elli anu vintu u prucessu. Torna una cun ritratti di cascie, cun minaccie di morte, una di più à rodesilu da nentru. Un hè mancu tantu per ellu ch'ellu si ne face, hè di più per a moglia è u figliolu. Sò stati minacciati anch'elli in l'ultima lettera. Dapoi ùn ne riposa, nè di notte nè di ghjornu. S'hà ancu compru una pistola. Li costa à ellu u so impegnu da difende a legalità è u dirittu in 'ssu paese. Guasi guasi si ne pente d'avè fattu annulà 'ssu prugettu di " golf " cun 300 letti " les pieds dans l'eau" dicia a pubblicità.

Vede un'ombra passà di punta à a persiana è cansassi. Si dicerebbi ch'elli s'impostinu. U so cerbellu s'imballa. L'ombra impustata è e lettere minacciante è a moglia è u figliolu fora. Piglia a pistola in u scagnu è senza riflette nè parlà tira à traversu à a persiana.

L'ombra fala in pianu senza un lagnu.

Sente a moglia mughjà. Apre a persiana.

U figliolu ghjace in un bagnu di sangue.


U Ghjudice
Revenir en haut Aller en bas
Voir le profil de l'utilisateur
Sumenta

avatar

Messages : 2050
Date d'inscription : 25/02/2012

MessageSujet: Re: Scritti imposti antulugia   Mer 27 Fév - 15:09

Princess 4 ever era stracquata annant'à u lettu, spalanchendu i so anchi è muscendumi ghjà bedda infusa a so finestra calda. Era quì u risultatu di parichji scambii di sms è di missaghji privati annant'à u situ d'Isula. Certu, mi paria bedda ghjovana 'ssa grossa donna dea, ma mi n'infuttiu pocu assà, stasera tastaria u me fiori trattu è duru, puntu è basta !

- Tè ! o fata, scuzzulami quissu ! Cunta ghjà sì tù ha' ghjà vistu un paghju di spichjetti cù un vulumu paghjesu ! ch'e' li dissi tuttu sbraghittendumi.

Dui minuti dopu, li spaccaiu u palazzu senza mancu lubrificà. A principessa ingurda briunaia com'è una persa : "Oh my god ! How ! Hè da veru u più grossu libru ch'aghju ma' presu in u parastagiu !!!"

Saziu, sbiutatu, mi lampaiu annant'à u spinu, i braccia in cruci è u tirrulu à l'aria, ch'iddu rispiressi appena dopu à tamanta chjachjarata.

Quidda anghjula sporca è vituparata di Princess 4 ever s'avvicinò tandu, pà cuffassi ghjustu contr'à u me pettu, calurosa, è sussurammi à l'arichji dui parolli di tinnarezza.

- Ùn parlu micca à l'intillittuali ! ch'e' li risposi senza fighjulalla. A prossima volta riflittarè nanzi d'inviammi i missaghja annant'à Isula !




Ghjuvan Filici
Revenir en haut Aller en bas
Voir le profil de l'utilisateur
Sumenta

avatar

Messages : 2050
Date d'inscription : 25/02/2012

MessageSujet: Re: Scritti imposti antulugia   Mer 27 Fév - 15:11

Cronica ghjudiziara
u 30 di ghjennaghju di u 2033


« Monsieur sérieux, ayant petit capital, désire épouser veuve ou femme incomprise, entre 35 et 45 ans, bien sous tous rapports, situation en rapport »*

Abituatu à e scruccunerie Landri avia avutu l’idea fumicosa in stu 2014 di fà passà un annunziu in i giurnali lucali è nant’à i media virtuali. Corse Matin, Le Petit Bastiais, Le Journal de la Corse, Twitter, Facebook, Tumblr, avianu ricevutu sugni messagi in a rubrica matrimuniale o nant’à a so pagina d’accogliu.

Ben'intesu a trappula funziunò d'incanti. In issi tempi di miseria economica è di cunfusione emuziunale eranu numarose quelle chì si vulianu marità. Intelligente, psicologu, paghjellaghju à e so ore perse, l’omu fece cunniscenza d'omancu 300 donne. Maria, Anghjulina, Lisandra, Antunietta, Paulina, Maddalena, Francesca, Livia, Unesta, Chjara, Nunzia, Ghjulia, Elisa, Petra, Lisabetta, Margarita, Marietta, Amandina… avianu tutte cedutu à u stu scruccone vulgaru. Avia un fisicu pocu agradevule ma andate à sapè perchè, piacia à e donne. Era un fattu. Sarà statu u so sguardu vitrosu di stumacatu di i sessu, a so chjocca pilata, a so dimarchja sticchita chì avia fattu d’ellu un voltacore ? Quellu ch’omu chjamava u « Barbiturchinu di Corti » avia soprattuttu prufittatu di u cuntestu. Aduprendu si di più di 90 fintinomi (Ruclinone, Rappallinu, Tittolu, Circione, Ghjallochju, Ghjuvan Filici, Erbaghju, Sidussincu, Caparrittu, Rocco2b, Principe4ever, Laricciudiuniolu, Pinudipalumbaghja, ecc.) pagava 2 camere à l’ostellu HR, 3 ind’è Colonna, un appartamente in a vechja cità è unu in e Lubiacce, senza cuntà i 2 guardia mobuli in u rughjone di Bastia è 2 case in Pianellu, avia messu in piazza un veru pianu machjavellicu. Di manera meticulosa avia scrittu una decina di lettere di risposta è fattu un schedariu metodicu di e so cunquiste, u tuttu archiviatu ben nant’à u so discu duru. Ci scrivia i detagli fisichi, nasi disgraziosi, arechje di pachidermu, ochji di topu,ecc. ma dinù a situazione familiale è a furtuna. I ducumenti eranu classificati sicondu designazione precise : « Risponde subitu », « senza seguita », « nunda à fà » è l’iniziale « SF » (senza furtuna) eliminendu d’offiziu a candidata.

Ma perchè avia risicatu a ghigliottina ? Pè u soldu. Fendu firmà procurazione è dunazione diverse, à a sparizione di e so vittime vendia case è tetti, mobuli è panni è si tenia a muneta. In u 2017 scuntrò à Fernanda Segret à u Caffè di Francia. Diventarà a so amica. A tenerà caru, quessa ùn smariscerà micca. Hè ancu in casa soia ch’ellu sarà arrestatu da a pulizza. À a listessa epica e prime famiglie cumencianu à dubità. Madamicella Lacosta per esempiu s’inchieta perchè chì ùn hà micca nutizie di a so surella Celestina pertuta per a dumenicata in Pianellu cù Landri. Cuntatta u sgiò merre u quale, suspresu da u so mail, li dice ch’una antra dumanda di u listessu tippu era ghjunta. A famiglia Pilloti, preoccupata da l'assenza di a so figliola venia di cuntattà lu. Lagnanza hè dipusitata. L’inchiesta cumencia cù u vicinatu di stu schisofrenu murtiferu chì si lagnava di u fume negru è di a puzza chì venia sempre di a so casa. U maltoltu fattu avia pigliatu l’abitudine di finisce e so cumpagne in potée o arrustite in u so fornu à pirulisa Schmidt.

Dece donne fubbenu tombe da Landri :

• Jeanne Cucheti : 39 anni, veduva, sartora, smarita di ghjennaghju 2015
• Lina Laborde : 47 anni, veduva, disoccupata, smarita di ghjugnu 2015
• Maria Angelica Guillini : 52 anni, veduva, renditaria, smarita d’ aostu 2015
• Berta-Anna Héoni : 55 anni, veduva, disoccupata, smarita di dicembre 2015
• Anna Collombi : 39 anni, veduva, secretaria, smarita di dicembre 2016
• Lyane Jaume : 36 anni, guasi divurziata, sartora, smarita di marzu 2017
• Andria Babelai : 19 anni, celibataria, serva, smarita di aprile 2017
• Celestina Buisson : 44 anni, veduva, serva, smarita di nuvembre 2017
• Annette Pasquali : 36 anni, divurziata, disoccupata, smarita d’aprile 2018
• Maria-Teresa Marchadier 39 anni, celibataria, puttana, smarita di ghjennaghju 2019

L’ondecesima vittima fù Tittina, 17 anni, u scivavà di a prima donna assassinata.

In u 2021 cuminciò u prucessu di Landri chì mughjava a so nucenza. U so avucatu Mu Moro-Giafferi, grande penalistu di l’epica, pruvò un colpu chì starà in l’annali ghjudiziari. Durante u dibattitu, quandu vense u mumentu d’evucà una di e donne smarite, si girò in direzzione di a porta è disse : « Sta donna ch'omu dice smarita, eccu la!!!» . A folla guardò a porta. Tandu l’avucatu lampò à a corte : « A vidite bè chì nimu ci crede ch'ella hè smarita! si sò girati tutti sani sani o sgìo presidente! » « Iè, for di u vostru cliente... » rispose quellu.

Landri fù ghigliottinatu u 25 di ferraghju di u 2022 à 6 ore di matina.**


* per disgrazia Landri ùn era micca corsofonu lacrime
** Toute ressemblance avec des personnages existants ou ayant existé ne serait pas purement fortuite lingua



Petra Circione
Revenir en haut Aller en bas
Voir le profil de l'utilisateur
Sumenta

avatar

Messages : 2050
Date d'inscription : 25/02/2012

MessageSujet: Re: Scritti imposti antulugia   Mer 27 Fév - 15:11


Avia aspettatu l’ultimu mumentu per entre. Ùn era più pussibule di fughje avà, era intrutu è surtita ùn ci n’era.
A colpa era di Maria, s’ella avia rispostu omancu una volta à tutte e so chjame è missaghji ma era solu silenziu dipoi a so partenza par u Bresiliu dui mesi fà. Tandu, ùn avia più riposu, ùn era solu ghjelusia o urgogliu feritu. S’inchietava da veru. Chì sà ciò chì pò accade à una giuvanotta un pocu persa in stu paese… Avia intesu certe storie, lighjia ancu i ghjurnali per sapè un pocu ciò chì si passava è era nata una angoscia terribule.
È finalmente, s’era decisu à affruntà a so fubbia di l’aviò per andà à vede ciò chì ne era di a situazione, truvà una spiecazione à stu silenziu. Sarà forse una spezia di Bresilianu, bellu zitellu è carcu à musculi a spiecazione ma s’era priparatu ancu à què.
Li facia quantunque un pocu male in quellu locu di pagà si un bigliettu d’aviò per custattà a so disfatta amurosa ma era dinù u prezzu di a so pace, permette li di pensà à d’altre donne, à d’altre strinte è d’altri basgi caldi…
Era prontu per u so primu viaghju reale chì per avà e so aventure è splurazione eranu piuttostu in u so capu o allora vicin’à u so quartieru in Pariggi.

S’era messu à pusà ùn circhendu micca à usservà à l’altri passageri, cumminciava à sente si male. Era dighjà strintu, stallatu è sudava d’angoscia. Li mancava u soffiu è u so ciarbellu bullia. Ùn era capace di pensà, raggiunà è purtantu li ci vulia à calmà si… pensà à Maria, pensà à Maria… Eccu, ciò ch’ellu circava à fà per appacià si, suffiendu di manera regulare cum’ella a facenu e donne in partu. Circava in tutte e so risorce psiculogiche per calmà i so terrori i più prufondi è arradicati à a so anima dipoi sempre.
Era partutu l’aviò, s’era staccatu da u catramu è u mondu sottu à elli ùn era più cà mosaiche di culori è forme diversi. U mondu cum’ellu ùn l’avia mai vistu. A vizione l’avia un pocu rassirinatu, ghjustu per ciuttà in u sonnu, perde a nuzione di u tempu è di u periculu ma facia sunniacci, i rimori di l’aviò si mischiavanu cù e so angosce : paura di l’aviò, paura di scopre Maria innamurata, paura d’amparà una gattiva nutizia… morte, accidente, sparizione. Paura d’avè la persa per sempre.
À tempu discitatu, a fubbia mughjava cum'è una bestia salvatica amansata qualchì minuti ma più periculosa cà mai. Cumminciava à trimà è era scuzzulatu di spasmi cum’è una girivecula in mani à un magu scemu. Ùn era mancu più capace di pensà à Maria, sudava più chè mai… u passageru accantu à ellu si decise à chjamà à l’ostessa. Quella era affaccata per calmà lu.

L’appaciava cù a so voce dolce, circava à truvà parulle magiche, u rassicurava, u so prufume era dilicatu è li cullava in capu, li dicia chì u viaghju era bellu avanzatu, chì eranu avà sopra à l’uceanu atlanticu, li dumandava senza aspettà nisuna risposta ciò ch’ellu andava à fà, li dicia d’avà cunfidenza è in lu mentre li mettia un mascu d’ossigeniu. Partia in e prufundure di l’anima purtatu da e parulle serene di a so musa aeriana…
Sunniava di Maria chì li parlava di i so missaghji, si scusava d’ùn avè rispostu, li parlava di pace, d’amore è di brama. Li dicia "ci avemu da ritruvà amore, ùn t’inchietà. T’aspettu…"
Si sentia appaciatu è serenu cum’è mai quandì l’aviò entrò in lu mare in un fracassu terribule…
Era u volu 447 di ghjugnu 2009.


Ciriola
Revenir en haut Aller en bas
Voir le profil de l'utilisateur
Contenu sponsorisé




MessageSujet: Re: Scritti imposti antulugia   

Revenir en haut Aller en bas
 
Scritti imposti antulugia
Voir le sujet précédent Voir le sujet suivant Revenir en haut 
Page 1 sur 1
 Sujets similaires
-
» Scritti imposti antulugia
» Scritti imposti
» Scritti imposti
» Antulugia d'Ernest Papi
» ANTULUGIA:Ribombi è risposte

Permission de ce forum:Vous ne pouvez pas répondre aux sujets dans ce forum
ISULA :: Quandu l'inchjostru sumena :: Prosa-
Sauter vers: