Lingua è cultura corsa
 
AccueilAccueil  FAQFAQ  RechercherRechercher  MembresMembres  GroupesGroupes  S'enregistrerS'enregistrer  ConnexionConnexion  

Partagez | 
 

 U vechju secretu

Voir le sujet précédent Voir le sujet suivant Aller en bas 
AuteurMessage
Sperenza



Messages : 1142
Date d'inscription : 28/02/2012
Localisation : quassù

MessageSujet: U vechju secretu   Ven 13 Mai - 7:29

Facia più d'un quartu d'ora chì u turistu girava intornu à a patecca, mugugnulendu. D'apressu à ciò ch'o capia, rimpruverava à i Corsi d'esse baulli, è chì e patecche ci vulia à vende le à fette cum'è in Italia, per ragione di cumudità. Ch’imbecile stu tippu ! Micca perchè chì si ghjucava a risa di noi, ma perchè ch'avia a ragiò. È chì da quellu ghjornu, Ghjacumu, u patrone, mi fece taglià sistematicamente tutte e patecche chè no mettiamu in vendita. Pocu m’impremia. U travagliu ùn mi facia paura. Apressu tuttu, bastava ch'ella caschessi a mo paga ogni fine di mese. Quell'annu, Ghjacumu m'avia campu mettendu a climatisazione in u magazinu. Ci vole à dì chì in piena sciappittana,  a timperatura spassava i quaranta gradi.


U mo tempu si ne passava scusgiuratu, à aspettà i clienti , quella vechjetta ch'avia da cumprà e grane per u misgiu o un chilò di prasche; quellu zitellettu in cerca d'una barra di cicculata o di qualchi bumbò...Da duie ore à quattru, u paese era addurmintatu sottu à e vampate di l'estate è cun l'accunsentu di Ghjacumu, mi n'andava à u caffè in faccia. C'era l'impiecatu chì mi piacia è li piacia ancu à ellu. Ùn s'era mai passatu nunda trà noi ma m'accunsentia d'andà à pruvà a mo seduzzione, cusì, per ghjocu. Mi tenia cumpagnia mentre fidighjava u canale musicale à a televisiò.


U mercuri era ghjornu speziale è u spettaculu si passava fora : tandu ci mettiamu in postu daretu à a finestra chì dava nantu à a strada è guardavamu à Luis passà. Tutti i santi mercuri, quellu Luis, un Spagnolu d'una cinquantine d'anni, si mettia duie o trè veste, un cappellu , i so scarponi è cullava in cima di a cullina, purtendusi appiccollu un saccu pienu di petre. Tutti dicianu ch'ellu facia penitenza, ch'avia tombu un omu di manera assai bestiale è ch'ellu circava à purgà i so peccati.


Di Luis ùn si sapia tant'affari, solu ch'ellu era ghjuntu in paese in u 1982. Ùn si mischiava micca à a vita paisana, mancu per u ripastu di Natale quandu tutti ci aduniamu in caffè per sparte caprettu è figatellu. À a barriera d'a lingua, s'aghjunghjia quella di i secreti. Ghjè chì certi s'eranu messi in capu chì Luis campava da rimitu perchè chì si rimpruverava qualcosa. È andate voi à spiecà à a ghjente chjuccuta chì certi ponu sceglie un modu di campà sfarente senza ch'ella ci sia à quessa una ragiò particulare. In tutti i casi, nimu ricircava a cumpagnia di Luis. U vidia eiu ognitantu in magazinu, ma per fà cum'è tutti, li mandava un semplice bonghjornu, più in segnu di curtesia chè d'amicizia d'altronde.





Mercuri u 7 d'agostu di u 2002



U caffè era disertu è mi stunava di l'assenza di Vittoriu, quellu chì servia. À un tavulinu s'era calatu Cristofanu, u figliulinu di Rosa, a mo cumare è patrona d'u locu. Si ghjucava cun una vitturuccia, imitendu cun a bocca u rimore d'u mutore.


Sì solu u mo ciucciu ?


Ié. Mammone hè cullata in casa à circà ùn sò cosa. Peccatu, perchè chì vulia una granatina...


Sì tù un voli chè quessa, ti possu serve.



Pigliai a buttiglia di Mattei nantu à u parastagiu è li ne lampai in un bichjeru cun appena d'acqua. Cuntinuava à ghjucà tuttu biendu. Missi a mo manu nantu à a vitturuccia per fàlla piantà.


Serà megliu chè tù bei prima, dopu ghjucherai. D'accordu ?


U zitellucciu, benchì offesu da a mo rimarca, fece di sì cun u capu.


Sai chì oghje aghju vint'anni ?


Vint'anni ?Ai da festighjà u to anniversariu cun i to parenti ?


Cun a mo mamma.


È u to babbu ?


U mo babbu...ùn lu cunnoscu.


Ùn cunnosci micca u to babbu ?Hè tristu l'affare. Ma cumu pò accade ?



U bichjeru li scappò quasi d'e mani; sburlava l'ochji cum'è s'ellu avia in faccia à ellu qualchi persunagiu sopranaturale.


Sò cose di grandi chè tù ùn poi capisce. Ma ti spiecheraghju un ghjornu. Intantu, prumettimi d'ùn frasturnàtti cun què.


D'accordu, ma mi poi cuntà a fola di i sette maghi ?


Cristofanu vense nantu à e mo dinochje. Mi ne ridia d'a striscia rossa lasciata da a granatina sopra à e so labbre.


Sì tù voli...C'era una volta un principe...


Ùn avia ancu cuminciatu a storia chì u zitellucciu penciulava digià.


O Lucì !Felice anniversariu !


Senza ch'o l'avessi intesu, Vittoriu era entrutu in caffè; si tenia vicinu à me, in manu un sacchittellu rossu cun nantu l'iniziali d'un magazinu di panni bastiacciu, u mo preferitu. Stallai à Cristofanu tuttu insunnulitu nantu à u picculu soffà è pigliai u pacchettu ch'ellu mi tendia Vittoriu.


Ùn mi dì micca chì ghjè u vestitu in seta ch'o t'aghju mustratu in a vitrina !!


Da a gioia, mi lampai à u so collu. Quellu ùn si fece pregà per stringhjemi forte, d'una manera più chè amichevule. U zitellucciu avia apertu l'ochji è ci fidighjava. Cunfusa, feci un passu in daretu.


Ti ringraziu ma mi tocca à sorte per circà à Luis : ùn s'hè vistu oghje...ci hè qualcosa ch'ùn và...à dopu...


Aspetta ! Ti compru un vestitu for di prezzu è cosa aghju in ringraziamentu : ti ne vai appressu à st'andaccianu !!


Allora ci vole ch'o ti stia sottumessa perchì chì m'ai fattu un rigalu ?Ma cosa credi ? Ùn aghju bisognu di i to solli, u mi possu cumprà da per me u vestitu.


Eppo tè! Un lu vogliu più !


O s'ella ùn fussi !! Campa chì c'era u zitellu osinnò u l'averia scialbatu in faccia u so sacchittacciu !! Ma per ùn mustrà cattivi esempii mi cuntentai di lasciàllu nantu à u zingu.


Rossa imbacarata, era surtita d'u caffè cum'è una saetta. Troppu emuzioni mischiate : a dulcezza d'u ciucciu, a lita cun Vittoriu, l'orgogliu di quellu ch'avia sempre tenutu cum'è un fratellu...


E lacrime mi scappavanu guasi è per smenticà 'ssa baruffa, m'era venuta un'idea : circà à Luis, è per cumincià, falà sinu à e Mure, induve ellu stava.


Qualcosa mi chjamava quaghjò.


*****


E Mure.Un locu scantatu, di sottu strada, cun u so casgile abbandunatu, i so chjarasgi, a so volta d’alburoni frunduti da parà ogni calmana. Era sempre quì ch’o venia quandu risentia u bisognu di dumà una zerga. Tuttu ci respirava a pace : l’acqualime d’u gaglinu, u chjuchjulà di l’acelli. M’era lasciata purtà da una dolce fantasia, un sognu svegliatu, quellu ch’o facia da chjuca quandu imaginava l'immensa furesta pupulata di mille essari fantastichi, elfi o fulletti ch'elli sianu chjamati, chì mi spiavanu da nentru à un troncu d’alburu o piatti sottu à e fronde.


Durò pocu ‘ssu mumentu. À l’impruvisu fubbi suspresa da a visione d’un corpu stracquatu daretu à un sepalu.


I mo ochji ùn si sbagliavanu. Era Luis, longutiratu. Forse feritu ? O puru mortu ? M'avvicinai cun angoscia è paura mischiate :« O Luis ! O Luis ! »


Si girò ver di me fendumi segnu cun a manu d’avvicinà torna. Paria debbule assai. L’incrusciai u fronte, per furtuna mi purtava sempre cun me una buttigliella d’acqua minerale. Missi a mo bisaccia sottu à u so capu da fàlli un cuscinu.Ùn avia più forze, nè per movesi nemmancu per parlà. Chì l’era accadutu ? Quessa ùn si saperà mai chì e sole parulle ch’ellu disse tandu funu per rivelàmmi un secretu: u secretu di vint’anni di vita.


Cinque parulle, prima di chjode l’ochji per sempre, cun u so pocu fiatu è un palesu à fior di labbre: « Mi hija…mi hija… figliola…»

Eccu ! ‘ssa carica, ‘ssu saccu di petre infine cappiatu in terra !!


Ùn risintii nunda. Era d’un tempu digià ch’o l’avia capita : un’affezzione particulare per ellu l’avia sempre avuta, eppo quella strana sumiglia, rimarcata da tutti…


À quale tuccava oramai à purtàllu 'ssu secretu ? À me ? Mancu pensàlla ! Subitu appena turnata in casa, cuntai a storia di Luis -turnata meia- à Vittoriu.

U tempu persu ùn si richjappa mai ed era scunsulata davveru,ma Luis avia da pudè attippà per e cullette d’u paradisu senza più quella soma ch’ellu avia trascinatu anni è anni.


Solu chè di pensàcci s'appaciò u mo core .



Estate 2013


Dernière édition par Sperenza le Ven 13 Mai - 22:52, édité 1 fois
Revenir en haut Aller en bas
Voir le profil de l'utilisateur http://isulana.blogspot.com
Circione



Messages : 2157
Date d'inscription : 27/02/2012

MessageSujet: Re: U vechju secretu   Ven 13 Mai - 18:33

Brava o Sperenza, facia un pezzu chì nimu ùn avia più scrittu nulla in la sizzione "prosa" ditone

Hè ùn bellu scrittu incù forse – s'e mi possu permette duie rimarche – dui o trè capatoghji à rivede inde a forma è soprattuttu d'appressu à mè annant'à l'indizii ch'è tù dai appena troppu prestu
Citation :

"Di Luis ùn si sapia tant'affari, solu ch'ellu era ghjuntu in paese in u 1982, l'annu di a mo nascita. "


"Vint'anni ?Ai da festighjà u to anniversariu cun i to parenti ?

Cun a mo mamma.

È u to babbu ?

U mo babbu...ùn lu cunnoscu."


eiu l'aghju capita subitu quale ellu era Luis, moltu più incù un titulu cusì.

Ma eiu sò astutu, sò sicuru chì l'altri avaranu una suspresa à a fine. lingua





_________________
Spunsurizatu  da l'UNESCO
Revenir en haut Aller en bas
Voir le profil de l'utilisateur
Sperenza



Messages : 1142
Date d'inscription : 28/02/2012
Localisation : quassù

MessageSujet: Re: U vechju secretu   Ven 13 Mai - 23:10

Aghju fattu a mudificazione necessaria da mantene u suspense sinu à a fine.

Per u titulu (à l’iniziu LUIS) dumanda à Forumactif, ch’ùn accetta chè i tituli di 10 caratteri almenu . rambo
Esitava dunque trà « u vechju secretu » è « u secretu palisatu ».Hè u secondu ch’aghju sceltu ancu sì, à dìlla franca, ùn mi piacia tantu…ne dice troppu, hè vera.
« U vechju secretu » appena più neutru ,cunvene megliu .

Aghju sguassatu « l’annu di a mo nascita » ch’ùn porta nunda à u scrittu.

Ti ringraziu per u cummentu è i cunsigli,sperendu chì u lettore, cum’è tù a dici, averà a suspresa à a fine. suspettu
For di quellu chì cunniscia digià ‘ssu Luis per via di isulana.blogspot.com clown


Per a piccula storia hè l’omu chì marchja cun i sacchi chì m’hà ispiratu ‘ssu scrittu.L’avete forse cruciatu nantu à e strade di l’isula o n’avete intesu parlà.Camina senza arrestu, un saccu per manu.Nimu sà da induve ellu vene è nimu sà induve ellu và.Camina.
Hà ancu ispiratu un filmettu à u rializatore bastiacciu David Lucchini, « L’omu di a strada ».

E Mure esistenu, e cunnoscu bè. Tenenu anch'elle i so secreti. Wink

Revenir en haut Aller en bas
Voir le profil de l'utilisateur http://isulana.blogspot.com
Erbaghju



Messages : 452
Date d'inscription : 29/02/2012

MessageSujet: Re: U vechju secretu   Sam 14 Mai - 7:57

@Sperenza a écrit:



Per a piccula storia hè l’omu chì marchja cun i sacchi chì m’hà ispiratu ‘ssu scrittu.L’avete forse cruciatu nantu à e strade di l’isula o n’avete intesu parlà.Camina senza arrestu, un saccu per manu.Nimu sà da induve ellu vene è nimu sà induve ellu và.Camina.
Hà ancu ispiratu un filmettu à u rializatore bastiacciu David Lucchini, « L’omu di a strada ».

Iè ma 'l'omu di a strada' ùn l'hà vistu nimu, megliu avessi fattu di fà 'forest gump' risa
Revenir en haut Aller en bas
Voir le profil de l'utilisateur http://erbaghju.unblog.fr/
Erbaghju



Messages : 452
Date d'inscription : 29/02/2012

MessageSujet: Re: U vechju secretu   Sam 14 Mai - 7:59

U fattu hè chì i parsunaghji sò pochi, dunque u littore cerca una leia trà quelli chì ci sò. Hè cusì chì anch'eiu l'aghju capita subite chì Luis era u babbu...
Revenir en haut Aller en bas
Voir le profil de l'utilisateur http://erbaghju.unblog.fr/
Sperenza



Messages : 1142
Date d'inscription : 28/02/2012
Localisation : quassù

MessageSujet: Re: U vechju secretu   Sam 14 Mai - 16:07

Eppuru ci hè mancata pocu per chì a prosa ùn si finissi mancu cusì. risa

Credimi puru ‘ssu scrittu m’hà datu assai fastidiu. À l’iniziu avia sceltu una morte tragica per Luis, tombu da qualchi cumpagnu di u so passatu scuru ( per una debita di ghjocu, un bursellu micca spartutu, una vindetta…) eppo tuttu scrivendu aghju sviatu strada per incalcà nantu à u latu affettivu ( sò una donna chì vulete fà… imbarazzatu ) è fàssi ritruvà un babbu è una figliola.

Ringrazii o Erbà ! salutu2
Revenir en haut Aller en bas
Voir le profil de l'utilisateur http://isulana.blogspot.com
Contenu sponsorisé




MessageSujet: Re: U vechju secretu   Aujourd'hui à 13:31

Revenir en haut Aller en bas
 
U vechju secretu
Voir le sujet précédent Voir le sujet suivant Revenir en haut 
Page 1 sur 1

Permission de ce forum:Vous ne pouvez pas répondre aux sujets dans ce forum
ISULA :: Quandu l'inchjostru sumena :: Prosa-
Sauter vers: