Nobili Dédé

« Ùn pienghjite davant’à sta petra ghjalata, chì ùn ci sò micca , ùn ci sò più. Sò frà e millaie dei venti chì soffianu in celu. Sò inde sta luce si vaghjime chì veste a Falcunaghja. Sò inde a forza di u vostru amore. Sò a stella di una notte d’estate chì luce per voi tutti. » (Dédé Nobili)

U CELU DI BALAGNA



Vecu u Monte Grossu da e stelle fiuritu
Da Zilia à Felicetu cù l'estru muntagnolu
Un acellu di notte chì d'amore si lagna
Tandu mi vene in core u celu di Balagna,
Tandu mi vene in core u celu di Balagna.

L'Isula a turchina face chjam'è rispondi
Cù Santa Riparata chì fideghje à Munticellu
L'estru di mio lochi mi fraie di cuccagna
Tandu mi vene in core u celu di Balagna,
Tandu mi vene in core u celu di Balagna.

Da a valle di Toru u verde di l'alivi
Mi stuzzeca a mente è Muru stà in pughjale
Sentu cantà a rota di millaie di fragni
Tandu mi vene in core u celu di Balagna,
Tandu mi vene in core u celu di Balagna.

U pinzu di a Vela pare muru di petra
Fruntiera naturale trà Nesce è Spuncatu
Vecu pagliaghje bianche cum'è mure di Spagna
Tandu mi vene in core u celu di Balagna,
Tandu mi vene in core u celu di Balagna.

U timpanu latinu d'una schilla luntana
Brusgia a mio memoria d'un'aria vagabonda
E capine chjinate mi sò palazzu giallu
Tandu mi vene in core u celu di Balagna,
Tandu mi vene in core u celu di Balagna.

Reginu maestosu di rabbia si ne scappa
Di Lozari vicinu cerca l'ochju barcale
E mio loche sicrete sò di piaghje è muntagne
Tandu mi vene in core u celu di Balagna,
Tandu mi vene in core u celu di Balagna.

Franchendu u ventu

Silenzii pisii site di l'andà ghjorni
A porta chjosa è u casale spentu
Voi chì nantu à u troppu erate tutti intornu
Sintinelle d'eternu purtate da u ventu.

Guerrieri muti d'una porta scrignata
Purtelli sbattuti à u soffiu di l'età
À u tufone immensu di u tettu falatu
Cuntate e stelle perse à u celu immensità.

Aghje scurdate chjerchji d'ogni bundanza
Cavestre vechje site ghjunte à strappà
Per firmà sole è spachje in l'eterne partenze
Di quelli andati un ghjornu per ùn mai più vultà.

Silenzii angusciosi site di i cuntorni
U ventu frà e fronde, e petre, u caracutu
È à l'ora maladetta di l'estate ritornu
Purtate dinò l'estru di un tempu scadutu.

Silenzii muchjeti site di a dulcezza
L'ochji di u m'amore pè 'sse petre cataste
Erate tetti stalle o stanze di carezze
Dà percepì di l'omi l'abbracci o li cuntrasti.

Maladetta fiumara cusì pricipitosa
T'ai paratu ghjente, paesi, vuluntà
Ma ferma solu è ciattu in un locu ghjelosu
Un mazzulu di zerga in brama di sbuccià.

LE CHEMIN DES DAMES

Vecu un pratu sott’à u sole
È tanti panni tesi nantu
Un acellu piglia u so volu
È aghju u mio core frantu

Culà l’ochji spenti Miola sunnieghja
Culà u mio estru corre è a fideghja
Culà ci s’hè firmata a mio vita

Vecu un pagliaghju fumichendu
Compulu à l’ora di a munta
È a mio mimoria s’accende
Per un pizzacciu di pane untu

Culà Francesc’Antone zappa l’ortu
Culà vecu ballà e barche in portu
Culà ci s’hè firmata a mio vita

Vecu una scola è un tavulone
Sentu mughjà mille zitelli
È di babbò tante canzone
Mi danu u fretu à a pelle

Culà Fasgianu trascina duie legne
Culà sentu u mio paese pienghje
Culà ci s’hè firmata a mio vita

Vecu una ghjesgia sott’à l’inguernu
Dui tizzoni è un casgile
A piaghja cutrata è inferma
Chì aspetta u mese d’aprile

Culà sentu u ventu frà i pini
Culà di Roccu sentu u viulinu
Culà ci s’hè firmata a mio vita

Vecu un chjarasgione fiuritu
È sentu fiscà i pastori
È tanti mumenti felici
L’aghju inchjudati in lu mio core

Culà vecu a neve per i chjassi
Culà sempre voltanu i mio passi
Culà ci s’hè firmata a mio vita.

LOTTE

Hè u listessu sole chì luce in le to lotte
Chì assesta i nostri ghjorni schjarisce e nostre notte
Hè a listessa tarra chì s'appicca à e nostr'ore
È pare culor mare quand'ellu piove in core.

È ghjunghje a sicurezza chì ti dice arrabbiata
Cascaranu e furterezze da noi lampate.

Hè un paese di centu fole natu
Da u tempu è l'offese arrittu è tribbulatu
Hè u to populu chì fideghja l'avvene
Canta cù mille voce l'inghjulia chì u mena.

È ghjunghje a sicurezza chì ti dice arrabbiata
Cascaranu e furterezze da noi lampate.

Hè a to Nazione chì stringhje ogni distenza
Chì di rabbia cumpone per ogni indipendenza
Hè a nostra vita un cimentu cumunu
Cù a manera ardita di mille fatti unu.

È ghjunghje a sicurezza chì ti dice arrabbiata
Cascaranu e furterezze da noi lampate.

Sò e nostre ghitare à varcà tante sponde
À purtà per a terra u cantu di stu mondu
Hè u nostru versu cumpostu di canzone
Chì mughja à l'universu a Corsica Nazione.

È ghjunghje a sicurezza chì ti dice arrabbiata
Cascaranu e furterezze da noi lampate.

A ballata di Mattea

Ùn lu vidarei più u capu à a Falcunaghja
I culombi chì d'aprile volanu sempre per paghju.

Ùn farei più sunate à u sole di e murnaghje
Nè puru ti sintaremu impruvisà nantu à l'aghja.

D'ottobre in campu furnellu quandu sarà l'astagione
E giuvanotte à cugliera aspittaranu e to canzone.

Piengu di sapè chì di marzu quandi u sole hè più vivu
Ùn sarei più cù noi sottà i rutoni d'alive.

Quandu pensu à li to ochji u mo ciarbellu si move
È piengu li mio suspiri mentre corre l'oliu novu.

Megliu chì ùn ci pensi più chì a mo mimoria scrochja
Morgu pianu di sapè chè t'ai sceltu d'altri ochji.

Oghje dapoi à tanti anni ormai a to strada hè meia
Di scopre tante billezze da e cime di San Parteu.

L'eternu

L'eternu port'à l'eternu, a muca di u tempu
Ma in paese meu, l'eternu u soffia u ventu.

D'eri à oghje a listessa strada,
A strada eterna di u sempre.

U sempre fattu straziatu, testimone sò e teppe
Mure accatastate, orte di un tempu andate
Calcicate da l'umani, cù e so sapienze strane.
E soie eranu linde nimu ùn l'insignava.

Fatte di vita, fatte di morte,
fatte cusì, fatte di sorte
Ma l'arba colla è morenu l'orte.

Ortu quì ci n'hè unu, l'aghju vistu eramu inseme.
Pulitu eppo' zappatu culor di veranu.

Un ortu appruntatu da e nostre mani,
Per i populi e per dumane,
Per dumane !

Donna locu

Sì mea per lu ghjornu di i primi accunsenti
Di l'ochji spalancati à ogni lotta umana
È'ssi paesi vioti battuti da i venti
Mi stringhjenu a vita in un accordu stranu
Ma sì mea.

Sì mea per e stonde ch'ella strida timpesta
È chì a vita tale à un battellu persu
Per circà a so strada di turmentu si veste
Eppò mi mette in core l'oddiu di l'universu
Ma sì mea.

Sì mea per a terra chì trema di passione
Per tutti l'ochji chjosi chì ùn lucenu più
Per e ghitare in festa di e belle canzone
È per u fiore coltu à la to ghjuventù
Ma sì mea.

Sì mea per u stracciu in punta à la mio lotta
Per u punghju ch'eo pesu à tutte le cundanne
Per a voce ribombu chì chjama a cuncolta
È mette in lu mio cantu è millaie di brame
Ma sì mea.

Sì mea per u fiume di rise è di zitelli
Per a cuncolta amata di l'ore le più forte
Per tutti i cumpagni chì ti dicenu bella
È ch'in la nostra casa trovanu u s'agrottu
Ma sì mea.

Sì mea per a notte chì veste lu rughjone
D'un populu feritu mucatu in lu so fiore
L'omi sacrificati à l'altare passione
Sò in le nostre mente cum'è fiaccule d'oru
Ma sò nostri.

I CARACUTI ROSSI*

Ti vogliu dì a lingua chì ci fece paese
L'arati chì sulconu e piazzate à l'insù
È l'aghje muntagnole à i sciappali appesi
Tistimone di vita di un tempiu chì fù

Ti vogliu dì a neve nantu à u sarrale
I caracuti rossi colti per u bambinu
U zitellu ch'è era a scola induve andava
È l'alba spurgulata di punta à la marina

Ti vogliu dì e case accinte di virdura
I ghjargaloni in festa sottu à u nivaghjone
L'aria di a muntagna chì fala fresca è pura
È ci mette u core à cantà e canzone

Ti vogliu dì i nostri paisani è pastori
Chì fecenu e case induve oghje no stemu
Omi di un antru tempu ch' avianu l'onore
D'accoglie u disgraziatu senza lampà ghjasteme

È vogliu ch'è tù sappia à chì ùn si vole rende
È ingrandà d'amore à mezu à noi tutti
Ch'ùn ci hè paese chjucu à chì vole pratende
Coglie à i tempi novi i sò più belli frutti

Ti vogliu dì a neve nantu à u sarrale
I caracuti rossi colti per u bambinu
U zitellu ch'è era a scola induve andava
È l'alba spurgulata di punta à e marine.







*Nantu à u dischettu "Sicondu l'estru" di u gruppu U Celu.