A mio penna ùn hè mai stata lazza, languida è liscia, innò mai a mio penna hè sempre stata arrutata bè, pinza è tagliva.
A l'età di vint'anni, i mio scritti eranu sopr'à tuttu pulitichi, dinunciavanu a culunisazione di u mio paese, chjamavanu à a lotta, scrivia libertà omenu dece volte à paragraffu.
Eranu l'anni ottanta, in pienu riacquistu, era un autore ingagiatu, indiatu cum'è no diciamu per fà più sputicu.
Quantu volte m'anu invitatu à i so meetings, era l'intelletuale di serviziu, u so Aragon à elli, quellu chì li dava bona cuscienza, era ghjastimatu da tutta l'intelligentsia pariggina è pro francese, ma mi ne infuttia, u so odiu ingrandava i mio scritti.
Poi, sò venuti l'anni di piombu, a guerra trà di anziani cumpagni, e sviere, l'affarisimu, è a cullata di u razzisimu.
Sò firmatu ingagiatu, l'aghju dinunciata, perchè chì ùn vulia st'avvene per a mio terra.
M'anu minacciatu di morte è aghju avutu à parte per u Pariggi, 'ssu Pariggi ghjastimatu.
Tandu l'intelletuali di a capitale s'interessonu à mè, era un scrivanu in esiliu, minacciatu di morte, fughjia 'ssu paese di salvatichi, era tuttu ciò ch'elli ùn eranu, elli 'ssi burghesi à u caldu nù i so salotti, u culu imbuffitu di caviar è foie gras, a panza colma di tratichjina, è u ciarbellu carcu à autosuddisfazione.
M'anu pigliatu in manu, m'anu fattu passà à a telé, m'anu fattu manghjà nù i ministeri, m'anu fattu scrive in francese è vende parechji libri.
Era u simbulu di a libertà maltratta, bastava ch'eo dicessi chì a Corsica era un paese persu, ch'eo cappiessi qualchì nome cum'è a peghju bilancia chì fussi, bastava ch'eo rinighessi ciò ch'era statu, ch'eo sputessi nant'à a mio lingua, è aprianu a bocca, beati d'ammirazione innamurati di a mio voce è di a mio penna.
Era sempre ingagiatu, ma ingagiatu contr'à i mei, l'onori è u cunfortu m'avianu puntatu à ese ciò ch'eo cumbattia trent'anni fà.
Vengu di rivedemi à a televisiò ind'è sta pedala di Ruquier, aghju fattu ciò ch'elli aspettanu da mè, aghju sputatu u mio velenu nantu à a mio terra, imbulighjendu ghjente onesta è vituperati ind'è una listessa ira.
Era un autore ingagiatu, sò diventatu una merda.
Serà l'ultima zingata di a mio penna, qand'è vo a leghjerete, e mio cerbelle seranu sparte nantu à u muru di a camara.
Era un autore ingagiatu, sò diventatu una merda.
Accueil 
