Bangladesh, " u techju ùn crede u famitu"

Hè una ritrattu – coltu annant'à facebook – di una viulenza è di una forza trimenda ch'e vi vogliu mustrà, un ritrattu chì scunvoglie ma chì ne dice di più cà tanti discorsi, per dinuncià u scandalu di l'industria tessile.



L'attelli tessili di u Bangladesh sò l'ultimi anelli di una catena infernale chì omu chjamà "l'effettu dominò". U fattu ch'elle sianu limitate e impurtazione in Auropa, incuragisce certi paesi cum'è a China à spiazzà i so attelli in altrò. E grande marche cundannanu di una parte e cundizione d'insicurità di i travagliadori ma in listessu tempu cuntinueghjanu à passà cumanda. Megliu, dopu ch'ellu si ne sia falatu u Rana Plaza, fendu più di mille vittime in Dacca, è chì u guvernu appii prumessu di pacà di più l'impiicati, è di fà un sforzu annant'à a sicurità, parechje multinaziunale anu minacciatu di parte da u Bangladesh – ma per andà induve? sarà difficiule per elle à truvà manu d'opara è attelli à cusì bon pattu. Certe marche elle anu digià signatu una spezia d'accordu.

Quì ci hè varie riazzione, l'idea forse più sparta hè di ùn vestesi più ind'è certe insegne... hè capita chì per certe parsone, chì ùn si vestenu cà ind'è Prada – è ancu ùn hè micca detta ch'elli ùn appianu micca attelli à u Bangladesh – u boycott di certe marche cum'è Mango o Leclerc saria a panacea universale, ma ùn ci scurdemu quantunque chì i veri culpevuli ùn sò micca i povari di quì.

Hè tuttu un sistema puliticu, chì mette nanzu u prufittu cà a dignità umana, una spirale chì face ch'omu diventa fatalistu è ùn si rivolta mancu più. È mentre certi s'ingrassanu senza purtà minimu pinseru, noi ci sintimu complici di sta catena vargugnosa, è ci dumandemu induve ci emu da cumprà i nostri T-shirt. Ma u techju ùn crede u famitu.

ne simu à mille morti è perchè? per a moda, per a sucietà di cunsumazione, per l'europeani chì volenu sempre cumprà di più è menu caru. cumu fà per ottene prezzi chì li cunvene? fà travaglià l'altri senza occupà si di u periculu o di a so salute, ghjuvà si di u so statutu di populu miseriosu...tuttu què ùn hà nunda à chì vede cù a crisa...ghjè sempre statu cusì.
zitelli schjavi, attelli trapieni di ghjente, paghe di miseria. ind'è noi ci vole à cumprà, scambià, rinuvellà, seguità mode sfarente è ricumincià sempre per sazià u narcissismu di qualchi unu...

una ghjornu, in scola, parlendu di l'ecunumia chinese emu ammintatu certe cundizione di travagliu è u destinu di i zitelli di sti lochi cusì luntani...ben intesu i mo ciucci anu avutu una reazzione colma di comprensione è di tristezza. certi anu vulsutu ancu "boycottà" i prudutti esciuti di sti paesi in ste cundizione...è ben intesu certi parenti (carchi à soldi ci vole à dilla)l'anu mughjati postu ch'elli ùn vulianu micca pagà più caru panni è ghjochi...eccu u so argumentariu...

allora cumpremu senza riflette è lascemu li more...