Lingua è cultura corsa
 
AccueilAccueil  FAQFAQ  RechercherRechercher  MembresMembres  GroupesGroupes  S'enregistrerS'enregistrer  ConnexionConnexion  

Partagez | 
 

 A Fiera di a Bocca di u Pratu

Voir le sujet précédent Voir le sujet suivant Aller en bas 
AuteurMessage
Ruclinonu Solechjari

avatar

Messages : 518
Date d'inscription : 27/02/2012
Localisation : Casinca

MessageSujet: A Fiera di a Bocca di u Pratu   Jeu 8 Mar - 16:05

A Bocca di u Pratu, nant’à u San Petrone, u più altu monte di a Castagniccia, ghjova di ligame tra a parte uccidentale di a Castagniccia, è u restu, di l’altru latu di a linea di i monti di Castagniccia fatta di muntagne tale ch’e San Petrone è Capu Caldane, chì custituiscenu l’essenziale di a catena muntagnosa corsa scistosa nata di l’orogenesa alpina.

Quassù, à quasi mille metri d’altitutina, stu puntu di passaghju, fruntera trà a cummuna di Quercitellu è quella di Merusaglia, tra l’Ampugnani è u Rustinu, tra a Castagniccia storica è a Castagniccia uccidentale, si trova stu puntu, duve a strada s’allarga per qualche centinaie di metri, assai menu pindiu ch’e u circondu d’un latu è di l’altru, è cusì bè sgaggiatu. Hè a Bocca di u Pratu.

Culà, si dice ch’ellu ci era una catedrale mitica, è chì quì si serianu piattati parechji Ghjuvannali fughjendu e persecuzione, ma invece di catedrale, si pò vede sopra locu a chjesa di San Petru d'Accia, in partita in ruvina, ma sempre bella, chì piglia u so nome di l’epica duve esistia l’episcupatu d’Accia, strania addunita di e pieve d’Ampugnani, di Rustinu, è di Caccia, andendu da Silvarecciu fin’à Ascu !



Quassù, in stu locu assai disertu, tutti l’anni, l’ultimi sabatu è dumenica di Lugliu, dapoi trenta un’annu, si passa a Fiera di a Bocca di u Pratu, spezialmente dedicata à l’animali dumestichi è e soccie, di capre, di pecure, di porchi dinù, ma sopra tuttu di cavalli.

Sta fiera, nata di u Riacquistu hè sempre, dapoi u principiu, un autenticu successu, cume una piccula vittoria di a Corsica tradiziunale contr’à l’uniformità è a mundialisazione ingorda. Una piccula vittoria di sta Corsica chì sempre vole stridà à a faccia di u mondu ch’ella brama solu d’esiste cume ella hè, senza rinegàssi.

È ci sò culatu.



U viaghju, franchendu a Castagniccia, principia veramente à l’escita di Folleli. Culà, francati l’ultimi casamenti muderni di cio chì era, menu di cinquant’anni fà, solu a marina di Penta di Casinca, s’entre veramente in a Castagniccia. A vera, sola, salvatica è antica.

Caminendu per ste cusì belle strade, si passa cun piacè d’un paese à l’altru, d’un paesolu à l’altru, fra tanti lochi d’incantu, franchendu e fureste anziane appupulate d’arburi per millaie, purtatore d’un autentica energia pusitiva chì vi supranisce l’anima cun una felicità tale ch’ùn site mancu capace di pudè spiegàlla cun parole simplice. Almenu ch’elli sianu carchi di nustalgia, d’una strania malincunia di vede a so terra abbandunata da l’omi, è ancu e fureste duvintà a preda di l’infamu tempu è di l’addisperu davanti à a morte prugrammata di l’Anima di sta terra di Corsica.

Ùn a puderia micca dì, ma sempre mi pare chì arburi arbusti è machjoni sembranu passà i so ghjorni à pinsà à u passatu, à u prisente, à un prisente alternativu di cio chì averia devutu esse, è forse à tutti l’avveni pussibili, da i più bramevuli à i più temuti.

Ancu e case, e vechje case in petre chì anu sulcatu sta terra, parenu sunnià à i tempi antichi duve eranu e regine d’una terra chì si vulia sempre esse fiera di cio ch’ella hè, d’una fierezza senza orgogliu, ch’ùn ammaestranu ch’e i savvii veri.



Si francanu dunque i paesi, da Folleli, si passa per i paesoli di Prunu cume Casette è Campu Pianu, è si passa per La Porta, si cola sempre di più, ingiratu da castagni cun estri autunnali, per ghjunghje in Quercitellu, è culendu sempre di più, in Stoppia Nova, paesolu di Quercitellu, duve si rallega senza difficultà a Bocca di u Pratu.



Quassu, cun un tempu assai più frescu ch’e quellu cuniscitu in piaghja, o solu in i paesi più bassi, si risentia cume un dolce ventu frescu chì puderia esse un ventu d’una vechja magia chì ci rallegra u core è l’anima attempu.

Per l’occasione, assai pastori è allivori ci eranu venuti di parechji rughjoni di Castagniccia, ma dinù di a Corsica sana. Si pudianu vede assai bestie, i cavalli essendu i più vedevuli, in mostra, o ancu in vendida mi pare, ben ch’ùn ne sia micca veramente sicuru.



Ci eranu dinù assai artigiani tradiziunali corsi, chì ci vendianu assai belle cose anziane, o nove ma fatte à l’usu anticu. Si pudianu amirà assai ughjetti tradiziunali fatti in legnu da artigiani corsi, cume murtali, autentichi mobuli corsi in legnu veru, l’esattu cuntrariu di l’agglumeratu industriale chì hà tombu tanti bancalari. Si pudianu vede dinù vere opere di stazzunerie à l’usu anticu, o ancu puru di vetreria d’arte assicuratu.

Senza parlà di tuttu cio ch’ellu ci era à beie è à manghjà. Un incantu per l’ochji, per u nasu, è per a lingua. Un autentica sinfunia di savore ci era pruposta per u nostru più gran piacè. Tuttu l’anima di a Corsica si truvava addunita in stu locu di transizione, di passata, abitualmente disertu. Una vera raccolta d’anime addunite in sta Fiera attuale, è chì puru tenia un muscu anticu, almenu ch’ellu fussi solu simpliciamente un muscu d’autenticità vera.

Ancu a bivetta, puru ordinaria, si mutava in un mediu di cummunicazione strasurdinaria tra ghjente chì si cuniscianu da luntanu, o da vicinu, o ancu ch’ùn si cunisciamu, ma chì per l’occasione, avianu cunstratatu assai di più ch’elli l’averianu pussutu in a vita oghjinca, duve tuttu và cusì in furia.



Aldilà di e dimustrazione, è di tuttu cio chì si pudia cumprà, ci era dinù, u lindumane, a dumenica, una ceremonia religiosa, una prucessione in l’antica chjesa di San Petru d’Accia, a mitica, duve u prufanu è u sacratu si bulighjanu cun l’ardore chì nasce di l’anima corsa autentica è bisvechja. Tandu ogni voce si scorda d’ella stessa è canta solu per ottene un armunia generale.





Nant’à a bella cummuna di Quercitellu, in pienu core di a Castagniccia antica è ribella, in a Bocca di u Pratu, ci sò cullatu, ci aghju vistu cun piacè assai ghjente ch’o cuniscia, cun i quali aghju cuntrastatu, è vistu tutte e maraviglie chì v’aghju cuntatu quì sopra. Di sicuru, e Fiere s’assumiglianu tutte più o menu, ma quessa era particulariamente riesciuta, è ne vulia parlà, scrive un articulu per sperà avvicinàmmi, ancu un pocu, di cio chì era. Per pudèvvi cuntà cun parole simplice tuttu cio ch’ellu ci era è tutte e mio emuzione è pinsate, chì forse ùn si ponu micca sempre scrive incù parole chì esistenu.

Di sicuru, si puderia dì o pinsà ch’e st’ambienza, st’atmusfera puderia esse un pocu artificiale, cume in ogni fiere, ma sta fiera, ste fiere di manera generale anu dighjà un meritu maghjore d’esiste è di permette à a Corsica anziana di porghje una manu à a Corsica attuale chì tene cusì poche occasione di ricurdàssi senza nustalgia eccessiva d’un epica, forse micca di cucagna, ma duve ci era qualcosa ch’e oghje avemu persu, o quasi, ma ch’ùn saperia sfinisce cun precisione, qualcosa d’etereu, d’indistintu, ma chì facia l’Anima Corsa sempiterna.



Infine… hè solu u mio corciu parè.
Revenir en haut Aller en bas
Voir le profil de l'utilisateur http://appuntamentu-corsu.forums-actifs.net
ceccu

avatar

Messages : 3
Date d'inscription : 10/03/2012

MessageSujet: Re: A Fiera di a Bocca di u Pratu   Mer 11 Juil - 11:39

A fiera di a bocca di u pratu cumencia quist'annu u 28 di lugliu a 9 ore!! Venite numerosi a sparte u vostru sapè!!
Revenir en haut Aller en bas
Voir le profil de l'utilisateur
Ruclinonu Solechjari

avatar

Messages : 518
Date d'inscription : 27/02/2012
Localisation : Casinca

MessageSujet: Re: A Fiera di a Bocca di u Pratu   Mer 11 Juil - 14:22

S'o ci possu cullà, ci seraghju !!
Revenir en haut Aller en bas
Voir le profil de l'utilisateur http://appuntamentu-corsu.forums-actifs.net
Contenu sponsorisé




MessageSujet: Re: A Fiera di a Bocca di u Pratu   

Revenir en haut Aller en bas
 
A Fiera di a Bocca di u Pratu
Voir le sujet précédent Voir le sujet suivant Revenir en haut 
Page 1 sur 1
 Sujets similaires
-
» A Fiera di a Bocca di u Pratu
» La nuit des reines (6Decembre a Cannes la Bocca)
» 3 eme Expo de Modélisme à Cannes le 08,09 et 10 février 08
» Weekend à Cannes pour la projection de Là-Haut au Festival
» Aujourd'hui dans le jardin

Permission de ce forum:Vous ne pouvez pas répondre aux sujets dans ce forum
ISULA :: Per isse sponde è da mare in là... :: À u fucone...-
Sauter vers: