ISULA
Vous souhaitez réagir à ce message ? Créez un compte en quelques clics ou connectez-vous pour continuer.


Lingua è cultura corsa
 
AccueilAccueil  Dernières imagesDernières images  RechercherRechercher  S'enregistrerS'enregistrer  ConnexionConnexion  
-24%
Le deal à ne pas rater :
PC Portable Gaming 15.6″ Medion Erazer Deputy P40 (FHD 144Hz, RTX ...
759.99 € 999.99 €
Voir le deal

 

 Tocca à tè di rendemi felice - O'Malley

Aller en bas 
AuteurMessage
Sumenta

Sumenta


Messages : 2052
Date d'inscription : 25/02/2012

Tocca à tè di rendemi felice - O'Malley Empty
MessageSujet: Tocca à tè di rendemi felice - O'Malley   Tocca à tè di rendemi felice - O'Malley EmptyMer 5 Sep - 15:15

TOCCA À TÈ DI RENDEMI FELICE


(Si sentenu i brioni di un omu è una donna , colpi, vetru sciappatu…Po altri mughji)

« HOO ! Hà da finisce stu carnavale ! Ma ùn vi ne pudiate stà in Parigi piuttostu chè di vene à rompemi i cuglioni quì, basta, dumane dumandu à u merre di cacciavvi da st'alloghju ch'è vo ùn pacate mancu, à calci in culu. Quessa a conna dinù, si face pistà di colpi è stà cù stu briacone, stu curcione ! Chì tonta persa ! "



Una donna, l’ochji imbuffati, spettinata, stracciata, prova à piattassi cum’ella pò daretu à un muru di petre secche

Tonta ? Iè, seraghju tonta, hà a ragiò « Mattu » !
Ha ! ha ! Ùn la sà mancu ch’elli u chjamanu cusì in paese.

Ma ch’e sia tonta, po hà a ragiò : perchè stò cù un omu chì mi strughje à pocu à pocu ?

Uh mamma chì fretu, ùn aghju da tene tutta a nuttata cusì !

Ma induve aghju da andà ? Sò tutte chjose e case è i pochi paisani chì ci hè ùn mi ponu vede à mè…Ùn li aghju fattu nunda, ma vengu da fora, ùn sò stata allivata quì. A casata corsa, n’anu poca primura, ùn sò di quì per elli, è basta. Guasi ci vulerebbe à mustralli a mo carta d’identità da ch’elli cridessinu ch’è sò bè « Corsa ». Un ghjornu l’aghju da fà : in piazza, aghju da sorte a carta d’identità è ubligalli à leghje u mo nome è i nomi di i mo genitori : 100 % corsi, simu…è dipoi generazione, certi quì chì si pratendenu più Corsi chè l’altri ùn ponu dì listessa!

Andà ind’è Ghjaseppu è Maria ? Ah nò, serianu troppu cuntenti di dimmi ch’elli m’avianu privinutu contru à u so figliolu…

Sè un ghjornu avessi pensatu chì si pudia udià i soi cusì, u figliolu chì odia i genitori, i genitori chì odianu u figliolu!! Furtunata ch’è sò d’esse stata orfana da chjuca ! Eiu pensava chì era a disgrazia tamanta di a mo vita, ma nò... ci hè peghju.

Almenu i mei i sunnieghju dolci, affizziunati, cum’è nantu à u so ritrattu di matrimoniu : sò cusì belli è innamurati…Invece chì per Ellu u sunniacciu l’hà sempre davanti à l’ochji, ùn serà liberatu chè quand’elli si ne seranu « andati »…Chì scumpientu.

Hum…Forse eranu pessimi ancu i mei? Vai à sapè!

Nò, nò, a sò in u mo core, i mei serianu stati veri parenti. Iè, parenti cumu si deve. Ahè, sò i boni chì partenu i primi, gattiva erba ùn ne more, ch’elli dicenu i paisani…

Oh ma chì ci facciu quì eiu, in un paese desertu, induve ùn ferma chè scemi, vechji è malati? Hè què u mo « Gran’Ritornu » (in un paese ch’ùn aghju mai cunnisciutu !), u mo « rifugiu » ? In veru, aghju trovu l’infernu cridendu di ghjunghje in paradisu…

(Si sente chjamà da una voce chì a face trimà, si sente chì l’omu hè briacu à tappu)

Uffa, crede po ch’aghju da rientrà in casa à fammi piglià torna à calci è pugni ? Sunnieghja forse di furzammi cum’è l’altra volta dopu à a concia ?

Penserà chì sò un’essare umanu o una ghjacara ? Un ghjornu m’hà da tumbà, dicia a verità Maria, a so mamma, ancu s’è li ne aghju vulsutu tandu. Ci vole chè salvi u mo coghju…Ci vole à fughje, à u più prestu. Iè, ma induve ? Induve, Cristu ?

(Pienghje, signuzzeghja)

U peghju di tuttu, u peghju, o povar’à mè, chì tonta, hè chì u tengu caru, u vogliu bè ‘ssu omu, ci sò i ghjorni ch’ellu hè cusì supplicante, ch’ellu pare cusì debbule, pare un zitellu, pare ! Quand’ellu mi guarda cù i so ochji di cane persu, i so ochji villutu, mi sentu persa, è attempu mi sentu un'anima di salvatrice, u vuleria salvà contru à ellu stessu.

Ma perchè, perchè chì tamantu amore si perse cum’è l’acqua in a rena ?

Eppo hè un artistu, un veru, un gran’ artistu ! Venerà u ghjornu, ne sò sicura, ch’ellu serà un pittore cunnisciutu è ricunnisciutu dapertuttu! Un pocu di pazienza. Ma ùn ne hà, ellu, pazienza. (Hè un pocu intennerita parlendu cusì)

È ancu i so puemi, i trovu magnifichi, ùn possu resiste à i so puemi. Hè cusì ch’ellu m’hà avutu, d’altronde…(Ride, ma d’una povara risa nerbosa, scema).

È pè u lettu, quessa sì ! Hè un diu ! Era a prima volta ch’è truvava tantu piacè, ùn era mai statu cusì forte cù l’altri. Serà a salvatichezza chì ci hè in ellu, ti face esce da tè stessu, ti face cappià tuttu…

Infatti, què era à u principiu. Quantu hà duratu u « focu », a nostra « luna di mele »… ? Un annu ? Dui à u più, quand’ellu ùn pensava ch’era soia, quandu li ci vulia sempre à cunquistammi … E storie d’amore ùn duverianu mai durà più di dui o trè anni... Dopu tuttu si guasta à pocu à pocu. Guasi sempre.

S’ellu ùn bivissi, seria un tippettu ! A sò, hè difficule per ellu d’ùn riesce à fà ciò ch’ellu vole, si sente di più in più male d’ùn stantà u so pane, di dipende di u mo travagliu. Chì vergogna per un omu…pensanu cusì a ghjente. Eiu mi n ‘infuttu ma a ghjente…ùn ci lascianu mai in pace. Ùn sà fà chè u so arte, ùn sà fà altru nunda, hè u veru artistu ! Ùn la capiscenu?


U peghju hè chì mi sentu culpevule, sò sempre eiu… Nò, nò, devu guardà e cose da un antru angulu, cum’ella dicia a psiculoga di u dispensariu.

Mi ne vole sempre di qualcosa, facciu tuttu in traversu. Ch’averaghju fattu cum’è sbagli, unu apressu à l’altru, cumu ne seraghju ghjunta à stu puntu ? M’avia dettu a so anziana cumpagna : « ci vulia à parte à u primu schiaffu, senza aspettà. » Anch’ella ci hà messu u tempu è hà finitu à l’uspitale !

« Tocca à tè di rendemi felice ! », mi dice sempre.

Hè vera, perchè, ma perchè ùn aghju riiscitu à rendelu felice, eiu chì li aghju datu tuttu ? Serà piuttostu quessu u sbagliu ? Dà tuttu, è ùn esiste più?

« Mi devi rende felice » ! Mi rende felice à mè? ? Quessa a questione ùn hè mai stata posta. Manch’eiu, a baulla, ci aghju mai pensatu…Ellu hè u Centru, ùn ci hè chè u so « Arte » è u so malessere chì contanu, eiu sò quì per ellu, ma eiu, EIU, esistu o nò ?

Forse, forse ch’ùn hà nisun talentu ed hè per quessa ch’ellu s’annega in l’alcollu, per quessa chì nimu u vole « ricunnosce ». Forse ch’ellu hè un artista di siconda, di terza zona, è ch’in fondu di ellu stessu a sà bè.

Anch’eiu sò una "looser" è dipoi u principiu, sì. Dui loosers inseme è a più ridicula sò eiu. L’orfana è u mal’amatu, dui zoppi, dui strampalati…Bellu paghju! Ùn pudia dà altru chè stu fiascu tragicu.


UUUUh ma sò ghjilata,eiu, mi n'aghju da more quì. M’anu da truvà morta è cuperta di cotru dumaitina. Seranu cuntenti in più, tutti st’abruttiti…

Induve l’aghju messa ‘ssa boatta d’allumette ? Milla… È e sigarette ? Uffa, una, mi ne ferma una, una sola !

A sigaretta di a cundannata (surride).

L’ultima…(Pare di avè un’idea chì a face ride torna di quella risa tonta. Fuma a so sigaretta. Mette à ride un’antra volta…)

Ha ha , sta notte, aghju da fà a « pulizia », vai puru, hà da esse l’infernu in veru ! Tutti i matti, i gattivi, i « Pilati », i malati è i briaconi chì pupuleghjanu stu paese anu da esse usciati cum’è porchi, anu da crepà : aghju da rende un serviziu di quelli à l’Umanità, a vera. Sò mesi è mesi ch’ùn hè piossu, ci vole pocu per fà piccià tutta sta machja à l’intornu. Quand’elli durmeranu bè, techji di serie di televisiò o di filmi pornò, tè !! Ùn averanu mancu u tempu di riagisce. L’aghju da zingà à i quattru punti cardinali, seranu intrappulati in un chjerchju di focu…


E s’è brusgiu anch’eiu ?


Civa !




O'Malley
Revenir en haut Aller en bas
 
Tocca à tè di rendemi felice - O'Malley
Revenir en haut 
Page 1 sur 1
 Sujets similaires
-
» Felice Travaglini
» Sò u rè - Petru Felice Cuneo-Orlanducci
» L'alchimistu-Petru Felice Cuneo-Orlanducci

Permission de ce forum:Vous ne pouvez pas répondre aux sujets dans ce forum
ISULA :: Quandu l'inchjostru sumena :: Bloghi è fori literarii :: The Old Pievan Chronicle-
Sauter vers: