U ghjacubinisimu

Postu chì l'emu evucatu à prupositu di Mélenchon...



À u principiu di ghjugnu di u 1789, una sucietà unisce parechji deputati di u Tiers Etat sottu à l’appellazione « club breton ». Quandu sta sucietà s’installa in u cunventu di i Ghjacubini scambia di nome per diventà u « club des Jacobins ». Si prisenta cum'è un centru induve si elaboreghjanu idee à prò di a Patria, induve si pripara una revoluzione pulitica destinata à assicurà à tutti a libertà è l’ugualità. In u 1790, i ghjacubini cuntinueghjanu u so sviluppu fendu parechje sucietà populare in pruvincia, creanu una vera reta. Si volenu à l’ascolta di u populu, pronti à dà vita à e so rivendicazione. Hè ciò chì face a so forza in st’epica tumultuosa induve ogni partitu prova à fà si sente è à piglià (o tene) u putere. U tonu hà da scambià quantunque prestu, sopra à tuttu quandu Robespierre piglia in manu u club durante u mese d’ottobre di u 1792. Cù a son influenza di più in più maiò, cù a manera ch’ellu hà di epurà i ranghi di a so sucietà, a rende più agressiva, vigurosa è ne face una putenza duminante chì direge a so azzione contr’à la Constituante troppu muderata per ellu. Dopu à a fughjita di u rè è a so arrestazione à Varennes dissensione schjattanu trà i soci. Certi si ne vanu laghendu tandu a piazza à i più accaniti (accaniti sin’à cuntribuisce à a morte di Louis XVI). Ùn ci vole à micca à stunà si sì durante u 19esimu è u 20esimu seculu, u ghjacubinisimu hè statu assuciatu in a mente culletiva à a Terreur è a dittatura revoluziunaria. :suspect:

A Revoluzione, u ghjacubinisimu anu avutu cunsequenze chì campemu sempre avà aldilà di u scambiamentu di regime. In u 1789 a Revoluzione hà messu in piazza a Nazione, ma hà tenutu dinù unu di i puntelli di l’Anzianu Regime : u centralisimu, fendu passà e prerugative di u rè à u statu. L’ideulugia ghjacubinista hà circatu à stabilisce una unità pulitica, culturale è linguistica appughjendu si nant’à un putere centrale chì duvia riprisentà tutti i citadini. Hà impostu una lingua cummuna, u francese, spieghendu a so scelta à traversu u principiu d’ugualità, di libertà di muvimentu nant’à u territoriu, i scambii pulitichi, suciali, economichi, culturali, literarii, scentifichi… S’hè oppostu à u regiunalisimu, à l’identità, à a specificità, à a storia individuale videndu in elli un periculu per a Nazione. Ci vole à ripensà à u dibattitu ch’emu vissutu in u 1999 cuncernendu à Cartula europea di e lingue regiunale o minuritarie , à e parolle di Georges Sarre o di Jean Pierre Chevènement chì vidianu in ella una manera di rimette in causa l’idea di populu francese. Oghje avemu à Mélenchon. L’omi scambianu ma u ghjacubinisimu ferma, cunsiderendu sempre a sfarenza, l’identità particulare, a lingua cum'è un'agressione contr’à a Republica …

Elli anu e so upinione.
Tocc'à noi d'intratene u fiatu.

Aghju intesu Mélanchon di ch'ùn hè micca oppostu à i lingui righjunali è chi solu dui à trè articuli di a cartula europea di i lingui righjunali o minuritarii ùn guarantisciani micca l'ugualità di i dritti di quiddi chi travaddani.
Sapendu ch'eiu possu essa capitu è campà in casa meia, incu i me vicini è a u me travaddu parlendu a me lingua, essa capitu quandu scrivu qui (à spergu), à vi possu di, a me primura hè n'altrò.