Eccu, avà ci sò. Sò puru ghjuntu à francalla ‘ssa fruntiera è sta volta hè l’ultima, ùn vulteraghju più ind’è mè. Oghje sò in pace.
A prima volta m’era fattu chjappà da e « border patrol », m’avianu chjosu une pochi di mesi in un campu cun d’altri immigranti, poi à u capu di qualchì mese ci anu rimandatu à u Messicu.
A seconda volta era passatu senza difficultà, s’ellu si pò dì, avia travagliatu cum’è ghjurnataghju in una spluattazione agricula di u Texas, induv’era trattatu abbastanza bè, è sopr’à tuttu pacatu quattru volte di più chè in u mo tufone persu di Las Vacas.
Eppò un ghjornu , sò ghjunti, armati, vestuti cun tenute militare, una decina di pick-up à troncachjavette, è aghju vistu a paura in l’ochji di i mo cumpatriotti, hè natu u scappa scappa, è elli ci tiravanu addossu, è noi fughjiamu, è parechji cascavanu, feriti o morti. Eo, a mi sò francata, eramu dui, à avè corsu abbastanza in furia o à esse stati crepati in colpu, chì forse ùn ci averanu mancu vistu, infine eramu salvi.
Quale eranu quessi ? Un era micca a border patrol
Cumu a sai ?
M’anu chjappu digià, è ùn ci anu micca tiratu addossu.
Diego ùn mi rispose micca. Chì ne pudia sapè ellu, qual’eranu ‘ssi tippi, ùn avia mancu vint’anni, è era partutu di u so paese perchè chì ci patia a fame.
Marchjavamu versi u meziornu, rientravamu ind’è noi, vultavamu à a miseria, vultavamu à a fame. Di prima sera, avemu vistu una casuccia scantata, Diego ùn ci vulia andà, dicia chì ci aviamu da fà tirà, ma eo era famitu, l’aghju dettu d’aspettami, anderia à dumandà qualcosa à pizzicà, è s’ellu si passava male, ùn averebbe chè da fughje.
Ci stava una donna sola in sta casuccia, ci allughjò, ci fece manghjà è ci spiecò qual’eranu i nostri amichi .
Eranu i Minute men, una milizia di citadini americani chì vulia luttà contr’à l’immigrazione, à u principiu facianu solu surveglianza è quand’elli ne chjappavanu unepochi di i nostri, i trasmettianu à a pulizza, ma u so razzisimu piattu avia pigliatu a suprana, è dillusi da i pochi risultati di a pulizza, eranu entrati in una guerra scema è fanatica.
Allora simu vultati à u Messicu . Un’antra volta. L’ultima volta.
A terza volta, ùn era micca solu, cun mè ci era Luis è Miguel, dui amichi di Las Vacas, babbi di famiglia curagiosi chì affruntavanu a fruntiera, a morte, per dà à manghjà à i soii.
Curagiosi, i mo cuglioni, quand’omu pate a fame, ci vole à esse incuscienti per piglià moglia è fà figlioli, incuscienti è scemi quandu per dalli à manghjà, ci vole à parte ind’un paese strangeru chì ùn vole di voi, chì alza un muru longu à a fruntiera, induve semplici citatini imbuffati di razzisimu è di cunnaria pura, piglianu l’arme è ci tiranu cum’è cunigliuli.
Aviamu francatu u Rio Bravo à u nutu, a ci eramu francata sin’à custì, di a border line è di e milizie. Sta volta, era a bona, aviamu passatu a fruntiera è seria l’ultima volta n’era cunvintu, più nimu mi rimanderebbe in l’infernu di Las Vacas.
Marchjavamu versu Eagle Pass, quand’elli ci sò cascati addossu. Un anu micca tiratu, ci anu ammanitatu è lampatu à bordu à i pick-up, i mo cumpagni mi fidighjavanu impauriti
Sò miliziani, ci portanu ind’è a pulizza, avemu da vultà ind’è noi.
Unu di ‘ssi inculati m’hà minatu di ceppu in capu,
Parla inglese o mullizzò, ùn si micca nù u to paese di scimii.
Ci anu purtatu in un hangar scantatu.
Sò vultati di notte, cun e tenute bianche di u klu klux klan, avianu preparatu e so croci rituale, quelle ch’elli brusgiavanu quandu tumbavanu i neri
V’avemu da amparà à stà ind’è voi, mansa di muracci, quì hè terra americana.
Eccu, avà ci sò. Un vulteraghju più ind’è mè, ùn averaghju mai più fame, ùn suffreraghju mai più.