Una serata in Furiani

Ci tocca à dìlla, micca chì qualchissia ùn a sapessi, ma solu per introduzzione : u ghjocu di ballò tene una piazza maghjore in a vita corsa oghjinca, in u core d’ogni Corsu, ch’ellu sia u SCB, o l’ACA, o u GFCOA, è tutte l’altre squadre menu cunisciute. Ognunu tene e so priferenze, chì currespondenu generalmente à u so rughjone, più o menu largu. D’una manera generale, sì puderia dì chì u norde di a Corsica sò in generale sustenitori di u Sporting, è chì quelli di u sudu, piuttostu per l’ACA o u Gazelec, mentre chì quasi tutti sustenenu squatre più locale di i so paesi è rughjoni. Dicu què à l’accorta, perchè di sicuru, ci sò eccezzione, senza mancu parlà di quelli chì sustenenu squadre furestere (di sicuru, ognunu hè liberu di sceglie di sustene a squadra ch’ellu vole ; puru, ùn parleraghju micca di quessi quì, per esse sicuru di firmà currettu è civile).

Eiu, ùn a vi piattu micca, sò per u Sporting. Ancu senza esse di i più accaniti di i sustenitori di Furiani, è ci sò parechje cose chì mi dispiacenu assai in u futbol ughjincu (cume per esempiu u fattu ch’e certi s’addestressinu di più à cascà ch’e à ghjucà, o tuttu u latu affaristu di certe persone chì giranu in giru di u mondu di u futbol in generale), ma ùn possu negà di risente in mè stu stintu, stu ligame à a mio squadra, à cio ch’ella riprisenta a squadra di Bastia, è à cio ch’ella riprisenta Furiani.

Vogliu pensà à a so gloria scorsa, à e magnifiche perfurmanze di l’anni settanta è di l’ottanta chì s’assumiglianu assai à un epupea fantastica, duve era a Corsica chì palisava à u mondu sanu ch’ella era, ch’ella esistia, è ch’e si devia fà cun ella.
Vogliu dinù pensà à e stonde triste cume stu maladettu cinque di maghju di u 1992, sempre in cori nostri. Una traghjedia tarribile, senza culpevuli.
Si pensa menu, o piuttostu, d’una manera sfarente, à i risultati più amari di l’anni più recenti, di a falata in L2 pò in L3, è di l’accanimentu di certi rispunsevuli di u futbol francese chì vulianu veramente a morte di u Sporting (pensu ch’ùn c’hè micca bisognu di dà nomi, avete tutti capitu di quale vogliu parlà).
Ma si pensa dinù a u sforzu tamantu di i so ghjucatori, di a squadra sana chì hà permessu a so riculata in L2, è accessuriamente a Cuppa di Francia di Naziunale, menu impurtante, per i mio ochji, ch’e a riculata.
Di manera aneddotica, mi piace dinù di pinsà à u trascinadore attuale di a squadra, Fréderic Hantz, chì face amparà a lingua corsa à i so ghjucatori !

Di sicuru, ùn hè ch’e un ghjocu, ma custituisce un veru ligame incù monda Corsi, chì in ogni altre circustanze, ponu esse smezati, è ancu puru nemichi, ch’ella sia per raghjone di pulitica, di pulitichella, o ancu d’inimicizie persunale. D’una certa manera, supranisce i clani, fin’à un certu puntu, è pò riprisentà un autenticu simbolu d’unità.

Ma basta e generalità. L’articulu d’oghje hè dedicatu a a partita di vennari sera scorsu, una bella partita Bastia-Istres, a prima in u stadiu dapoi a fine di a staghjone antecedente. Una partita ancu più simbolica chì a settimana scorsa, Bastia, in spiazzamentu à Istres, avia persu a partita (ùn mi dumandate micca quantu ; eiu ùn mi ricordu ch’e di e vittorie, micca di e scunfitte).

A partita principiò cume sempre, à ott’ore di sera, sott’à u sustegnu di parechje centinaie, forse millaie di persone, venute attempu per passà una bella serata ch’e per acclamàllu. A squadra d’Istres, à u cuntrariu, fù assai cunspuata, micca solu perchè ella era a squadra aversa, ma dinù perchè ci avia scunfitta a settimana scorsa, è dinù perchè dui ghjucatori d’Istres, senza parlà di u so trascinadore, sò Corsi !

Tandu, incù una ambienza attempu eletrica, calurosa, è pudente, a partita pudì principià.
Subitu subitu, a squadra bastiaccia si lampò à l’assaltu cun forza è vigore, à tal puntu ch’e no credimu vede parechji punti marcati in e dece prime minute, ch’ùn fiasconu ch’e perchè u goal istriesu era assai dutatu.

Ma a tendenza si perseguitò. I Bastiacci eranu assai più spessu in offensiva ch’e in diffensiva, è ancu s’ellu si vedia ch’e i ghjucatori aversi facianu cio ch’elli pudianu, eranu cume annegati sott’à l’onda turchina di a squadra turchina. Malgratu qualchi tempi morti, Bastia marcò u so primu puntu dopu à vinti minute di ghjocu, è ne mettì dui altri in u secondu mezu-tempu, malgratu un ligeru rallentamentu versu a meità di a partita. U terzu fù messu à a fine strema, quasi durante e prulungazione, cio ch’elli chjamanu dinù u tempu addiziunale.

Tuttu si seria passatu d’incantu s’e ùn aviamu micca incasciatu quantunque un puntu, dopu à un ritornu di penalty fiascatu. Tantu peghju.

U più impurtante hè quantunque ch’e avemu vintu è chì avemu passatu qualche belle stonde in stu stadiu di Furiani, sempre pienu, sempre allegru di sustene a so squatra, cume simbolu d’unità di a Corsica.
Micca simbolu esaustivu, pensu, ma unu di i simboli, di sicuru.

In u mio articulu precedente, v’avia parlatu di a rivolta paesana di u 1730 chì era statu u principiu di a rivuluzione corsa. V’avia dettu, in particulare, ch’e i ribelli s’eranu adduniti in Furiani ghjustu nanzu d’assaltà Bastia. Oghje, senza paragunà un cuntestu più ch’assai sfarente, cundizione più ch’assai sfarente, è scopi ancu di più ch’e più ch’assai sfarenti, mi face piacè di vede ch’e, una volta di più, Furiani permette un addunita di Corsi, cume una manu tesa di l’anziani à quelli d’avà.

Una bella fiura di sperenza, per mè.