Un classicu: u fiadone.
Ma u fiadone corsu inquant'à mè hè appena cum'è u tiramisù talianu
ognunu u face à so modu ... ùn hè micca cucina cumplicata, basta à mischià ove brocciu è zuccaru... è à infurnà hè veramente faciule ancu Petra Alta ci ghjugne
.
Vi dò a mo manera di fà è dopu forse mi diciarete cum'è vo fate voi.
A cosa più impurtante pè un fiadone hè a qualità di i prudutti dunque ci vole à avè brocciu chì sia brocciu, micca sta spezia di rubaccia industriale fatta incù latte di u cuntinente chì ùn sente più di nulla.
Eiu aghju pigliatu quellu di a mo cucina carnale, hè di pecura.
Ove fresche
limone naturale nustrale (d'Aregnu)
acquavita bona, a meia vinia di e Piazzole, una maraviglia! (à ringrazià à Carlantone)
è zuccaru ( pè u zuccaru pigliate puru quellu ch'è vo vulete
)
Pè e prupurzione hè sicondu u gustu d'ognunu
Di regula pè un brocciu si mette 6 ove è 300 gr di zuccaru, una cuchjara d'acqua vita è una buchja di limone - cercu un'antra parolla per zeste ma ùn mi vene , eppuru ci deve esse.
Ma eiu ùn facciu mancu appena cusì
zuccaru ne mettu più pocu
ove dinù
eppo' a prupurzione dipende dinù di u piattu ch'è v'avete.
s'è vo vulete un fiadone abbastanza bellu ci vole ch'ellu fia bè i so trè centimi d'altu ( si tratta di fà un fiadone micca un chjirchjolu
) .
u mo piattu face circa 35 centimi è avia u mondu in casa pè a sant'untone di mezu ghjinaghju.
allora aghju fattu cusì:
3 brocci (sguasi trè perchè unu l'avia tastatu
)
12 ove
acquavita (2 c à s)
a buchja raspiata di un limone.
400g di zuccaru.
ci vole à batte l'ove, metteci u zuccaru
è dopu u brocciu, à mè mi piace quand'ellu ci hè sempre pizzatelli di brocciu, dunque ùn impuleghju micca micca troppu
ci sò chì battenu e chjare di l'ove sin'à "cullalle in neve"
eiu micca, 'ci chì hè più ligeru cusì... s'è vo mittite più ove cà brocciu pò esse, ma s'è vo u mittite u brocciu, ùn ghjova à nulla à u mo avisu di batte e chjare à parte eiu aghju pruvatu è ùn m'hè micca parsu più bonu.
Dopu infurnate à 180 o 190, custì hè à ochju è à vista, diciaria chì u meiu hà cottu 40 minuti ma custì dinù ci vole à cunnosce u so fornu è u so piattu.
Dopu pè a finizione l'aghju passattu à u grill.
ecculu:
Accueil 
