Fusina Ghjacumu

Ci hè dinù

Ci hè dinù tanti paesi strangeri
Fratelli di la briglia è di l'umbasti
Chì traccianu l'idee è li cuntrasti
Sgracinendu cullane di penseri
Ci hè dinù tante razze malavviate
Surelle di l'albore culuritu
Chì piglianu la strada è lu partitu
Di ciò chì ci leia à le storie andate.

Ci sò tutti quessi è po ci sò eo
È lu so passu novu hè dinù meo.

Ci hè dinù tanti populi malati
Fratelli di la frebba è lu dulore
Chì cantanu li so guai affanati
Cù lu vechju suspiru di l'amore
Ci hè dinù tante forze liberate
Surelle di lu mondu chì s'avvia
Vive, è da tante mane purtate
Chì ci mettenu in core l'allegria.

Ci sò tutti quessi è po ci sò eo
È lu so passu novu hè dinù meo.

Ci hè dinù tanti associ per furtuna
Fratelli di l'ochji aperti à lu sole
Indiati cum'è squadre di fole
D'ùn vulè più esse cechi à la funa
Ci hè dinù tante voci discitate
Surelle di a fede è di a salvezza
Chì portanu à l'avvene a so carezza
È valenu più chè le fucilate.

Ci sò tutti quessi è po ci sò eo
È lu so passu novu hè dinù meo.

Ma dì ciò ch'è tù voli

Ma dì ciò ch'è tù voli
Hè bella a nostra terra
Da e so cime à i moli
Da e so cime à i moli
In centu riturnelli
Ci cantanu l'acelli
Hè finita la guerra
Hèfinita la guerra.

Ma dì ciò ch'è tù voli
Chì si stà bè in paese
Quand'ellu ùn s'hè più soli
Quand'ellu ùn s'hè più soli
È ch'omu s'addunisce
In amicizie lisce
À bandere palese
À bandere palese.

Ma dì ciò ch'è tù voli
Li ferà prò l'avvene
À i lochi muntagnoli
À i lochi muntagnoli
Sì quellu chì ci spera
Face girà la sfiera
Di e so inghjuste pene
Di e so inghjuste pene.

Ma dì ciò ch'è tù voli
Chì d'odiu ùn sè capace
Un ghjornu ti cunsoli
Un ghjornu ti cunsoli
È ti vene à u core
Un surrisu d'amore
Dolce quant'hè a pace,
Dolce quant'hè a pace.

L'odore d'i nostri mesi

Ottobre sente e castagne
In paese fumicosu
Quand'u celu nebbiacosu
Fala nant'à le muntagne
Pare tutt'avvene chjosu
È finite le cuccagne.

Dicembre sente l'aranciu
Chì fiurisce per'sse piaghje
Ma quandi lu ventu traghje
Piglia inguernu lu sbilanciu
Tempu d'acque è di nivaghje
Affannosu è pocu danciu.

Maghju sente la ghjinestra
Chì sbuccia per lu pughjale
Inzeppisce fiuminale
Verdiceghja la campestra
L'acelli sparghjenu l'ale
Si spalanca la finestra.

Aostu sente a filetta
Calpighjata à merendella
A notte s'empie di stelle
Di dulcezza benedetta
In core di le zitelle
Ci hè un fiore chì l'aspetta.

Chì senteranu li mesi
Di la prussima stagione
Duve pianterà viaghjone
Cù le so sperenze appese
È basteranu e canzone
Per guarì tutte l'offese ?

Amicu ci sì tù

Amicu, ci sì tù chì ci porghji la manu
Quandi u ventu gira ind'u celu isulanu
Quandi u sensu spira ind'u cerbellu umanu
Amicu,ci sì tù

Amicu, ci sì tù chì ci porti penseru
Quandi u morsu stringhje di ferru furesteru
Quandi l'ochju dinnera da lu vechju addisperu
Amicu,ci sì tù

Amicu, ci sì tù chì copri lu dulore
Quandi a brusta ghjala u focu di l'amore
Quandu a fede cala in core traditore
Amicu,ci sì tù

Amicu, ci sì tù chì ci apri le porte
Quandi l'idea move nant'à le strade torte
Quand'ellu sbuccia un fiore cum'è sognu di morte
Amicu,ci sì tù

Amicu, ci sì tù chì ci dai sperenza
Quandi a vita cagna ci tomba fratellenza
Quandi a terra cara si sfuma in la partenza
Amicu,ci sì tù

Amicu, ci sì tù chì ghjetti lu mandile
Quandi u tempu vene d'ùn esse più ghjentile
Quand'ella vene l'ora d'ùn esse più civile
Amicu, ci sì tù
Amicu, ci sì tù

Isula idea

Isula idea di la mio alba
Rosula altea è la vitalba
Fiore chì sbuccia è chì ci chjama
Fiore chì s’apre è dà la brama
Isula

Isula radica di a mio vita
Rispiru d’una acqua salita
Basgiu lampatu da i zitelli
Basgiu cascatu da i battelli
Isula

Isula idea di u viaghju
Di l’odissea ch’eo feraghju
Mandile spartu di li mio sogni
Mandile crosciu ùn ti vergogni
Isula

Isula celu tintu di sole
Ancu quandi un nulu dole
Chì a frasca s’alza è ci balla
Cum’è un penseru di farfalla
Isula

Isula idea di li mio strazii
A voglia mea, ma ch’è tù sazii
Ochju abbagliulatu da u sole
Ochju calatu di ogni amore
Isula

Isula fata è mai morta
Cuscogliula chì u ventu porta
À u locu ascosu di u core
Duve u ricordu ùn pò mai more
Isula

Paghjella

Paghjella chì ne veni
da l’Oriente eternu
nata quale hè chì sà
da chì lettu maternu
arrembatu à chì voce
o nantu à chì quaternu
da fà lu cantu altieru
è liatu è fraternu

Paghjella chì viaghji
è ne franchi frontiere
di lochi assulanati
è di terre primiere
di paesi landani
è di centu manere
di piaghje à vista d’ochju
è di muntagne fiere

Paghjella chì ne sì
da luntanu venuta
è barcati li tempi
cù la voce tenuta
appesa à lu to filu
di memoria minuta
da ch’ellu ùn scordi u core
per ùn fermà ne muta

Paghjella ti ne sì
un ghjornu à lochi arcani
di a gloria passata
è di l’eroi anziani
à latu à fiume Bussu
calata in stretti piani
chì sottu à Santu Alesiu
t’accolse l’Alisgiani.

À a sbunurata

A valle s’hè croscia
Di bazza calata
A notte s’hà lasciatu
Quì è culà duie ombre
Sott’à i castagni insunnuliti
A machja ùn parla ancu
È u celu s’hè grisgiu
A mio stradella ciotta è passa
Longu à fiume diciulone
È leva ogni vistica
È muschi zitellini
Una tintenna persa
Trinneca qualchì tirlu
Sottu à a filetta azeza
È v’anscia in faccia una aria
Chì parturisce fole :
Stamane mi ne vò
Ad aspettà u sole...

Isula d'oghje

Isula d'oghje quale sì
à mezu à l'onda suminata
barca chì move è ùn s'affonda
per suffià sempre a ventata
nantu a so terra à scunfinì ?

Isula bella chì ci chjami
Quand'ì u sognu hè à u veranu
Chì tuttu face testimoniu
À lu misteru più arcanu
È mette à u core i so liami

Isula cruda chì si perde
A forza altiera di e virtù
Quelle chì ti fecenu fiera
À l'ochji di a giuventù
Sì u to Palazzu ùn hè più verde.

Isula mea fà chì dumane
Ch'ellu ne sbucci torna un fiore
Ch'elli si piantinu i cartucci
Per fà la piazza à lu t'amore
À u travagliu è à u pane.

Isula d'oghje quale sì

Quantu sì cambiata

S'è tù ti n'avveni la mio innamurata
Ne fecemu noi prumesse sulenne
Ancu senza festa per quelle le strenne
La volsemu bella la nostra abbracciata
Ma oghje mi pare di sente e tintenne
O Corsica mea quantu sì cambiata


Sè tu t'arricordi di quella sbarcata
Colmi di speranze è di l'allegria
Ci era in core à noi cumu diceria
Un rispiru novu d'una sventulata
Mi parenu oghje tutte niscentrie
O Corsica mea quantu sì cambiata

Un paese spentu da la spenserata
A campagna guasta da u lasciacorre
A cità chì ride di lu so rimore
Ogni cosa cara la sentu sbandata
Hè ghjunta amarezza ind'u nostru amore
O Corsica mea quantu sì cambiata

Da lu sognu fieru chì ti fece fata
Purtatu da l'omi nostri più sinceri
À lu celu d'oghje dopu à quellu d'eri
Mi pare chì tuttu pigli la falata
S'approntinu ghjorni d'angoscia è penseri
O Corsica mea quantu sì cambiata

Ma nun vogliu perde la sperenza amata
Mancu vogliu sente la to malacella
In mare turchinu una navicella
Mi fermerà in core, di neve impannata
È in la mio memoria ci luce la stella
Di Corsica mea chì ùn hè mai cambiata

sò tutte propiu belle ma devu ricunnosce chì l'ultima mi tocca ancu di più

Citation :

In mare turchinu una navicella
Mi fermerà in core, di neve impannata

sò magichi sti dui versi

In chì ortu addurmintata


Tù chì eri partutu in festa
U core colmu da speranza,
Da tanta la fratellanza
Centumila soli in testa
Tù chì cridie li mondi
Fatti à matinate belle
Da ogni culor di pelle
Per ogni chjam’è rispondi
Tù chì sempre fusti bravu
Cù la ghjente malavviata
Nant’à la via straziata
D’umanu populu schjavu

In chì ortu addurmintata
È sottu à chì paisaghju
In fine di lu viaghju
A to vita s’hè firmata ?

T’anu vistutu di pannu
Di lu verde militare,
Di quellu d’inguernu in mare
Quand'ì l’acqua dà l’affannu
T’anu armatu di fucili
È pinzute bagliunette
À lu son di e trumbette
In l’aria cum’è staffili
T’anu fattu fà le prove,
T’anu amparatu la guerra
Cù le manovre di terra
Ch’ellu nevi o ch’ellu piovi

In chì ortu addurmintata
È sottu à chì paisaghju
In fine di lu viaghju
A to vita s’hè firmata ?

Quanti funu regimenti,
Quanti funu battaglioni
À cullà guasi à pasponi
Versu li macelli ardenti ?
Quanti funu omi valenti,
Quanti funu i camerati
Chì cun tè ne sò cascati
Sottu un celu di spaventi ?
Quanti cum’è tè in ritrattu
Sò nant’à vechje cumode
Ch’ùn ponu cantà e lode
D’ogni guerrieru fattu ?

In chì ortu addurmintata
È sottu à chì paisaghju
In fine di lu viaghju
A to vita s’hè firmata ?


una di e mo preferite, mi sò permessu di scrivela siguitendu u filu di u versu (magnificu dinù) ch'ellu li hà datu Michele Paoli di u gruppu Tavagna.

hè per mè una di e più belle canzone di st'ultimi vint'anni.

L’addurmintatu di a valle
(adattu da Rimbaud)

Hè un ghjargalettu zeppu
Duv’ella canta una vadina
Chì vole appende à ogni erbetta
L’argnetu vivu di a so crina
Ci luce un sole muntagnolu
In a virdura di issu vallicciolu.

Un giuvanottu suldatellu
A bocca aperta è capinudu
Si dorme un sonnu di zitellu
A mezu à u so lettu crudu
Di frasche verdi è di filetta :
Sopra, c’hè u celu ch’aspetta.

Dorme sticchitu è spenseratu
Cù a niscentria di l’acellu calatu :
O Natura fideghja, chì mi pare malatu !
Ùn sente più i to prufumi
Straquatu à u sole, tranquillettu :
Hà leccu un paghju di palle in pettu.

MALANNI (ma intitulata Dissuccupatu in "E sette chjappelle")


Disuccupatu sò pè la campagna
È mi ne vò pè i so chjassi solu
Fighjendune'ssi lochi di cuccagna
È aspettendu a notte in paisolu.

I mio pinseri sò à l'ammarezza
À l'avvacinu, à la malincunia
È mi stantu à cunservà la saviezza
Chì più d'una volta si n'anderia.

Disuccupatu sò pè la citane
È mi ne vò pè i carrughji solu
Fighjendune e vitrine à robe vane
È aspittendu di l'ore lu scolu.

I mio pinseri sò à l'ammarezza
À l'avvacinu, à la malincunia
È mi stantu à cunservà la saviezza
Chì più d'una volta si n'anderia.

Disuccupatu sò pè a stagione
E mi ne vò da casa solu solu
Or chì vulete ch'aghja una passione
Da turnammi un antru omu è piglià volu?

I mio pinseri sò à l'ammarezza
À l'avvacinu, à la malincunia
È mi stantu à cunservà la saviezza
Chì più d'una volta si n'anderia.

Disuccupatu sò ma chì vulite ?
Travaglierebbe anch'eiu s'eiu pudia
À mè ùn mi circate tante lite
Ch'ùn m'arricordu più di ciò chè l'allegria.

I mio pinseri sò à l'ammarezza
À l'avvacinu, à la malincunia
È mi stantu à cunservà la saviezza
Chì più d'una volta si n'anderia.

DUMANE

U cavallu ariottu ughjuleghja à morte
Sopru à li paesi à spinta fulena,
U libecciu soffia da muntagna à rena
Ghjura dinù ellu : "maladetta sorte !"

Ma sì oghje stringhje l'amaru dimoniu
Forse chì dumane sbuccerà veranu,
È la spiga fiera purterà lu granu
Libertà chì nasce fiurisce lu sognu.

Dumane la lingua piglierà pretesa
Di l'anima corsa vestuta da sposa,
Dumane la scola senza piatta cosa
Insignerà la storia di l'antica offesa.

Dumane l'acellu canterà speranza
È l'alburu novu chjamerà ritornu,
Dumane più chjaru s'alzerà lu ghjornu
È da iss'alba rossa nascerà cuscenza.

Dumane feremu mondi è maraviglie
Da u boscu à lu pianu da li monti à l'onda
Sì dumane a sorte vole girà tonda
Corsica, la imbiglia ne ferà dumane.

Indu u ghjornu suttanu a pampana hà trizinatu
Mentre ch'aostu passa è vene
E a si sciala longu mare,
Calzu sì è calzu nò
L'avenire hè infilaratu

State à sente o zitelli,
Chì qualcosa nasce oghje
In u trastusgiu di l'estate,
In i calori piaghjinchi;

Qualcosa nasce oghje
Di pazienza trapassata,
In e poste à e lustinche
Di u chjampidu dulore;

Qualcosa leva oghje
Issu cavallu Libertai
Chì ci ruzerà davanti,
S'omu sà apreli l'ale;

Qualcosa oghje leva
Versu l'Aleria rumana,
Un sole novu ribomba,
A storia corsa chjama à dumane.

----------GF---------(1975)

I Bianchi Salini

Vurria ch'idda fussi
A me canzona chieta
Com'è di u pueta
Quiddu lli zinni russi
Quandu iddu mi dicia
Chi mi pari l'altr'eri
« Veni à senta una cria
I nosci aspri sarreri »

Furestu di lli pina
E tarra di i guai
Aduniti oramai
A i bianchi salini
Ma un fu sempri mali
O Porti-vechju, sà
Chi d'antichi pasciali
Ni festi una cità.

Rena di Pinareddu
Acqua di Palumbaghja
U vechju e u ziteddu
Tuttugnunul'assaghja
Di punta a Fautea
Suvitendu u mari
Da l'alti l'Uspidali
A i piaghji di Chera

« S'idd'he fidu e sinceri
D'amicizia e di cori
Mai l'umanu mori
Ne mancu he prighjuneri »
Cussi ch'iddu scrivia
Pà ghjuventu a vena
Da supr'à gioia e pena
Chi a sorti li dia

Furestu di lli pina
E tarra di i guai
Aduniti oramai
A i bianchi salini
Ci he l'aghjenti d'istati
Com'e furmiculaghju
Ma li vi cuntaraghju
I me loca incantati.

Parulle nustrale

Parulle nustrale
mi pichjanu in gola
è si ghjocanu inseme
à u manganiolu




È si stellanu nantu à i spechji memoria
cum’è lucciule in celu è grombuli di storia
ne fala eppo ne fala rimori d’arilogi
à i passi spapersi è à e perse voce

Parulle nustrale
mi pichjanu in gola
è si ghjocanu inseme
à u manganiolu

In pratu zitellinu hè vultatu veranu
cù li venti zeffiri d’ogni sintimu umanu
sò tanti li prufumi è mazzuli di fiori
chì muscanu ab eternu un balsamu d’amore

Parulle nustrale
mi pichjanu in gola
è si ghjocanu inseme
à u manganiolu

È si ghjocanu inseme


----------GF----------(1999)

Sperenza a écrit:

DUMANE

U cavallu ariottu ughjuleghja à morte
Sopru à li paesi à spinta fulena,
U libecciu soffia da muntagna à rena
Ghjura dinù ellu : "maladetta sorte !"

Ma sì oghje stringhje l'amaru dimoniu
Forse chì dumane sbuccerà veranu,
È la spiga fiera purterà lu granu
Libertà chì nasce fiurisce lu sognu.

Dumane la lingua piglierà pretesa
Di l'anima corsa vestuta da sposa,
Dumane la scola senza piatta cosa
Insignerà la storia di l'antica offesa.

Dumane l'acellu canterà speranza
È l'alburu novu chjamerà ritornu,
Dumane più chjaru s'alzerà lu ghjornu
È da iss'alba rossa nascerà cuscenza.

Dumane feremu mondi è maraviglie
Da u boscu à lu pianu da li monti à l'onda
Sì dumane a sorte vole girà tonda
Corsica, la imbiglia ne ferà dumane.

Chì vole dì "ariottu'

U cavallu ariottu hè, in francese, la chouette hulotte. U so altru nome hè u nottulu.

Sperenza a écrit:

U cavallu ariottu hè, in francese, la chouette hulotte. U so altru nome hè u nottulu.

Grazie tante, cusì mi pare più chjaru u scrittu !