Mélenchon un veru fascistu?

ùn sò micca ciò chì ci vole à pensà di Mélenchon. ùn mi piace tantu a so manera di sprime si, sempre in l'eccessu è u cunflittu ancu s'ellu prova à argumentà. ghjè u tonu ch'ellu impiega chì mi dirangia assai. hè vera dinù chì certe volte face prò di vede à qualchissia cù cunvinzione à mezu à tutti sti discorsi insipidi è sti surridi falzi. "fascistu" ùn hè micca a parolla ghjusta. si cunfonde spessu u fattu d'esse virulente cù sta forma di "spressione". Mélenchon sarà arcaicu, chjuccutu, eccessivu, giacobinistu, un esempiu di ciò chì pudia dà a terza republica...è d'altri affari ancu. hè un francese, republicanu (in u gattivu sensu)è dunque luntanu di l'interessi di a Corsica è di e minorità.

per Marine Le Pen hè quantunque sfarente. emu un esempiu magnificu di ciò ch'hà datu u IIIè Reich. parlemu quì di u solu partitu puliticu chì prupone Mein Kampf à l'appiattu durante i so cungressi :suspect:

Iè, socu abbastanza d'accordu.

Fascistu pà Mélenchon saria un termini abusivu. Ma hè quantunca un cunnacciu. È un uppurtunistu, parchì s'hè scupartu di strema manca quandi i cummunisti l'ani uffertu un distinu di prisidinzievuli.

Nanzi era solu un giacubbinu di manca, com'è ci n'hè tantu.

Inveci pà Le Pen ùn ci voli micca à sbagliassi, nò, idda è u so partitu sò fascisti da veru, malgradu un "lifting" par raportu à i pusturi vechji di u so anzianu capu. Ùn ci hè più tarocchi publichi annant'à i furri, ma tuttu hè in u filu di a strema dritta storica.

Ciò chì i banalizighja, forsa, hè chì a dritta à u puteri li s'assumidda di più in più.

s'anu da piglià e voce di i cacciadori, quelle di i catolichi, è s'ella ùn la face micca Marina à scunvice i 500 merri, incù u travagliu di Guéant è quellu do Nico si n'anu da piglià qualchì una di e soie...


Per rivene à Melenchon, era l'invitatu di Cuntrastu anzora... ùn aghju vistu cà un pezzu d'emissione, ma quandu aghju intesu e so pusizione annant'à à lingua è u populu corsu aghju capitu chì u tippu u scrivarà mai annant'à u nostru foru. :pale:

Veru fascistu, innò.

Veru connu, sì, opportunistu, cum'ellu a dice Muzzucanu. Per fassi vede bè da i cumunisti, ghjoca u rollu d'una caricatura di Georges Marchais, ma l'omu s'hè fattu chjappà da e camera di u " Petit journal" di Canal.

Era in campagna ùn sò più in chì gara di a regione parigina , è ci hè un vechju " cheminot " sindicatu, chì li dice ch'elli avianu u male cun l'anziani ministri di manca chì l'avianu burlati tantu è più.

Melencon li risponde chì ellu hà u male cù i conni in generale, poi alluntanendusi, dice à u so staff " rodidon, faudrait faire du reperage avant que je debarque, faudrait pas tomber sur le seul gauchiste du coin."

A mediter, dice u pinzutu.

un vorebbi micca ripete cio ch'aghju scrittu l'altr'eri nant'à un antru foru (quessa a lasciu fà à Musantu ..) ma parlà di fascisimu per stu generu di persunagiu è un eccessu e un sviamentu di sensu ; d'altronde e ch'omu ne pensi n'impurta che su termine un è adattatu mancu à u vomiteghju di Marine Lepen(ancu se cum'ella a ricorda cun raggiò Petra Alta si cultiveghja custì ambiguità e anc'appena a nostalgia ..). quandu si parla di fascisimu si tratta d'un ideologia totalitaria particulare (ci vorebbe in più à fà a disferenza cu u nazisimu) visendu à cuntrollà l'inseme di a sucietà nu un esaltazione naziunalista . per Le Pen simu piuttostu nu una spezie d'arricolta strana d'autoritarisimu, di zenoffobia mal piatta chi tende à alliscià i sintimi i più bassi fendu crede à soluzioni semplici à i spiriti di povera ghjente delusi e sbussolati . in quant'à Melenchon simu in faccia à un saltimbanca in traccia di ghjocà un rolu : persunagiu assai cultivatu chi vole impiecà u vocabulariu ch'ellu crede esse quellu di u populu ,sbarcatu da u partitu sucialistu per surpàssi i voti d'un cumunisimu e d'un estrema manca in scunfitta . per tene stu rolu (studiatu) s'è impatrunitu di di i temi frusti di a republica d'un antra epica e s'è fattu maestru di l'effetti di tribuna ( si piglierà per Jaures ?) , ma chi ne penseranu i nostri corsisti (iè ne cunnoscu qualchi unu ..) di u Front De Gauche in Corsica di u so disprezzu per a nostra lingua (dixit"chi n'averete à fà quande vo serete nu u metro parigginu?") e di u so giacobinisimu chi serebbenu da apparagonà infatti à cio chi d'altri chjamanu "a ierarchia di e civilisazioni"(ma interna à a "Francia"..) postu chi à u finale è ben di quessa ch'ellu si parla ?

V'ha da caccià a puzza Mélenchon, ò mansa di bobo gluttologhi!