trovu nant'à u situ di l'Adecec
http://adecec.net/nutizialeculturale2.php?id=3420
Dopu l’armistiziu di l’8 di settembre di u 1943, u generale Magli riceve u cummandante Colonna d’Istria pè mettesi d'accordu nant’à piani operaziunali cumuni. U Cumitatu di liberazione occupa a prefettura d'Aiacciu è ubligheghja u prefettu di Vichy à signà l’addunita di a Corsica à u Cumitatu francese di Liberazione naziunale, u CFLN.
U 9 di settembre, in u portu di Bastia, u contraturpigliore Aliseo direttu da u capitanu Carlo Fecia di Cossato, cù a curvetta Cormorano, affonda sette nave alemane è face danni à trè altre.
À parte da l’11, u generale Giraud manda 109 omi di u primu battaglione paracadutistu cummandatu da Gambiez nant’à u sottumarinu Casabianca. In più, materiali è truppe venenu da Alger in Aiacciu cù i gumieri è tiragliori maruccani.
Toccu u 9 di settembre, i resistenti corsi è i suldati taliani attaccanu e truppe alemane. Malgradu i contrattacchi, l’assassiniu di dui patriotti è a minaccia alemana di strughje u paese di Livia (chì hà ricevutu a Croce di guerra cù palma è una citazione à l’ordine di l’armata pè a so rivolta contr’à i nazi), i patriotti si sò mantenuti sopr’à locu ancu s’elli ci eranu dece morti è più di dece feriti, nanzu a ghjunta di e Forze Francese Libere. Sò riesciuti à fà fughje l’Alemani.
L'offensiva di l’armata francese di a liberazione principia u 14 quandu 6 600 suldati di a quarta divisione maruccana di muntagna sbarca in Aiacciu, sustenuta da a Royal Air Force è l’United States Army pè arrestà l’unità alemane in scunfitta. Sartè hè liberata u 22. U 23, e truppe è i patriotti corsi ghjunghjenu in Purtivechju. E truppe taliane di a Divisione d'infanteria Frioul è truppe culuniale maruccane s’impadruniscenu di a bocca San Stefanu u 30 di settembre eppo quella di Teghjime u 3 d’uttobre. Raghjunghjenu dopu i resistenti corsi pè assaltà i 10 000 omi di e truppe alemane long’à a piaghja orientale. Quesse strughjenu ponti stradali è strade ferrate pè prutege u so ritiru è, a notte da u 3 à u 4 d’uttobre, partenu da Bastia. À 5 ore di mane, u capitanu Then entre in Bastia digià libera, à capu di u 73u goum di u 6u tabor.
Ritrattu di Corse-net infos. Livia, u 7 d'uttobre di u 1943, Paul Nicolai, capu militare di u FN di Livia, prega a benvenuta à u generale de Gaulle è li face u contu resu di i cumbatti.
Cullezzione di Paul Nicolai.
Accueil 
