Rocchi Ghjuvanteramu

DITEMI

O Mà chì vulia ditti,
Troppu spessu stemu zitti,
Tù in un scornu è eu in quill'altru
Quantu ci manca lu passu
Di quellu chì ghjè quallà
Per azzicacci la pena
Sò ci parlessimu à pena
Tantu sò a verità
Ma sì muta o Mà,
Ma sì muta.
M'anu insignatu di ditu:
"Hè figliolu di banditu !"
Toccu quant'è mi sò intesu
Po cù lu mio pugnu tesu
Lu nostru populu offesu
Babbu sempre l'hà difesu
Quale di voi ùn la sà.

U lindumane à bon'ora
Tempu simu intrat'in scola
Nant'à lu nostru tavulone
Foscu più chè una prigione
Una manu di zitellu
C'avia postu un acellu biancu,
È scrittu: libertà !
Ma sì muta o Mà,
Ma sì muta.
Sai, avà, dettu lu corsu
Ci mettimu à parlà corsu
Emu tutti à u curughjolu
Un nome di macchjaghjolu.
Eiu, hai induvinatu
Portu lu nome di Babbu
Ch'elli c'anu incarceratu
Ch'elli c'anu incarceratu,
Ma sì muta o Mà,
Ma sì muta.
T'arricord'issa matina
I nostri sogni in pulvina
Ellu solu, elli sei
Manittatu mani è pedi
Po lu si, l'anu purtatu
Ghjustu s'ellu c'hà basgiatu
Quant'ellu era curagiosu
Babbu caru u to sposu,
Ma sì muta o Mà,
Ma sì muta.

Da u mio più prufondu sognu
Ogni ghjornu cresce un frombu
Ghjè quellu d'un aviò
Chì partendu à le prigiò
Mi sbranguleghja lu capu,
Mi trapaneghja lu core
Mi discetu è vecu à Babbu,
Incatinatu è prontu à more
È tù chì ùn vole parlà
Dimmi ch'ellu hà da vultà !
Dimmi ch'ellu hà da vultà !
Dite ch'ellu hà da vultà !

I RUSIGNOLI


Nant’à un arburu in la machja ma chì ci serà ?
Ci sò dui rusignoli ch’ùn facenu chè cantà.

Unu dice pianu pianu ma chì dicerà ?
Dice oghje hè lu veranu ci vulemu marità.

L’altru dice pianu pianu ma chì dicerà ?
Dice ci feremu un nidu quì nimu ùn lu truverà.

È in quellu nidu di piume chì ci nascerà ?
Nasceranu l’acellucci l’ampareremu à cantà.

Nant’à un arburu in la machja ma chì ci serà ?
Ci sò dece rusignoli
Ci sò centu rusignoli

Centu mille rusignoli ch’ùn facenu chè cantà
Rusignoli machjaghjoli cantanu la libertà.




Duie puesie messe in musica da u gruppu Tavagna nantu à u so primu discu Chjamu esciutu in lu 1981.


FIUME

Tragonfiu di tempurali
U fiume oghje si hà paratu
E torte cun li matrali
È corre scatinatu
Quandu ellu era prigiuneru
Corciu à chì l’hà ghjestimatu.

Ali sparte sopra à l’onda
Un chjerchju di lume in giru
L’accumpagna una culomba
Porta una svetta d’alivu
Quandu ellu sbuccherà in mare
Turnerà calmu lu riu.

S’alzerà una alba nova
È lu fiume spurgulatu
Cun la libertà ritrova
Cunterà lu so viaghju
À mille culombe bianche
À l’alivu multiplicatu.

ZITELLUCCI


A campagna avà si hè cuperta
Di u mantellu neru di a notte
U ventu fisca u serinatu
À e stelle le so innamurate.

A luna ùn si hè ancu affaccata
Si ghjoca in lu monte culà
È lu pinu incalfendu a so cappa
Conta chì si anu da marità.

A noce hè ghjelosa di l’acelli
Stende e bracce è prova à gulà
A surgente l’annacqua i so pedi
Di u so cantu a face vultà.

A campagna, e stelle è u ventu
A luna è u monte dinù
Ammoglianu tutte le notte
I sogni chè tù faci tù.

Ripigliu :
Dormi, dormi
U mio piulellu
Dormi, dormi
U mio tesoru.

Sò trent’anni


Ere una giuvanotta ed eiu un zitellucciu
Ogni tantu dicie : Alò fammi un basgiucciu
È ti basgiava o mà, forte forte cun brama
Cumu solu a sà fà un figliolu à a mamma
Ch’o mi n’andessi à corre pè u grataghju à pena
A fà mangani appesu à a nostra catena
Ti sentia pichjà di mani da u lettu
Venia à ditti : O mà chì ci hè ?
Tù cun affettu facie una carezza à e mo chjome bionde
Cumu sapè chì conte eranu e to stonde
Cumu sapè chì stava à curatti à e porte
Dopu affanni è dulori a manu di a morte
Ere una giuvanotta ed eiu un zitellucciu
ogni tantu dicie : Alò fammi un basgiucciu !
Babbu ùn ci era, era fora à pressu à l’animali
U purtellu era apertu è da i fiuminali
Un pichju di tintenna latina cullava
Una zia era ghjunta, allibrava, accunciava
Prupunia acqua dolce, sciroppi, tisane
Tù guardave u sole è e creste luntane...
In un sussuru mi dissi : in piazza à a scola
T’aspetta a to surella, ùn la ti lascià sola
Fala à truvalla, quì, zia si derà capu
Cullerete sta sera à tempu à u vostru babbu.
Era ghjugnu era festa eramu e Penticosti
Sò trent’anni dumane
Voli ch’o m’accosti ?
Ere una giuvanotta ed eiu un zitellucciu
Ogni tantu dicie : Alò fammi un basgiucciu !


Aghju ritrovu e parulle chì mi mancavanu stendu à sente à Antone Ciosi (dischettu Nostalgia)

MANGANIOLU

Manganiolu, Manganiolu, fammi vede u Niolu
Fammi vede una muvrella
Fammi vede a più bella, fammi vede a più bella

Quandu ùn ci hè scola toccu l'aprile
Falu à ghjucammi sola in curtile
Sò mamma è babbu à travaglià
Chjosa in curtile, chjosa in curtile, mettu à sunnià
Cola l'argentu da a funtana
Mammona in piazza fila a lana
Manganiolu collami tù
In Calasima, in Calasima è da Cintu insù

Manganiolu, Manganiolu, fammi vede u Niolu
Fammi vede una muvrella
Fammi vede a più bella, fammi vede a più bella

Golu sculiscia à petre tonde
E pesce leste saltanu in l'onde
Manganiolu collami tù
In Calasima, in Calasima è da Cintu insù
Pè a furesta corre u ventu
Ciuffi di pini ne move centu
Manganiolu collami tù
In Calasima, in Calasima è da Cintu insù

Manganiolu, Manganiolu, fammi vede u Niolu
Fammi vede una muvrella
Fammi vede a più bella, fammi vede a più bella