Lingua è cultura corsa
 
AccueilAccueil  FAQFAQ  RechercherRechercher  MembresMembres  GroupesGroupes  S'enregistrerS'enregistrer  ConnexionConnexion  

Partagez | 
 

 Vuleria esse tù

Voir le sujet précédent Voir le sujet suivant Aller en bas 
AuteurMessage
Ruclinonu Solechjari

avatar

Messages : 518
Date d'inscription : 27/02/2012
Localisation : Casinca

MessageSujet: Vuleria esse tù   Lun 13 Jan - 8:32

Testu scrittu per u cuncorsu "Musanostra" di l’annu 2012 nant’à u tema di l’acqua.
Revenir en haut Aller en bas
Voir le profil de l'utilisateur http://appuntamentu-corsu.forums-actifs.net
Ruclinonu Solechjari

avatar

Messages : 518
Date d'inscription : 27/02/2012
Localisation : Casinca

MessageSujet: Re: Vuleria esse tù   Lun 13 Jan - 8:33

Oghje mi trovu sopr’à tè, arrittu nant’à u vechju ponte genuvese, è ti feghju cun un ammirazione gigante è senza più nisun limite, tù ch’o vecu sott’à mè, ma cusì più grande ch’e mè, tù chì corri frà i scoglii, cusì pura è cusì dolce, ma chì fundi ancu i terreni i più duri, senza mai perde ne u to fiatu ne a to vulintà. Porti u titulu di fiume, ma ti chjami acqua, elemente naturale u più insignificante di tutti, a beienda a menu elaburata da tutte, è puru oghje vuleria esse tù.

Vuleria esse tù, tù chì faci sempre u passu è vene nantu à a nostra terra, tù chì sì prisente dapertuttu è indocu attempu, tù chì da a pioce à l’oceanu scambià sempre di faccia, ma ùn pianta mai di fà parlà di tè. Tù, cusì disprezzata in i paesi i più ricchi chì ti tenenu à buzzeffu, quelli chì tantu ti feriscenu, è ti preferiscenenu l’oliu di a petra, stu nemicu chì cusì spessu, troppu spessu, t’incataghja è ti snatura. Tù cusì venerata in i paesi i più povari di a pianetta, i soli in i quali cunoscenu u to veru valore, sti paesi miserevuli duve i zitelli si battenu per una sola candella di tè, ancu incughjita da a scimizia di l’omi.
Tù amante bisfacciata di tutti quelli chì campanu di u fruttu di a terra in u mondu sanu, attempu amata è odiata quand’e tù t’affacchi, o quand’e tù ùn t’affacchi, misurata o smisurata, nant’à i solchi di a terra per prudigàlli u fiatu di vita, o ancu di morte. O quant’elli sò felici di vedetti ghjunghje per rinvivisce i so zitelli vegetali ! O quante a so anima si sfracella quand’e li faci u capriziu d’esse assente, o quand’e tù riveni troppu o troppu spessu attempu !
Ma sì l’unica regina di u mondu ch’e l’albasgiosi omi anu vulsutu pritende soiu senza scumpartimentu. Sì l’unica dea, cumpagna di Tlaloc ou di Hyetios à pudè sceglie, cun a to manu sacrale, di dà a vita, o di dà a morte, à u to reame a Terra. Sì tù, tuttu què, è ancu di più, è oghje vuleria esse tù.

Vuleria esse tù quandu l’omini provanu à ammaestràtti. Quand’elli si credenu patroni di l’universu, chjamati à reginà a totalità di cio chì esiste è ancu cio ch’ùn esiste, ch’ùn esiste più, o ch’ùn esiste micca per avà. Quand’elli si custruiscenu tempii dedicati à a so autosuddisfazzione per veneràssi elli stessi, cum’e s’elli eranu creatore di u mondu, di i mondi. Quand’elli t’inbruttanu, quand’elli ti strughjenu, quand’elli t’arrubbanu a to sustanza o i to figlioli per glorificà a so sola onniputenza.
Vuleria esse tù quandu to putenza si scatena contr’à ss’umanità in vindetta di tutti i turmenti ch’ella face nasce in tè. Quella stessa umanità ch’o aghju amparatu à odià mentre tutti l’anni di troppu ch’aghju passatu à campà nant’à sta terra ch’ùn hà mai avutu bisognu di mè, ch’ùn hà mai vulsutu ch’o esisti, è chì patte di u mio pesu è di l’infamia di a mio esistenza.

Oghje, dopu à tant’anni, mentre chì aghju amparatu à udià tuttu cio ch’o aghju in mè, a mio sola unica ultima brama chì mi ferma sempre hè di pudè riesce à esse tù.
In mè, campanu duie personne, campanu centu personne, campanu mille personne, tutte più sfarente l’une di l’altre, incù u solu puntu cummunu d’esse tutte, à a so manera, l’ughjettu di a mio osa feroce chì mai ùn si tacerà. Attempu e ghjente di bè chì fiascanu in i so belli sintimi, ch’e l’altri, persone malefiche chì sempre triunfanu in l’eterna battaglia tra u bene è a u male, in u casu duve esisteria da veru, quella manicheista fruntera tra u bene è u male in un mondu capitanu da u male ancu in so più belli lati.
È fora di mè, campanu mille personne, campanu un millione di personne, campanu sette milliardi di personne, ghjente di qualità, o ghjente di diffettu. À tutte, à tutti li vogliu porghje e mio scuse e più sincere. À tutti quelli da i quali aghju spartutu a vita, è pò dinù à tutti l’altri, vi vogliu dumandà u perdonu.

Vi vogliu dumandà u perdonu quandu pensu fà u bène, ma ch’ùn facciu ch’e u male. Quandu pensu chjamà à a pace, ma ch’o ùn facciu nasce ch’e a guerra. Quandu si svolta u mio sguardu vigliaccu per ùn esse mè stessu abbuccatu da a maledizzione d’un mondu malatu di a so umanità in a so multitutine, è ch’o mi dimenticu solu ch’o sò eiu stessu, cusì culpevulu ch’e tutti l’altri, o ancu di più.
Vuleria dinù chere u perdonu per a mio esistenza. Quandu u più minimi di i mio atti, di i nostri atti à noi tutti, basta à figliulà suffrenza è disulazione. Quandu ùn esiste mancu più scelte bone à fà per megliurà a sorte cummuna, è chì a sola perspettiva chì ci ferma hè di sceglie a menu peghja per noi tutti, à tal puntu chì ùn si campa più ch’e di cumprumissione. Quandu a morte ella stessa, ella tandu cusì temita, ùn hè più ch’e poca roba paragunata à a suffrenza di a vita, una suffrenza cusì forte
ch’ellu ùn esiste mancu più nisun nome per qualificàlla, è ch’ella hà riesciutu à caccià à a vita tuttu u so sapore, è tuttu u so muscu. Quandu mi ne voltu spruvistu di valore propia, ma solu custitutivu d’un tuttu chì mi face orrore, tantu hè immondu.
Quandu u velenu di a dannazione mi passa à traversu, mi cuntamina, è mi cunduce, malgratu a mio vulintà, à a cuntaminazione di l’altre mente chì campanu in giru à mè senza vulèmmi male.
Quandu vogliu rifà u mondu, mentre chì quessu u mondu, ùn abbisognu d’esse rifattu, ma solu d’esse sbarrazzatu di qualchi parasiti, da i quali sò un degnu riprisentente.
Infine, quandu u mio ochju estenuatu, pieghendu sott’à u pesu di l’orrore ch’o aghju di mè stessu, ùn hà più ne a forza, ne a vulintà di firmà sempre apertu à fighjulà l’universalità.
Spergu ch’ùn ghjornu, a mi perdonerete, ancu s’o sò ch’ùn a meritu micca. Ancu s’o cunoscu megliu ch’e voi u mio valore, o piuttostu, a mio assenza di valore. Ancu s’o sò megliu ch’e voi cosa vale a mio trista vita, una vitaccia fatta di dillusione in quale a mio anima malata patte sempre d’una febbra arrabiata, forza maestra di u mio esseru, sempre à ingiràlla, cume un anticu magu di e fole, tale un mantellu di pinsate stranie chì in mè sò irremediabilmente sulcate per l’eternità chì mi ferma à campà.
Per què, per tuttu què, vuleria esse tù.

Vuleria esse tù, l’incarnazione di a purezza di mente, l’incarnazione di a beneficenza, a persunificazione di a vita, di a forza di a Terra, quella chì sempre si rinova dapoi tant’e tanti millioni d’anni, dapoi u Cumminciamentu di i Tempi, à l’alba di u nostru mondu, natu di tutte e forze scatenata chì mancu i dii ùn avianu riescitu à cuntene in elli.
Vuleria esse tù, mamma d’ogni vita, chì, parechji milliardi d’anni capunanzu, avia figliulatu cun successu i babbi di i babbi di i babbi di i nostri babbi. Tù chì avia participatu à custruì, mentre tutti st’anni, u nostru mondu ughjincu ch’e avemu struppizzatu in pochi anni per a gloria di a nostra muffa è di a nostra ambizione senza nisuna para altra ch’e a nostra tuntizia murtifera. Oghje vuleria esse tù s’e tù mi lasci fà, per piantà d’appartene à sta razzaccia chì mi spaventa quandu ùn aghju più a forza di tene i mio ochji chjosi per infama vigliacchezza arradicata in mè cum’e un inguariscevule virus, o piuttostu cume una feroce tumore ch’o portu in mè nata di mè è chì morerà solu attempu à mè, à a mio carre, à a mio anima dinù. Ma cosa sò, eiu, eiustessu, fora d’un virus ignobile per l’altri, per a natura, per a Terra sana sana ? Ùn sò nunda. Nunda di più. Solu un ingordu pruffitatore chì a usurpatu u dirittu di campà in sta vita à monde criature assai più meritevule ch’e mè è chì puru ùn esistenu, o ùn sò smarite ch’e troppu prestu.

Arrittu sopr’à tè, arrittu nant’à stu ponte, pensu à tè, à tè sola, è più ch’e mai, vuleria esse tù, in u fiume, in u mare, sott’à a terra o in l’aria. Vuleria esse stu fiume, ardore chì trionfa di a mortifera umanità, arcanu viaghjatore chì franca tutte e porte, simbolu caru d’amore cun un essenza cusì forte. Vuleria esse quellu fiume chì passa sott’à tutti i ponti di u mondu, cantendu sempre a stessa canzona, l’innu universale di a natura, una bella storia ch’o bramu di capì, una testimunianza ch’ùn sì pò rapì, una bella fola empiita d’incantu, colma di magia, d’estru fiaricantu di tempi antichi, o quelli à vena chì sumena u so missaghju in tutti i chjassi di u nostru tintu mondu umanu è naturale, chì mi cunduce sempre in alta esaltazione, attempu stranieru è in cummunione, sapiendu propiu chì l’armunia naturale hè più pudente ch’e u tristu mondu materiale, supranendullu incù a so magia è anneghendu cusì a so alterigia.

Vuleria esse tù in a pace, ma dinù in guerra, in a timpesta. Vuleria esse u mare timpestosu è u nulu chì l’accumpagna. O mare, o maestosu imperu, grande hè a to putenza, signore ghjustu sinceru carcu di magnificenza, sì tù u più grande messaghjeru sparghjendu beneficenza.
O quantu bellu hè u mare quandu ghjunghje a timpesta, cun a sciuma per cullare, festighjeghjanu e ballane, per celebrà a bellezza d’un pudente timpurale, una forza cun dulcezza chì pare tuttu sacrale. O ardente hè tandu u fideghju d’un celu nivulatu, spartendu l’imbrustuleghju d’un spiritu adiratu. Etere fattu culore, hè a pioce chì sumeni, cun u tonu u rimore, o natura ti scateni. Quandu u mare si lampa nant’à u scogliu petrosu, hè un cuncertu chì svampa, un spettaculu marosu. Hè tutt’una sinfunia di culore di clamore, u svelu di l’armunia o a magia di u core. Quand’un celu sbuzzacatu chì risplende d’alabastru nant’à un mare slavatu si ne muta in un astru : tenebrosu di superba, è di
ghjada è d’opale, a timpesta s’esacerba di manera sensuale, è l’incantu m’abbutula cum’una santa passione, benedetta inciufula, bramata liberazione. Si face l’anneatura ind’un vera estasa, d’una zerga cusì pura tale l’anima evasa.
A ballana si scatena, cume per cumbatte u scogliu ; si ci lampa è u mena, straniu sembra u so vogliu d’adduniscessi cun ellu cun un amore murtale, a forza vultendu ghjuvellu per l’ochju universale. E quelli nuli si facenu affreschi, sembrendu cusì dipinghje tant’arabeschi in u celu chì si volenu accinghje. Tandu l’insù s’addubisce d’un mirificu tesoru, è u celu si chjarisce di u bughju in splendore.

Hè bonu di spenseràssi cun a putenza smarita, quant’hè bonu di scurdàssi cun a natura in lita di l’osa d’un mond’umanu, d’un umanità ferita, è di u mio bughju vanu, a mio nucenza svanita. Quant’hè bonu di pinsà ch’e aldilà di l’infamu spechju di l’umana falsità, esiste sempre un mondu d’armunia, un mondu naturale, un mondu ch’ùn cunosce nisun altru turmentu ch’e quelli ch’e a razzaccia umana li hà creatu. U velenu di a mio Cundizione Umana hè in mè, è quant’e tutti l’altri omi di sta terra, ùn l’accettu manc’una seconda, è u vuleria supranà s’o ne tenia a forza. Ma quella forza mi face diffettu. Quella forza mi ferà sempre diffettu. Quella forza ùn hè micca umana.
Singhjuzza dissanguinatu u mio core, ragnula l’anima mea in dulore, chì mette anima mea in bullore per adondàlla sott’à u so furore. A fiura chì m’addirizza u mio spechju sembrà esse un pinnechju, è sempre di più, s’assumiglia a mio sorte à un sunniacciu ch’e solu a mio morte puderà rompe. A mio osa si scatena tuttu contr’à mè, cume s’o fussi in guerra tenebrosa. M’odiu più ch’e tuttu cun tanta vergogna, cun tamanta amarezza chì m’impogna, chì m’aghjade incù l’ambiu d’un archeru, per infine annegàmmi in un mare d’addisperu. Un mare, sempre un mare.

Per cumbatte u velenu di a dannazione eterna da u quale ùn seraghju mai sbarrazzatu, aviu ancu chjamatu u sonniu, quellu straniu sonniu, sempre fattu d’acqua, in un altrò inaccessibile, in un Asia sunniata. Aviu vistu in un sonniu, in un tempu malinconiu, un mare mensu turchinu sott’un celu arancinu, serenu è armonicu, capace di francà ogni velenu di a natura, d’una putenza dolcissima, è sparghjendu a beneficenza. Nant’à stu mare, solu era un battellu fattu di dilicatezza per annientà a durezza. Era un vechju battellu di u legnu u più bellu cuncipitu per mill’anni campà nant’à l’oceani,
cun una vela ballendu sott’à u dolce ventu da u tempu resa gialla. Sempre vogava u battellu à mezu à l’acquarellu per qualchi scopu piattatu senza mai perde fiatu, di stu mare senza terra ch’ùn tenia nisun fruntera, o Natura maravigliosa è simplicità maestosa ! Pò nant’à sta barca ondina, ritta era una femina incù un sguardu di focu è d’opale.
In quell’essenza divina, a pace era a sola regina, è pò a mio anima si vulia pesa à quella chjama intesa, à stu straniu ribombu luntanu, o talismanu supranu, mentre chì a pace era duvintata loda, è a dea s’addurmentava. Tandu, eiu vulia risponde à quella chjama sunniata per entre in quell’affrescu, in un mio sonniu incompiu fattu di stu mare di dulcezza, accant’u à a so dea.

Ma oghje ùn sì parla più di sonnii. Solu di realità. Oghje sò duvintatu vechju è ùn aghju più laziu di sunnià. A vechjaia, l’aghju capitu dopu à tant’anni, ùn hà nunda à chì vede incù l’età, incù u numaru d’annu passati nant’à sta Terra dapoi a nascita, o incù a salute. A vechjaia hè in ligamu unicu incù u spiritu. L’omu hè ghjovannu à n’importa chì età, fin ch’ellu tene sonnii in i quale crede. Quandu l’omu ùn crede più in i so sonnii, ch’e qualcosa s’hè rottu di manera eterna in a so anima, tandu diventa vechju. È oghje, sò divintatu vechju, sò divintatu vechju, è ùn aghju più nisun sonniu, è più nisun brama. Fora di diventà tù.

Arrittu nant’à u ponte à muscà l’aria frescu chì m’hè arrecatu da u ventu, aghju infine à fà a mio sola azzione onorevule di a mio vita. Aghju da passà sopra à e barriere di sicurezza di u ponte, m’aghju da ritrovà di l’altru latu, è aghju da saltà in u fiume per annegà a mio suffrenza è u mio velenu.
Oghje, infine, aghju da duvintà tù.
Revenir en haut Aller en bas
Voir le profil de l'utilisateur http://appuntamentu-corsu.forums-actifs.net
Maria

avatar

Messages : 1238
Date d'inscription : 28/02/2012
Localisation : quassù

MessageSujet: Re: Vuleria esse tù   Lun 13 Jan - 20:23

Bravu. ditone 
Revenir en haut Aller en bas
Voir le profil de l'utilisateur http://isulana.blogspot.com
Ruclinonu Solechjari

avatar

Messages : 518
Date d'inscription : 27/02/2012
Localisation : Casinca

MessageSujet: Re: Vuleria esse tù   Lun 13 Jan - 21:48

Ti ringraziu. Per una volta, aghju scrittu una nuvella più gioiosa.
Revenir en haut Aller en bas
Voir le profil de l'utilisateur http://appuntamentu-corsu.forums-actifs.net
Contenu sponsorisé




MessageSujet: Re: Vuleria esse tù   

Revenir en haut Aller en bas
 
Vuleria esse tù
Voir le sujet précédent Voir le sujet suivant Revenir en haut 
Page 1 sur 1
 Sujets similaires
-
» Déesse du Printemps ou Reine des enfers
» [soom cass]Hecate, déesse de la lune noire
» Quand la déesse de l'amour s'ennuie, elle n'a qu'une chose à faire ... [Pv : Arès]
» Travis Charest à Paris auyx Editions Déesse
» M et Déesse sont-il une seule et même personne ??

Permission de ce forum:Vous ne pouvez pas répondre aux sujets dans ce forum
ISULA :: Quandu l'inchjostru sumena :: Prosa-
Sauter vers: