Aghju da apre stu filu cù una puesia di circustanza (era ora di mettela, chì s'avvicina u scrutinu !). Ci n'hè per tuttu u mondu, ma cù certi era di sicuru più faciule :
L’elezzione di u Prisidente di a Republica francese – maghju 2012
Di tutti sti candidati
Chì n’avaremu da fà
Cercanu tutti li mezi
Per avè a magiurità
Noi ùn li vutemu micca
È i lascemu parlà.
O s'ellu c'era una amenda
Per ogni bucia cappiata
Pensu chì più d’una volta
Falaria ma cutrata !
Tutta la candidatura
Ne saria sbaiuccata.
Prima vogliu ammintà
L’arichjutu di l’Elisea
Cinqu’anni ch’ellu s’arrizza
Sempre cù una nov’edea
Pè zappà nu u bangatu
Hè di novu candidatu.
À stà à sente à Sarkossu
Hà già salvatu u mondu
Ancu à pedi nu u fossu
Ùn si vole vede in fondu
U ci prisenta quadratu
L’affare quand’ellu hè tondu !
C’eranu candidatelli
Diputati è ministri
Giravanu intornu à elli
Butinisti è Vilpinisti
Anu righjuntu u primu
Senza troppu ch’ellu insisti.
Ma lascemu po’ issa ghjente
Lampemu un sguardu à manca
Hollande ghjè seguitatu
Da una truppa bella stanca
Quellu pè ghjunghje à u tronu
Quant’hè ch’ellu pesa l’anca !
S’o vuteraghju per ellu
Cù pecure, capre è mucche
Mi misurgu è dubiteghju
S’aghju da rinfurzà e truppe
Forse ci zapparà menu
Ma ci zapparà quantunque.
Dopu ci hè ssu Mélanchon
Arrabiatu cum’è un cane
Vole spuglià i ricconi
Ma ùn sò s’ellu l’hà da fane
E prumesse, dopu elettu
Parenu sempre luntane…
Nu u chjosu socialistu
Ci hà apartu una callaghja
Sortanu e pecurelle
Ogni volta ch’ellu abbaghja
Ma riturneranu prestu
Videndu u latte ch’ùn caghja.
Ci sarà quellu impiegatu
Licenziatu da l’usina
Chì n’andarà cum’è sempre
À fassi un frullu à Marina
Suguitavanu u babbu
Suguitanu a figliulina.
Pare ch’ella appii manghjatu
E forche in aziminu
Hà frustatu li so scarpi
Sempre in listessu camminu
Vole caccià u strangeru
Chì zappa lu so giardinu !
Ùn parlaraghju d’Artaud
È nemmancu di Poutou
Chì piglianu à capu inghjò
È Dupont-Aignan dinù
Ma mi tocca à dì qualcosa
Di quellu François Bayrou.
Cinqu’anni fà mi paria
Un omu più chè fundatu
Quist’annu, cumu si face ?
Pare più chè disinnatu
L’astra volta era u terzu
Ma oghje sarà falatu !
C’hè lu partitu di l’erba
Chì face candidatura
Ma la so ghjente hè macerba
- Fruttu verde ùn hè maturu ! -
Per viaghjà in bissicletta
Và listessu nu u muru.
U più stranu sarà forse
’Ssu scemu di Sciaminatu
Fà chì pè pudè cuncorre
Pè u carminu hè passatu ?
Quand’ellu era nantu u tettu
Pensu chì u sole hà pichjatu.
Si vede subitu subitu
Ch’ellu hè liatu à a funa
Face appena cum’è tutti
Prumittenduci a luna
Ma sarà ancu più pazzu
Chì ci prumette ancu Marzu !
Di parlà s’elli anu l’asgiu
A cosa hè più chè chjara
Ùn hè micca à u più chì face
Hè à u più chì dichjara
Ma quella di i « sondages »
Quandu fala nun si para.
Parlanu di carne Hallal
Di permessi di cunduce
In pettu à u « chômage »
Hè quant’à spillà e puce
Facenu cum’è a farfalla
Chì gira intornu à a luce.
Girate u primu giru
Belle techje di duttrine
Ma sappiatevi cunnosce
O siate più maligne
A farfalla ch’hà giratu
Spessu si brusgia à a fine !
SIDUSSINCU
Accueil 
