Contru natura - Isabella Bird

Contru natura

(cuncorsu nature writing)


Oghje, l’editore Parigginu m’hà fattu una cummanda « un pocu speziale », una nuvella nant’à u nature writing… I Pariggini sò cusì… li piace a natura. Ma li piace scritta, in i libri, li si pare d’esse spluratori fighjulendu ritratti è quandu unu parte - in veru - ghjè per entre in cumunione cù l’elementi, una spezia di ritirata psiculogica, riflette nantu à u so cuscente, subcuscente, incuscente o chì ne socu… tamanta scruccaria… Ùn s’entre micca in cummunione cù a natura, omu hè o ùn hè micca in cummunione, puntu è basta. Pensu chì li ferma sempre un qualcusella di stu periodu culuniale, un pocu di nustalgia di l’intrusione nantu à i territorii scunnisciuti è vergini ch’elli si ponu impatrunisce, fisicamente ma dinù cum’è s’elli ne eranu i maestri murali, o allora hè Rousseau chì l’hà fatti troppu sunnià.

Avà, tocca à mè di participà à st’ippucrisia, à st’amore falzu, à quellu treep intellò … Eiu odiu a natura, odiu u so odore, a so puzza piuttostu, odiu u so caratteru scemu, bipulariu. Eiu sò a natura, vogliu dì chì corre indè e mo vene, a campu, a cunnoscu è mi possu permette d’udià la quant’ella mi pare. È u possu cuntà, ind’è sta nuvella, u me odiu tamantu ? Ùn pensu ch’ella sia quessa a so cummanda, tandu, è mi ci vole à inventà un’armunia, un amore passiunatu, dì chì mi sentu vive quandu francu e vadine, quandu vò à piscà ghjurnate sane, dì chì di vede l’arburi mi face pienghje, è chì mi svengu quandu i fiori sbuccenu…

Scruccaria dinù quessa, ma scruccaria pagata.

M’avete da dumandà ciò chì mi piace finalmente, postu chì mancu a mo scrittura mi rallegra… Ciò chì mi piace ? Hè l’adsl à mè chì mi piace. Risentu per stu filu un’amore passiunatu, mi porta l’allegria in casa, mi face pienghje è ride, u tengu talmente caru chì quandu sta conna di natura s’inzerga, aghju a paura per ellu, tandu sì chì tremu per a so vita, chì simu liati. U so benistà face u meiu, è nimu, ùn ci serà nimu à dì mi chì ghjè una rilazione contru natura. Per mè, a sola rilazione contru natura chì intratengu è quella chì mi leia indè a servitù à u mo locu, à a mo terra. Sò u schiavu d’induve sò natu è di quale sò. A mo priggione hè naturale ma crudele dinù… Quella cummunione cù a natura hà un prezzu, è u pagu ogni ghjornu.

È d’altronde, postu chì ne parlu, mi n’anderaghju à piscà duie truite, chì eri ùn ci sò andatu. Forse mi daranu qualchì spirazione, ‘sse truite mischine…


Isabella Bird