Scritti imposti

Francescu Arliconi vultava in paese soiu, Nivrasi. Passendu per u giratoriu di Casamozza, sculunnò un omu chì li facia cennu. Ben ch’e naturalmente sfidanciu di a ghjente ch’ellu ùn cuniscia, sopra tuttu dopu à a strania sparizione di u so cugnatu, Francescu decidò di piantà a so vittura per vede cosa vulia l’omu. Senza parole, ellu rientrì in a vittura è Francescu, senza frasturnàssi di più, ripigliò a so strada.

U straniu omu scunisciutu s’era pusatu davanti, nant’à a « piazza di u morte », è s’assumigliava tuttu à un sgiò. Di fattu, ben ch’e crosciu da u groppu, Francescu ùn vedia ch’e troppu bè ch’e a so vistura era di bona qualità. D’altronde, si tenia cusì dirittu ch’e, paragunatu à ellu, Francescu si sentia gobbu o inzimbitu. Degnu degnu, paria attempu ghjovanu, è attempu vechju. A so pelle era quella d’un omu ghjovanu, quante i so gesti, ma a so andatura generale era assai più matura. A tal puntu ch’e malgratu i so sforzi, era propiu impussibile à Francescu d’attribuisce un età à l’omu pusatu accantu à ellu in a vittura.
Ma u più chì disturbava Francescu, era di custatà fin’à chì puntu ne era impenseritu è fin’à chì puntu e so pinsate eranu cume monopulizate da stu viaghjatore, mentre ch’ellu avia dighjà à bastanza pinseri impurtanti.
D’altronde, Francescu ùn vedia ch’e troppu ch’ella ci era qualcosa di veramente misteriosu in st’omu firmatu mutu impassibile. U peghju era u so sguardu, attempu fretu, crudelu è perversu. Un sguardu inumanu.
Più caminava, è più Francescu principiava à sentessi malconciu, senza ch’ellu pudessi spiegà perchè. A timperatura paria essessi calata in a vittura da a sola presenza di l’omu chì, ben ch’e firmatu mutu, era dighjà in pusizione di duminazione.
Per tuttu quessu, è per francà u disandiu chì li paria d’essessi impatrunitu di a so anima, Francescu decidì d’inizià a cunversazione, dumandendulli :
« Induve andate ? »
« In Figari. » Rispose u passageru invitatu.
Mentre ch’ellu parlava per a prima volta, Francescu capì subitu ch’e u cuntrastu ùn migliureria mai l’atmusfera pisia di a vitura. A voce di l’omu era attempu linda linda, freta, è monda crudella attempu. Senza ch’ellu fussi capace di spiegàssi perchè, a voce li sembrava inumana quante l’omu accantu à ellu. Puru, malgratu s’accertata, Francescu, carcu di bona vulintà, perseguitò u cuntrastu :
« Figari ? Duv’ellu ci hè l’aeruportu ? »
« Iè. Culà. » Rispose l’altru, sempre cusì fretu.

Incù ste poche parole, a timperatura calò ancu di più in a vittura. Incù a so sola presenza, l’omu misteriosu era spavintosu. Senza chì a so faccia fussi spezialmente brutta, l’omu era d’una guffezza eccezziunale è incumprensibile attempu. Ben ch’e quasi bellu di faccia, era goffu, è Francescu si pentia dighjà d’avèllu pigliatu cun ellu. Puru, sempre bramosu di smurbàssi, Francescu cuntinuò u cuntrastu, dichjarendu :
« L’aeroportu di Figari ? Hè fattu per i signori o per i ricchi. Micca per noi. »
Puru, subitu subitu, Francescu si pentì di a so frasa, pensendu chì forse l’omu era ellu stessu un riccu o un « signore », tale ch’ellu l’avia evucatu. À stu mumentu precisu, li parì ch’ellu l’avia fattu à posta ghjustu per frasturnàllu di più, è ormai, si dumandava cumu facia l’omu per mettellu cusì malconciu senza dì nunda, o quasi.

Tandu l’altru iniziò un surrisu. Un surrisu falsu è gattivu, chì quasi s’averia pussutu chjamà un mal’surrisu. Era cume un surrisu di trionfu, un surrisu di ghjattu prontu à chjappà un topu. Un surrisu cusì aghjacciente chì Francescu, per a prima volta di a so vita, accendì a scalderia di a so vittura in pienu mesu di settembre. Infine, l’omu dichjarò, ironicu :
« Ùn vi piacenu micca i signori ? »
Pò, senza mancu lascià u tempu à Francescu di risponde qualcusella, sughjunghjì :
« Ùn avete mai pinsatu à una soluzione sicura è sempiterna per sbarazzàvvi una volta per u sempre di i signori è di tutte e ghjente chì vi dispiacenu ? Seria interessante, pensu. »

Una pruposta tale, detta d’una manera cusì calma è cusì seria, cutrò u sangue di Francescu più ch’ellu era dighjà. Quell’omu, ch’ellu ùn cuniscia mancu, li parlava di a manera a più seria chì fussi di l’eventualità di tumbà ghjente. Francescu ùn ci vulia crede. Più ch’e prima si pentia d’avè pigliatu cun ellu in a so vittura stu passageru cusì terrificante, chì parlava allunghendu sempre a lettera « s », tale un sarpu.
Ma u sunniacciu ùn era compiu per Francescu, mentre chì l’omu, sughjunghjì :
« S’e a vulete, s’e vulete organizà un operazione per eliminà à qualchissia chì vi spiace, tutti i ricchi chì piglianu l’avione in Figari, o quale ch’e vulete, sapete ch’e sò prontu è chì seria un piacè supranu per mè d’assicurà l’operazione d’eliminzione. Ma di sicuru, ci serà un prezzu à pagà per voi stessu. »

Francescu, più spavintatu ch’e mai, pigliò infine cuscenza di manera certa ch’e l’omu accantu à ellu, ch’ellu fussi scemu o micca, era periculosu. Ormai, a so sola presenza, moltu più ch’e e so parole, bastava à turmintàllu. Puru, ellu firmava sempre decisu à ùn palisà i so sintimi. Per quessa, vulendu parè naturale, dumandò :
« Cosa fate in a vita vostra ? S’e a mi vulete dì, di sicuru. »
L’omu, accentò u so surrisu, più maleficu ch’e mai, è rispose :
« Sò Lernazg. Sò U Purtatore di Luce. »
Francescu, chì fin’à tantu ùn avia cusì praticatu a Bibbia, ùn capì subitu l’allusione, ma dighjà a cunversazione li paria d’esse duvintata tonta, fracica, senza più nisun sensu. U so spiritu era persu persu, incapace di riflette, è ùn aspettava nunda di più ch’e a fine di u sunniacciu, quale ch’e fussi sta fine. Fù à stu mumentu ch’e u dettu Lernazg li dumandò :
« È voi allora ? Induve andate ? »
In circustanze nurmale, Francescu ùn averia mai rispostu à sta dumanda indiscreta, è ancu di più s’ella venia d’un strangeru ch’ellu ùn cuniscia manc’appena. Puru, u so spiritu era quasi vintu da a sola presenza malefica di Lernazg, è rispose quantunque, cun debbulezza :
« Rivoltu in Nivrasi. »
Subitu Francescu rincrescì d’avè rispostu, d’avè parlatu, à qualchissia tale. Ùn riescia micca à capì perchè a so vulintà li paria ormai annientata. A so risposta era stata ancu più periculosa ch’e Lernazg subitu dumandò :
« Nivrasi ? Interessante. SSSSSSS. Ùn site parente incù Ghjacumu Ferletti ? »

Sta questione fù per Francescu cume un colpu di piola ! Era assai impenseritu di vede ch’e stu furesteru pudessi cunosce u so tintu cugnatu, ch’ellu avia passatu settimane à circà in vanu. Ghjacumu. U fratellu di a so moglia, chì si ne era fughjitu dopu à avè tombu à Pulsametti chì avia furzatu a so surella. A so surella, Fiurina chì era dunque a moglia di Francescu !
A corcia è dolce Fiurina, dighjà sfracelata in mente da a so aggressione, era ormai addisperata da a sparizione di u so fratellu. Tuttu « l’affare » era accadutu cusì in furia ch’e Francescu ùn avia avutu u tempu di riagisce per aiutà u so cugnatu, smaritu senza dì nunda.
U solu fattu ch’e stu furesteru li parlessi quasi spuntaneamente di Ghjacumu era per ellu a prova ch’ellu sapessi qualcosa. Ancu di più ch’e di « l’affare », si ne era ch’e pocu parlatu in a stampa.

Fù à stu mumentu cruciale per Francescu chì Lernazg pruponì :
« S’e vo vulete, vi possu mandà à ellu, s’e u circate sempre. Sò induve ellu hè postu chì si trova à l’agrondu in i mio lochi. SSSSSSS. »

Francescu ùn ne pudia più. Più mortu ch’e vivu, li paria d’esse duvintatu una mosca imprighjunata in a tela d’un ragnu. Ben ch’e u furesteru ùn ebbi prununciatu ch’e poche parole, Francescu era interruritu cume ùn l’era mai statu in a so vita. U colpu di grazia era statu per ellu di mintuvà u so cugnatu smaritu. Ma invece di fà rinasce in ellu a sperenza per Ghjacumu, Francescu ùn avia più per unicu laziu ch’e di fughje s’ellu a pudia sempre.

U so soffiu era duvintatu cortu, i so ochji li brusgiavanu, è li sembrava ch’e a so vulintà era duvintata sottumessa à quella di Lernazg. Inoltre, li era venutu un tremulu incontrollevule chì, affettendu i so gesti, rendia a so cundutta periculosa. Mentre chì a paura l’impediscia di riflette di manera curretta, Lernazg era firmatu meteru, sempre surridente, incù un sguardu tarribile di sarpu o di cruccudillu.
Prontu à pienghje, senza più nisun cuntrollu, Francescu devì fà un sforzu strasurdinariu chì li strappò quasi a mente, per prununcià qualche corcie parole :
« S’e vo vulete… s’e vo vulete… s’e vo vulete… vi facciu rigalu di a vittura. Ma… ma per pietà… per pietà, lasciatemmi sorte… lasciatemmi liberàmmi… per pietà… »
D’una manera quasi impercettibile, u surrisu di Lernazg si svanì, rimpiazzatu da una spressione di riflessione chì durò una decina di seconde, senza fine per u corciu Francescu. Pò, u so surrisu rivenì stessu, è Lernazg rispose :
« Ssa vittura ùn mi cunvene. Ùn mi curresponde micca. Ùn s’assumiglia à una vittura di lussu tale ch’elle sò quelle ch’o pigliu sempre. Ma puru, per un unica volta, a vostra dumanda serà accittata. Mi ne facciu l’altu favore. »
È senza mancu lascià à Francescu u tempu di risponde qualcosa, Lernazg ordinò :
« Piantate a vittura. Subitu. Quì. »

Subitu dettu, troppu felice di pudè ubbidisce à st’ordine chì u salvava, Francescu piantò a vittura in pienu mezu à a strada, senza mancu impenseriscessi di u periculu, subitu escì di a so vittura, mentre chì Lernazg s’impatrunia di e cumande, è fà smarrà a vittura, chì prestu smarì.


Firmatu solu, Francescu ùn pensava mancu à u fattu ch’ellu venia di rigalà a so vittura à un strangeru. Ne mancu ch’ellu pensava à u fattu ch’ellu era, tra Ponte Novu è Ponte Leccia, senza nunda, è senza sapè cumu avia da fà per raghjunghje Nivrasi. Solu l’impurtava u fattu ch’ellu avia riescitu à fughje. Solu què.
Pusatu in bor’di strada, u so sullevu l’annegava di felicità. Li paria d’avè salvatu a so vita.

Puru, dopu à qualche minute di beatitudine, Francescu si rimisse à riflette di manera più attiva, è quasi si rimprovava a so paura. Certe, l’omu puzzava u malefiziu è a perversità d’una manera ch’e Francescu ùn averia mai credutu pussibile, ma almenu à nome di u so cugnatu, averia devutu pruvà à capì s’ellu sapia veramente qualcosa.


Tandu Francescu decidì di fà tuttu cio ch’ellu puderia per ritruvà à Lernazg – ellu avia dettu ch’ellu andava in Figari, era dunque quallà ch’ellu devia circà – per sapè, per pruvà di ritruvà à Ghjacumu.


Ma per quessa, avia bisognu, à u più prestu, d’un veiculu.