Croce Patriziu

A CASA

A casa fù nova
À luce di sole altu
À metteci u caldu
Un ragiu a si prova

A casa fù quella
Di rise zitelline
È sporte di susine
A casa fù bella

A casa cantava
Per ogni so purtellu
battia un curicellu
A casa l'annannava

A casa fecia
Bullianu pignatte
È sicreti à l'appiattu
A casa dicia

A casa hè impressa si
di tutte e vistiche
È stampe mai antiche
A casa hè sempre quì

In Bastia 02/10/2010 (d'appressu à una fottò di petra Alta)

Sò l'arburi tamanti
Chì ti creonu o cara
Cum'è bracci d'amanti
Chì strinsenu a terra

Chì strinsenu l'amore
Per ùn vedelu persu
È lapidi di sudore
Creonu l'universu

Cusì nacque lu mondu
U prima è u segondu
Duve hè a nostra vita

Ma sì l'amore ùn ci hè
Ùn firmerà di tè
Più manc'una vistica

Cantu di l’onda

Eo sò lu mio battime
Angosce umane appuzzate
Zeppe zeppe lacrimate
Longu à i seculi sempre muti

Eo sò lu mio battime
Senza fine crepacore
Inciacc’amore è chjocca l’ore
Longu à i seculi sempre muti

Eo sò lu mio batime
Chì ne sbuccia la timpesta
È chì chjocca senza fine
Cum’è luce chì ci veste
À la notte malincunia
A gloria di l’Ave Maria

L'erba croscia di bazza luccicheghja
Più in là un vapore à strisce di bambace
Face un lettu à chì sunnieghja
E lu pratu s'empie di dulcezz'è di pace

Chì cuntrastu ! à u paese suttanu
duve la pace ùn hè chè lu « bon'dì »
È a salute u traspeghjime umanu
duve principia ciò ch'hà da finì

Ùn taglieraghju u filu chì mi fece
ma sciuglieraghju u tessutu di pece
Ed ogni tantu m'arremberaghju à tè

Fustu tamantu di l' arburone
per ùn pensà o pensà canzone
È tiranne cusì un immensu piacè

PORTE D'INFERNU

Sumenaci tù
Nantu a petra di a miseria
Pè fà l'ultima cugliera
Eu ùn possu più.
Annacquaci tù
Nant'à stu campu di guerra
Ciò chì ferma a nostra terra
Eu ùn possu più.
Viaghjaci tù
Duve hè passatu lu focu
Ciò chì ferma u nostru locu
Eu ùn possu più.
Strignilu tù
Stu pezzacciu di carbone
Chì ghjè l'ultima canzone
Di la mio giuventù.
Eu ùn possu chè
D'una sorte maladetta
Fà ne l'ultima vindetta
Fermerai tù.
Fermerai tù
À cuntà u mio passatu
Cum'è una sfiacculata
Di mai più,
Di mai più,
Di mai più.

À Lisa Maria ( a mo figliola)

Vogliu arrembammi à li nuli
Azzingammi à lu sole
Tesse una funa di fole
À l’eterni mari muti

Apparrechjà la barcella
Chì ci vucherà felice
Cù le sirene à l’orice
Di la cuntrata più bella

Duve hè l’ultimu tesoru
Chì ne vale più cà l’oru
È ch’omu trova cusì

Per offre à le ciucciarelle
Di le centumila stelle
Chì spampillulonu quì

Duve vanu l'acelli (cù una musica di Eric Gineste)

Duve vanu l'acelli
Quandu fughje l'estate
à cogliesi una vita
in le nove cuntrate
o more in silenziu
per ogni ora campata ?

Averanu li guai
à lasciassi daretu
u sole, i belli frutti
è tutti i so sicreti
l'amori è li piacè
per tracorre u fretu ?

M'hà dettu un acellu
ch'al di là di u mare
ci hè un locu à l'appiattu
duve l'onda è la terra
s'uniscenu d'amore
nu e sciume di sale

si ritrovanu inseme
l'amanti è li so detti
torna è facenu i passi
è tutti li so prugetti
è si stanu à l'agrottu
di cori stretti stretti

ùn sentenu più fretu
ne angoscia è spaventu
è s'elli cantanu inseme
per scunghjurà lu ventu
un core à mille voci
s'addorna di talentu

duve vanu l'acelli
di corta giuventù
quandu vene l'inguernu
chì li dice di tù
soca à chjamà ne altri
elli ùn voltanu più
05.10.10

À tè a Corsica Regina

À tè a Corsica Regina
À ella tù
È u pocu di sta rima
À ciò chì fù

À tè lu ventu chì scuzzula
L’alburoni intimuriti
Spazzendu in terra la pula
Di li to passi smariti

À tè l’abbracciu di sta terra
À i purtelli di a notte
Quandu si tace ogni guerra
È s’aprenu le centu porte

E centu porte di l’avvene
I centu mesi di u ritornu
Ciò chì fughje è ch’omu tene
Cù a sperenza chì un ghjornu

À noi d’ùn lacà travvià
È d’ùn pienghje à mille voci
U tempu hè fiume ùn ci vol’à fà
Ch’elle s’ingòrghinu le foci

P. Croce / M. Pesce

U partigianu

Trà li mughji è li silenzii
Pienti zeppi assuffucati
Si hè pisata la voce
Di li populi nigati
Liberendu la nazione
Feremu a rivoluzione

Cù li chjuchi l’inghjuliati
Operai è paisani
Chì si frustanu la vita
È chì campanu poch’anni

Contr’a Francia imperialista
Manu di li spluttadori
Contr’à i Corsi impanzati
Sempre vili è traditori

Per la terra di u cumunu
D’i nostri antichi lasciata
Ch’è no avemu scumpartuta
Eppò oghje abbandunata

Per la Libertà di l’Omu
Cù li populi fratelli
Contr’à u capitale ingordu
Chì li porta à u macellu

Per li vechji è pè li zitelli
Da la so lingua ligati
Pè li Corsi omi degni
Chì sò stati imprigiunati
Per la Corsica nazione
Feremu a rivoluzione

P. Croce / Trad. Ucrania

In lu novu campà

Scrive nant'à l'ale di u tempu
E parolle sumente
Di u novu campà

Scrive nant'à l'acque ridente
U sfocu senza pientu
Di u novu campà

Scrive nant'à e facce di sole
E parolle dulente
Di u novu campà

Scrive nant'à i passi di fole
U ballu senza fine
Di u novu campà

Scrive ùn ci serà più penna
Nè più fogli per scrive
Atti da cundannà

Mai à sumena sumena
'No sentimu per vive
A voce di ognunu
In lu novu campà

CULOMBU


Partianu e grande nave
À vugà sopr'à lu mare
Luntanu,
Era u seculu di l'oru
Per secula seculoru
Cristianu.

In lu portu si cantava
È lu ventu scuzzulava
Le fune,
Era gioia è allegria
In u vinu chì curria
À fiume.

S'imbuffavanu le vele
Fatte di e forte tele
Di l'avvene,
Dendu brama à li zitelli
Di li paesi nuvelli
Da vene.

Tunavanu li cannoni
Da sopr'à li muraglioni
È lu molu,
In la vechja citadella
Signuzzava ogni zitella
In dolu.

È le donne e più avvezze
Si spartianu carezze
È danari,
Contr'à un sognu di speranza
In l'ochji di a partanza
Di i marinari.
À li maghji di mezana
À lu ventu è à la sulana
E bandere,
Chjucchittavanu cuccagna
Per a regina di Spagna
A più fiera.

È li grandi li signori
Sempre avvezzi à l'onori
Di lu mondu,
Fighjendu l'avventura
D'un Calvese di furtuna
Culombu.

Furesteru di lu mare
Senza tituli nè terre
L'esiliatu,
Lascendu l'isula bella
In l'ochji di Lisabella
Innamuratu.

Chì ricurderà la Storia
S'ell'ùn hè fiume di gloria
Passatu,
M'arricordu una regina
Chì in un castellu pienghjia
U so innamuratu.

Guerrieri

Centumila guerrieri anu francatu la bocca
Tutti vestuti di lume cun trumbett'è cun tamburi
Facenu trimà la terra chì seranu l'auguri ?
Centumila guerrieri anu francatu la bocca.

Fissanu un puntu luntanu, a vittoria chì s'avvicina
U nemicu soffrerà sterperanu u so locu
Pè dì qual'hè u maestru, diceranu cù u focu
Fissanu un puntu luntanu, a vittoria chì s'avvicina.

Ma daretu à l'armata l'ultimu hà passu stancu
Carcu à sudori è sangue trascina la so miseria
Luntanu dananzu à ellu ci hè a musica guerriera
Ma daretu à l'armata l'ultimu hà passu stancu.

Lu so cantu hè di silenziu è la so parolla hè muta
Pensa à ciò chì ùn hè più per ùn sente ogni sassu
Di stu caminu di croce chì ormai hè lu so chjassu
Lu so cantu hè di silenziu è la so paroll'hè muta.

Ma sintite la mio voce, sintite la mio canzona
Per l'ultima umanità è per l'ultimu suldatu
Li so guai lu so sangue, u so passu trascinatu
Hè per ellu, ellu solu ch'eu cantu sta canzona.

Ma sintite la mio voce, sintite la mio canzona
Per l'ultim'umanità è per l'ultimu suldatu
Li so guai lu so sangue, u so passu trascinatu
Hè per ellu, ellu solu ch'eu cantu sta canzona.

Piccula marina

L'onda s'allonga è si chjina.
Ùn si sente un rimore
In sta piccula marina
È tuttu piglia valore.

Ogni parolla risona
In lu calmu è lu serenu.
Pè fà l'ultima canzona
U mio versu serà lenu.

Cù lu so pinnellu a luna
Allatta ogni muraglia
Di strisce bianche l'affuna
Ùn ci serà mai più battaglia.

A timpesta hè pruibita,
È cum'è a mezu à u desertu
Ci hè un nidicale di vita
Chjosu à lu ventu incertu.

Lacatemi una notte
U calmu di la turchina
Tenite chjose le porte
In sta piccula marina.

À Dede

Manca à li mo ghjorni quandu chjamava à tè
Un cunsigliu, una risa, un'idea da sparte
Cum'hè tristu lu fornu duve u pane ùn ci hè
Ch'ellu hè spentu è mutu è chì a ghjente parte

Manca à li mo detti i detti di i toi
Chì ancu senza sapè an'annacquatu i mei
Ghjente eppo ghjente ch'ùn funu micca eroi
Ma trasmissenu à noi è ci fecenu eredi

Manca à i mo fatti u to fidu sustegnu
D'assicurà i passi è d'ùn avè peura
Sò pochi avà Dede quelli di u to legnu
Allevati à l'onore è zuccati à a luna

Manca à i mo canti appena di Balagna
Duve s'apre a porta à tutt'ora à la cima
Paese di virtù, d'alivi è di cuccagna
Duve fecimu inseme e cullane di rime

Manca à la mo sera, à u celu stellatu
I sogni per l'avvene è u currente longu
À voce pien'è forte pè fà l'impruvisata
È tante discursate da impastà u mondu

Manca a to zerga, i to spaventi è vezzi
E to scelte dinù ch'anu bellu fruttatu
A memoria mi torna ancu pur' pezzi à pezzi
Per chè tù manchi menu da ciò ch'ai lasciatu

In Rusiu stu 24 d'aostu 2012

ci si corre u celu


Ci si corre u celu
À dapre i purtelli
È u sole s'infrugna
À ragi di zitelli

Farfalle canterine
Silenzii zuccherini
È u mele ci scola
In le rise divine

Ci si balla u ventu
Ogni cosa s'ammenta
Ci si basgia l'eternu
S'ellu hè cortu u tempu

È i visi di gioia
Induv'ellu si gode
Anu poca primura
Impiastranu u sole

Sò fureste è terranii
I muschi di sti panni
Chì ascivanu di notte
Ùn ci hè nunda di vanu

È l'amore si face
Cum'una guerr'è pace
À l'intimu mumentu
Duve u mondu tace



26 03 11

Vurria esse un scivavà

Vurria esse un scivavà
Pettinatu allisciatu
Sempre pront’à priminà
Vurria esse un scivavà

Vurria esse un scivavà
Barcà a strad’accumbracciatu
Avè cumpagn’à lu mo latu
È una cullan’à luccicà

Vurria esse un scivavà
Di ceppu nobil’è anticu
Ma inde stu mondu a vi dicu
Chì batte sol’hà da strazià

Vurria esse un scivavà
Techju di dolc’è di salitu
U techj’ùn crede u famitu
È u famitu hà da crepà

Vurria esse un scivavà
More nant’un lettu di pienti
Dop’avè suttu lu mo tempu
Cum’è tutti li scivavà

RITURNELLU

Ma nùn sò micca un scivavà
Sò un canacciu di rapina
chì pesa l’anc’à le vitrine
È prim’à morde ch’abbaghjà

Patriziu in Bastia di novembre 2006

sì la neve vene pianu
ùn la senteremu vene
à chjinassi nant'à u pianu
ad amattà ci le pene
cum'è i capelli d'argentu
contanu l'anni è u tempu

ci dicerà le passioni
l'allusinghi di la vita
cum'è le dolci canzoni
ogni carezza smarita
ci piglierà per la manu
si la neve vene pianu

ci ferà bellu lu chjassu
tuttu quellu ch'hà da vene
quant'ellu fù ogni passu
le so gioie è le so pene
è vultendu i nostri sguardi
diceremu « hè bellu tardi »

ci deremu di rimenu
senz'allungà ne lu passu
cù lu core sempre pienu
lettu piuma lettu sassu
di l'amore di l'umanu
sì la neve vene pianu

Meraviglia


Ai l’ochji pien di stelle
È un celu à ricuccà
Un core sempre zitellu
Nant’à e mani pront’à dà

Ai la mente ribella
Eppo l’anim’appaciata
Ai l’anima zitella
È lu pient’assirinatu

Ai l’attu bellu è gravu
Di u saviu chì perdona
S’è t’ùn eri avà sì bravu
È offri la to canzona

Ai l’ochji spampillenti
Di u ciucciu chì ùn pò sapè
Boccarisa è cuntentu
Ciò chì li vene da tè

Riturnellu :

In sta notte meraviglia
Sott’a volta stelleria
Duve canti ancu tù
Quand’ellu nasce Gesù

Di settembre 2007

l'anghjuli


L’anghjuli per e campagne
Anu mossu lu so cantu
È l’eccu di e muntagne
Torna è dice lu vantu
Gloria…

Pastori pè qual’hè ssa festa
Per quale sò ssi canti
Qual’hè chì sta ser’in testa
Move un'armata santa
Gloria…

Dicenu ch’un ciucciu hè natu
Quessu hè u salvatore
È noi altr’inghjinuchjati
Cantemu per u s’amore
Gloria…

Circheremu lu paese
Duv’hè natu miserosu
Fend’omagiu à l’offesu
Di a voce è di u core
Gloria

Pastor’i vostri caselli
fiurite è fat’unione
L’armunia di u celu
Sia in le vostre canzone
Gloria…

A pera giallogna appes'à u peru
U ficu scrittu chì dice di sì
U chjarasgellu carcu à pendini
U castagnone di vechja maestà
U ghjicciu di sottuculu pè dì ti u veru
A talla ch'indetta mì mì !
Mì a ghjandaghja ch'ùn vole stà
Si porta la ghjanda è la to zitellina

Canzunetta

T’avia fattu una canzona
Chjara cum’è l’alba chjara
Cù trè fiori di lu mio core
Pè palisà lu me amore

Ùn ci eranu tante parolle
Nè discorsi infiarati
Solu u basgiucciu fiuritu
Di u veranu nascitoghju

La ti vulia cantà
Sopra l’onde di lu ventu
Aduprendu lu so versu
Chì cunvene pè le fate

Ma lu to core era altrò
È tempu nat' a mo canzona
Quand’u ventu s’hè calatu
Si n’hè morta à le mio labbre

1978

L’amanti

Eranu dui nantu la muntagna
In la luce di u veranu
Cum’è u focu chì nasce è s’accresce
In lu core di l’umanu

Ditemi chì tempu ellu era
È la gioia di lu so esse
Eranu forti cum’è la muntagna
Dolci cum’è tennerezza

L’ochji di u mare

L’ochji di u mare sò cum’è li to ochji
À mezu ci hè una vela bianca chì sfrisgia l’orizonte

L’ochji di u mare sò cum’è li to ochji
Tante lacrime marosuli m’anu d’annigà

Cartulina

Bellu à l'asgiu mi ne stò
À la riva assulanata
Addombra la mi'arrembata
Solu una palma in bisbò

Un acellu lenta un tiò
U mare battieghja appena
Un omu nant'à la rena
Porta una scimia à zò zò

Si sente una ghitarrata
Ch'ella ci porta l'ambata
Tuttu hè chietu ed eo sò

Più tardi feremu cena
Quandu la sera sumena
A pace di u lagò

In Bastia 24/06/1992

SÒ GHJUNTU

Sò ghjuntu à l'abbughjata
Quandu a suppa scaldava à u focu
Di l'accolta perpetuata
Di l'omi nati in lu so locu.
Sò ghjuntu à u fà di u ghjornu
Quand'è vo durmiate sempre
A luce bianca vugava intornu
À la casa è à lu focu.
Sò ghjuntu la borsa in manu
Piena di povere cose da dà
Legna d'auturnu frutti di veranu
È tante vechje canzone di e stagione chì vanu.
Aghju pichjatu una volta
Sola m'avete rispotu
U pane dipoi sott'à la volta
Di lu fornu canta la nostra accolta.