- Caparrittu a écrit:
- Ziu Anghjulu Ghjuvanni
U tempu sfila è trascorre
Trà i ghjorni, i mesi, è l'anni
Ma ùn sfassa mai l'amore
Ch'omu porta senza inganni
À i soi, è oghje occorre
Di dilla à Ziu Anghjulu'Vanni
Quandu in paese à l'imbrocu
U tempu mi vene largu
Ùn trovu più bellu locu
Chè la panca induv'è mi calgu
Cù i mio vechji à lu focu
Più ci stò è più n'ampargu
Guardu è ascoltu à Ziu
Chì mi spanna a so mente
È mi face turnà vivu
U passatu à u presente
Tandu sì ringraziu à Diu
D'avemmi datu sta ghjente
Cù e so mani mi tesse
U so mondu cum'ell'era
Tante vistighe trasmesse
Nù l'affettu è a spartera
Chì mi permettenu d'esse
Ciò ch'e sò nant'à sta terra
Quand'atteppu cun ardore
I chjassi di a so vita
Aghju la so voce in core
Chì mi guida, mi seguita
È m'insegna à tutte l'ore
I passi di a so imbestita
Mi pare d'esse cun ellu
In tempu di muntagnera
U sentu cantà zitellu
À u stazzu di Leccia Nera
Quandu cù u so fratellu
Impruvisavanu a sera
Mi parla d'un antru seculu
È ogni usu mi tramanda
Temp'esciutu da u veculu
Pasturellu sempre in anda
Ziu cunniscia l'eculu
D'ogni schilla di a banda
Vecu e mule,i boi in l'aghja
È girà l'anticu tribbiu
A casa di a Vaccaghja
Cum'ell'era à u principiu
Da la muntagna à la piaghja
Girgu e pagine d'un libru
Un libru di mille veghje
Da quant'ellu ci ne conta
Tanti lochi ci si leghje
Tanta ghjente ci si scontra
Una storia ch'ùn s'arreghje
È ch'ùn serà mai compia
Guardianu è testimoniu
D'un stintu ch'ellu trattene
Ammenta un patrimoniu
Chì ci corre indù e vene
Chì per esse omu hà bisognu
Di sapè d'induv'ellu vene
Quandu lu mio sguardu volghje
Versu a strada di li mei
Capiscu quale sò oghje
È induve mettu li pedi
È ch'ellu mi tocca à porghje
Sta lascita à li mio eredi
Francescu Luciani [/i]
Salut’ò Francè : t’aghju lettu nant’u colpu di meziornu è quandu voltu
ùn si già più in capu di screnu !
ti facciu ricullà à lume per rispondeti
Bella à spessu aghju di e to nutizie in direttu di a casa di a vaccaghja
Ci’hè po da dì d’Anghjulughjuvani chi tempu ch’o l’aghju intesu l’aghju cugnomatu a Memoria
Chi saria u dettu senza a prisenza è ùn ti si scurdatu di mentuà e so mani spinate è tonde di munghjitore chi Pasquale u so discipulu pastore n’hà pigliatu arte è manere .
tantu à leghje ch’à risponde ritrovu l’ambiente di quassu( rinfrescatu di pocu ch’aghju chjamatu prima di scriveti)
S’ell’ùn era statu per ellu è per tè ùn seria ghjuntu in fondu chi l’hai scrittu quant’ellu ne sà è quant’e so faccende !
ma ùn hè a prima ne l’ultima voltu ch’o passu per stranu !
Accueil 
