Notini Ghjannettu "U Sampetracciu"

Chì ghjè? Una franchizia stampata in ricordu di U Sampetracciu?

chì ai? ùn ci ghjugni micca à leghje?
aiò!
eiu ci ghjugnu zenza spichjetti



tè o vichjò :

Cusì sì!

Machja corsa

Machja corsa, impampanita
Cù lu to verde mantellu
Pichjulatu à mille fiori
Carchi di mille sentori,
Chì danu ghjubiliu è vita
À la bestiola, à l’acellu…
Machja corsa, tanti muschi
Tanti fiori
È culori
Dimmi : Duve l’hai buschi ?

I buscu in senu à sta terra
Impastata di lu sangue
Sguttatu in più d’una guerra
È vindetta. Oghje mi langue
Di misurà l’abandonu
Chì nun merita perdonu.
A ! sò bella, di sicuru
Cu sti fiori
È st’odori…
Pueta, cantami puru !

Si, ogn’annu rifiuriscu
Per mandà muschi luntanu ;
Si cusì ringiuvaniscu
Mostru, à lu passante stranu
In sta terra chì dà suchju
Ad albitru, scopa è muchju
Ch’ell’hè terra solu avvezza
Incu fiori
È culori
A miseria ed a bellezza.

Ghjanettu Nottini
San’ Petru u 13 d’ottobre 1958

Machja corsa

Machja corsa inveranita
Carc’à mazzuli muscanti
Conta, conta o preferita
Ch’eiu possa ripete in canti
Sai chì, cum’è u mare è u ventu
Capiscu lu to lamentu

È la machja tutta in fiore
Cun alitu prufumatu
Trà la gioia è lu dulore
Cum’un dolce sirinatu
À stu core chì mi trema
Mi cunfidò stu puema

Veni quì pueta caru
Frà ste più belle rambelle
Mì, un lettu di murze paru
À st’albitru in campanelle
Posa. Tè ! T’ adumbreraghju
Cù stu muchju rusulaghju

Aghju datu mille assami
D'ape in cerca cù sussuru
Tutti i dolci zuccherami
Di lu mio suchju più puru
Dicendu à se mosche d'oru
Distillate u mio decoru

Tante vette aghju intricciatu
Per mille coppie d’acelli,
È i so nidi aghju curatu
Per gode d’i so sturnelli
Cun tè chì mi teni cara
Voli ch’eiu mi mostri avara

Sta mane mi sò sbighjata
Carca à perle è diamanti:
Mi ne dedi tanti è tanti
L'ultima piuvicinata;
È lu sole per tributu
I m'incese cù salutu.

E ghjunt' una pasturella
È c'una voce d'argentu
A so scopa muscatella
Hà signuzzatu un lamentu:
U so caru,à u strangeru
A s'hà lasciata in disperu.

Tandu a scopa prufumata
Per ùn sente più su pientu
Cù l'aiuta di u ventu,
A so neve hà scuzzulata
Carchendune li capelli
È i peducci scalzi è belli

Sò ghjunte duie pernice
Caccianendu da l’amore
Dicendu i nostri nemici
A volpe è u cacciadore
Ci danu riposu infidu
Facci, o machja, u nostru nidu

Tandu su tangu cerbunu
Carcu à stelle di zaffranu
Hà inscripitu lu so prunu
Per difende sin'à in pianu
Un agrottu à i 'nnamurati
Cù i so ovi pichjulati

Ma dinò, o chì sfurtuna
In tristu preparativu
Hè ghjuntu à u chjaru di luna
Un esseracciu nucivu
Cù la micidiaghja fiara
Per brusgiammi à rughja para

https://www.youtube.com/watch?v=TAHGGEU0oD0