A fola di Salamone
In Niolu, i vechji contanu ch’ellu hè Salamone chì hà amparatu u mistieru à u primu pastore…
Dopu avè passatu una bella stonda cun ellu ind’è u compulu incù u tinellu, per amparalli à munghje, Salamone li fece vede cum’ellu ci vulia à fà per culà u latte incù a filetta secca, per fallu caghjà incù l’aredu, per rompe u caghjatu, eppo' una volta cacciatu u seru, li mustrò cum’ellu ci vulia à empie incù a cochja di ghjinneparu e casgiaghje (chjamate dinù fattoghje in certi lochi) messe annant’à a scaffa, à appiccià i casgi freschi, eppo' ben’intesa ancu à fà u brocciu…
Per fà u brocciu bisogna à fà scaldà u seru inde u paghjolu, quand’ellu hè caldu abbastanza u seru, ci si mette appena di latte frescu (u puricciu) è s’accatizza u focu. Dopu avè cacciatu a sciuma si pò mette u brocciu ind’è e casgiaghje è infine, incù un gestu pricisu, ci vole à accuppià duie casgiaghje per fà un brocciu. À a fine di l’affare inde u paghjolu ùn ferma più cà u seru cottu, si chjama a ciabba. Di a ciabba ùn si ne face nulla, ghjova solu à richjarà e casgiaghje. Ci hè ancu una sprissione : « fà ciabba », quandu si dice à qualchissia ch’ellu hà fattu ciabba vole dì ch’ellu ùn hè micca riisciutu à fà ciò ch’ellu vulia, hè fiascatu è hà persu u so tempu per nulla…
Salamone amparava dunque tutti issi gesti à u primu pastore ma s’eranu arrizzati à l’alba tramindui… in più bella à u pastore li vense a penciula è ùn stede tantu à chjinassi à dorme … Dopu una bella alluppicata, u pastore aprì l’ochji è vide chì mentre ch’ellu durmia, Salamone incù a ciabba avia fattu un pane di cera !
Da a tradizione urale.
Accueil 
Ma poi chì ne hà fattu Salamone di quellu pane di cera ? L'hè ghjuvatu à qualcosa à lu pastore tandu :?: 
