Pulitica strangera?

Sumenta a écrit:

à ringrazià vi per e vostre spiegazione!

 
Indè! di tant'in tantu cù Petra Alta o Sumenta ghjunghjimu à spiecàci quantunque!
Ò s'o pudia pagà l'Estate ch'ellu vi cacci 'ssu pilone !

Quandu vegu stu sughjettu, mi dicu chì e verità di tandu ùn sò più quelle d'oghje...

Isulanu a écrit:

Quandu vegu stu sughjettu, mi dicu chì e verità di tandu ùn sò più quelle d'oghje...

a credi?

"l'affari" ci sò sempre - più cà mai - ma voli sicuramente parlà di l'interessu di i Corsi pè l'elezzione francese? Vinarà sicuramente da tutti st'affari ghjustappuntu.

Ùn si parla micca tantu di campagna o di prugrammi, ma s'agisce di truvà u candidatu ch'appii menu cazzarole cà l'altri à strascinà... Simu affullati... ùn ci hè più un palmu di nettu.

Ind'issu mentre Marina cresce in li sundagi, è quessa malgradu e soie e cazzarole.

''Ùn ci hè più un palmu di nettu'' : In pulitica, ùn si po micca parlà d'affare ''nette''

s'asgiscerà  solu  di parlà  d'affari  "netti"  o  di   sapè  se  u  nostru  votu  hà  da  esse solu  quellu  di  citadini  francesi  o  quellu  di  corsi  (naziunali ?)   ...?  
rubrica  rimessa  in  anda  tutti i  5 anni   ,  prussimu  appuntamentu  in  2022  ....  

Circione a écrit:

Isulanu a écrit:

Quandu vegu stu sughjettu, mi dicu chì e verità di tandu ùn sò più quelle d'oghje...

a  credi?

"l'affari" ci sò sempre -  più  cà  mai  - ma voli sicuramente parlà  di  l'interessu di i Corsi pè l'elezzione francese? Vinarà sicuramente da  tutti  st'affari ghjustappuntu.

Ùn si parla micca tantu di campagna o  di prugrammi, ma s'agisce di truvà u  candidatu ch'appii menu cazzarole cà l'altri à strascinà...  Simu affullati...  ùn  ci hè  più un palmu di nettu.

Ind'issu mentre Marina cresce in li sundagi, è  quessa malgradu e soie  e cazzarole.

Iè l'interessu di i Corsi per st'elezzione è ciò ch'elli ne aspettavanu sò cambiati in 5 anni, è a mo visione di stu votu hè cambiata anch'ella.

Sicura ch'ùn hè micca pulitica strangera, è chì u risultatu ci hà da tuccà, quelli chì dicenu u cuntrariu sò sempre i listessi 5 anni dopu. Ma oghje sò cunvintu ch'ùn ci vole à tene vivu un sistema ch'omu ùn ricunnosce.

Parlu à u livellu di a Corsica, sò independentistu, è postu ch'o ricusu l'oppression francese, ùn li deraghju più legittimità (a visione marxista di u fronte era forse a bona). Ma parlu dinù à un livellu globale : puru s'o era statu francese ùn averia vutatu à st'elezzione. Nanzu, era sempre à pregà u menu peghju pussibule, quandu bramava un mudellu cumplettamente sferente. Francamente, hè megliu à lascialla trafalà sta sucetà, ùn seraghju più eiu à tenela ritta. Sò sempre i listessi chì sceglienu è anu tutti i mezi per cuntinuà. Ùn li deraghju più, vutendu, a pussibilità di dì ch'è no simu in una demucrazia. Ùn aghju bisognu di nimu per sceglie à a mo piazza, nè à u livellu francese nè à u livellu corsu.
Nè diu nè maestru dicianu quelli.

Pensu anch'eiu cum'è  tè...
Ma s'ellu  ci hè un sicondu giru Marina / X  – è  bardendu a lista di i  candidati ufficiali  ùn vecu micca tantu cumu  a ci pudariamu francà    –  vutaraghju.


Ma à  forza d'andà  à  vutà  à rinculera tantu à  u  livellu naziunale cà  lucale, aghju da finisce anch'eiu cum'è  tè:

vi mettu quì ciò ch'aghju spartutu annant'à u nostru muru FB.

Citation :

Cari amichi, di regula annantu à stu muru di pulitica ùn si ne parla ma leghju quì è culà ch'è vo site parechji à ùn vulè vutà à u sicondu giru. Rispettu a libertà d'ognunu di vutà induv'ella li pare o ancu di ùn vutà micca. Ùn contu micca di davvi cunsigne di votu – chì ùn mi sentu micca l'anima di un gurù. Ma vistu tuttu ciò chì si leghje quì mi permettu di sparte cun voi stu picculu panorama – forse un pocu caricaturale – di parechji cumpurtamenti usservati annant'à u microcosimu "corsofacebookianu " dipoi dumenica sera.
M'arvecu chì astensiunisti di u sicondu giru ci n'hà da esse in tutte e manere:
Avete i "Corsica is not France" chì cunsidareghjanu chì st'elezzione ùn ci cuncerna micca. Avariamu uttinutu l'indipindenza senza ch'ella ùn la mi dicessi nimu??? Siamu unesti è rialisti, simu francesi inde i fatti, ch'ella ci cunvenghi o micca. U prisidente elettu dicidarà incù u so guvernu di a vita ch'emu da avè pè i 5 anni à vene. Ùn ci cuncerna micca? A ghjustizia? L'educazione? L'ecunumia? U suciale? L'Auropa? ecc. ùn ci cuncernanu micca??? Allora cari "Corsica is not France" postu ch'è vo campate in un mondu imaginariu, riflittite bè, è postu ch'e ci simu per rende più rialistu u vostru sonniu, unipochi cumminciate puru à parlà è à scrive in corsu. Ùn bastarà micca per fà di u nostru paese a nazione ch'è no bramemu ma omancu ci darà l'impressione di ùn campà più in cuntinente...
Almenu ch'è vo siate cuscenti di campà inde u dinecu è, in fondu, ch'ella ùn sia cà una pusitura quella di u "Corsica is not France", quant'è ch'è vo vi voglite rassirinà, via, una spezia di mettudu Coué.
Avete dinù i "Pasquale Paoli", cunsidareghjanu anch'elli chì "Corsica is not France", ma basta à andà annant'à i so muri per capisce chì ancu s'elli parlanu di vutà à Pasquale Paoli, u soiu u naziunalisimu s'assumiglia in tuttu à quellu di Marine. Ci vularia à cuntà i voti uttinuti da Pasquale Paoli à u sicondu giru per essene sicuri ma pensu chì parechji "Paulisti" vultaranu casacca ghjunti daretu à a tindina è lamparanu u so votu à u FN.
Ci avete dinù i "gauchos". Quelli sò à fondu contr'à Marina ma dinù à fondu contr'à Macron. Mettenu annant'à un pede d'ugualità finanza è fascisimu, quant'è ch'elle sianu duie minacce simule. Soca sò stati allusingati dinù elli da u discorsu pupulistu di Marine è pensanu ch'ella hè di manca???
Po' ci avete tutti l'indicisi. Ùn volenu micca ch'ella passi Marina, ma temanu chì u so votu sia capitu cum'è un votu à favore di Macron invece saria solu un votu contr'à Le Pen. Di regula anu digià vutatu à Chirac in 2002 è ùn l'anu micca suppurtata. Li si pare d'esse stati ingannati d'esse castati inde una vera trappula. Allora quist'annu stanu indu l'inforse.
Infine frà l'indicisi ci avete "l'uttimisti". Per elli l'affare hè digià fattu. Macron passarà di sicuru à u sicondu giru ancu senza u so votu. Tantu megliu, perchè ùn cuntavanu micca di vutà à Macron. Ramintatevi quantunque un pruverbiu chì dice: " À chì s'assicurò nè persi nè guadagnò".
Eiu dicu solu un affare, ùn vi vogliu micca scunvince, ognunu vutarà – o micca – in anima, ma nanzu riflittite quantunque à què:
S'ella pare acquista capunanzu a vittoria di Macron à u livellu naziunale, in Corsica i risultati di u primu giru ci ponu fà teme una vittoria di Le Pen in li dui dipartamenti. Ùn vutà micca saria piglià u risicu di vede torna a Corsica in Bleu Marine annant'à e carte di i risultati di u sicondu giru. À mè mi basta per sapè ciò ch'aghju da fà u 7 di maghju.

Torna Vignale cum’è tù a dici è una volta dinù, certi anu da vutà, micca per u candidatu chì porta u più i so valori ma per fà ostaculu à MLP.
Aghju amichi cumunisti chì in u 2002 anu vutatu à Chirac ma chì avà pensanu chì fendu cusì si tradisce e so idee è chjamanu à l’astensione.
Ma u ghjocu di l’astensione puderia esse periculosu è à prò di MLP.
Anderaghju à vutà, più pensendu à u mo caccaru* è à tutti i resistenti, cunnisciuti o micca, omi è donne chì anu fattu u sacrifiziu di a so vita, chè per paura di u marosulu bleu marine.
Aghju scrittu un ghjornu « puru vestitu à fiori l’odiu ferma odiu » è MLP chì canta nantu à Snapchat una canzona di Dalida ferma quella chì s’hè fatta fotograffià cu i neunazisti in Liò.
Pensu chì a ghjente ùn sò micca cuscenti di u periculu ch’ella po esse ‘ssa donna o allora campanu in u mondu di i Bisounours o sò stradati da tutte e tuntie ch’ellu si leghje nantu à FB.
E mi dumandu dinù cumu si po esse (pratende ) omu naziunalistu è vutà à MLP ?

*Lurenzu si chjamava u mo babbone.Un ghjornu hà pigliatu u fucile è hà tiratu nantu à un aviò alemanu.Quellu hà cappiatu un obu , l’amicu di babbone fubbe scapatu è ellu gravamente feritu in pettu.
Più tardi, à chì ghjunghjia in casa, li mustrava a so ferita.
N'aghju sempre intesu parlà.

Eccu per a piccula storia.
In a grande Storia.
A so storia à ellu, a meia, ch’hà fattu ch’o sò nata è sò ingrandata quì.
Libara.

A sò anch’eo ciò ch’aghju da fà u 7 (sperendu chì a Corsica ùn marcherà micca u sette cum’è per u primu giru)  per ùn discitammi l’8 di maghju (chì bellu ghjornu !) incu a pena in capu.

un aghju micca à ripete qui cio chi no scrivimu di poi qualchi ghjornu nant'à FB (o maria un hai che da andàcci ... heu ghjust'appena ..) . solu chi sin'à avà un aghju mai votatu à un elezzione di u presidente di a republica francese e sta volta agh'à fà eccezzione (a sapite un so che i sumeri ch'un cambianu d'avisu ) : micca ch'o voglia salvà a francia di u fascisimu (s'ella s'ha da salvà a ferà senza me) ma i risultati di a dumenica scorsa m'hanu datu a vergogna pè a corsica , per a fiura chi no demu à l'altri ma dinò per quella chi no ci demu à noi stessi . mi ne impippu di Macron , un aspettu nunda d'ellu moltu più ch'un ci hà prumessu nunda , ghjustu chì s'he mostratu apertu nanat'à parechji suggetti e un mi pare micca avè posizioni dottrinarie (ma dopu toccherà à noi varghi cum'ella varghi à creà un raportu di forze favorevule) d'altronde u suggettu un he mancu quessu : cum'he pussibule di mette nant'à u listessu pianu un candidatu chi à u peghju mantenerà u status quo di pettu à una chi no qualificheremu di fascista (per facilità e perchì ci vorebbe un analisi assai piu longa) ancu se à m'avisu simu danvant'à un muvimentu d'un antra natura , chì s'oppone à a nostra lingua , à tutt'evoluzione istituziunale e megliu vole rivene 40 anni in dietru supprimendu a cullettività territuriale .. passeraghju nant'à u babbu quandu u guerciu ci prumettia a pena di morte e i battaglioni di paracaduttisti . allora se une poche d'anime perse di u naziunalisimu ghjunghjenu à ghjustificà un votu per sta personna u meo ch'un hè che unu l'anderà contra .

SERRA a écrit:

un  aghju  micca à  ripete  qui cio  chi no  scrivimu  di poi  qualchi ghjornu  nant'à  FB   (o  maria  un hai che  da  andàcci ... heu  ghjust'appena ..)  

Guarda chì Lulù ci  hè  andatu  è  s'hè  scurdatu di noi
avà  ùn  scrive più cà  custì è sfranciseghja  ancu!

SERRA a écrit:

o  maria  un hai che  da  andàcci ... heu  ghjust'appena ..   

Sò digià spartuta trà Isula foru è Isulana blogspot...