Joseph Antonini

Trista nutizia a settimana scorsa. Si n'hè andatu Joseph Antonini, chjamatu dinù Jo Couteau, u 6 d'aostu di u 2015, un maestru in l'arte di fà curtelli è stiletti.


Aghju avutu l'onore è u piacè di scuntrà lu parechje volte. Era sempre un mumentu magnificu, riccu è una occasione tremenda d'amparà a nostra storia. A cunniscia perfettamente è ne parlava cù ghjustezza è ragione, ch'ella sia di Paoli o di l'artisgiani di i seculi passati.
Dipoi zitellu, dipoi ch'ellu avia compru per a prima volta un stilettu in Tulò, era un passiunatu di st'arma magnifica, passione ch'ellu spartia cù talentu è generosità.
Era per mè un maestru è sò veramente furtunata d'avè ogni ghjornu accant'à mè parechji di i so stiletti.
Mi ricordu dinù di stu ghjornu, quandu li aghju purtatu un vechju stilettu trovu in una vechja casa familiale. Mi paria d'avè scupertu un tesoru è ellu dinù era cummossu. Hà rifattu, ritoccu (manicu è lama) stu vechju ricordu di i nostri antenati, senza fà mi pagà u so travagliu. M'hà dettu solamente ch'aviamu salvatu stu stilettu è ch'ella ne valia u colpu.

Ciò chì valia u colpu era di sapè chì un omu simile, bravu, attalintatu è umile hà fattu campà a nostra cultura.
Quelli chì l'anu cunnisciutu ùn si ne puderanu mai scurdà.