A vita hè fatta à scala

Riagiscu quì à un missagiu ch'aghju vistu annant'à u muru di ziu Micheli chì sparte annant'à facebook una videò di un'animazione fatta da un gruppu corsu per un matrimoniu in cuntinente. In stu gruppu cantanu Benedettu Sarocchi* è Ghjuvan Petru Pieve dui paghjillaghji è cantadori di prima trinca.

U missagiu chì accumpagna sta videò hè " A vita hè fatta à scala..."

è a videò hè questa quì:



Ùn la sò ciò ch'ellu hà vulsutu dì Michele, pensu - è spergu - ch'ellu ci sarà micca statu da a so parte una vulintà di ghjudicà à Sarocchi o di criticallu è spergu ch'ellu ci darà u so puntu di vista quì postu ch'ellu face parte di i soci di stu foru.


U fattu si stà chì una di e litture pussibule di stu missagiu spartutu annant'à Facebook saria chì à un cantadore cum'è Sarocchi ùn li sende à fà quessa - quant'è ch'ellu vendi a so anima à u diavule per fà animazione per un matrimoniu.

Eiu à Benedettu u cunnoscu, è pensu ch'ellu ùn hà micca lizzione à rivece da nimu in stu duminiu. Hè un omu chì hà cappiatu u so postu di stidutore per "cullà " in Parigi è chì prova à campà di a so arte - è l'arte a pussede. Eiu rispettu e so scelte è u so curagiu, hè capita ch'ella mi faria piacè di più s'ellu pudessi campà solu incù a vendita di i so dischi è i so cuncerti è saria più cà mirdata. Ma e cose ùn sò micca sempre cusì faciule. Eppo' ùn hè mancu sicura ch'ella a vulessi quessa, perchè à Benedettu, di cantà in li matrimonii o in li risturanti incù u so amicu Ghjuvan Petru Pieve li piace! è quessa dinù si rispetta innò?

Pinsemuci nanzu di dà lizzione annant'à ciò chì si pò - o si deve - fà à nome di a cultura corsa.

Ùn la dicu micca per tè o Michele perchè a mo littura di u to missagiu ùn hè micca questa quì è sò parsuasu ch'è tù voli solu mustrà quant'ella ti pare amara è inghjusta ch'ellu sia "custrettu" à fà animazione un omu cù u talente, a voce è soprattuttu a lighjittimità di Sarocchi.

* per quelli chì ùn lu cunnoscenu, Benedettu Sarocchi facia parte di u gruppu Voce di Corsica chì ottense una vittoria di a musica in la categuria musiche di u mondu in 1995...

Eccu postu ch'e no ci simu vi mettu duie videò chì mostranu ciò ch'ellu hè - dinù - Sarocchi.

sicuramente chì u messagiu ùn hè micca statu scrittu in stu sensu è chì a publicazione hè pusitiva. hè tuttu u prublemu di fb è internet in generale. ùn si pò micca vede e spressione di u visu, l'intunazione di a voce è ognunu capisce ciò ch'ellu pò (o vole) capisce.

guarda: si scrivu "Circione hè un pezzò" a piglii cum'è un cumplimentu ma in verità daretu à u mo screnu a dicu cusì "Circione hè un pezzò "


in tutti i casi hè un peccatu quandu una persona attalintata è passiunata ùn riesce micca à campà di a so passione. in a sucietà oghjinca rileva guasi di u sognu...

Pensu chì ziu Michele a capisciarà, ma u piccatu hè chì u risultatu ùn s' hè fattu tantu aspittà: Ci n'hè unu chì hà spartutu un ligame di Corsica Terra - una virsione trimenda di u Diu vi salvi regina: http://www.myspace.com/video/guitarepassion/dio-vi-salva-regina/31747569 spergu chì stavolta ùn la cacciaranu - annant'à u so muru ghjustu accant'à quella publicazone di Sarocchi .

È per mè mette à u listessu pianu à Corsica Terra è à Sarocchi, hè inghjusta è mi stumaca.

Benedettu Sarocchi sendu u to amicu, capiscu chè tù ti sia intesu offesu; ma ùn pensu micca chì Ziu Micheli abbia vulsutu esse scurrettu o dà lezziò. Avà a publicazione ùn l'aghju vista ch'ùn aghju à FB è spergu chì, s'ellu ci leghje, venerà à spiecassi.

Michele hà datu u so parè dirittamente annant'à FB
mi permettu di mettelu quì:

Citation :

Mai ùn mi saria parmissu di pinsà un affari cusì. U travagliu di sarocchi hè più cà rispittevuli è ci voli à prumova è sustena lu. Moscia bè chì l'ARTISTI ind'è noi è quiddi cunsidirati da MAESTRI sò ridurti à l'animazioni è quissa hè piccatu. T'abbracciu o olivier.

NB: ùn ci hè micca currizzione automatica annant'à FB.

Circione a écrit:

Michele hà datu u so parè dirittamente annant'à FB
mi permettu di mettelu quì:

Citation :

Mai ùn mi saria parmissu di pinsà un affari cusì. U travagliu di sarocchi hè più cà rispittevuli è ci voli à prumova è sustena lu. Moscia bè chì l'ARTISTI ind'è noi è quiddi cunsidirati da MAESTRI sò ridurti à l'animazioni è quissa hè piccatu. T'abbracciu o olivier.

NB: ùn ci hè micca currizzione automatica annant'à FB.

iè l'aghju messa eri per tutte e risposte addirizzate à u fb di Isula
ùn si vede micca cusì ma sò una vera geek

Saluta à tutti,

Eccu mi pà una affaccatedda nantu à l'isula (mi scusareti d'ùn intarvena di più suventi)solu pà risponda à Circione.
In prima locu ti saluteghju O Circiò, è spergu chì tutti stani bè pà i to lochi balanini.

In sicondu locu, Benedettu u cunnoscu ancu eiu (forsa menu cà tè) ma aghju francatu i 4O anni è quandu l'aghju cunnisciutu à Benedettu eru ghjuvanuttonu, pà dì ti solu, chì hè una parsona ch'e rispettu mori mori pà i so qualità umani è ùn hè d'oghji.

In terzu locu, "a vita hè fatta scala..." ghjustu pà metta in rilevu, chì in ogni paesi di u mondu ci sò artisti, "maestri", rifarenzi vivi rispittati pà l'arti ch'eddi portini, inveci cà quì i "maestri" sò à u scartu. Fighjuleti a ricunniscenza di l'unesco pà u cantu in paghjella... i boci chì ani corsu, ani fattu chì mezi pà arradicà una pratica paisana in ogni pievi di l'isula ùn sò stati dati, quì dinò i "maestri" ùn sò stati intesi... è fatt'è fini, a dinamica s'hè spinta.
Fighjuleti ghjà, i sunadori di viulinu : quantu ni fermani in Corsica suttana oghji? possu scriva quì chì in a me Pievi d'Ornanu ci n'era unu in ogni paesi in l'anni 50... oghji i sunadori suttanacci sò pochi, menu di deci... i spazi di festa campagnoli, paisani, populari spariscini, u baddu "corsu" si spinghji pocu à pocu, l'associ chì prumovini a quatriglia s'invechjani è noi, chì emu sunniatu di ritruvà una funzioni suciali : ci femu cacà è "a vita hè fatta scala"

Certi volti, mi veni a stizza, è a voglia di dumandà un asili musicali, in Bagolino (locu persu di lombardia duva si campani i sunadori di tradizioni° .
Mi dispiaci di senta mi risponda, "sai in Corsica, un spittaculu ùn lu possu fà, i corsi si disintaressani di ciò ch'e facciu..." Piccatu, piccatu pà noi è pà l'artisti...tandu a scrivu torna un'antra volta :"a vita hè fatta scala...".

Tanti saluti è à prestu.

Ps : pà u nosciu piaceri eccu un arrighjistramentu rializatu 20 anni fà da Benedettu è Ghjuvan Micheli : http://soundcloud.com/soloni/ellegia-damore