Duie piccule riflissione annant'à sta qualificazione di a Francia
Certi si raligravanu capunanzu di vede l'ecchippa di Francia guardà u mundiale à a telè, i listessi oghje sò stumacati di vede ch'elli sò passati.
Più và è più u ballò scimisce a ghjente...
Oghje si misura u so attaccamentu à a Corsica à traversu a passione ch'omu porta à u so club, è chì passione: à fondu per u Sporting dunque contr'à "l'ACA gaulois "...
A squadra francese? mancu parlanne: "Noi simu Corsi, i Francesi sò i nostri nimichi, forza Ucraina! " eccu u ragiunamentu di basa di sta ghjente chì " magna è caca in francese" è chì campa solu a so "cursitudine" à traversu u ricusu di l'altru, Francese o Arabu ch'ellu sia. Ben'intesu accantu à què ùn ci hè nulla, nè spirdu corsu, nè lingua, nè mentalità, nè ingagiamentu culturale, nè cuscenza o riflissione pulitica, nulla di cuncretu è di pusitivu. Si parte da l'idea chì u Corsu ci vole ch'ellu sia contr'à a Francia osinnò hè un traditore è dunque per certi u fattu d'esse contr'à l'ecchippa di Francia hè naturale, eccu in riassuntu tutta a cuscenza pulitica d'unipochi.
Allora iè hè una visione caricaturale, ma nanzu d'esse contr'à qualcosa ci vularia à esse per qualcosa è difendelu, s'è tù ùn ai nulla à difende ch'ai da luttà à fà?...
Ma vultemu à stu maccione di i BLEUS
Quand'elli anu vintu 3 à 0 arrisera i Francesi, in casa ùn s'hè intesu mancu un "cuccuricù" nemmenu un "chicchirichì ", mancu sò surtitu fora à sciaccà una fucilata...
Ùn era micca nè per l'unu nè per l'altru, mi guardava un macciu di ballò.
Da una parte aviamu una squadra di ghjucatori tratechji, chì viaghjanu in Ferrari, Maserati o Lamborghini (12 milioni d'€ à l'annu per Ribery, 9 per Benzema, 7 per Abidal o Nasri, 5 per stu tappu di Valbuena, ecc.) è da l'altra un'ecchippa di ghjucadori chì ghjocanu tutti (mi pare) in lu so campiunatu, à u Dnipro Dipropetrovsk, u Chakhtar Donetsk o u Dynamo Kiev... è duve quelli chì sò pacati u più devenu tuccà 2 milioni à l'annu - una limosina
. Si face chì avaria avutu piuttostu tendenza à raligrammi di sta scunfitta 2 à 0 di vennari, era una bella lizziò è certi ghjucadori n'avarianu bisognu è hè dinù quessa a billezza di u sportu, quandu u chjucu magna u maiò.
Ma – è quì hè l'amatore di ballò è u spettatore di TF1 chì parla
- cù un ragiunamentu simule, sariamu tutti contr'à l'Argentina, u Brasile, l'Inghilterra, a Spagna, l'Allimagna, l'Italia... è à dilla franca un Ucraina / Isule Feroe m'interessa menu cà un Francia / Argentina... Dunque pè u spetaculu hè quantunque una bona nutizia di vede a Francia qualificata.
Allora hè vera, ci tuccarà prestu à suppurtacci i Pinzuti - è ancu parechji Corsi- chì sustinaranu à so squadra davanti à i screni gicanti di e tarrazze di i caffè
, ma ci diciaremu chì ùn hè cà un sportu... è chì ùn ci ghjuchemu micca a nostru distinu naziunale.
È a sera di a finale, s'elli ci facenu torna u colpu
, faremu cum'è in 1998, ci staremu in casa.
PS: sò quantunque cuntentu per Landreau ch'ellu finischi a so carriera à u Brasile.
Accueil 
