Vitalba

parolle: Olivier Ancey
musica: Stéphane Ancey



Muntagna chieta


Nu i mumenti più chieti
Quand’ellu spunta l’albore
L’estru di centu pueti
Versu a muntagna corre
Palesa i so sicreti
È svela u so splundore

Sparghje u sole d’inguernu
A so dilicata fiara
È abbraccendu l’eternu
Si disceta l’alta sarra
Matrimoniu più serenu
Di u celu è di a tarra

Stende i so primi ragi
Intricciati di dulcezza
È si stinzanu i largi
Per godene a carezza
O per sente i so basgi
Calassi nant'à a cresta

Ci porghje a zilifrina
Di Monte Cintu u fiatu
Trave l’aria marzulina
Sin’à Capu Tafunatu
Mentre u sole camina
Nu u celu spurgulatu

Ribombanu e tirzine
Ch’elle cantanu e fate
Inde e valle turchine
È e punte innargintate
Altiere cum’è regine
Di neve incurunate

U sole chì si lamenta
Quandu lu ghjornu finisce
Per licinziassi lenta
Purpurine e so strisce
A muntagna s’addurmenta
Annanata da e spisce

Parolle: Stéphane Ancey
Musica: Toussaint Montera


Malaterra


Sò Gaià a turchina, sò u nulla è u tuttu
Sò l'alburu di vita, a radica è u fruttu
Tremu cù u to pientu, spartu a to prighera
Sò l'arechja chì sente è a voce chì spera


Sò u vadu chì corre è a petra chì stà
L'inguernu chì s'affacca è l'acellu chì và
U ventu frà e fronde, a matina fritosa
L'arte in ogni belleza, u sensu d'ogni cosa

Sò Gaia a turchina...fideghja mi 'ssu mare
È 'ssi monti zuccati è 'sse fureste care
Millenarii di vita m'aghju francu e strage
Poi sè ghjuntu tù à rompe mi a pace


L'orisonte s'abbughja, l'aria si face piombu
Da e cime affilate à u mio più prufondu
Corre a malaterra, corre l'anticu frombu
Di l'antica paura ch'e guarisca lu mondu

Chì in fondu di mè, nimu a vole crede
U mio core hè di farru è di petre d'infernu
È a mio storia hè vechja, inghjusta è senza fede
Più c'à a storia umana chì si crede l'eternu

Parolle à musica: Jean Yves Acquaviva



L'isula sola



O quantu vuleria scrive chì a mio storia hè di pace
Chì l’albori ch’aghju vistu si sò pisati sereni
Ma à empie a mio mente sò centu mila e strage
È di fiure sanguinose i mio ricordi sò pieni

Aghju vistu tantu volte u mio mondu piccià focu
Per una croce, un spechju o per un palmu di terra
Per una fede, un’idea, per u pusessu d’un locu
L’omi move e battaglie, l’omi dà si à a Guerra

Eiu sò l’isula sola
Locu di tanti sicreti
Un’isulella di fola
Musa di tanti pueti
Sò un’isula sulella
Mi chjamanu a più bella

Aghju vistu à l’orisonte ghjungne tanti battilloni
È i sullati à millaie calpighjà e mio marine
Aghju in core e vinice di ‘ssi tempi bughjiconi
È piengu à fiumi pieni e mio pene senza fine

Da sempre sò stata eiu ogettu di ogni imbliglia
Quella chì omu vulia cumprà, vende o cunquistà
Quella stella ch’in lu celu di più c’à l’altre spampiglia
È ch’ognunu vuleria di e so mani tuccà

Eiu sò l’isula sola
Locu di tanti sicreti
Un’isulella di fola
Musa di tanti pueti
Sò un’isula sulella
Mi chjamanu a più bella

Ma vogliu sperà e crede in un dumane sfarente
Sunnià di l’ore à vene cum’è di tant’allegrie
Vede e so albe chjare è di pace splendurente
Pisà si à l’infinita cum’è in le puesie

È vogliu dì à i mei, à i mio figlioli cari
In un cantu di sperenza, in un’ardente prighera
Di francà mi à l’ora mai di tanti ricordi amari
È di tene caru à mè di più c’à a mio bandera

Eiu sò l’isula sola
Locu di tanti sicreti
Un’isulella di fola
Musa di tanti pueti
Sò un’isula sulella
Mi chjamanu a più bella…

Innò o Dolì, ghje' cantu solu quand'e' so cordu, ancu assà.

Parolle: Jean Yves Acquaviva
Musica: Toussaint Montera


Mi ne vogu

Cù e sciume chì vanu à imbiancà l’orisonti
Purtate da u mare peregrinu eternu
Cù e neve chì stanu appese à i monti
Carezze di silenziu rigalu di l’inguernu

Cù l’omu spiranzosu fighjendu a spirata
Chì vene à risplende mezu à u timpurale
Cù l’ansciu silenziosu di a chieta attrachjata
Quandi a luna accende u più altu sciappale

Mi ne vocu à cantà e fureste di sole
I chjassi di u sperà eppo l’eternità
Eppo l'eternità


Cù l’acellu quassù in lu celu turchinu
Duve và solu, solu un nulu andarice
Cù u tempu dinù missageru divinu
Chì tramanda l’idea d’un mondu più felice

Cù u ventu istrosu chì gira centu mondi
Basgendu ogni sarra di e so dolce lapre
Cù u fiume furiosu chì và mezu à e sponde
È l’immensa dulcezza di u fiore chì s’apre

Mi ne vocu à cantà e fureste di sole
I chjassi di u sperà eppo l’eternità
Eppo l'eternità

Cù l’ochji illuminati da i ghjorni d’aprile
Impastati d’amore è carchi d’asgiatezza
Cù i cori infuriati da u sintimu suttile
D’appartene à a tarra è à e so billezze

Cù l’omu incatenatu privu di stellaria
À l’ora chì a notte stende u so reame
Cù u sognu strappatu in cerca d’armunia
Chì scianchighjendu và versu l’alba chì chjama

Mi ne vocu à cantà e fureste di sole
I chjassi di u sperà eppo l’eternità
Eppo l'eternità

Parolle: Jean Yves Acquaviva
Musica: Stéphane Ancey


Stirling bridge



U sole brusgia à l’orizonte
À dolci raghji scalda e fronte
In a campia u ventu voca
È d’ogni silenziu si ghjoca
Quassù à nant’à e culline
U core pienu quasi à schiattà
L’omi sò pronti à ghjungne à fine
Da difende a so libertà
Incù a forza immensa d’una mossa cumuna
Per mughjà à l’inglese chì ‘ssa tarra ùn s’affuna
È chì regnanu quì u sole cù a luna


U sole luce à u celente
Pianu, pianu infrebba e mente
In a campia u ventu voca
È ogni silenziu s’alloca
È a battaglia si scatena
Si tomba per ùn esse tombu
U farru contru à u farru mena
Sin’à cunfonde voce è ribombu
Incù a forza immensa d’una mossa cumuna
Per mughjà à l’inglese chì ‘ssa tarra ùn s’affuna
È chì regnanu quì u sole cù a luna

U sole more à l’orizonte
Si piatta daretu à u monte
U ventu alliscia a campia
A nebbia s’hè fatta pisia
Solu per rompe u silenziu
È dà fiatu à a mio musa
Cum’è un ultimu licenziu
Si lagna una caramusa

Dumane un sole à l’orizonte
Brusgiarà da scaldà e fronte
In a campia assirinata
Ci vucarà ogni vintata
Diceranu voce é ribombu
Adduniti à l’eternità
Perchè tumbà o esse tombu
Da difende a so libertà ?


Incù a forza immensa d’una mossa cumuna
Per mughjà à l’inglese chì ‘ssa tarra ùn s’affuna
È chì regnanu quì u sole cù a luna

Parolle: Anton'Francescu Filippini
Musica: Stéphane Ancey


U fiume discitatu

À l'ombra di a custera
Fiume Golu si lamenta
Fiume Golu insunnulitu
Chì ogni tantu si ramenta

Un orchestra di fucili
Discitatu l'hà di novu
Chì a polvera ragiona
Da Niolu à Ponte Novu

Penetrendu e vallate
Quandu l'ecu si sbucina
Trimà face i monti sacri
Quelli di Santa Regina

Prima face e verde ripe
Di Rustinu è Riscamone
È lu fiume fala in mare
Tasanendu ogni pentone

Chere or'chì lotte tremende
Scempierenu a Cursichella?
Serà l'ultima angunia
O serà l'alba nuvella?

Cirnu i to palatini
O sò tombi o sò impiccati
Ma per fà stu finimondu
Soca sò rissuscitati

Cusì parla Fiume Golu
C'ùn s'hè datu mai ragione
È c'ùn alza ormai a voce
C'à per fà st'implurazione







Parolle è musica: Jean Yves Acquaviva



Fiure di Palestina


Sottu à un celu spurgulatu
À mezu à un alivetu
Un agnellucciu hè natu
È campa chietu, chietu

L'accarezza un zitellu
È u cura un pastore
In 'ssu locu cusì bellu
A vita pare d'amore

Ancu u più finu fiore
In sè piatta una spina
A vita pare d'amore
Ma piegne a Palestina

In un pratu verdicheghja
L'arbicella di dumane
È l'agnellu saltilleghja
À l'asgiu di e lite umane

Sò cusì belli 'ssi lochi
Quandu l'ora hè sirena
Quandu sò spenti i fochi
È appaciata a pena

Ancu u più finu fiore
In sè piatta una spina
A vita pare d'amore
Ma piegne a Palestina

Parolle: Jean Yves Acquaviva
Musica: Toussaint Montera



Di mele è di sale

Sò e muse disposte
À impristà mi rime
È scrive e to loche è amintà à tè
E to superbe coste
L'altu di e to cime
È tante e canzone chì ribombanu in mè

Canzone di statina
Ligere è savurite
Cum'è un fiume mossu à surgente piacè
Canzone maltasgina
Di sponde infreddulite
È tant'altre stagione à invintà per tè

Stagione à l'appollu
D'un eternu rinnovu
Di culori è profumi chì a natura sà
Dumani à l'affollu
D'ogni sbilanciu novu
Per esse sale o mele di u mondu da fà

U sale di 'ssu mare
Prigiuneru o prigione
Nidicale o cabbia d'un avvene à tesse
U mele chì mi pare
Esse in ogni ragione
D'ùn dupità mai più di tutte e to prumesse

Prumesse di canzone
È di muse disposte
Per cantà e to loche è amintà à tè
Vede à ogni stagione
E to superbe coste
Dà si à 'sse puesie chì dormenu in mè

bellissima...

In publicu...




Prigiuneru

Parolle è musica: Jean Yves Acquaviva

E mio cunfine sò
Di petra è di farru intricciati
È da induve stò
Ùn vecu più i verdi prati
Ma sunnieghju, iè sunnieghju è sunnieghju

E mio cunfine sò
Di petra è di farri intricciati
È da induve stò
Ùn vecu più i verdi prati
Ma quandu vene l'ora
Di chjode l'ochji è sunnià
Pigliu e strade d'oru
Quelle accese di libertà

Chì ùn ci hè matre da parà
U fiume di u sunnià
È ùn ci hè marchjone à sarrà
U ventu di u ricurdà

U mio sonnu hè di fole
Ma i mio ghjorni sò di stizia
Chì campu senza sole
Prigiuneru di l'inghjustizia
Ma quandu vene l'ora
Di lascià a mente scappà
Mi trovu torna fora
Per e machje di libertà

Chì ùn ci hè matre da parà
U fiume di u sunnià
È ùn ci hè marchjone à sarrà
U ventu di u ricurdà

Ùn sò s'è un dumane
Torna per mè si pisarà
S'è à e mio sulane
Puderaghju torna avvintà
Ma c'hà da vene l'ora
D'apre l'ochji è di fidighjà
E billezze di fora
A vogliu torna imaginà

Chì ùn ci hè matre da parà
U fiume di u sunnià
È ùn ci hè marchjone à sarrà
U ventu di u ricurdà










Parolle: Jean Yves Acquaviva
Musica: Jean Yves Acquaviva/ Toussaint Montera


Duve sò

Duve sò pigliate l'ore di e rise zitelline
Quandu per coglie e more ùn timiamu e spine
Duve sò, duve sò 'ssi mumenti
Duve sò, duve sò à i venti o spenti

Forse si ne sò andate cù u fiume di l'età
Cù 'sse piene infuriate à l'eterna libertà
Duve sò, duve sò 'ssi mumenti
Duve sò, duve sò à i venti o spenti

Duve sò a niscentria è u so cumpagnu l'asgiu
Oghje ferma a nustalgia è d'un ricordu u basgiu
Duve sò, duve sò 'ssi mumenti
Duve sò, duve sò à i venti o spenti

È quelle ardente battaglia da difende u castellu
Fattu di tarra è di paglia di u mondu u più bellu
Duve sò, duve sò 'ssi mumenti
Duve sò, duve sò à i venti o spenti

È 'ssi chjarasgi pumposi quantu volte vindimiati
I rivecu, diviziosi carchi à frutti inzuccarati
Duve sò, duve sò 'ssi mumenti
Duve sò, duve sò à i venti o spenti

Ma in fondu à u mio core l'aghju tinutu prisenti
U profume di 'sse more è tutti quelli mumenti
Sò in mè, sò in mè 'ssi mumenti
Sò in mè, sò in mè à venti
Sò in mè, sò in mè 'ssi mumenti, mai spenti...






Parolle: Ghjanettu Notini
Musica: Toussaint Montera



Machja corsa inveranita
Carc’à mazzuli muscanti
Conta, conta o preferita
Ch’eiu possa ripete in canti
Sai chì, cum’è u mare è u ventu
Capiscu lu to lamentu

È la machja tutta in fiore
Cun alitu prufumatu
Trà la gioia è lu dulore
Cum’un dolce sirinatu
À stu core chì mi trema
Mi cunfidò stu puema

Veni quì pueta caru
Frà ste più belle rambelle
Mì, un lettu di murze paru
À st’albitru in campanelle
Posa. Tè ! T’ adumbreraghju
Cù stu muchju rusulaghju

Tante vette aghju intricciatu
Per mille coppie d’acelli,
È i so nidi aghju curatu
Per gode d’i so sturnelli
Cun tè chì mi teni cara
Voli ch’eiu mi mostri avara

Sò ghjunte duie pernice
Caccianendu da l’amore
Dicendu i nostri nemici
A volpe è u cacciadore
Ci danu riposu infidu
Facci, o machja, u nostru nidu

Ma dinò, o chì sfurtuna
In tristu preparativu
Hè ghjuntu à u chjaru di luna
Un esseracciu nucivu
Cù la micidiaghja fiara
Per brusgiammi à rughja para

O le mio muscante gemme
Li mio tanti è più culori
È voi quantu mi preme
O canzone, aliti, amori
Chì sarà a nostra risorsa
Fiati di la machja corsa

Tù pueta chì mi senti
Chì mi capisci è mi lodi
Piegni, canta i mio lamenti
Nanzu chì a manu s’approdi
Prova à tuccà u core in pettu
À quellu ch’ùn m’hà rispettu

Eccu un tamantu piacè. Voce di zitelli da fà campà 'ssa lingua...

Manca a fine ma...


A CANZONA

S’o sapessi in duie rime caccià tutta a tristezza
Di l’ore culor’vaghjime di e stonde di sulezza
S’o sapessi a meludia chì cunsola d’ogni pena
A funtana d’armunia chì scioglie d’ogni catena

Esse a voce, esse u cantu, esse u luciore tamantu
Chì accende ogni vita
Esse u nidu, esse u locu, esse a fiara, esse u focu
Chì scalda l’alba infretulita

S’o sapessi in e mio rete pigliacci a puesia
À e so strade sicrete attippacci una cria
È ‘sse note vagabonde sposte à ogni fiumara
S’o e sapessi asconde nentru à a mio ghitara

Esse a voce, esse u cantu esse u luciore tamantu
Chì accende ogni vita
Esse u nidu, esse u locu, esse a fiara, esse u focu
Chì scalda l’alba infretulita

S’o sapessi imbulighjà in una stonda fatata
‘Ssi filari di sperà cù a musica incantata
S’o sapessi tuttu què ne faria ‘ssa canzona
Ch’à u prufondu di mè dapoi sempre risona

Esse a voce, esse u cantu Esse u luciore tamantu
Chì accende ogni vita
Esse u nidu, esse u locu, esse a fiara, esse u focu
Chì scalda l’alba infretulita
Esse u nidu, esse u locu, esse a fiara, esse u focu
Chì scalda l’alba infretulita…

Manca a fine??? Po! si veramente un cosu

Un pocu di live...

Torna un suppulellu...