I dui camiò marcati di u segnu di l'O.N.U sò entrati in u paese. Una vintina d'omi si sò varcati, l'arme in manu, un sisu infettu li hè cullatu subitu in capu, mettite i maschi urdunò u generale. U paese era disertu, cum'è abbandunatu. Dapoi l'indipendenza di a Corsica è a guerra civile chì seguitò trà partisgiani di l'ordine murale è cristianu, è partisgiani di un paese laicu, ùn si cuntava più i paesi sviutati per via di tazzeghji. L'O.N.U era stata oblicata à intervene.U paese induv'elli eranu ghjunti era à favore di i laichi. Un stetenu tantu à scopre u sfracellu, l'omi strippati, castrati, impiccati, scapati, tagliati à pezzi, brusgiati vivi. Un bastava più à tumbà u so nemicu, ci vulia à strazià lu nanzu. Ci vulia à fà vede quale era u più gattivu, u più crudele, un suldatu entrì in una casa induve a puzza era più forte, ciò ch'ellu visse u fece rende, quattru giuvanotti eranu stracquati in pianu, l'ochji crepati è cacciati da i so tufoni, rimpiazzati da petre, u minchju tagliatu è sciaccatu li in bocca, pedi è mani sigati, u corpu apartu è e trippe surtite, appiccate à u muru, sguttavanu sempre è facianu gran'festinu per e mosche. U generale s'avvicinò di u suldatu, un zitellone anch'ellu è u leticò, dicendu chì s'ellu ùn suppurtava quessa, ci vulia à riturnà si ne in casa. S'eranu adduniti nant'à a piazza, ci vole à ritruvà e donne cun i zitelli disse u generale, sò elli chì ci anu chjamatu. Avianu fattu una battuta, è l'avianu trovi sottu à u paese, chì si piattavanu, impauritu, traumatizati, e donne eranu state furzate, parechji zitelli dinù, v'avemu da purtà à locu sicuru avia dettu u generale, è l'avianu fatti cullà nant'à u camiò. Un ci era micca sciuffore nant'à u camiò, ma elli ùn si n'eranu avvisti, l'altru camiò cun i militari era digià partutu, quand'elli anu capitu, ùn ebbenu tempu di varcà si, una splusione terribile i purtò à locu sicuru.
Accueil 
