Religione

In quant'à Borgia, ùn mi pare micca, ma à contu meiu, aghju intesu parlà d'un altru papa da u quale s'hè dettu, senza sicurezza puru, ch'ellu era forse un corsu di Vivariu : u papa Formose.

Straniu destinu ch'e quellu di stu vescu di Porto (tenite... torna un altru nome corsu   ), duvintatu papa da u quale si cunosce assai pocu di a so vita, fora di e so decisione pulitiche, fra altre, tra e grande famiglie di tandu per sceglie u principe à mette à u capu di l'Imperu carulingianu.

Dopu à a so morte, naturale, unu di i so eredi, u papa Stevanu VI, ch'ùn accunsentava micca a so scelta pulitica, decidì di ghjudicà u so predecessore. L'escì di a so tomba, è fece passà in ghjudiziu. Fù u famosu "Cuncile Cadavèricu", à u termine di u quale u tintu papa Formose fù destituitu di u so titulu di papa, amputatu di a so manu, è cundannatu à esse lampatu in u fiume di Roma, u Tibru.

Ma u populu di Roma ùn accittò sta vergogna è Stevanu VI fù tombu pocu dopu, mentre chì Formose fù reabilitatu, è ch'ellu fù decisu ormai di pruibbisce i prucessi fatti à i morti.