Amore fele amaru mele
Dà ch’ellu era per strada un la saperià dì.
U fattu si stà, chi parechji ghjorni si sò pisati dapoi u primu ghjornu.
Mancu più averià pussutu dì s’ellu rigritava, chi arricurdà un si n’arricurdava più dì u perchè.
Di cioch’ellu era sicuru, era di l’odiu.
Si ralligrava, ogni stonda, di l’amarezza di u fele in bocca, cumpagnu fidu sempre à fiancu à ellu dipoi u principiu.
Di cioch’ellu era sicuru era di a stizza.
Gudia ogni stonda di u gustu acidosu di u rimbeccu, niellu fratellu chi purtava i so passi, più indà.
L’albore si pisava strascinendu u so chjarore falliccicu, vistura pallida di un antru ghjornu ghjustu nattu è digià in lu passatu, albina prumessa d’una lattosa angoscia ch’ellu purtava l’omu à murseca pele incù a certezza fosca dì ciochi fù, è ch’un sera maì piu.
L’albore si pisava straziendu a mente di l’omu incù a velata memoria di ‘ssi dolci ricordi di i sofficci sogni à l’arrizzà imbalsamati dà u muscu canterinu dì a sò pele chì u fraiavanu, canacci maschile chì ùn lu capiavanu più.
L’albore si pisava schiariendu di neru ciochi nè fù di a vita di l’omu aghjacaratu quì in l’odiusi mumenti à vene , oghje à u tallozzu , ochji belli aparti annantù à i prugetti calcicati di una vita ch’ellu avia sperata spartuta è ch’ellu purtava à piccollu dà solu in lu sole primaticciu chi trigava ad’alzzassi.
U lume si fece, schiariendu di vita a cucina.
In quattru passi avia francatu a sebbia.
Un catornu liatu in fondu à u giardinu, lampò dui abbaghji per devuzione.
A visse.
Po i dui masci.
U babbu intri l’ultimu.
Sintia u sisu puzzinosu di a felicità sorge dà tutt’a casa.
I cani li strapavanu i cerbelli pezzi à pezzi,
Funu tutt’è quatru stupiti di vedelu entre in la pezza.
Cume di solitu, scanò prima a donna.
I cani s’erannu assirinati.
Minchjudargentu
Accueil 
