Aghju lettu ultimamenti in u cutidianu ch'iddu c'era un club di football americanu in Bastia, i Panthers di Bastia.
A dicu sinceri ùn m'intaressa tantu 'ssa disciprina. Subratuttu ch'ùn ci capiscu nudda. Ma ciò chì m'à intarissatu in l'articulu, hè u fattu chì i tinti Panteri ùn la facini micca à scrivasi in i cumpitizioni francesi.
I squatri cuntinintali rifusani di spiazzassi in Corsica, trovani l'affari troppu cumplicatu, li costa troppu, ecc.
Tandu i Bastiacci si devini accuntintà d'una partita contr'à un' altra squatra corsa, in Aiacciu, è privedini di ghjucà un campiunatu uffiziosu cù echippi taliani è... serbi !
Ci vularà à spiicammi parchì i Taliani è i Serbi a poni fà di spiazzassi in Corsica, o à accittà i scontri cù una squatra corsa, quandi i Francesi iddi trovani tutti i scusi pà scantà a stessa squatra.
Pari d'essa vultati à l'anni 50 o 60, quandu l'istanzi di u ballò (u veru) rifusaiani di scriva i club corsi, è chì tutti i cumbriculi pussibuli erani boni par impidì i Corsi di ghjucà i campiunati naziunali.
Ghje' trovu chì ciò chì hà scandalizatu 50 anni fà pà u ballò hè sempri valevuli oghji pà d'altri sport. O 'ssi squatri di Bastia è d'Aiacciu sò in regula è devini ghjucà i cumpitizioni francesi, o ùn sò micca in regula è ùn si ni parla mancu.
Ma ublicalli à ghjucà contr'à squatri d'altri paesi hè com'è di cunsidaralli anch'iddi com'è stranieri. È dopu poni un prublemu cù "l'egualità" è i "valori di a Ripublica".
M'eti da dì, ed hè vera, chì ci n'infuttimu di u ballò americanu, ma hè vera dinò chì l'inegualità faci u so lettu cù una mansa d'affari chì à principiu ci n'infuttimu.
Dunca oghji ùn era micca una cronica, com'è l'aghju prumissu à Isula, ma era quantunca u me colpu di stizza di u ghjornu. Pà apra 'ssa rubrica sport ch'e' vicu biotu - cù addisperu - dapoi u principiu di u bloggu.
Accueil 
