Rosa GIANSILY

A celebra puetessa corsa Rosa GIANSILY hà impruvisatu per voi

Difenditi o Corsu



Già chì oghje sò disposta
E la musa m’accumpagna
Vogliu fà duie canzone
E parlà di la Balagna
Avale si sò decisi
Di strughjeli la muntagna.

Siamu tutti pronti o Corsi
Per salvà la Cursichella
Omi è donne zenza conti
Ch’emu da andà in l’Argentella
Per difende la regione
Di Balagna cusì bella.

Fussi per le giuvanelle
Omi maritati è figli
Nu la nostra terra corsa
Eramu cusì tranquilli
E avà li dirigenti
Mettenu tanti bisbigli.

E li Corsi reuniti
Ne perteremu currendu
Per spiegà ne le ragione
Ancu à lu nostru guvernu
Chì di la nostra isulella
Ne volenu fà un infernu.

Chjameremu lu vicinu
Scriveremu à lu luntanu
Ch’elli ne ghjunghjinu tutti
Per dacci un colpu di manu
E per salvà la so terra
Credu ch’ùn ricuseranu.

A la terra di Balagna
Un li danu chè velenu
Eranu tutti decisi
Di caccialli lu so trenu
E avà s’ella stà zitta
Li strughjenu lu terrenu.

A Corsica s’aghjutava
E ricultava ogni fruttu
In tempi di u gran Pasquale
Di Sampieru è Sambucucciu
E si rivultava fiera
Si lu fattu ùn era ghjustu.

Quì riposu la mio penna
E la mio musa si tace
Rispettate l’Argentella
Chì male ùn vi ne face
E cusì o Cursichella
La ti guderai in pace.

S'è qualchissia chì cunnosce bè ssa puetessa ci pò dì qualcosa. Sò chì ghjera a figliola di Divota Paoli. Sò dinù ch'avia campatu in Sidossi durante a guerra di u 40, avia ancu fattu una puesia addossu à u mo paese, ma sarà persa, almenu ch'ella sia stata scritta, quale hè chì sà ?

A celebra puetessa corsa Rosa GIANSILY hà impruvisatu per voi

Lagnu di Cursichella


Aiutami la mio musa
Ben’ch’è sia fatigata
Per parlà di Cursichella
Di sta terra tant’amata
Da tutti li so figlioli
Si ritrova abbandunata.

Lu clima di Cursichella
In tuttu u mondu risona
Ne ghjunghjenu li turisti
Perchè la mio aria hè bona
Ch’ella sia in San Petrone
Monte Cintu o Vizzavone.

Sò cunsunta da lu focu
L’ùn ai cumpassione
Basta ch’è tù sia in Francia
Appressu à la pensione
A to più gran’ malatia
Hè quella di u gallone.

Ma tutti quelli cunsigli
Nun l’ai vulsutu sente
Tutti maritati è figli
Pigliate lu cuntinente
Le moglie cù le figliole
Restanu tutte cuntente.

Ma si tù mi cultivave
Cùn tuttu lu mio decoru
Vigne è granu suminave
Fendune lu to lavoru
Averie manghjatu è betu
E accumulatu l’oru.

Quand’è tù ghjunghji d’estate
Ti piacenu li mio frutti
Le mio coppe cunservate
Li lonzi è li mio prisutti
E l’ùn pensi mancu appena
Ch’elli sò li mio prudutti.

Ti sereste sempre à tempu
O Corsu rifletti un pocu
Metti una severità
Ch’ellu s’arresti stu focu
Osinnò di Cursichella
L’ùn ci resta chè lu locu.

Appena ghjunghje settembre
Agisci cum’un zitellu
Corri à circà lu bigliettu
Quandu parte lu battellu
E ne chiti la mio terra
Chì credi di truvà megliu.

E malgradu la mio chjama
Vi ne state cusì zitti
Quand’ellu vene l’estate
Ne ghjunghje tanti turisti
Videndumi cusì inculta
Restanu cunfusi è tristi.

Si Cursichella s’arresta
Nun la ti piglia da male
Quand’è tù passi in Orezza
Vai à l’acqua minerale
Chì quessa n’hè bona è fresca
E ne guarisce ogni male.

Guarda bè, rifletti o Corsu
Mettiti una manu al core
Eppo’ di la terra corsa
Abbiene cumpassione
Eu ti perduneraghju
S’ai cummessu un errore.

Quì finiscu è chjodu u fogliu
Aghju cantatu abbastanza
Difendeti nùn ti vogliu
S’è tù vogli parte in Francia
E Cursichella di tè
Ne perderà la speranza.

Quand'era giovanu in fiera di niolu avia fattu a cunniscianza di una donna chì cantava assai bè; avia una certa età, avia una casata niulinca, mi pare ch'ella m'appii dettu ch'ella era maritata in Niolu.

Parechji anni dopu intesi a voce di Rosa Giansily annant'à i fondi Quilici, ùn sò micca sicuru sicuru ma mi pare bè a listessa voce.

un versu magnificu.

S'o era statu eu l'avia arrigistrata... Forse ai fattu qualchì ritrattu ?

inde i tempi affari per arrigistrà ùn ci n'era tantu, eppo' ùn si pò micca cantà è purtà a croce.


MA u ben d'Anghjulu Delfini – di i Muvrini – avia sempre un magnetofonu.

quellu l'hà fatti l'arrigistramenti in fiera ma induve saranu chjappi quessa ùn la sò.

A celebra puetessa corsa Rosa GIANSILY hà impruvisatu per voi

Lamentu di u Cummandante-Quéré


Dumandu aiutu à la musa
Decisu hè lu mio cerbellu
Per fà ne duie canzone
E parlà di lu batellu
Lu ci volenu piglià
Ch’hè so ch’avemu di megliu.

Nun lu vulemu caccià
Da lu portu di Bastia
Ch’hà da serve per purtà
Li suldati in Algeria
La salvemu vulenteri
Ch’hè la nostra culunia.

Lu Cummandante Quéré
Lu ci vulianu piglià
Per andà à fà i viaghji
Da Bordeaux à Casablanca
Dicendu chì l’isulella
Si ne pudia passà.

Di lu guvernu francese
L’ùn ci ne pudemu pienghje
E s’ellu vene un bisognu
Ne pertimu tutti inseme
Ma lu battellu c’hè caru
Nùn lu li putemu rende.

E d’un vulè li lu cede
Ne simu tutti disposti
Perchè lu c’hà da andà
A amarà in d’altri porti
L’emu da tene in Bastia
A imbarcà li nostri Corsi.

Sta canzona hè stata fatta
Da una donna d’isulella
Poi messa sottu inviluppu
La vogliu mandà in Marseglia
Per dumandà à li Corsi
S’elli la trovanu bella.

Ci volenu lacà nunda
O Corsica tanta amata
Ti piglianu lu battellu
Eppo’ la strada ferrata
E tutti li to figlioli
Li ti mandanu à l’armata.

Mi vogliu arricumandà
A tutti li nostri Corsi
Per dacci un colpu di manu
Ch’elli ùn ci vacanu torti
A quelli chì sò culandi
Chì ne parlanu à li posti.

Ne ripongu la mio penna
Finiscu le mio canzone
Ci messi tutta la tema
Cù tutta l’attenzione
Partenu da la Campana
Per righjunghje à Linzulone.

Quì finiscu è chjodu u fogliu
E la mio musa si resta
Accettate ste canzone
O Dalla Porta d’Orezza
Seremu belli cuntenti
Si lu battellu ci resta.


Vede quì :http://www.frenchlines.com/ship_fr_110.php

Eccu l'ultima puesia ch'avia. Sò state stampate ma aghju pigliatu a seratina per accuncià l'ortografia. Forse ci sarà qualchì sbagliu. Cunnoscu dinù à qualchissia chì ne sà un antra, ma ci vole ch'o li dumandi.

à ringraziatti assai pè stu travagliu o Sidussì

Circione a écrit:

Parechji anni dopu intesi a voce di Rosa Giansily annant'à i fondi Quilici.
un versu magnificu.

Tandu ci vuleria à mette calcosa inde l'antulugia di u foru.

iè a faraghju s'e ritrovu l'arrigistramentu in quistione, cantanu mamma è figliola.