Circione
Messages : 2212 Date d'inscription : 27/02/2012
| Sujet: Sicondu festivale internaziunale di a puesia Jeu 20 Juin - 13:31 | |
| S'hè compiu dumenica scorsa u sicondu festivale internaziunale di a puesia u vennari sò cullati parechji sculari chì avianu participatu à u cuncorsu di puesia, hè sempre un piacè per l'insignanti d'avvià l'elevi chì s'impegnanu in simuli prugetti. Vi mettu quì e puesie ch'elli anu prupostu, parechje sò state primiate, filicitzione à tutti i participanti è à ringrazialli! - L'elevi di u liceu di Balagna a écrit:
Vindetta
L’acqua hè sangue u tempu hè cundanna… Dui anni ch’aspittava avà hè ora. Mi rode stu sintimu, a cannella hè strinta ma a manu ùn trema. A morte hè lampata, sona u murtoriu. Nè lacrime nè rimorsu ùn ponu sguassà u sangue chì hè corsu.
L’acqua hè sangue u tempu hè cundanna…
Antoine Clément, Scola di siconda, Liceu di Balagna.
Paese
Di veranu u mo bellu paese hè culuritu Chjarasge è frutti ma paese bughju Nimu nimu, u corciu paese hè feritu Ma sempre inde a so tana fermerà u Lupu
D'estate u mo bellu paese hè caldu è vivu Feste è serate a notte ùn si compie mai Manghjemu, cantemu è partemu in giru Mà sempre cù l'allegria è senza mai guai
D'auturnu u mo bellu paese hè fieru Acqua bella fresca à e Quercidine Cù in fronte u San Petrone cù bianche cime
D'inguernu u mo bellu paese hè frescu Frescu in natura è frescu in e strette Acqua linda per u lavatoghju è neve nant'à e petre
Jean-André MARCHIANI, scola di prima ES, liceu di Balagna.
Santa Reparata di Balagna Supraneghja à Munticellu Azzingatu à a muntagna Campa di pettu à u mare Batticore di a Balagna Cù una rambella d’alivu Risponde à Lisulani Per mustrà quant’ell'hè vivu Ancu à l'altri paisani Ne ribomba u so nome Da Zilia à Sant’Antuninu Si ne fale fin’à Reginu Incantendu u Balaninu Sempre pront’à festighjà Da ch’ellu spunta l’estate In paese a sanu fà Durà ancu e nuttate Corentin MANCIOPPI, Scola di prima S, liceu di Balagna.
A Partenza
U battellu aspetta in cità Per purtammi in cuntinente Luntanu di a mio ghjente Ma ùn vogliu andà quallà
Ma collu in stu battellu Ancu sè ùn vogliu andà Perchè ùn possu micca campà Luntanu di Munticellu
Mi trovu nantu à u ponte È vecu u mio paese Chì smarisce à l’orizonte Ma starà sempre u listessu. Thomas Marchetti, scola di siconda, liceu di Balagna.
Sunettu turchinu
Ristarè sempre in lu mio core Tù o squadra accanita è fiera Di l’isula portabandera U to ricordu ùn pò more !
U to core sempre turchinu L’Auropa hà fattu trimà Furiani ai fattu cantà Ùn avia paura di nimu !
Ienà, Torino è « Novucastellu » U to populu ti ringrazia D’avelli datu tanta gloria
D’esse quì malgradu a disgrazia Di issu veranincu macellu Hè a to più bella vittoria
Anthony Flori. Scola di prima S, liceu di Balagna.
Una brama di libertà
Per tanti omi chì sò morti L’arme in manu sò cascati Per difende un ideale È valori calpighjati Per tante battaglie ardente Di issi populi inghjuliati
Tutti s’eranu piazzati Sott’à a listessa bandera À u spuntà di u sole S’anu cintu a carchera Tutti si ne sò andati À vede una vita nera
Omi di valore pieni Omi di curagiu eternu Furiosi è scatinati È di spiritu fraternu Tutti si ne sò andati Sò pochi à esse vultati
Avianu in core à elli Una brama di libertà
Carlu Rocchi, scola di prima S, liceu di Balagna.
2B-Tittina
Hè u sole di a mo vita Hè l’alitu d’estatina Hè u soffiu di l’amore Chì si pesa ogni matina Ùn cunnoscu chè u so nome Si chjama 2B-Tittina
L’aghju scuntrata una sera Annantu à l’urdinatore Emu discutatu appena M’hà apertu u so core È m’hà ancu fattu crede Chì era bella cum’è un fiore
Ci scriviamu ogni ghjornu Cuntendu e nostre vite Sms è cumpagnia Ci frighjianu e dite Eranu parolle dolce Tante prumesse infinite
Ci simu vulsuti vede Emu accesu a webcama Aghju vistu a so faccia È m’hà cacciatu ogni brama In mè stessu aghju pinsatu : O cum’ella hè goffa ! Uh mamma !
Joris Agostini, Lucie Langlade, Léa Luiggi, Yohann Sandroni. Scola di siconda, liceu di Balagna.
Vuliu
Vuliu parlatti di luna, Di stelle eterne in u celu, Di sole lucendu in la mio vita Quand’eramu inseme.
Vuliu campà cun tè In una casa fiurita, Cù zitelli belli cum’è tè È rise sunendu à l’infinitu.
M’ai lasciatu cusì sola, Pocu impreme a ragione Eiu mi sentu addisperata Di lacrime sò e mo nuttate.
Ma m’anu parlatu di tè, M’anu dettu « Cun ella stà bè. ».
Vuliu esse u to miraculu, È imbellisce i to ghjorni, Avà capiscu chì t’aghju persu, È soprattuttu ch’ùn rivenerai.
Ùn senti mancu i mo pienti, A strappatura di u mo core, E tratte nant’à l’isule rosse, U to silenziu ind’u mo rimore.
Ma m’anu parlatu di tè, M’anu dettu « Cun ella stà bè. ».
Eva Cardi, scola di prima ES, liceu di Balagna.
Trà
Trà l’amicizia è l’amore Di sonniu è d’affezzione Pè fà smarisce l’amore È dà tanta passione Trà passione è sintimenti Si pò piattaà u curdogliu Si scrive li so lamenti È s’annegrisce u fogliu Trà anima è ragione A mente hè sbucculata Vole scambià e stagione È si ritrova annicata Trà machja è lume Di mimoria è di ghjuventù Pocu impreme tuttu issu fume Spaventu ùn ci hè più Pè l’amore di a Nazione Anderemu tutti inseme À luttà incù passione Incù e rime di a mente PICOURY Francescu Maria, scola di terminale ES, liceu di Balagna.
Furiani
In una notte senza luna U paradisu turnò infernu È di farru u tarramotu Amattò ogni passione.
Spazzate da un fiume di ventu, Sfragellate à sciume mosse, Anime sciolte da u sfrombu Fronde tolte à u veranu.
È a piaca di u ricordu Chì ferisce i nostri cori Sbucciarà sempre à i ghjorni à vene Cum’è fiori di mai più.
Scola di siconda 4 corsu LV3 (Cullittivu), Liceu di Balagna. Un mumentu aspittatu era quellu di u chjama è rispondi, u Niolu era riprisintatu, Francescu Simeoni è Andria Acquaviva è u vostru servitore in testa accumpagnati da pueti più giovani cum'è Francescu Luciani chì ci hà fattu u piacè di fassi un'affaccata malgradu e so rivisione di l'urale di u capes – ciò chì ùn l'hà micca impeditu di chjappallu!!! – è dinù di u so paisanu Ghjuvan Lucca Luciani chì ci hà fattu anch'ellu qualchì strufata, senza scurdammi di Francescu Geronimi... U Niolu in forza dunque, per dà l'assaltu à un Rusignolu di Zilia bellu risalutu malgradu i so ottantasette anni. L'ultima ghjurnata ricca di parechje cunfarenze annant'à a puesia o u bislinguisimu è di litture di puesie – senza scurdacci di quelli brocci fatti sopr'à locu - s'hè compia incù un bellissimu cuncertu di i Chjami Aghjalesi – ghjunti à u cumplettu . Hè quantunque qualcosa di sente sta quindicina di voce sparghjesi sott'à i castagni, à u pede di Monte Cintu. Eiu aspittava di vedeci un publicu più numarosu cà cusì, una perchè hè una bella scumessa di muntà un festivale cusì à st'eplica in li nostri paesi di muntagna – è sò iniziative chì à titulu di militante culturale ci vole à incuragille –, duie perchè cuncerti di i Chjami Aghjalesi ùn ci n'hè micca tanti. Ma trà u timpacciu – facia un fretu chì si siccava – u fattu ch'ellu cascava u cuncertu in dumenica sera è tutti l'altri avvenimenti culturali pruposti quì è culà in lu badru di a simana di a lingua corsa, ùn eramu cà pochi à pudenne prufittà, tantu peghju per l'altri :p. dunque belle stonde in lingua corsa spartute incù parechji soci d'isula.forumactif.com : Sidussincu, Caparrittu, Tittolu, Isulanu, ecc.
Dernière édition par Circione le Jeu 20 Juin - 14:12, édité 2 fois | |
|
Sumenta
Messages : 2052 Date d'inscription : 25/02/2012
| Sujet: Re: Sicondu festivale internaziunale di a puesia Jeu 20 Juin - 13:52 | |
| impussibile di vede certe fottò, quelle di e puesie | |
|
Circione
Messages : 2212 Date d'inscription : 27/02/2012
| Sujet: Re: Sicondu festivale internaziunale di a puesia Jeu 20 Juin - 14:08 | |
| l'aghju messe in word era un' URL chjappa annant'à gmail, ma inquant'à mè ùn le pudia vede cà eiu.
| |
|
Sumenta
Messages : 2052 Date d'inscription : 25/02/2012
| Sujet: Re: Sicondu festivale internaziunale di a puesia Jeu 20 Juin - 14:14 | |
| | |
|
Circione
Messages : 2212 Date d'inscription : 27/02/2012
| Sujet: Re: Sicondu festivale internaziunale di a puesia Jeu 20 Juin - 14:30 | |
| innò... e più chì mi piacenu à mè sò Vindetta, 2B-Tittina è Furiani. | |
|
Isulanu
Messages : 229 Date d'inscription : 03/03/2012
| Sujet: Re: Sicondu festivale internaziunale di a puesia Jeu 20 Juin - 15:08 | |
| Vindetta pare una sintenza murtale. Corta ma putente. | |
|
Circione
Messages : 2212 Date d'inscription : 27/02/2012
| Sujet: Re: Sicondu festivale internaziunale di a puesia Jeu 20 Juin - 15:32 | |
| iè, a forza di a puesia certe volte a trovi in un versu solu: l"acqua hè sanque"
face parte di i testi premiati, à mè mi piace assai.
| |
|
Contenu sponsorisé
| Sujet: Re: Sicondu festivale internaziunale di a puesia | |
| |
|