Sujet: Saremu muntoni? porchi? o sumeri? Jeu 4 Mai - 13:42
"Ùn ci cuncerna micca" ma ne parlemu listessu...
Saremu tutti d'accordu per dì ch'ellu si ne parla assai, è forse ancu troppu di st'elezzione. Nulla di stunante, Facebook essendu u locu pridilettu di quelli chì li piace à parlà è à dà u so parè annantu à tuttu. D'altronde, frà quelli chì pratendanu ch'ella ùn cuncerna micca a Corsica, parechji ùn parlanu sguasi cà di quessa . Ma s'ella ùn ci cuncerna micca st'elezzione cumu sarà ch'e vechi fiurisce tanti statuti insultanti è puzzulanti?
Quellu chì sceglie di participà à l'elezzione, hè subitu cunsidaratu cum'è un traditore. S'ellu sceglie di vutà à Macron, tandu li si hè rimpruvaratu di ùn riflette micca da per ellu, di suvità a banda di tutti l'altri chì si lascianu scunvince da i media in quattru è trè sette. È fà è fà, s'e vutemu à Macron simu "muntoni". Aghju vistu parechji statuti FB o disegni di caricaturisti chì andavanu inde stu sensu:
Appena di rispettu!
Pare quantunque appena faciule è ancu appena inghjusta per parechje ragione. A prima hè u rispettu di e scelte d'ognunu. Ùn si pò micca passà u so tempu à rivindicassi l'eredi di Pasquale Paoli è di u Seculu di i Lumi è esse cusì chjuccuti è intulleranti. A siconda hè chì u fattu di vutà à Macron ùn hè micca esse nucente à u puntu di crede ch'ellu riprisenta un'alternativa à u sistema. Ùn hè mancu dalli un sceccu in biancu cum'ellu a scrisse Gilles Simeoni ùn hè tantu. Frà quelli chì vutaranu à Macron, sò parechji à pinsà ch'ellu riprisenta soprattuttu un'alternativa à u FN.
Ci vole à rispittà à tutti, in particulare l'elettori. Sò spessu elli e prime vittime di e bugie di so propii candidati. Miseria suciale, intilittuale, o ancu simpliciamente paura di l'islamisimu radicale, anu cunduttu parechji elettori à fà sta scelta di u peghju. Eppuru ùn mancanu micca l'insulti mancu contr'à elli. Sò parechji à cunsidarà ch'elli sò tutti "porchi"," fascisti", o ch'elli ùn sò più degni d'esse corsi quelli chì votanu à Marine. Di sta scurtatoghja faciule trà scelta pulitica è identità n'aghju digià parlatu. L'aghju scritta parechje volte è a mantengu: U votu ùn difinisce micca nè l'identità nè a parsona. Ùn basta micca à vutà Corsica Libera o Femu a Corsica per esse corsu, è u fattu di vutà à Marina ùn farà micca di voi un Gaulois nun più. L'affare hè più cumplicatu cà cusì. Avà hè vera chì quand'ellu si sente certi "ragiunamenti" o ch'ellu si vede certe facce cum'è quella di u nostru amicu di a videò quì sottu, u paracone incù u porcu pare ch'ellu si ghjutificheghji quantunque appena...
Ma quessa dinù a ripetu, è mi pare impurtante à ripetela: Ùn ci vole micca à mette à paru tutti l'elettori FN. Eppo' chì paracone ci pudaria esse trà quella vichjetta chì passa a so ghjurnata sola in paese, chì hà siguitatu à a televisione l'attentati di Parigi o di Nizza, induv'ella ci hà nipoti, figlioli o puffiglioli, è u skinhead néo-nazi di basa? S'e vi parlu di sta vichjetta chì stà in paese hè dinù perchè Marine hè ghjunta in testa in parechji paesi. Ùn vogliu micca fà u pulitologu à dui € ma mi pare quantunque impurtante di piglià appena in contu, frà altri criterii, l'età di a pupulazione di i paesi di l'internu per fà un'analisi piu fina di certi risultati. Ma ùn hè micca solu inde i paesi, chì frà l'elettori novi di Marine, parechji anu cidutu à a "tentazione" soprattuttu per via di sta paura di u terrurisimu. Paisani o citatini, vechji o giovani, sò vittime di e bugie di Marine chì ghjoca incù e paure di a ghjente. Hè d'altronde stu fenomenu novu – aghjustatu à 15 anni in più di crisa ecunomica è suciale – chì mi face dì chì a situazione ùn hà più nulla à chì vede incù quella di l'elezzione di 2002, ancu sì l'attentati di u World Trade Center è di Washington qualchì mese nanzu ùn funu per nulla in lu risultatu di J.M. Le Pen. È sta situazione nova ci pò fà teme una suspresa dumenica sera.
"Astensiunisti cuntrariati"
L'astensiunisti dinù sò mustrati di ditu, ma forse di più in cuntinente cà quì. Sarà forse chì quì, i partigiani di #CorsicaIsNotFrance – ma chì certi magnanu è cacanu in francese, cum'ella dice a canzona – sò belli numarosi. Eiu à u fondu, frà tutti l'astensiunisti, sò i "ni-ni" ch'e capiscu u più. Vogliu dì quelli chì ùn votanu micca nè à Marine, nè à Macron simpliciamente perchè indu a so idea, unu hè male è l'altru hè peghju – è ùn hè micca a so pristazione à tramindui in lu dibattitu d'arrisera chì i farà cambià d'avisu. Vogliu parlà dinù di quelli chì a so miseria suciale i porta à pinsà chì a so situazione ùn cambiarà micca incù Macron prisidente. Sarà digià un bellu affare s'elli ùn votanu micca à Le Pen. Si vede dunque quant'ella hè frolla a fruntiera trà un votu Le Pen è un'astenzione s'elli sò mutivati i dui da una vulintà di mustrà un'uppusizione à u sistema da quelli chì ne sò e principale vittime. Hè frolla dinù a fruntiera trà certi astensiunisti è certi macrunisti. Hè longa a cumpagnia – è ne facciu parte – di quelli ch'e chjamaremu "astensiunisti cuntrariati" (Circione ) chì anu da vutà à Macron, ma chì s'elli fussinu sicuri di a so vittoria capunanzu si starianu in casa dumenica.
Simbuli bioti
L'altra mutivazione di l'astenzione, l'emu detta, hè stu sintimu di ùn sentesi micca cuncernati da un'elezzione o una prublematica francofrancese. Ùn vale micca a pena di rivene annantu à quessa, tantu, à mè, mi pare surrealistu l'affare. Mi pare ch'ella sia soprattuttu una pusitura: Si rinforza u sintimu idintitariu in lu ricusu di ciò chì ùn hè micca nostru. U piccatu hè chì accantu à stu ricusu, ùn si vede tanti sforzi per esse in accordu incù ciò chì currisponde à l'idea ch'è no ci femu di l'identità corsa – lingua, cultura, spirdu, ecc. Ci piace di più à arrimbacci à simbuli, spessu simbuli bioti, chimere. Ben'intesa trà i partigiani di u #CorsicaIsNotFrance ci avete dinù ghjente chì ùn si sentenu micca francesi culturalamente – è ùn sò – è chì strazieghjanu per stantà u so pane, parlu in particulare di l'agricultori, i pastori o ancu di l'artigiani. Quelli una certa indipindenza po l'anu, ma quantunque mi pare ch'elli sianu belli "cuncernati" certi quand'ellu s'agisce di chere l'aiute à u Statu. L'emu vista ùn sia cà dopu i danni di l'innundazione di nuvembre scorsu. Ch'ella sia chjara, ùn li rimpruvareghju micca di dumandà e prime è l'aiute di u Statu. Mi pare lighjittima è nicissaria. Dicu solu ch'ellu ci hè un'incuerenza s'elli pratendenu chì l'elezzione ùn li cuncernanu micca: Li tuccarà à scumbatte è à niguzià incù u guvernu di quellu o di quella chì sarà elettu(a).
Una cria d'imparzialità
Ma volta è gira è tribbia è pesta, st'elezzione "CHÌ ÙN CI CUNCERNANU MICCA" sò quantunque l'uccasione di tazzacci in trà di noi. Per quessa e cose ùn cambianu micca. Allora malgradu tuttu hè forse ancu megliu à ride appena, è postu ch'è no simu in le scurtatoghje simpliste è faciule è in li paraconi animaleschi vi prupongu una sintesi chì mittarà à tutti à ugualità. Ciò chì mi pare sicura hè ch'ellu ùn ci resta cà trè pussibilità: Vutà à Marina, vutà à Macron è ùn vutà micca – o biancu o "Pasquale Paoli", ecc.
Cunsidarendu ch'elli sò porchi l'elettori di Marina è ch'elli sò muntoni quelli chì li votanu contru, si pò cunsidarà dinù chì quelli chì a lascianu passà ùn vutendu micca o vutendu biancu sò sumeri:
Hè bè di ride appena ma tandu saria una bona ch'omu fessi prova di una cria d'imparzialità per chì ognunu ci trovi u so contu – o u pigli .
Maria
Messages : 1264 Date d'inscription : 28/02/2012 Localisation : quassù
Sujet: Re: Saremu muntoni? porchi? o sumeri? Sam 6 Mai - 21:16
Un'analisi chjara è ghjusta, mi sò propiu campa à leghje.
Sì tù a permetti vuleria sfugammi appena è indirizzammi -à l’astensiunisti, micca i cuntrariati ma i veri -à l’elettori di MLP.
-Ùn vulete andà à vutà ? Bon prò vi faccia ! State à chjachjarà nantu à e rete suciali, andate à piscà , à nutà, à fà una spassighjata in muntagna, una bucciata…Infine sì Eole a permette.
Ma dopu ùn ci vulerà micca à lagnassi di e misure pigliate da u futuru guvernu cuncernendu l’educazione, a salute, l’impiegu, i trasporti, ecc. chì impatteranu DINÙ a Corsica (vi lasciu induvinà perchè. ) È sì,tandu, vi vene in quella di falà in carrughju rimpienghjendu d’un esse vi mossu u ghjornu di l’elezzioni ùn a vi cacciate cun nimu. Solu cun voi.
-Ci avete pensatu à i vostri antichi, cari babboni è arcibabboni ch’anu cumbattutu u fascismu ? Devenu fà e rutulate in e so tombe dopu à u risultatu di u primu giru : una candidata fascista in testa in Corsica.
Vergogna !
Figlioli indegni !
È ch’ùn vi senti più dì chì MLP ùn hà nunda à chì vede cun u so babbu !! Ùn feraghju l’elencu di tutte e fotograffie d’ella cun neunazisti (l’aghju ancu vista in ritrattu cun un SS, da giovana) raminteraghju solu un pruverbiu nustrale « chì di ghjallina* nasce in terra ruspa ».
*Seria più ghjusta di dì "ghjallochju" (maschile) ma dopu m'aghju da fà un nemicu.
Maria
Messages : 1264 Date d'inscription : 28/02/2012 Localisation : quassù
Sujet: Re: Saremu muntoni? porchi? o sumeri? Dim 7 Mai - 6:31
Hà pensatu à voi.
Ùn vi scurdate d'ellu.
Contenu sponsorisé
Sujet: Re: Saremu muntoni? porchi? o sumeri?
Saremu muntoni? porchi? o sumeri?
Page 1 sur 1
Permission de ce forum:
Vous ne pouvez pas répondre aux sujets dans ce forum